Paulus ngombela arop ah nuk husuk Agripa
26
Hiyon Agripa ahkan Paulus: “Ihkok ongak kuk hocok ahkam muk supayak ihkok bokesah ngombela arop muk.” Mahkak Paulus ngahtang longoi ah khavui bokesah ngombela arop ah. 2 Hiyoi ah: “Lacak jok konolehkak kuk Agripa! Ahkuk ngomok ah utung touk bokesah ngombela arop kuk nuk husuk muk, mongenai kaduk jok pomotenah ulun-ulun Yahudi ahkak kuk. 3 Kotului ihkok taꞌai mongenai adat kobudayaan ulun Yahudi khavun mosalah jok baꞌas lopung nuk holang ihtok. Kotului erih ahkuk nyavot mbak ihkok, supayak ihkok nyonih ahkuk mbak sabar.4 Paring ulun Yahudi taꞌan doh mongenai ahkuk tahkan kolengak kuk nyiring hun ihtuh, beteng ahkuk honong bio ahkuk mocon unuk holang-holang dok portama nuk kota kuk Tarsus, khavun nuk Yerusalem. 5 Uwas tahik idoh taꞌan ahkuk, khavun ngindoi doh kanik idoh touk ngesah paring ah mongenai komolum kuk, ngindoi lomoi ahkuk uwas bolum sobagai ulun Parisi khavun ahkuk pahtuh umbak porahturan agamak ekai. a 6 Khavun huntuh ahkuk arok nuk ohtoi ahkan kongadil kotului ahkuk pocayak khavun ngindoi Hotalak nguan inon jok uwas konojanjik Ah ahkan tahtuk ajuh ekai. 7 Janjik erih noh jok konoharap koduok balas suku bangsak Israel, sohinggak idoh pahtuh nyembah Hotalak hondo khavun ngolomik. Lacak jok konolehkak kuk, kotului ahkuk pocayak mbak janjik erih, ahkuk tonuduh ulun-ulun Yahudi. 8 Ngombai dolang bari-basak kuk ulun Yahudi iyam pocayak ngindoi Hotalak ngomolum ulun mahtoi?
9 Lomoi ahkuk pocayak ngindoi ahkuk harus nguan inon pun supayak ngolavan kuasa Yesus tahkan Nazaret.b 10 Aꞌang erih konguak kuk kak nuk Yerusalem. Hatin surat kuasa tahkan kopala-kopalak pomipin agamak Yahudi, ahkuk tumbuk mosolong ulun jok pocayak khavun jok pahtuh mbak Hotalak noku luvang ponjara. Ahkuk halik sotuju ngindoi idoh konohukum mahtoi. 11 Tumbuk ah kak ahkuk monyorak idoh nuk lohpo-lohpo sombayang ulun Yahudi, supayak idoh nohtah ah inon jok doh pocayak ah. Ahkuk mahik-mahik becik mbak idoh, sohinggak ahkuk ngasang doh noku kota-kota jok bohkon.”
Paulus botobat
12 “Umbak evak erih noh ahkuk ngomin surat kuasa tahkan kopala-kopalak pomipin agamak Yahudi khavun tulak noku Damsyik. 13 Khavun beteng ahkuk nuk tohun jalan, beteng tohun ondo, lacak jok konolehkak kuk, ahkuk nohtok aꞌang jok tarang tahkan langit aꞌang erih tarang hinok mbak mahtan ondo. Aꞌang jok tarang erih ngoliling ahkuk khavun dolang ulun-ulun jok ngohasuk kuk. 14 Ihkai paring ah botahas turus tokaling noku tanak. Khavun ahkuk nyonih auh jok marak ahkak kuk luvang auh Ibrani, ‘Saulus, Saulus! Ngombai ihkok monyorak Ahkuk? Ihkok ahkan poros bongom muk, ngindoi ihkok nulo ngolavan pomipin jok harus kok pahtuh mbak iyok.’ 15 Mahkak ahkuk ngisok ah, ‘Iyai Ihkok, Tuhan?’ Khavun Yok mutah ah, ‘Ahkuk noh Yesus jok pononyorak muk. 16 Kuat nai khavun tombok nai! Ahkuk motohtok arop kuk ahkam muk supayak ihkok molayan Ahkuk. Ihkok harus ngesah ahkan ulun bohkon inon jok tonohtok muk hondo ihtuh khavun mongenai inon jok ahkan pomotohtok Kuk ahkam muk nain arok waktu ah. 17 Ahkuk ahkan nyolamat ihkok tahkan bangsak ulun-ulun Yahudi khavun tahkan bangsa-bangsak jok bohkon jok iyam ulun Yahudi. Ahkuk ahkan nyuhuk ihkok tulak noku idoh. 18 Supayak ihkok nguan mahtan doh ngomolat, ahkan idoh boluak tahkan jok pindong khavun nyolong noku luvang jok tarang; Ahkan doh lahpas tahkan pongaruh lacak roh jaek, khavun konguasak Hotalak. Mahkak kotului doh pocayak mbak Ahkuk dosa-dosa doh ahkan kongapun khavun idoh ahkan jadik kolompok ulun-ulun jok pocayak khavun jok konopilik Hotalak.’ ”
