23
Beteng Paulus ngonorong dolang kopalak pongadilan agamak jok paling isung erih iyok marak ah: “Oo dolang bari-basak kuk! Nyiring ondo ihtuh ahkuk bolum mbak ahtoi jok borasih nuk husuk Hotalak.” 2 Totahpik Pomipin Agamak Yahudi jok paling isung Ananias ngarai ah iyok nyuhuk idoh jok tombok donik Paulus nehpak baui ah. 3 Mahkak hiyon Paulus ahkan Ananias kopalak agamak jok paling isung erih: “Hotalak ahkan nopeleng ihkok ulun munapik jok pura-purak suci! Ihkok tuot nuk anai ngohakim ahkuk monurut hukum taurat jok tonulih Musa, podahal ihkok bongomuk noh jok ngolanggar hukum erih ihkok nyuhuk ulun nopeleng kuk!” a4 Ulun-ulun jok nuk silak Paulus marak ah hiyon doh: “Ihkok ngolunyik Pomipin Agamak Yahudi jok paling isung, hamba Hotalak!” 5 Hiyon Paulus mutah ah: “Oo dolang bari-basak, ahkuk iyam taꞌai, ngindoi iyok Pomipin Agamak Yahudi jok paling isung. Memang arok tonulih nuk luvang kitab, ‘Arak ihkok bokesah jok jaek mongenai pomipin bangsak muk!’ ” b
6 Paulus taꞌai ngindoi ulun nuk anai arok duok kolompok yok erih kolompok ulun saduki khavun kolompok ulun Parisi. Kotului erih, iyok marak ah mbak auh jok mohing ahkan anggota-anggota pongadilan agamak: “Dolang bari-basak kuk! Ahkuk tahkan kolompok Parisi khavun ulun okok kuk pun tahkan kolompok Parisi. Mahkamah agamak huntuh ngadil ahkuk kotului ahkuk yakin ngindoi Hotalak ahkan ngopolum ulun mahtoi sohinggak bolum hinok.” c 7 Kotihkak iyok bokesah koderih, kolompok Saduki khavun kolompok ulun Parisi erih nopahtuk hirat, sohinggak idoh homomilang jadik duok. 8 Kotului kolompok ulun Saduki iyam pocayak ngindoi ulun mahtoi ahkan hulik bolum, idoh halik iyam pocayak ngindoi arok molekat khavun roh. Totahpik ulun Parisi pocayak paring jok pomarak kolompok Saduki erih arok. d 9 Mahkak lopung noh kokalut jok punak nyangit. Arok pirak behtik ulun Parisi jok jadik guruk agamak Yahudi tombok khavun bokesah tahtup kobirat hiyon doh: “Ihkai yarok nohtok inon kosalak ulun ihtuh! Mukin arok roh ngindoi iyam molekat jok bokesah ahkai ah!”
10 Mahkak torjadik noh pongirat jok punak nyangit, sohinggak komandan erih mihkoh, ngindoi idoh ahkan ngoroyok Paulus. Mahkak iyok nyuhuk dolang pasukan ah mosuluh noku pindak ngonin Paulus bulik noku markas doh.
11 Ngolomik jok bohkon ah hinok Tuhan lombut khavun tombok nuk silak Paulus khavun marak ahkai ah: “Arak mihkoh, kotului ihkok bohanyik ngesah mongenai Ahkuk nuk Yerusalem koderih kak, ihkok harus ngesah mongenai Ahkuk nuk Roma.”
Kolompok ulun Yahudi
12 Hondo havun ah hinok ulun Yahudi nopahtuk nguan kolompok. Idoh hotulut iyam ahkan kuman khavun ngorih ngindoi jaham doh munuk Paulus. 13 Paring doh icok kolompok holovik mbak ohpat puluk behtik. 14 Idoh tulak noku kopala-kopalak pomipin agamak Yahudi khavun ulun-ulun okok jok ulun Yahudi hiyon doh marak ah: “Ihkai uwas hotulut iyam ahkan ngorih khavun kuman ngindoi ihkai jaham munuk Paulus. 15 Kotului erih ihkam ulun okok khavun dolang anggota Mahkamah Agamak ihkam harus marak ahkan komandan erih nyuhuk supayak iyok ngonin Paulus hinok noku husuk mik, jadik ihkam pura-purak kanik morisak kosalak ah mbak toliti, khavun beteng erih noh ihkai ahkan munuk Paulus nuk luvang ponyalan ah noku ihkam.”
