Paulus nuk pulou Malta
28
Umbot kai docok mbak solamat nuk kovang, baruk ihkai taꞌai, ngindoi pulou erih iyok noh pulou Malta. 2 Dolang ulun jok mocon nuk pulou erih norimak khavun ngavat ihkai yamios kopion doh. Idoh ngopolum ahpui supayak ngolasut behtin kai, kotului ucan khavun yamios kosorongin ah. 3 Kotihkak Paulus ngupur pahting kajuk khavui nihkas ah noku ahpui, boluak noh icok kungan lohik jok moharik tonunduk ah kotului kobolasut ahpui erih khavun lohik erih nunduk longoi ah. 4 Kotihkak dolang ulun nohtok lohik erih lehket nuk longon Paulus, idoh bokesah icok mbak jok bohkon: “Pasti iyok baꞌas munuk ulun, kotului holuk poh iyok uwas solamat tahkan bohayak jok nuk tohun laut, totahpik dewi koadilan iyam mosuah iyok bolum.” 5 Totahpik Paulus hobirik longoi ah sohinggak lohik erih botosahkah noku lupuk ahpui, khavun iyok yarok ngomok oros ah nyohiyot pun buah tunduk lohik erih. 6 Totahpik ulun jok arok nuk anai moravak iyok ahkan loting khavun ahkan mahtoi khavun mohovak tahkan ponombok ah beteng erih kak. Totahpik was tahik noh idoh ngindoi ah, idoh nohtok, iyam arok inon-inon jok torjadik mbak Paulus, mahkak idoh moravak iyok erih dewa.7 Iyam macuk tahkan unuk erih arok tanak ain gubernur pulou erih. Gubernur erih ngarai ah Publius. Iyok noharang ihkai khavun ngahtang kan kai ukun ponguman umbak kosenang ahtoi ah toluk ondo kotahiu ah ihkai nuk lohpo ah. 8 Beteng hun erih amai Publius honong kaling nuk poniruh ah kotului mondam khavun noso. Khavun Paulus tulak nohtok iyok, khavun kotihkak Paulus bodoa khavun nihkas longoi ah noku isung amai Publius, iyok pun turus pios. 9 Umbot aꞌang erih torjadik lombut noh ulun-ulun poros jok bohkon jok mocon nuk pulou erih khavun idoh pun pios kak tahkan oros doh. 10 Kotului aꞌang erih idoh punak ngolehkak ihkai. Kotihkak uwas ohkot ah noh ihkai nurus ponyalan kai, idoh nyodiak paring aꞌang jok kopoduluk kai.
Paulus dahpot nuk Roma
11 Toluk bulan ulik erih ihkai tulak tahkan anai nuhkat icok kahpal tahkan Aleksandria jok kotahin musim sorongin tulik nuk pulou erih. Kahpal erih hatin lambang Dioskuri. 12 Ihkai tulik nuk Sirakusa khavun mocon nuk anai toluk ondo kotahiu ah. 13 Tahkan anai ihkai nyalan nyihing kovang danum, khavun ihkai docok nuk Regium. Icok ondo ulik erih bahiu tahkan solatan pun lombut kolo konomusik khavun ondo koduok ah docok noh ihkai nuk Putioli. 14 Nuk anai ihkai bohavung mbak arok pirak behtik jemaat, khavun kotului ponyavot doh ihkai mocon pihtuk ondo nuk anai havo-havoi mbak idoh. Umbot erih kai tulak noku Roma. 15 Dolang bari-basak jok pocayak umbak Yesus nuk Roma, idoh uwas nyonih kesah ah ngindoi ihkai nuk luvang ponyalan nujun kota Roma. Khavun arok nuk holang idoh jok lombut ahkan jemput ihkai nuk Pasar Apius khavun jok bohkon ah tulak jemput kai nuk kota Ponginapan Toluk. Kotihkak Paulus nohtok idoh, iyok bosukur umbak Hotalak khavun ahtoi ah ngandah.
