Paulus tulak noku Yerusalem
21
Umbot kai hobomilang mbak dolang pomipin jemaat Epesus erih ihkai pun tulak hatin kahpal noku pulou Kos. Hondo havun ah hinok docok noh ihkai nuk Rodos khavun tahkan anai ihkai noku Patara. 2 Nuk Patara ihkai nohtok arok kahpal kanik tulak noku Pinisia. Ihkai homboh kahpal erih, khavun kai tulak. 3 Beteng nuk luvang ponyalan kai ihkai nohtok pulou Siprus nuk silak uloi kai, totahpik ihkai nyihing kiyak mbak pulou erih ihkai tulak nujun Siria. Khavun kahpal jok hatin kai erih pun docok nuk Tirus provinsi Siria, kotului arok barang jok harus pomukar khavun tonohtah nuk anai. 4 Nuk anai ihkai noharang dolang ulun jok pocayak khavun mocon nuk anai pihtuk ondo kotahiu ah. Khavun Roh Kudus bokesah ahkan ulun-ulun jok pocayak erih ahkan doh marak ah supayak Paulus arak tulak noku Yerusalem. 5 Totahpik beteng uwas docok noh waktu ah ihkai tulak tahkan anai nurus ponyalan kai. Dolang ulun pocayak erih pun tahtup dolang anak oruh doh, idoh ngitot kai nyiring boluak tahkan kota erih. Khavun nuk kovang laut ihkai tosuhkuk khavun bodoa. 6 Umbot ihkai promisik kanik tulak, ihkai nuhkat noku kahpal, idoh pun bulik noku lohpo.7 Tahkan Tirus ihkai docok nuk Ptolemais. Nuk anai ihkai tulak nomarung dolang ulun jok pocayak, ihkai nongak salam kai ahkan doh, khavun ihkai mocon icok ondo mbak idoh. 8 Ondo havun ah hinok ihkai tulak, khavun docok nuk Kaisarea. Nuk anai ihkai tobarung mbak icok behtik ponginjilan ngarai ah Pilipus, khavun ihkai mocon nuk lohpo ah. Pilipus iyok noh tahkan holang doh pihtuk behtik erih jok uwas kongopilik ngavat dolang rasul-rasul nuk Yerusalem. a 9 Pilipus tepun ohpat behtik anak bavik jok uwas beleh ah, dolang anak ah erih ongak Hotalak kohorahtik supayak doh touk marak tanjik Hotalak ahkan ulun arok. 10 Uwas arok pirak ondo kotahiu ah ihkai mocon nuk anai, lombut noh tahkan Yudea icok behtik nabik ngarai ah Agabus. b 11 Iyok lombut noku ihkai, khavun ngonin ikat pinggang Paulus. Sambil ngahut paai khavun longoi ah, khavun hiyoi ah: “Ihtuh noh jok pomarak Roh Kudus erih. Ulun jok tepun ikat pinggang ihtuh ahkan kongahut kolo ihtuh konguan ulun Yahudi nuk Yerusalem, khavun sonyerah noku kuasa ulun jok iyam ulun Yahudi.”
12 Kotihkak kai nyonih erih, ihkai khavun ulun-ulun jok pocayak jok mocon nuk Kaisarea nyavot tuꞌuk-tuꞌuk mbak Paulus supayak iyok iyam tulak noku Yerusalem. 13 Totahpik yok mutah ah hiyoi ah: “Inon jok nguan kam nangih sohinggak ihkam nguan ahtoi kuk hacur? Ahkuk uwas siap konahut khavun pomunuk nuk Yerusalem kotului Yesus.” 14 Kotului iyok iyam kanik nyonih auh kai, ihkai tondok nyavot mbak iyok supayak iyok arak noku anai hiyon kai marak yok: “Pohiyoi noh kokanin Tuhan jok torjadik!”
Paulus bohavung mbak Yakobus nuk Yerusalem
15 Arok pirak ondo mocon nuk Kaisarea, ihkai pun ngoripos, khavun tulak noku Yerusalem. 16 Arok pirak behtik ulun pocayak jok tahkan Kaisarea ngohasuk ihkai ihdoh ngitot kai noku lohpo Manason, iyok tahkan Siprus iyok uwas tahik noh pocayak mbak Yesus, ihkai ahkan nupang tiruh nuk lohpo ah nuk Yerusalem.
