Kolose 3

Ihkam uwas hulik bolum hinok mbak Kristus. Kotului erih ihkam alah ngotiak ngonduon paring aꞌang jok nuk surga. Nuk anai Kristus tuot unuk ponuot jok konolehkak momoretah hicok mbak Hotalak. 2 Ahtoi pihkir mik alah mihkir aꞌang jok nuk surga, arak noh mihkir aꞌang nuk duniak ihtuh. 3 Kotului komolum mik jok lomoi was palus. Huntuh komolum mik jok bohuak was hicok mbak Kristus nuk luvang Hotalak. Khavun ulun jok iyam pocayak iyam ahkan taan doh nohtok ah. 4 Kristus noh jok nongak bolum ahkan tok. Beteng Iyok lombut hinok, mahkak paring ulun ahkan nohtok ihtok hicok mbak Iyok nuk luvang kuasak-Ah jok hajok.

Komolum jok lomoi khavun komolum jok bohuak

5 Kotului erih, ngindo ah noh dolang kojolik duniak jok touk ngalut arop muk yok erih: tiruh mbak ulun jok iyam bosai khavun iyam oruh ah, dolang tobiat khavun pihkir jok iyam sorunuh, kojolik jok jaek khavun bokahuk. Kotului bokahuk kolo nyembah dolang koponahto. 6 Paring tobiat jok kolo erih noh jok nguan Hotalak birat khavun ngohukum ulun-ulun jok iyam pahtuh mbak Iyok. 7 Holuk ihkam halik nguai paring tobiat jok jaek erih, beteng ihkam bolum ngohasuk kokanin mik jok jaek.

8 Totahpik huntuh ihkam alah ngindo paring aꞌang jok jaek luvang pihkir mik: arak birat, arak sangit nahtup mingas mukan, arak becik mbak ulun bohkon. Arak sapai boluak tahkan baun mik tuhtui auh jok motenah ulun bohkon khavun tuhtui auh jok kohtor. 9 Arak hokomalik icok mbak jok bohkon kotului ihkam was iyam nai bolum mbak tobiat jok holuk. 10 Ihkam was tonongak bolum jok bohuak. Hotalak jok naoi ihkam ahkan nulo ngaluh ahtoi pihkir mik supayak nyinong ondo mahik havoi mbak Iyok, sohinggak ihkam tuꞌuk-tuꞌuk nyokonok Iyok. 11 Tului erih, iyam arok nai jok milang ulun Yahudi khavun iyam ulun Yahudi, ulun jok pomalax khavun jok iyam pomalax, ulun bangsak bohkon ngindoi iyam ulun jok iyam taꞌai adat turan, jihpon khavun tuan. Kotului Kristus noh jok punak peting tahkan paring aꞌang khavun Iyok bolum nuk luvang paring tok.

12 Dolang bari-basak ihkam arok noh dolang ulun jok konopilik Hotalak. Hotalak mongasihi ihkam khavun ngopilik ihkam ahkan jadik ulun jok suci jok Iyok tepui. Kotului erih noh ihkam alah mongasihi, mohian ahtoi, iyam sahkah, pios tuhtui auh mik, khavun duon ngarot kojorak. 13 Ihkam alah sabar icok mbak jok bohkon, khavun havo-havoi ngapun ngindoi arok jok poros ahtoi ah. Nohouk ah Tuhan was ngapun ihkam, jadik ihkam pun alah kanik ngapun havoi arop mik. 14 Khavun jok punak poduluk arok noh ihkam alah havo-havoi mongasihi, kotului kasih erih noh jok tuꞌuk-tuꞌuk ngohicok ihkam yarok tahpas kokurang ah. 15 Ihkam arok noh behtin Kristus khavun was konopilik supayak bolum hicok khavun hokopios havoi arop mik. Kotului erih pohiyoi noh damai jok tahkan Kristus ngahtur ahtoi pihkir mik. Khavun ihkam alah nulo bosukur. 16 Mihkir ah noh auh Kristus nyinong ondo, sohinggak auh erih nguasak paring pihkir khavun tobiat muk. Mahkak mbak paring kohorahtik ihkam ngajar khavun nuhtun ulun bohkon. Khavun tahtup nyanyi tahkan kitab Mazmur, nyanyi tahkan Auh Hotalak khavun lagu-lagu jok bohkon mongenai Tuhan, ahtoi mik nulo bosukur noku Hotalak. 17 Paring aꞌang jok konguan mik nyihing auh khavun tobiat mik, nguai ah noh paring ah erih nuk luvang ngaran Tuhan Yesus. Khavun paring jok pomarak mik, alah noh ihkam marak ah luvang ngaran Tuhan Yesus. Ihkam alah bosukur noh noku Hotalak Amai ahkan paring aꞌang jok konguan Yesus ahkan mik.

Bolum jok bohuak nuk luvang avuk humak

18 Dolang oruh! Ihkam alah ngolehkak bosai mik. Kotului koderih noh jok soharus ah tobiat mik sobagai ulun-ulun jok pocayak mbak Hotalak.

19 Dolang bosai! Ihkam alah mongasihi oruh mik khavun arak moros idoh.

20 Dolang anak! Sobagai ulun Kristen ihkam alah tuꞌuk-tuꞌuk pahtuh mbak ulun okok mik nuk luvang paring aꞌang, kotului erih noh jok touk ngosenang ahtoi Hotalak.

21 Dolang amai! Arak noh moros ahtoi dolang anak muk sohinggak nguan idoh puhtus asak.

22 Dolang jihpon! Nuk luvang paring aꞌang, ihkam alah pahtuh mbak tuan mik jok arok nuk duniak ihtuh. Arak pahtuh mbak idoh cumak nuk husuk doh kiyak, kotului kanik nyenang ahtoi kolunon. Pahtuh noh mbak idoh mbak ahtoi jok pios, kotului ihkam ngolehkak Hotalak. 23 Inon kiyak jok konguam muk, nguai ah noh tuꞌuk-tuꞌuk paring ah erih kolo ihkok nguai ah ahkan Tuhan muk, iyam kolo ihkok nguai ahkan kolunon. 24 Nohouk ah Tuhan ahkan nongak uhpah jok was sonyodiak-Ah ahkan mik. Khavun tuan jok ponolayan mik arok noh Kristus. 25 Khavun iyai kiyak jok nguan kosalak, mahkak kotului kosalak doh erih idoh ahkan konohukum, kotului Tuhan iyam mili-milik ulun.