Paulus nuk husuk Gubernur Peliks
24
Limok ondo ulik erih lombut noh Ananias Pomipin Agamak Yahudi jok paling isung khavun arok pirak behtik pomipin Yahudi khavun icok behtik pengacara doh ngarai ah Tertulus idoh noharep Gubernur khavun ngaduk tuduhan doh mongenai Paulus. 2 Kotihkak Tertulus tonaꞌah noku depan, iyok nuduh Paulus hiyoi ah,“Tuan Gubernur jok konolehkak kuk! Bangsak ihkai tuh nuk luvang poletah tuan, nogarak kai tuh jadik damai khavun torahtur. Khavun kotului tuan punak horahtik tumbuk komajuan bangsak kai tuh. 3 Nuk amo-amoh paring jok konguan tuan erih ihkai norimak ah umbak pios khavun kai botorima kasih. 4 Totahpik ahkan iyam tumbuk korejak tuan, ihkai nyavot umbak hormat supayak tuan nyonih kaduk kai nyohuluk. 5 Ihkai uwas sadar tului ulun ihtuh ngacau khavun bohayak. Nuk amo-amoh iyok nguan ulun-ulun Yahudi posak iyok kak pomipin kolompok ulun Nasrani. 6 Iyok uwas ngohtor Lovun Hotalak jok kudus. Tului erih noh ihkai navan iyok, khavun ngohakim yok, monurut hukum Taurat. 7 Totahpik komandan Lisias maksak ngomin iyok tahkan ihkai. 8 Khavun nyuhuk dolang ulun jok ngaduk Paulus lombut noku tuan kak. Ngindoi tuan morisak ulun ihtuh, tuan ahkan nyonih tahkan iyok khavun tuan ahkan taꞌai inon jok tonuduh kai erih tuꞌuk noh.” 9 Ulun-ulun Yahudi jok arok nuk anai pun umbak nuduh Paulus khavun marak ah tuꞌuk noh inon jok pomarak Tertulus.
Paulus ngombela arop ah nuk husuk Gubernur Peliks
10 Khavun gubernur erih nongak kode ahkan Paulus supayak iyok bokesah. Mahkak Paulus marak ah: “Ahkuk taꞌai tuan uwas jadik hakim nuk nogarak tuh botoun-toun kotahiu ah. Kotului erih noh ahkuk ngandah khavun ahkuk iyam mihkoh ngombela arop kuk nuk husuk Tuan. 11 Tuan touk nyolidik ah bongom tului iyam holovik duok balas ondo ulik kuk dahpot nuk Yerusalem ahkuk sombayang noku Hotalak. 12 Ulun-ulun erih nohtok ah kak tului ahkuk iyam alik hirat umbak ulun amoh pun atau napak huru-harak, nuk luvang Lovun Hotalak ataupun nuk lohpo-lohpo sombayang ulun Yahudi atau nuk paring kota Yerusalem. 13 Idoh yadahpat nongak tandak ahkam muk inon jok uwas tonuduh doh ahkak kuk. 14 Totahpik ahkuk ngahkuk ahkam Tuan, kotului ahkuk nyembah Hotalak tahtuk ajuh kai monurut ajar barak Yesus jok pomarak doh salak. Totahpik ahkuk honong pocayak mbak kitab jok tonulih Musa khavun dolang nabi-nabik. 15 Havoi mbak idoh ahkuk punak pocayak ngindoi ulun mahtoi hulik bolum konguan Hotalak, ulun jok pios khavun ulun jok jaek! 16 Erih noh buhkui ah ahkuk ngotiak supayak komolum kuk khavun ahtoi kuk borasih khavun ahkuk bolum pios nuk husuk Hotalak khavun kolunon.
17 Khavun arok pirak toun kotahiu ah ahkuk lombut hinok noku Yerusalem ahkuk nongak porsembahan duit ahkan bangsak kuk, khavun nongak porsembahan ocin louk ahkan Hotalak. a 18 Beteng kuk nguan paring ah erih, arok pirak behtik ulun Yahudi tahkan Asia idoh nohtok ahkuk nuk luvang lovun Hotalak, solesai upacara muhik arop kuk nuk anai bungun yarok ulun ngohasuk ahkuk khavun yarok bohok bombok. 19 Idoh jok soharus ah noharep tuan nuk ohtoi khavun ngolahpor ahkuk, ngindoi arok kosalak kuk. 20 Totahpik Pohiyoi ah noh ulun-ulun jok arok nuk ohtoi motohtok ah inon kosalak kuk, kotihkak ahkuk noharep Mahkamah Agamak. 21 Inon leh ahkuk kongadil kotului ahkuk marak ah ngindoi ulun mahtoi ahkan hulik bolum, kotului erih leh ahkuk kongonin noku husuk Tuan?” b
22 Khavun Gubernur Peliks jok taꞌai mongenai ajar barak Yesus, iyok nunda pokarak erih hiyoi marak ah: “Ahkuk ahkan ngopuhtus ah sidang tuh ngindoi kopalak komandan Lisias uwas lombut.” 23 Peliks nyuhuk kopalak porajurit jok jagak Paulus: “Jagak iyok khavun arak ngahut longoi ah, arak ngurung iyok nuk luvang ponjara totahpik pohiyoi noh dolang jolahai ngavat iyok ngindoi iyok arok poduluk.”
Paulus nuk husuk Peliks khavun Drusila
24 Khavun pirak ondo ulik erih lombut noh Gubernur Peliks khavun oruh ah Drusila, oruh ah Drusila arok noh ulun Yahudi, khavun Peliks nyuhuk naꞌah Paulus, khavun nyonih tahkan iyok mongenai kopocayak ah mbak Yesus Lacak Penyelamat. 25 Totahpik beteng Paulus bokesah mongenai cara bolum jok pios nuk husuk Hotalak, mongenai nahan nafsu khavun kojorak beteng ondo kiyamat, Gubernur Peliks mihkoh jadik hiyoi ah: “Ihkok touk tulak huntuh, ngindoi arok hocok hinok ahkuk ahkan nyuhuk naꞌah kok hinok.” 26 Jadik Peliks ngoharap Paulus ahkan nongak yok duit supayak Paulus ponolahpas, kotului erih noh iyok bojoin naꞌah Paulus supayak bokesah mbak iyok.
27 Beteng toun jok koduok ah Peliks jadik gubernur iyok pun kongatik Perkius Pestus, khavun supayak nguan ahtoi ulun Yahudi senang Peliks atak ah mosuah Paulus nuk luvang ponjara nulo.