16 Beteng kai dahpot nuk Roma, Paulus ponosuah mocon nuk lohpo bongoi mbak dolang porajurit jok jagak iyok.
Bokesah mbak ulun Yahudi nuk Roma
17 Uwas docok toluk ondo, Paulus naꞌah dolang ulun Yahudi jok poduluk nuk daerah erih. Khavun umbot idoh hokupur, iyok marak ahkan doh: “Dolang bari-basak! Ahkuk iyam salak inon-inon mbak bangsak etok, ahkuk iyam pujik kak ngolavan adat kobudayaan jok tonorimak tok tahkan dolang tahtuk ajuh tok. Totahpik ahkuk tonavan nuk Yerusalem khavun sonyerah noku ulun-ulun Roma. 18 Umbot ahkuk ponorisak, idoh kanik molahpas ahkuk, kotului yarok ngonduon icok inon pun kosalak tahkan ahkuk jok pahtut ngohukum kuk nyiring mahtoi. 19 Ahkan totahpik ulun-ulun Yahudi ngolavan kotului erih torpaksak noh ahkuk nyavot kongadil nuk pongadilan Kaisar, totahpik erih iyam kotului ahkuk kanik ngaduk bangsak ekuk. a 20 Jadik ahkuk nyavot ihkam ahkan lombut kohtoi ahkak touk marak kam ngombai ahkuk tonahan. Yok erih tului ahkuk pocayak umbak Lacak Ponyolamat, jok uwas tahik noh sojaham ah jok kongonjanjik Hotalak ahkan ihtok ulun Yahudi.”
21 Khavun idoh marak ahkai ah: “Ihkai jaham norimak icok surat pun tahkan Yudea mongenai ihkok. Khavun yarok icok behtik pun tahkan anai jok ngesah ihkok borbuat jaek. 22 Totahpik ihkai kanik nyonih mongenai ajaran muk, kotului ihkai paring ah uwas nyonih nuk amo-amoh ulun ngolavan ajar muk erih.”
23 Mahkak idoh khavun Paulus netu ah icok ondo ahkan doh bohavung hinok. Beteng ondo erih tumbuk ulun lombut noku lohpo nuk Paulus mocon. Tahkan ngohkos nyiring cohit Paulus marak ah mbak jelas ahkan doh mongenai bokolo Hotalak momorintah sobagai lacak. Hatin ayat tahkan buhkuk nabik Musa khavun buhkuk nabi-nabik jok bohkon, Paulus ngotiak nguan doh pocayak mongenai Yesus. 24 Arok jok pocayak mbak inon jok pomarak Paulus, totahpik arok kak jok iyam pocayak. 25 Mahkak idoh huta-hutah auh khavun doh pun nohtah pertemuan erih, khavun Paulus ngohpah kesah kolihtuh hiyoi ah: “Memang tu'uk inon jok pomarak Roh Kudus nyihing nabik Yesaya ahkan tahtuk ajuh tok! Tuhan marak ah,
26 ‘Tulak noh noku bangsak ihtuh, khavun marak ah:
Ihkok ahkan nyonih khavun ahkan nyonih totahpik ihkok ahkan iyam ngorehti;
ihkok ahkan nohtok khavun nohtok totahpik ihkok iyam taꞌai inon jok torjadik. b
27 Kotului ahtoi bangsak ihtuh uwas ngombahtuk,
tolingan doh elen doh nyonih
khavun mahtan doh uwas iyam kanik nohtok.
Ihtuh konguan supayak mahtan doh arak nohtok,
tolingan doh iyam nyonih,
pikiran doh supayak iyam doh ngorehti,
supayak idoh arak hulik noku Ahkuk,
oluk poh Ahkuk kanik ngopios idoh.’
28 Kotului erih ihkok harus taꞌai, kotului kosolamatan jok tahkan Hotalak harus pomarak noku bangsak-bangsak jok bohkon jok iyam ulun Yahudi. Idoh ahkan nyonih ah!” [ 29 Khavun umbot Paulus bokesah koderih, tulak noh ulun-ulun Yahudi erih nohtah nuk anai tahtup hirat icok mbak jok bohkon.]
Paulus ngajar marak mongenai korajaan Hotalak nuk Roma
30 Khavun Paulus mocon duok toun kotahiu ah nuk Roma, nuk lohpo jok sonyevak ah bongoi. Iyok senang norimak ulun jok lombut noku lohpo ah. 31 Khavun mbak bohanyik iyok ngesah ahkan doh mongenai bokolo Hotalak momorintah sobagai lacak khavun mongenai Tuhan Yesus Lacak Ponyolamat. Paulus bokesah ahkan doh mbak bebas yarok jok ngohalang yok.