16 Paulus arok ahkoi bahkas anak arik ah jok bavik, ahkoi ah erih nyonih mongenai pahkat ulun Yahudi erih iyok lombut noku markas khavui marak ahkan Paulus mongenai pahkat doh erih. 17 Khavun Paulus naꞌah icok behtik kopalak porajurit khavui marak ah: “Ngonin anak kinyam tuh ahkan komandan mik, kotului arok aꞌang jok harus pomarak ahkai ah.” 18 Parajurit erih pun ngonin anak kinyam erih noku komandan ah hiyoi ah: “Paulus ulun jok tonahan erih nyuhuk kuk ngonin anak kinyam ihtuh noku ihkok, kotului arok jok harus pomarak ah, ahkan muk.”
19 Mahkak komandan erih namit longon anak kinyam erih, khavun ngonin yok noku saran khavun ngisok yok: “Inon jok ahkan pomarak muk ahkak kuk?”
20 Anak kinyam erih mutah ah: “Ulun-ulun Yahudi uwas hopahkat ahkan nyavot mbak ihkok, supayak havun ihkok ngonin Paulus hinok noku Mahkamah Agamak, idoh pura-purak kanik morisak Paulus mbak toliti hinok. 21 Totahpik arak noh kok nyonih idoh kotului ohpat puluk holovik behtik jok uwas siap munuk iyok nuk jalan. Idoh hotulut kotului idoh iyam ahkan kuman khavun ngorih sojaham doh munuk yok, huntuh doh uwas siap uras noh khavun huntuh idoh ngindoi ngopuhtus muk.” 22 Khavun komandan erih nyuhuk anak kinyam erih bulik khavui hiyoi ah: “Arak ngesah ahkan iya-iyai kok uwas marak kuk evak doh erih.”
Paulus pomindah noku Kaisarea
23 Khavun komandan erih naꞌah duok behtik kopalak porajurit khavui nyuhuk ah: “Nyodiak ah duok lahtus porajurit tulak noku Kaisarea khavun pihtuk puluk behtik porajurit jok hatin kuda khavun kira-kira duok lahtus behtik porajurit jok hatin lunjuk. Ihtok ahkan tulak jam sioi ngolomik tuh noku Kaisarea. 24 Nyodiak ah kuda ahkan hatin Paulus, ngonin yok noku Gubernur Peliks mbak solamat.” 25 Khavun komandan erih nulih surat ahkan Gubernur Pelik, suang surat erih kolihtuh,
26 “Ahkan Gubernur Peliks jok torhormat. Salam tahkan Klaudius Lisias! 27 Ulun ihtuh uwas tonavan ulun Yahudi khavun iyok manyo pomunuk doh, khavun ahkuk lombut molahpas yok mbak pasukan porajurit kotului ahkuk nyonih iyok ulun Roma. 28 Kotului ahkuk jolik taꞌai inon alasan ah idoh kanik munuk yok, mahkak ahkuk ngonin yok noku Mahkamah Agamak doh. 29 Idoh nuduh iyok kotului mosalah mongenai Hukum Taurat doh, totahpik ahkuk yarok nohtok icok pun kosalak ah sohinggak iyok harus konohukum mahtoi ngindoi iyam ponjara. 30 Ahkak kuk uwas pomarak, arok kolompok ulun Yahudi jok uwas ngevak kanik munuk iyok. Kotului erih ahkuk nyuhuk ngonin yok noku ihkok, ahkuk uwas umbot marak ahkan ulun-ulun jok nuduh iyok supayak idoh marak tuduhan doh erih noku ihkok.”
31 Khavun porajurit-porajurit erih ngonin Paulus sosuai mbak inon jok pomoretah komandan ah ahkan doh, khavun ngonin Paulus tulak ngolomik noku Antipatris. 32 Ondo koicok ah idoh nyuhuk porajurit-porajurit jok hatin kuda erih nurus ponyalan doh mbak Paulus, khavun porajurit jok bohkon ah hulik bulik noku markas. 33 Beteng doh docok nuk Kaisarea porajurit-porajurit jok hatin kuda erih nongak surat erih ahkan Gubernur khavun nyerah Paulus noku iyok. 34 Khavun umbot ngomasak surat erih, Gubernur erih ngisok Paulus tahkan provinsi amoh asal ah. Khavun kotihkak iyok nyonih, ngindoi Paulus tahkan Kilikia, 35 iyok marak ah: “Ahkuk ahkan morisak pokarak muk, ngindoi paring ulun jok nuduh kok lombut noku ohtoi.” Khavun doh nahan Paulus nuk istana Herodes.