Paulus bokesah ahkan ulun Yahudi
22
“Dolang bari-basak khavun dolang ulun okok, ngonih ah inon jok pomarak kuk ahkan mik unuk mombela arop kuk.” 2 Kotihkak ulun arok erih nyonih iyok bokesah hapan auh edoh bahasa Ibrani, idoh jadik tonih. Khavun yok marak ah, 3 “Ahkuk arok noh ulun Yahudi, tahkan Tarsus nuk provinsi Kilikia, ahkuk mocon khavun konohanjok nuk kota tuh ahkuk kongajar nguan aꞌang jok pios, ahkuk murit Gamaliel ahkuk bolajar mbak tuꞌuk-tuꞌuk mongenai hukum tahtuk ajuh tok, sohinggak ahkuk jadik ulun jok punak pahtuh mbak Hotalak tok havoi mbak ihkam kak.a 4 Ahkuk punak somangat nyangit sohinggak ahkuk monyorak ulun-ulun jok pocayak mbak Lacak Ponyolamat, bahkas bavik ahkuk nyuhuk ulun ngipos doh noku luvang ponjara, ahkuk halik sotuju ngindoi ulun munuk doh. b 5 Khavun Pomipin Agamak Yahudi jok paling isung khavun dolang anggota Mahkamah agamak pun taꞌai ngindoi inon jok pomarak kuk tuh tuꞌuk-tuꞌuk torjadik, tahkan idoh noh ahkuk ngonduon surat ijin jok onik kuk noku ulun Yahudi nuk Damsyik khavun ahkuk tulak noku anai. Suang surat erih marak ah supayak ahkuk touk navan ulun-ulun jok pocayak mbak ajaran Lacak Ponyolamat idoh jok mocon nuk kota bohkon, khavun ahkuk ngonin doh bulik noku Yerusalem supayak dolang pomipin ngohukum idoh.”6 Beteng kuk luvang ponyalak ihkai uwas manyo docok Damsyik, beteng tohun hondo, nyolengak arok aꞌang jok tarang kolo kilap nih tahkan langit lombut ngoliling ahkuk. 7 Ahkuk botokaling noku tanak khavun arok kuk nyonih auh marak ahkuk hiyon auh erih, Saulus, Saulus! Ngombai ihkok monyorak Ahkuk? 8 Khavun kuk bokisok: “Iyai Ihkok, Tuhan?” Hiyoi mutah ah: “Ahkuk Yesus ulun Nasaret, jok pononyorak muk.” 9 Ulun-ulun jok arok nuk anai jok ngohasuk ahkuk, nohtok aꞌang jok tarang erih, totahpik idoh iyam nyonih auh jok bokesah ahkak kuk. 10 Khavuk kuk bokisok mbak auh erih hiyok kuk: “Tuhan inon jok harus kuk nguai ah?” Hiyoi mutah Ah, Kuat nai tulak nai noku Damsyik. Nuk anai nain ihkok ahkan pomarak mongenai inon jok konganin Hotalak kok nguai ah. 11 Beteng hun erih ahkuk jadik bobulen konguan aꞌang jok tarang erih. Jadik dolang ulun jok ngohasuk ahkuk erih jok nguhkui kuk noku Damsyik.
12 Nuk anai arok icok behtik ulun ngarai ah Ananias. Iyok ulun jok pahtuh mbak ajar barak Hukum Taurat, khavun iyok ulun jok punak pios nuk holang ulun Yahudi jok arok nuk anai. 13 Iyok lombut nohtok ahkuk, khavun tombok nuk silak ahkuk khavui marak ah hiyoi ah: “Saulus nguhkoi mahtam muk khavun ngomolat nai!” Khavun kotihkak erih kak ahkuk touk nohtok hinok khavun ahkuk ngonorong iyok. 14 Khavun hiyoi ahkak kuk: “Hotalak tahtuk ajuh tok uwas ngopilik ihkok ahkam muk taꞌai inon jok konganiu Ah, khavun nohtok Yesus, Jihpoi Ah jok ngohasuk konganiu Ah, khavun nyonih auh Yesus beteng yok bokesah. 15 Ihkok ahkan jadik saksi ahkan ngesah ahkan ulun arok inon jok uwas tonohtok khavun sonyonih muk. 16 Huntuh arak nok ngindoi tahik-tahik. Kuat nai, khavun nongak ah noh arop muk kongombaptis, bodoa noh noku Tuhan supayak dosa-dosa muk kongahpus Ah.”
