Paulus nyavot kongadil Kaisar Roma
25
Toluk ondo umbot iyok docok nuk daerah erih tulak nai Gubernur Pestus tahkan Kaisarea noku Yerusalem. 2 Nuk anai lombut noh dolang kopalak pomipin agamak Yahudi khavun dolang pomipin-pomipin ulun Yahudi jok tulak ngaduk mongenai pokarak Paulus ahkan Pestus. 3 Idoh nyavot supayak Pestus motohtok kopios ah ahkan doh iyok ngavat idoh khavun iyok nyuhuk ulun ngonin Paulus noku Yerusalem, kotului idoh uwas hopahkat ahkan munuk Paulus nuk holang jalan. 4 Totahpik Pestus mutah hiyoi ah: “Paulus honong tonahan nuk Kaisarea, khavun ahkuk pun iyam tahik kak kanik hulik noku anai. 5 Jadik pohiyoi noh kam nguhtus pomipin-pomipin mik noku anai hombo-homboh mbak ahkuk khavun ngaduk ah hinok pokarak Paulus ngindoi iyok tuꞌuk salak.”6 Umbot mocon nuk Yerusalem sokitar jaluk nyiring sopuluh ondo ulik erih Pestus hulik noku Kaisarea. Umbot yok docok Kaisarea ondo havun ah iyok pun nguan pokarak pongadilan khavun nyuhuk ngonin Paulus noku husuk ah. 7 Kotihkak Paulus uwas lombut noh ulun-ulun Yahudi jok tahkan Yerusalem tombok nuk hokosilak iyok khavun doh nulo nuduh yok mbak tuduhan jok bahat totahpik idoh pun yadahpat doh motohtok tandak tuduhan erih. 8 Khavun hiyon Paulus ngombela arop ah: “Ahkuk nyohiyot pun yarok salak kuk, yok erih salak mbak Hukum Taurat ulun Yahudi atau mbak Lovun Hotalak khavun mbak Kaisar Roma.”
9 Totahpik Perkius Pestus kanik nguan ulun Yahudi ngandah. Mahkak iyok bokisok mbak Paulus: “Inon leh ihkok kanik tulak noku Yerusalem, supayak ihkok kongadil nuk anai nuk husuk kuk mongenai pokarak ihtuh?”
10 Tahpik hiyon Paulus mutah yok: “Ahkuk huntuh tombok nuk ohtoi nuk husuk pongadilan Kaisar Roma nuk ohtoi noh pongadilan jok ahkan ngopuhtus pokarak ihtuh. Ihkok uwas ta'amuk ngindoi ahkuk iyam salak, nyohiyot pun ahkuk yarok salak kuk mbak ulun Yahudi.
11 Jadik, ngindoi ahkuk salak khavun tuꞌuk-tuꞌuk nguan kosalak khavun kosalak kuk erih hajok, ahkuk siap kongohukum mahtoi, totahpik ngindoi ahkuk iyam salak khavun iyam havoi mbak tuduhan doh erih, iyam icok behtik pun jok touk nyerah kuk noku idoh. Ahkuk nyavot kongadil nuk pongadilan Kaisar Roma!”
12 Umbot doh hopahkat mbak anggota-anggota pongadilan jok bohkon, Pestus mutah ah: “Ihkok ahkan kongadil nuk pongadilan Kaisar, jadik ihkok harus tulak noku Kaisar.”
Paulus nuk husuk lacak Agripa khavun Bernike
13 Pirak ondo ulik ah lombut noh Lacak Agripa khavun Bernike noku Kaisarea kanik ngucap solamat ahkan Pestus kotului iyok konopilik jadik gubernur. 14 Kotihkak arok pirak ondo nuk anai, Pestus marak mongenai pokarak Paulus noku lacak Agripa hiyoi Pestus: “Nuk ohtoi arok tahanan jok tonohtah Peliks beteng yok iyam nai monjabat jadik gubernur. 15 Kotihkak ahkuk arok nuk Yerusalem, kopala-kopalak pomipin agamak Yahudi khavun dolang ulun okok marak ah dolang kosalak Paulus khavun doh nyavot yok konohukum. 16 Ahkuk mutah doh, ngindoi porahturan ulun Roma yataꞌai nyerah ulun jok arok mosalah ah supayak iyok touk konohukum sojaham iyok tonoharep noku ulun-ulun jok nuduh iyok, khavun tonongak hocok ahkai ngombela arop ah. 17 Kotului erih idoh hombo-homboh mbak ahkuk noku ohtoi. Khavun ondo ulik kuk lombut ahkuk turus nguan pokarak pongadilan khavun nyuhuk Paulus lombut noharep. 18 Kotihkak ulun-ulun jok nuduh Paulus erih bokesah marak dolang tuduhan doh noku iyok, idoh yarok marak icok inon pun kojaek ah, kolo jok ponoravak kuk. 19 Totahpik idoh cumak salak paham mbak iyok mongenai agamak doh, mongenai ulun jok ngarai ah Yesus jok uwas mahtoi, totahpik Paulus marak ah tuꞌuk-tuꞌuk ngindoi Iyok hulik bolum. 20 Kotului ahkuk deroh nokolo nyolesai pokarak erih, ahkuk ngisok inon leh iyok kanik tulak noku Yerusalem, supayak mosalah erih tonongak kopuhtusan nuk anai. 21 Totahpik Paulus kanik supayak kongadil nuk pongadilan kaisar Roma. Iyok nyavot, supayak iyok mocon nuk tahanan khavun ngindoi, sapai mosalah ah konopuhtus Kaisar. Kotului erih ahkuk nyuhuk nahan iyok nyiring kuk touk motiang yok noku Kaisar.” 22 Hiyon Agripa ahkan Pestus: “Ahkuk kanik nyonih tahkan ulun erih jok bokesah,” Pestus mutah ah: “Havun ihkok ahkan nyonih iyok.”
23 Ondo havun ah hinok lombut noh Agripa khavun Barnike dorok tonoharang ulun arok jok ramai-ramik, khavun beteng doh uwas nyolong nuk luvang lohpo pongadilan, dorok hombo-homboh mbak dolang komandan khavun ulun-ulun jok poduluk nuk kota erih, Pestus nyuhuk supayak Paulus tonoharep noku husuk idoh. 24 Pestus marak ah hiyoi: “Oo lacak Agripa khavun dolang ulun jok lombut nuk ohtoi. Nohtok ulun ihtuh, jok tonuduh paring ulun Yahudi, yok erih ulun Yahudi jok nuk Yerusalem khavun jok arok nuk ohtoi idoh lombut noku ahkuk tahtup idoh nuntut khavun koriak, hiyon doh. Iyok iyam pahtut nai bolum tahik. 25 Totahpik nyahtak ah, iyok yarok nguan kosalak icok inon pun supayak iyok touk konohukum mahtoi khavun kotului iyok nyavot supayak kongadil nuk pongadilan Kaisar, Ahkuk ngopuhtus ah motiang iyok noku Kaisar. 26 Totahpik yarok aꞌang jok punak jelas ahkan tonulih kuk nuk surat ahkan Kaisar mongenai Paulus. Kotului erih noh ahkuk ngonin yok noharep noku ohtoi noku husuk kam paring ah, jok portama ahkam muk lacak Agripa, supayak umbot pokarak tuh ponorisak nuk ohtoi, ahkuk touk nulih khavun monjelas ah mongenai mosalah tuh nuk luvang surat kuk ahkan Kaisar. 27 Kotului monurut kuk iyam taꞌai motiang ulun tahanan ngindoi iyam jelas tuduhan ulun mbak iyok.”