2
Ahkuk kanik, supayak ihkam taꞌai ahkuk korejak mahto-mahtoi dohop ihkam, khavun paring ulun nuk kota Laodikia, khavun ahkan paring ulun jok iyam pujik tobarung mbak ahkuk kak. 2 Paring ah ihtuh konguak kuk supayak ahtoi doh jadik muhat sohinggak idoh hicok tului mongasihi icok mbak jok bohkon. Mbak koderih idoh punak yakin kotului idoh tuꞌuk-tuꞌuk ngorehti khavun nyokonok Yesus Kristus, jok sojaham ah iyam pujik Hotalak motohtok ah. 3 Kotului nuk luvang Kristus ihtok ngonduon paring kohorahtik khavun ihtok taꞌai paring aꞌang mongenai Hotalak jok iyam pujik paring ulun taꞌai.4 Ahkuk marak naing ihtuh ahkan mik supayak ihkam arak buah tihpuk ulun-ulun jok tuhtui auh ah momih nyoling totahpik ajar barak ah lajat. 5 Holuk poh ahkuk iyam hicok humbak mbak ihkam, totahpik ahtoi pihkir kuk hicok mbak ihkam. Ahkuk ahkan nulo ngandah kotihkak nyonih ngindoi ihkam bolum mbak torahtur khavun kopocayak mik borohon mbak Kristus.
Ajar barak mongenai bolum jok bohuak luvang Kristus
6 Barih basak kuk ihkam uwas norimak Kristus Yesus sobagai Tuhan. Kotului erih ihkam alah nulo bolum hicok mbak Iyok. 7 Kopocayak mik mbak Kristus alah borohon, kolo dolang komulan jok uhat ah ngahkah ngaluk nuk luvang tanak, khavun motombok ah noh komolum mik nuk luvang Iyok, kolo lohpo jok tombok borohon nuk isung tanak. Ihkam alah mahi-mahik borohon nuk luvang kopocayak mik sosuai mbak jok was kongajar ahkan mik. Khavun ahtoi mik alah nulo bosukur holovik holeak.
8 Jaga-jagak noh supayak ihkam iyam kongolanyat ajar barak jok yarok gunai ah jok nguan ihkam lajat. Arak kanik buah tihpuk doh, kotului ajar barak doh tahkan porahturan jok tonapak tahtuk ajuh doh khavun tahkan roh-roh jaek jok bokuasak nuk duniak, ajar barak erih iyam tahkan Kristus. 9 Nohouk ah noh paring tobiat Hotalak arok nuk luvang Kristus, kotihkak Yesus jadik kolunon pun Iyok tepun paring tobiat erih. 10 Khavun kotului ihkam hicok mbak Kristus, mahkak komolum mik yarok tahpas kokurang ah. Tului Kristus kopalak tahkan paring jok bokuasak khavun dolang pomorintah jok arok.
11 Tului ihkam uwas hicok mbak Kristus mahkak ihkam uwas pomalax, pomalax erih iyam numun jok konguan kolunon, kolo adat turan ulun Yahudi. Tahpik Kristus jok malax ahtoi mik, nyihing Iyok molahpas ihkam tahkan kuasak dosa nuk luvang ahtoi mik. 12 Kotului beteng ihkam konombaptis, rehti ah ihkam was tonanom hicok humbak mbak Kristus, khavun mbak baptis erih kak, ihkam hulik bolum hicok humbak mbak Iyok. Kotului ihkam pocayak mbak kuasak Hotalak jok was nguan Kristus hulik bolum tahkan pomalus-Ah. a 13 Holuk, beteng ihkam jaham pocayak, ihkam kolo ulun jok was mahtoi kotului dolang dosa mik, khavun kotului ihkam iyam pomalax monurut agamak Yahudi. Totahpik huntuh Hotalak nguan ihkam hulik bolum hicok mbak Kristus tului Hotalak was ngapun dolang dosa tok. b 14 Ihtok holuk iyam pahtuh mbak poletah Hotalak, kotului erih ihtok pahtut konohukum. Hukuman erih kolo uhtang tok noku Hotalak, uhtang tok erih konomayar uras nyihing pomalus Yesus Kristus nuk kajuk salib. c 15 Nuk salib Yesus, Hotalak was mokarah ah ahkan paring ulun nuk duniak ngindoi paring ponguasak jok jaek jok momoretah nuk duniak uwas kongalah khavun paring kuasak doh konolohpung.
Cumak Kristus jok nongak komolum bohuak
16 Kotului erih arak noh ngohasuk kokanin dolang ulun jok ngosalak ihkam kotului iyam ngohasuk porahturan ulun Yahudi mongenai ukun ponguman khavun korih, khavun kotului mongenai ondo-ondo porayaan agamak, porayaan bulan bohuak, khavun mongenai ondo Sabat. d 17 Dolang porahturan erih kolo gambar jok motohtok ah inon jok ahkan torjadik nain. Totahpik nuk luvang Kristus paring aꞌang erih uwas torjadik! 18 Arak ngohasuk kokanin ulun jok ngihit ihkam pura-purak ngopindak arop mik khavun ngihit nyembah dolang molekat. Idoh kanik nguan supayak ihkam pocayak mbak ponohtok doh jok iyam tonohtok ulun bohkon. Idoh ngehtek arop doh podahal ajar barak doh erih tahkan pihkir kolunon. 19 Ulun-ulun jok kolo erih iyam nguan Kristus jadik kopalak. Kristus kolo kopalak khavun ulun-ulun jok pocayak kolo behtiu-Ah. Kotului Kristus, paring behtin jadik hicok, hosorunuh khavun hokavat icok mbak jok bohkon, khavun makin pocayak numun huang Hotalak. e
Mahtoi khavun bolum hicok humbak mbak Kristus
20 Ihkam uwas palus havo-havoi mbak Kristus, khavun uwas pomolahpas tahkan dolang roh jok nguasak paring duniak ihtuh. Kotului erih, ngombai ihkam bolum kolo ulun jok honong konguasak duniak ihtuh? Ihkam ngohasuk dolang porahturan jok kolo ihtuh: 21 arak namit ihtuh, arak kuman erih, arak nukik ihtuh. 22 Dolang porahturan erih kolo barang bandak jok sinok kiyak hatin ulik erih iyam nai bolehkak. Kotului porahturan khavun ajar barak erih tonapak kolunon. 23 Holuk poh tohtok ah ajar barak erih pios, totahpik jok kotuui ah agamak jok tonapak kolunon, jok ngajar mongenai ngopindak arop ah khavun nguan arop ah jorak. Totahpik jok kotuui ah ajar barak erih cumak porahturan jok tonapak kolunon, khavun iyam ahkan ngaluh kojolik kolunon jok jaek jadik pios.