Paulus onin mbak kahpal noku Roma
27
Umbot konopuhtus, ngindoi ihkai ahkan tulak homboh kahpal noku Italia, mahkak Paulus khavun pirak behtik tahanan jok bohkon sonyerah noku kopalak porajurit ngarai ah Yulius, iyok tahkan pasukan Kaisar. 2 Ihkai nuhkat noku kahpal jok lombut tahkan Adramitium khavun tulak mbak kahpal erih, kahpal erih uwas siap tulak noku dolang polabuhan-polabuhan jok arok nuk provinsi Asia. Aristarkhus iyok ulun Makedonia jok lombut tahkan Tesalonika, tulak hatin kahpal hombo-homboh umbak ihkai. 3 Hondo Khavun ah hinok ihkai docok nuk Sidon. Yulius molayan Paulus mbak pios iyok mosuah Paulus bohavung mbak dolang jolahai ah, supayak idoh touk nongak inon jok pomonuluk ah. 4 Kotului bahiu punak nyangit ihkai nurus ponyalan kai nyihing kovang pulou Siprus. 5 Khavun ihkai nyihing laut jok nuk husuk Kilikia khavun Pamfilia turus docok Mira nuk nogarak Likia. 6 Nuk Mira kopalak porajurit erih ngonduon kahpal tahkan Aleksandria jok kanik tulak noku Italia. Mahkak iyok ngahtun kai noku kahpal erih.7 Kotului nyangit bahiu tahkan depan kahpal kai, arok pirak ondo torpaksak ihkai tahik nuk luvang ponyalan kai, tahtup kosusah kai pun docok noku donik kota Knidus kotului bahiu nyangit, ihkai nyihing kovang Kreta nyihing Tanjung Salmone. 8 Umbot ihkai tahtup kojorak kai nyihing tanjung erih, docok noh ihkai noku icok polabuhan ngarai ah Indah, donik kota Lasea.
9 Ihkai uwas tahik nuk luvang ponyalan sohinggak Ondo Raya Pordamaiyan ulun Yahudi uwas umbot. Khavun bohayak ahkan kai nurus ponyalan kotului bahiu nyangit, kotului erih Paulus marak ahkan doh, hiyoi ah, 10 “Dolang bari-basak, ahkuk nohtok ah, ngindoi ponyalan tok ahkan ngonduon bohayak khavun ngonduon korugik jok hajok, iyam ahkan puat tok khavun kahpal tok kak, totahpik ahkan hasong tok kak.” 11 Totahpik kopalak porajurit erih holovik pocayak mbak kopalak alur khavun jok juragan kahpal erih, dari padak inon jok pomarak Paulus. 12 Kotului polabuhan erih iyam pios ahkan mocon nuk anai solama musim sorongin, mahkak tumbuk tahkan idoh jok sotuju ngindoi idoh nikos tehtap nyalan hatin kahpal erih nyiring kota Peniks supayak touk mocon nuk anai kotahin musim sorongin. Kota Peniks arok noh polabuhan nuk pulou Kreta, jok noharep noku arah barat daya khavun donik arah barat laut.
Bahiu bolovut nuk laut
13 Beteng hun erih bahiu tahkan solatan koman suhkup halus ngomusik doh. Idoh davak touk noh doh tulak nyalan hatin kahpal erih, mahkak idoh mokar jangkar, khavun tulak nyihing kovang Kreta. 14 Totahpik iyam tahik ulik erih, bahiu bolovut jok pomarak bahiu Timur laut, lombut tahkan arah pulou erih. 15 Khavun kahpal doh arok nuk tohun bahiu erih, khavun kahpal erih pun iyam mukin nai duoi nyalan nyihing bahiu bolovut erih, mahkak ihkai pasrah khavun mosuah ah kahpal mohaman biang-biong ngohasuk bahiu erih. 16 Kotihkak ihkai mohaman ihkai kolindung nyohiyot konguan pulou erih beteng kai nyihing pulou Kauda jok kenek jok arok nuk silak solatan, nuk anai ihkai tahtup susah payah ihkai touk ngaman alut kenek nuk lihkut kahpal kai. 17 Khavun kotihkak alut koik erih kongaroi doh noku luvang kahpal, idoh nokulong kahpal erih mbak talik, kotului idoh mihkoh sokarah nuk Sirtis, idoh nohkak layar ah supayak kahpal ngohasuk arah bahiu. 18 Totahpik bahiu bolovut khavun lujak punak nyangit ngorinah kahpal kai, sohinggak ondo icok ah, dolang anak buah kahpal ngindo dolang muatan doh supayak ahkan kahpal mohian. 19 Khavun ondo jok kotoluk ah hinok idoh ngindo alat-alat kahpal noku laut. 20 Uwas arok pirak ondo kotahiu ah ihkai yarok nohtok mahtan ondo khavun potion, khavun bahiu bolovut erih nulo lombut. Khavun davak kai ihkai iyam ahkan solamat.