17 Khavun ulik erih ahkuk hulik noku Yerusalem, khavun beteng kuk honong bodoa nuk Lovun Hotalak, ahkuk konguasak Roh Hotalak. 18 Ahkuk nohtok Tuhan Yesus hiyoi ahkak kuk, Ngimos nohtah Yerusalem, kotului dolang ulun nuk ohtoi iyam ahkan norimak kosaksian muk mongenai Ahkuk. 19 Hiyok kuk ahkai Ah, Tuhan, idoh uwas taꞌan doh ngindoi ahkuk uwas nyolong lohpo-lohpo sombayang ulun Yahudi khavun navan ulun-ulun jok pocayak mbak Ihkok khavun ngipos doh noku luvang ponjara turus norahuk monyorak doh. 20 Khavun kotihkak dahak Stepanus jok jadik saksi Muk erih nyalut tahkan behtiu ah, ahkuk arok nuk anai ahkuk sotuju mbak porbuatan doh erih ahkuk jok jagak hatik doh jok munuk iyok. c 21 Totahpik hiyon Tuhan ahkak kuk, Tulak nai kotului Ahkuk ahkan nguhtus ihkok noku bangsak-bangsak jok bohkon.
22 Nyonih Paulus bokesah umbak bangsa-bangsak jok bohkon kiyak, ulun arok erih ngoriak: “Munuk ah kiyak ulun jok kolo atuh iyok iyam pahtut bolum!”
Nuk luvang markas
23 Tului idoh birat doh noravuh debu noku isung khavun nguvat jubah doh turus nosahkah nyopiling ah. 24 Mahkak komandan pasukan Roma erih nyuhuk ngonin Paulus noku markas doh supayak iyok pomorisak nuk anai iyok pun nyuhuk pomorihpit Paulus supayak iyok ngahkuk, ngombai tumbuk ulun bokesah bira-birat nuk husuk ah. 25 Totahpik beteng Paulus uwas kongahut kanik pomorihpit, Paulus marak ahkan kopalak porajurit jok tombok nuk anai hiyoi ah: “Inon leh touk morihpit ulun Roma sojaham iyok kongadil?”
26 Nyonih erih kopalak porajurit erih tulak noku komandan ah, khavui marak ah: “Inon jok kanik konguam muk? Iyok ulun Roma!”
27 Mahkak komandan pasukan erih lombut noku Paulus khavui marak ah hiyoi: “Marak ah, tuꞌuk noh leh ihkok ulun Roma?”
Hiyon Paulus mutah ah: “Tu'uk.” 28 Khavun hiyon komandan erih: “Supayak ahkuk touk jadik ulun Roma tumbuk jok harus konombayar kuk!”
Khavun hiyon Paulus mutah yok: “Ahkuk kongarok sobagai ulun Roma.” 29 Beteng erih kak dolang porajurit jok morisak Paulus erih, mundur khavun komandan erih pun mihkoh kotului iyok uwas ngahut longon Paulus, jok kongahut erih arok noh ulun Roma.
Paulus mombela arop ah nuk husuk Mahkamah Agamak
30 Totahpik komandan erih jolik taꞌai ngombai ulun-ulun Yahudi erih birat ahkan Paulus. Kotului erih ngohkos ah iyok nyuhuk ngonin Paulus tahkan ponjara ngupur paring dolang kopalak pomipin agamak Yahudi khavun dolang kopalak Mahkamah Agamak supayak morisak yok. Khavun iyok ngonin Paulus tahkan markas noharep idoh.