SURAT PAULUS
AHKAN JOMAAT NUK
KOLOSE
Salam tahkan Paulus ahkan jomaat nuk Kolose
1
Salam tahkan ahkuk Paulus, rasul Kristus Yesus, ahkuk jadik rasul kotului kokanin Hotalak. Salam kak tahkan Timotius bari-basak jok hicok kopocayak mbak ihtok.
2 Ahkuk nulih surat tuh ahkan bari-basak, ulun-ulun jok Hotalak tepui jok sotia mbak Kristus, jok mocon nuk kota Kolose. Ahkuk bodoa nihak ndoi kopion ahtoi khavun damai sojahtera tahkan Hotalak, Amai tok, hicok humbak mbak ihkam.
Paulus bosukur khavun bodoa
3 Ihkai nulo bosukur mbak Hotalak, Amai Tuhan tok Yesus Kristus, kotihkak ihkai bodoa ahkan mik. 4 Kotului ihkai uwas nyonih bohkolo ihkam pocayak mbak Kristus Yesus khavun ihkam punak mongasihi paring ulun jok Hotalak tepui. 5 Ihkam tehtap pocayak khavun mongasihi idoh kotului boharap mbak inon jok was sonyodiak Hotalak ahkan mik nuk surga. Mongenai pongharapan erih ihkam was nyonih ah kotihkak Tarung Pios tahkan Hotalak jok hinut erih kongesah ahkam mik. 6 Tarung Pios erih uwas konihan nuk amo-amoh, khavun tumbuk ulun mahi-mahik pocayak khavun botobat kotului Tarung Pios erih. Koderih kak jok torjadik luvang komolum mik kotihkak ihkam nyonih khavun taꞌai kopion ahtoi Hotalak mbak hinut. 7 Epapras noh jok ngesah Tarung Pios erih ahkam muk, iyok jolahan kai korejak jok kongasih kai. Iyok arok noh polayan Kristus jok sotia molayan kam. a 8 Tahkan Epapras ihkai nyonih ngindoi kuasak tahkan Roh Hotalak noh jok touk nguan ihkam mongasihi icok mbak jok bohkon.
9 Tului erih ulik ihkai nyonih ah, ihkai nulo bodoa ahkan mik. Ihkai nyavot mbak Hotalak supayak Roh-Ah nongak kohorahtik ahkan mik sohinggak ihkam taꞌai khavun tuꞌuk-tuꞌuk ngorehti kokanin Hotalak mbak hinut. 10 Mbak koderih ihkam duon mik bolum numun kokanin Hotalak, khavun nulo ngosenang ahtoi-Ah. Sohinggak nuk luvang paring aꞌang ihkam nongak hasil tobiat jok pios, khavun ihkam ahkan holovik hinok nyokonok Tuhan. 11 Ihkai bodoa supayak ihkam borohon kotului kuasak Hotalak jok yamios kohajoi, sohinggak duon mik noharep paring kojorak mik mbak sabar khavun ahtoi jok sanang. 12 Khavun ihkam touk bosukur noku Hotalak Amai. Kotului Iyok noh jok touk nguan ihkam pahtut ngonduon bagian jok uwas konojanjik ahkan ulun jok Iyok tepui-Ah jok bolum luvang tarang. 13 Hotalak uwas molahpas ihtok tahkan kuasak Lacak paring otuk jok pindong khavun ngomin ihtok bolum nuk luvang korajaan Anak jok kongasih-Ah. 14 Nyihing Anak-Ah noh ihtok tonovus, rehti ah paring dosa tok uwas kongapun. b
Kristus khavun inon jok konguai Ah