Paulus monjelas mongenai polayanan ah
19 “Kotului erih, lacak Agripa jok konolehkak kuk, Ahkuk ngotiak supayak tehtap pahtuh umbak porintah jok uwas kongonyahtak, Yesus ahkak kuk nyihing ponohtok kuk. 20 Totahpik topahtuk ah ahkuk marak ahkan ulun-ulun Yahudi nuk Damsyik, nuk Yerusalem khavun nuk paring Yudea, khavun ahkan bangsa-bangsak jok bohkon, kotului idoh harus botobat khavun hulik noku Hotalak khavun nguan dolang korejak jok sosuai mbak pertobatan. c 21 Kotului erih ulun Yahudi navan ahkuk nuk Lovun Hotalak, khavun kanik munuk ahkuk. 22 Totahpik nyiring hondo ihtuh ahkuk konolindung Hotalak, sohinggak ahkuk dahpat tombok nuk ohtoi ngesah dolang kopion Hotalak nuk luvang komolum kuk ahkan paring ulun jok hajok maupun ulun jok kenek. Inon jok pomarak kuk tuh yarok bohkon dari padak inon jok uwas kongesah dolang nabik tormasuk nabik Musa; 23 yok erih ngindoi Lacak Ponyolamat harus jorak iyok arok noh ulun jok topahtuk ah hulik bolum tahkan holang ulun mahtoi, supayak umbak koderih Iyok touk marak mongenai tarang yok erih kosolamatan ahkan ulun Yahudi khavun ahkan ulun jok iyam ulun Yahudi.” d
Paulus nyuhuk lacak Agripa tuꞌuk-tuꞌuk pocayak
24 Beteng Paulus ngombela arop ah koderih, Pestus bokesah mbak auh jok mohing hiyoi ah: “Paulus kok bobujon, kopitar muk jok arok erih nguan ihkok bobujon!” 25 Totahpik Paulus mutah ah: “Ahkuk iyam bobujon, Pestus jok konolehkak kuk! Inon jok pomarak kuk tuꞌuk khavun inon jok pomarak kuk erih boluak tahkan pihkiran kuk jok sehat! 26 Lacak Agripa halik taꞌai mongenai pihkiran kuk erih, kotului erih ahkuk bohanyik bokesah jok kotuꞌui ah ahkam muk. Ahkuk yakin, kotului iyam arok icok inon pun jok jaham kok taꞌai, kotului kojadian erih torjadik iyam unuk jok sonyuhuk. 27 Pocayak leh ihkok lacak Agripa, tahkan aꞌang jok pomarak dolang nabik erih? Ahkuk taꞌai, kotului ihkok pocayak mbak idoh”
28 Hiyon Agripa mutah ah: “Ihkok pihkir murah nguan ahkuk pocayak khavun nguan ahkuk jadik ulun Kristen. Iyam somudah erih!” 29 Hiyon Paulus: “Ahkuk kanik bodoa noku Hotalak, supayak pohos esah harus tahik, iyam hanya ihkok kiyak, totahpik paring ulun jok arok nuk ohtoi khavun ulun jok nyonih auh kuk jadik havoi mbak ahkuk, totahpik iyam ahkan konahut mbak rantai umat.”
30 Khavun uwas umbot noh kuat nai lacak khavun gubernur nogarak erih khavun Barnike khavun paring ulun jok arok nuk anai jok tuot halik mbak tombok turus boluak. 31 Beteng doh boluak, idoh bokesah icok mbak cok bohkon: “Ulun ihtuh iyam nguan aꞌang jok jaek. Jadik ulun ihtuh iyam taꞌai mosolong iyok noku luvang ponjara, khavun yataꞌai ngohukum iyok nyiring mahtoi.” 32 Hiyon lacak Agripa ahkan Pestus: “Ulun ihtuh sobenar ah uwas touk ponolahpas ngindoi iyok iyam nyavot kongadil nuk pongadilan Kaisar.”