17 Kotihkak ihkai docok Yerusalem, paring ulun jok pocayak noharang ihkai tahtup kosenang doh. 18 Ondo bohkon ah hinok Tulak noh Paulus homboh mbak ihkai nomarung Yakobus, dolang paring pomipin jemaat arok nuk anai. 19 Paulus nongak salam ahkan doh, khavun ngesah ah mbak toliti paring aꞌang jok motaher jok uwas konguan Hotalak, nyihing iyok nuk holang bangsa-bangsak jok iyam bangsak Yahudi. 20 Umbot nyonih kesah Paulus erih, idoh paring ah momuji-muji Hotalak. Khavun hiyon doh ahkan Paulus: “Paulus kok harus taꞌai kotului arok bokujan-kujan ulun Yahudi jok uwas pocayak mbak Yesus. Idoh arok noh ulun-ulun jok pahtuh mbak Hukum Taurat jok tonulih Musa, 21 idoh nyonih kesah mongenai ihkok, kotului ihkok ngajar ulun Yahudi jok mocon nuk bangsa-bangsak jok bohkon, kok nyuhuk molahpas Hukum Taurat, kotului ihkok majak malax anak doh khavun arak bolum numun kobudayaan etok, 22 Jadik bokolo huntuh?” Ulun-ulun Yahudi jok percaya Idoh pasti nyonih ah ngindoi ihkok lombut noku ohtoi. 23 Kotului erih nyonih ah noh auh kai, kotului nuk ohtoi arok ohpat behtik jok uwas bojanjik mbak Tuhan. c 24 Ngoniu ah noh idoh havo-havoi mbak ihkok, khavun nyuci ah arop muk homboh mbak idoh khavun nanggung ah noh inon jok jadik kopoduluk doh, sohinggak doh touuk nguting balo doh mahkak paring ulun ahkan taꞌai inon jok kongesah doh mongeai ihkok paring ah salak, kotului ihkok halik bolum sosuai mbak Hukum Taurat. 25 Totahpik mongenai bangsa-bangsak jok bohkon, jok uwas jadik pocayak, uwas umbot kai nulih ah paring kopuhtusan kai, supayak idoh yataꞌai kuman ukun ponguman jok uwas ongak ahkan dolang topahtung jok sonyembah, khavun yataꞌai kuman ukun ponguman jok honong arok dahak ah, khavun kuman binahtang jok mahtoi sonyeok khavun yataꞌai tiruh hicok mbak bavik jok iyam avun human doh. d
26 Ondo havun ah Paulus pun ngomin doh ohpat behtik erih ngohasuk iyok, iyok muhik arop ah hicok humbak mbak idoh. Umbot erih Paulus nyolong noku Lovun Hotalak khavui marak ondo ah upacara muhik arop doh ahkan tuhtuk numun porahturan agamak Yahudi khavun idoh nongak surung doh havoi aiu noku Hotalak.
Paulus tonavan
27 Kotihkak uwas ondo kopihtuk ah manyo noh ohpah upacara muhik arop doh erih numun porahturan agamak Yahudi arok pirak behtik ulun Yahudi tahkan Asia nohtok Paulus nuk lovun Hotalak, idoh ngohasut ulun arok khavun navan Paulus. 28 Nahtup ngoriak: “Oo dolang ulun Israel. Nyonih ah noh! Ihtuh ulun jok tulak noku ohtoi anai ngajar tumbuk ulun mbak ajaran jok ngolavan bangsak etok, khavun ngolavan ajaran mongenai Hukum Taurat turus ngonin ulun jok iyam ulun Yahudi tuh noku teras Lovun Hotalak, khavun nguan kohtor nuk ohtoi.” 29 Idoh bokesah koderih kotului idoh nohtok Trofimus iyok iyam ulun Yahudi iyok tahkan Epesus ngohasuk Paulus, idoh moravak Paulus uwas umbot ngonin yok noku luvang Lovun Hotalak. e
30 Mahkak paring kota erih jadik kalut, khavun dolang kolunon lombut hokupur khavun navan Paulus khavun ngonin yok boluak tahkan Lovun Hotalak, beteng erih kak paring Pagar Lovun Hotalak tonuhtup doh. 31 Beteng doh ngevak kanik munuk yok ulun marak ahkan pomipin pasukan Roma, ngindoi Yerusalem jadik kalut. 32 Komandan erih tulak nahtup mbak dolang kopalak porajurit khavun dolang porajurit-porajurit, idoh ngimo-ngimos tulak noku unuk jok kalut erih. Beteng ulun arok nohtok Kopalak komandan erih mbak dolang porajurit ah, idoh tondok nahup Paulus. 33 Komandan erih ngoronik Paulus khavun navan yok, khavun nyuhuk ulun mahtuk borgol nuk longon Paulus. Khavun komandan erih ngisok iyai Paulus khavun inon jok uwas konuai ah. 34 Totahpik nuk holang ulun arok erih arok jok marak ah kolihtuh arok jok marak ah kolihik. Koadaꞌan ah makin kalut sohinggak pomipin porajurit erih iyam dahpat ngorehti inon jok uwas torjadik, kotului erih yok nyuhuk ngonin Paulus noku markas. 35 Kotihkak docok nuk honjan bahtuk dolang ulun arok erih nyangit birat khavun notucuk Paulus sohinggak Paulus kongahtang dolang porajurit erih. 36 Ulun arok jok ngohasuk idoh, idoh ngoriak hiyon doh: “Hai tok munuk yok!”
Paulus Nyavot arop ah bokesah
37 Beteng Paulus kanik onin doh nyolong noku markas, Paulus marak komandan erih: “Touk leh ahkuk bokesah nyohuluk mbak ihkok Tuan?”
Hiyon pomipin porajurit erih mutah yok: “Oo jadik ihkok touk hatin auh Yunani! 38 Ahkuk davak ihkok ulun Mesir erih malom jok napak mosalah khavun ngomin ohpat kujan behtik pongacau jok hatin sonahpang noku lahpang baras. Tahpik ahkuk salak.”
39 Paulus mutah ah: “Ahkuk arok noh ulun Yahudi, tahkan Tarsus kota jok paling poduluk nuk Kilikia. Ahkuk nyavot ahkak kuk touk bokesah mbak dolang ulun erih.”
40 Paulus pun kongijin ah Paulus tombok nuk honjan, khavun nongak kode hatin longoi ah. Paring ulun jadik tonih. Khavun Paulus bokesah ahkan doh nuk luvang auh Ibrani, hiyon Paulus,