15 Ulun iyam taꞌai nohtok Hotalak, totahpik ulun touk nohtok tobiat-Ah jok nyahtak nyihing Kristus. Kristus paling peting tahkan paring aꞌang jok tonaoi. 16 Hotalak naoi paring ah nyihing Kristus, paring aꞌang jok nuk surga khavun nuk duniak, paring aꞌang jok kihtan khavun iyam kihtan, paring roh jok bokuasak khavun jok momoretah. Nyihing Kristus noh Hotalak naoi paring suang duniak erih supayak Kristus konolehkak. 17 Kristus uwas arok sojaham paring aꞌang tonaoi, Iyok noh jok jagak khavun ngahtur paring aꞌang. 18 Kristus noh jok paling bokuasak ahkan ulun-ulun pocayak, numun kolo kuhung bokuasak nuk behtik. Iyok noh jok nongak komolum ahkan ulun-ulun pocayak. Kristus noh jok topahtuk ah hulik bolum nuk holang ulun mahtoi. Mbak koderih Iyok punak peting tahkan paring aꞌang. c 19 Hotalak punak kanik paring tobiat-Ah arok nuk luvang Anak-Ah. 20 Nyihing Kristus, Hotalak nguan paring aꞌang jok arok nuk surga khavun nuk duniak hokopios mbak arop-Ah. Hotalak nguan aꞌang erih nyihing pomalus Anak-Ah nuk kajuk salib. d
21 Ihkam holuk macuk mbak Hotalak. Ihkam jadik musuh Iyok luvang ahtoi pihkir mik khavun tobiat jaek jok konguan mik. 22 Tohtapik huntuh Anak-Ah was jadik kolunon khavun mahtoi. Nyihing pomalus-Ah, Iyok nguan ihkam tonorimak Hotalak. Supayak ihkam touk noharep Hotalak mbak suci, ahtoi jok borasih khavun iyam arok kosalak mik. 23 Totahpik ihkam alah nulo pocayak khavun tehtap sotia khavun tombok mbak borohon mbak kopocayak muk. Arak sapai ihkam molahpas harapan, jok uwas tonongak ahkan mik kotihkak ihkam nyonih Tarung Pios jok tahkan Hotalak. Tarung erih was pomarak noku paring ulun nuk duniak tuh. Khavun ahkuk, Paulus, uwas sonyuhuk ahkan ngesah Tarung Pios erih.
Polayanan Paulus khavun kojorak ah
24 Ahkuk ngandah tului huntuh ahkuk jorak ahkan kopoduluk mik. Kotului nyihing kojorak ihtuh, ahkuk nurus kojorak jok was kongomok Kristus. Kojorak ihtuh ahkan kopoduluk ulun-ulun jok pocayak, idoh arok noh behtin Kristus. 25 Hotalak uwas nyuhuk ahkuk ahkan molayan dolang ulun jok pocayak. Mahkak ahkuk alah ngesah ah uras Auh Hotalak erih noku ihkam. 26 Tarung Pios tahkan Hotalak erih yarok ico-behtik ulun pun jok taꞌai tahkan topahtuk duniak tonaoi, kotului Hotalak nyuhuk ah. Totahpik huntuh, was ponokarah-Ah ahkan ulun-ulun jok Iyok tepui. 27 Hotalak kanik supayak ulun-ulun jok Iyok tepui taꞌai aꞌang jok yamios kopios ah holuk, aꞌang erih sonyuhuk. Totahpik huntuh was kongesah noku dolang bangsak jok bohkon jok iyam ulun Yahudi. Aꞌang jok sonyuhuk erih iyok noh: Kristus arok nuk luvang ihkam, khavun Iyok mihtik nguan ihkam ahkan ngomok kotamam komuliaan Hotalak nuk surga. 28 Kristus noh jok kongesah kai ahkan paring ulun. Ihkai ngingat khavun ngajar paring idoh mbak kohorahtik jok tahkan Hotalak. Ihkai kanik paring ulun lombut noku Hotalak, sobagai ulun jok punak horahtik nuk luvang kopocayak ah, kotului uwas hicok mbak Kristus. 29 Supayak ngonduon paring ah erih ahkuk korejak mahto-mahtoi. Ahkuk ngotiak mbak paring kuasak jok ongak Kristus, jok korejak nuk luvang ahkuk.