Paulus noku Provinsi Makedonia khavun Troas
20
Umbot kokalut jok nuk Epesus erih tondok, Paulus ngupur dolang jemaat khavun nongak somangat ahkan doh. Khavun iyok nyavot promisik mbak idoh khavun nurus ponyalai ah noku Makedonia. 2 Iyok tulak noku daerah Makedonia masap ngajar marak ulun jok pocayak nuk daerah erih supayak doh tuꞌuk-tuꞌuk pocayak mbak Tuhan. Khavun yok pun tulak noku Yunani. 3 Uwas toluk bulan noh kotahiu ah yok mocon nuk anai tahkan anai iyok kanik tulak hatin khapal noku Siria. Totahpik beteng hun erih ulun-ulun Yahudi nuk anai kanik munuk yok. Kotului erih iyok ngopuhtus ah hulik hinok nyihing Makedonia. 4 Arok doh pirak behtik hombo-homboh umbak iyok, arok Sopater anak Pirus tahkan Barea, Aristarkhus khavun Sekundus, dorok tahkan Tesalonika, khavun Gayus tahkan Darbe, Timotius khavun duok behtik tahkan Asia, yok erih Tikhikus khavun Trofimus. 5 Idoh erih tulak holuk khavun ngindoi kai nuk Troas. 6 Beteng umbot porayaan Kue Iyam Konolakik, ihkai tulak hatin kahpal tahkan Pilipi. Limok ondo ulik erih ihkai docok nuk Troas khavun ihkai hokupur hinok mbak idoh nuk anai. Ihkai mocon sokitar icok minggu nuk anai.7 Ngolomik minggu kotihkak ihkai hokupur ahkan nguan perjamuan kudus, Paulus bokesah ahkan dolang bari-basak jok arok nuk anai, kotului ondo havun ah yok kanik tulak, iyok bokesah nyiring tohun ngolomik. 8 Nuk lohteng, nuk kai kupur, tumbuk lampu jok bolum pomasang doh nuk anai. 9 Arok icok behtik ngarai Eutikhus tuot nuk jendela. Kotului Paulus tahik bokesah, anak kinyam beleh erih yadahpat noron tunduk ah. Khavun iyok pun bototiruh nuk jendela saking kojolok ah iyok botahak tahkan lohteng tingkat toluk noku pindak. Beteng doh ngahtang yok, iyok uwas mahtoi. 10 Khavun Paulus mosuluh noku pindak iyok ngohavon anak kinyam beleh erih khavui marak ah: “Arak bohok, kotului iyok honong bolum.” 11 Umbot Paulus hulik noku lohteng lohpo erih khavun ihkai kuman hombo-homboh. Umbot Paulus kuman mahkak iyok bokesah suhkup tahik, nyiring topolaoi yok bokesah. Khavui ah tulak. 12 Umbot erih doh ngitot anak kinyam beleh jok bolum erih noku lohpo ah, idoh pun ngandah mongenai inon jok uwas torjadik.
Ponyalan Paulus tahkan Troas noku Miletus
13 Ahkuk Lukas hombo-homboh mbak idoh tulak holuk noku kahpal erih, turus noku Asos. Ihkai noku anai ngonin Paulus, sosuai mbak tanjik ah, kotului iyok nyalan paak bongoi buah diang. 14 Beteng yok tobarung mbak kai nuk Asos, ihkai ngonin yok noku kahpal, khavun nurus ponyalan kai noku Metilene. 15 Tahkan anai ihkai nurus ponyalan kai nyiring ngohkos ihkai dahpot nuk donik Pulou Khios ondo jok kobohkon ah hinok ihkai tulak noku Samos khavun ondo jok koduok ah ihkai docok nuk Miletus. 16 Paulus kanik supayak ihkai iyam tulik nuk Epesus supayak iyam ohpah waktu doh nuk Asia. Kotului iyok jonyo-jonyok, supayak iyok touk arok nuk Yerusalem tumbas ondo Pentakosta.