21 Khavun idoh arok pirak ondo iyam kuman, tombok noh Paulus nuk tohun-tohun idoh khavui marak ah: “Dolang bari-basak ngindoi auh kuk sonyonih, supayak tok iyam tulak tahkan Kreta, ihtok iyam ahkan buah musibah khavun rugik kolo ihtuh. 22 Tahpik huntuh ahkuk marak supayak ihkam arak puhtus asa. Kotului yarok cok behtik pun tahkan holang ihtok jok ahkan lohpung. Totahpik kahpal ihtuh kiyak jok ahkan hacur. 23 Ahkuk marak ah koderih, tului ngolomik nonih molekat tahkan Hotalak lombut noku ahkuk. Hotalak erih noh jok tepun ahkuk khavun jok sonyembah kuk. 24 Khavun molekat erih marak ah, ‘Paulus arak mihkoh. Ihkok ahkan noharep Kaisar. Khavun kotului kopion Hotalak ahkam muk, iyok bojanjik dolang paring ulun jok nyalan luvang kahpal atuh jok homboh mbak ihkok ahkan solamat.’ 25 Jadik dolang bari-basak arak puhtus asa, kotului ahkuk pocayak umbak Hotalak, kotului paring ah torjadik sosuai mbak inon jok pomarak Ah ahkakuk. 26 Totahpik kahpal ihtuh ahkan sokarah nuk icok pulou.”
27 Ngolomik jok kohpat balas ah ihkai honong buah bahiu bolovut erih, ihkai kongomin bahiu erih nyiring noku tohun laut Adria. Beteng tohun ngolomik dolang anak buah kahpal erih ngomok ngindoi kahpal erih ngoronik tanak diang nuk tohorong danum jok monyavau. 28 Khavun doh nguhkur kotimbon laut hatin bahtuk jok konahut doh mbak talik, khavun kotimboi sokitar tolun puluk pihtuk mehter. Umbot nyalan nyohiyot hinok idoh pun nguhkur ah hinok kololagui kotimbon danum nuk anai sokitar duan puluk pihtuk mehter. 29 Kotului mihkoh kahpal erih sokarah nuk bahtuk, jadik idoh nohkak ohpat jangkar nuk laik kahpal, khavun ihkai ngoharap supayak ondo pohos ngohkos. 30 Ahkan totahpik dolang anak buah kahpal ngotiak supayak idoh buho tahkan kahpal. Idoh nohkak alut koik, khavun doh nihpuk kai idoh pura-purak nohkak arok pirak sokavit cuhkui kahpal tahkan urung kahpal. 31 Kotului erih Paulus marak ah kopalak porajurit khavun dolang anak buah ah: “Ngindoi dolang anak buah kahpal ihtuh iyam mocon nuk kahpal tuh, ihkam iyam ahkan solamat.” 32 Khavun dolang porajurit erih nohtos talin alut koik erih khavun mosuah ah mohaman.
33 Kotihkak ondo uwas kanik boloang Paulus ngihit paring idoh joarok nuk anai kuman, hiyoi ah: “Uwas ohpat balas ondo ihtok iyam kuman inon-inon khavun ngindoi tahtup kihkoh tok. 34 Kotului erih ahkuk marak ihkam paring ah, ahkan kam kuman holuk. Kuman erih poduluk supayak jagak komolum mik. Iyam icok behtik pun nuk holang ihkam jok ahkan nohkah icok koliting balo tahkan isung kuhung mik.” 35 Umbot marak ah naing erih iyok ngomin kue, bosukur noku Hotalak nuk husuk doh paring ah, khavui nyipak ah turus kumai ah. 36 Khavun idoh pun jadik somangat khavun doh turus kuman kue erih ngohasuk Paulus. 37 Karon kai jok nuk kahpal erih duok lahtus pihtuk puluk onom behtik. 38 Umbot kai kuman nyiring bosuh, idoh ngindo dolang gandum jok arok nuk luvang kahpal erih ngindo ah noku laut supayak kahpal erih mohian.
39 Kotihkak uwas manyo noh tohun hondo, idoh nohtok tolux jok teneng danum ah khavun tanak ah lahtak nuk kovang tolux erih, totahpik idoh iyam nyokonok nuk erih, idoh ngopuhtus ah ahkan nyokarah kahpal erih nuk anai. 40 Idoh molahpas talin sokavit cuhkui kahpal, khavun mosuah sokavit cuhkui kahpal erih lohtong noku kalang laut. Khavun umbot erih idoh molahpas kahut jok nuk ngahut komudi kahpal, khavun doh motuhkat layar supayak bahiu ngomusik notucuk doh noku kovang. 41 Totahpik nuk anai monyavau sojaham doh docok kovang, kahpal doh sokarah nuk isung baras, khavun kahpal erih iyam dahpat hokuvut, khavun laik ah hacur buah lujak jok punak nyangit.
42 Beteng hun erih dolang porajurit erih kanik munuk ngohpah dolang tahanan supayak yarok jok nangui nyolamat arop doh. 43 Totahpik Yulius kanik nyolamat Paulus, jadik iyok majak idoh khavun iyok marak doh supayak iyai doh jok touk nangui holuk nomarang noku laut khavun nangui noku kovang. 44 Khavun ulun-ulun jok bohkon jok yataꞌai nangui touk ngohasuk hatin dolang kajuk poramuk kahpal jok uwas hacur erih, mahkak doh touk nangui solamat nyiring noku kovang.