Paulus nyavot promisik mbak dolang pomipin jemaat Epesus
17 Kotului erih iyok nyuhuk icok behtik ulun tahkan Miletus noku Epesus supayak nyapai tanjik ah ahkan dolang pomipin-pomipin jemaat Epesus supayak idoh lombut noku Miletus. 18 Beteng dolang ponipin jemaat erih lombut iyok marak doh hiyoi ah, Ihkam taꞌan bokolo ahkuk bolum nuk holang ihkam tahkan topahtuk kuk lombut noku Asia. 19 Ahkuk molayan Tuhan iyam sombong khavun nuk luvang polayanan erih ahkuk tumbuk nangih. Khavun tumbuk mosalah konguan ulun Yahudi ahkak kuk idoh kanik munuk kuk. 20 Holuk noh hiyoi koderih ahkuk yapujik nohtah khavun nolingau ah ngajar marak kam nongenai aꞌang jok bogunak ahkan mik, ahkuk ngajar kam depan ulun arok khavun nuk lohpo-lohpo mik. 21 Ahkuk nulo ngajar ulun Yahudi khavun ulun Yunani supayak idoh botobat noku Hotalak khavun pocayak mbak Tuhan tok Yesus Lacak ponyolamat erih. 22 Huntuh kotului ahkuk ngohasuk kokanin Roh Kudus mahkak kuk tulak noku Yerusalem, khavun ahkuk iyam kuk taꞌai inon jok ahkan torjadik ahkak kuk nuk anai. 23 Totahpik ahkuk taꞌai nyinong kota Roh Kudus monjelas ah ahkak kuk ngindoi ulun-ulun ahkan ngipos ahkuk noku luvang ponjara khavun ahkan monyorak ahkuk. 24 Totahpik ahkuk iyam podulik oluk poh aꞌang erih bohayak, ulun touk munuk ahkuk, jok paling poduluk ahkak touk nyolesai polayanan jok uwas ongak Tuhan Yesus ahkak kuk, supayak ahkuk tuꞌuk-tuꞌuk ngesah Tarung Pios mongenai kopion Hotalak. a
25 Khavun huntuh ahkuk taꞌai, ngindoi ihkam yarok ahkan nohtok tapak kuk hinok, tahpik ahkuk uwas lombut noku ihkam ngesah ah nongenai bokolo Hotalak momorintah jadik Lacak nuk isung kam paring ah. 26 Hondo ihtuh ahkuk bokesah tuꞌuk-tuꞌuk ahkam mik ngindoi arok nuk holang ihkam nain jok iyam sonyolamat, iyam salak ahkuk. 27 Kotului ahkuk iyam langak ngesah paring evak Hotalak ahkam muk. 28 Kotului erih jagak ah noh arop muk khavun dolang jemaat jok sonyerah Roh Hotalak ahkamuk supayak kok jagak ah, kotului ihkok noh jok konopilik Roh Hotalak ahkan jagak dolang jemaat Ah kolo ponjagak domba jagak domba-domba ah. Kotului paring jemaat erih uwas konopilik Ah khavun Iyok noh tepui Ah, khavun Anak Ah uwas mahtoi nuk nguan aꞌang erih torjadik. 29 Ahkuk taꞌai, ngindoi ahkuk uwas nohtah ihkam, ulun-ulun jok jaek ahkan lombut ngalut kolompok ulun-ulun jok pocayak, idoh ahkan ngolohpung ngolumat dolang jemaat erih. Ulun jok jaek erih idoh kolo horomaung jok bosiak ahkan lombut noku tohun-tohun domba khavun ahkan ngolohpung ah. 30 Khavun tahkan holang ihkam ahkan arok pirak behtik, idoh ahkan marak ihkam mbak ajar barak jok salak idoh ahkan ngohasut jemaat supayak ngohasuk ajaran doh, jok salak erih. 31 Kotului erih touk-touk khavun nohouk ah, ahkuk ngajar marak ihkam paring ah yapujik tondok hondo khavun ngolomik kotahin toluk toun erih, tahtup tangih kuk.
32 Khavun huntuh ahkuk nyerah ihkam noku Tuhan, supayak ihkam konojagak Ah khavun ihkam tehtap namit kopios Hotalak. Kopios Ah jok nguan ihkam makin pocayak mbak Iyok, khavun Iyok nongak bagian jok uwas sonyodiak ah ahkan sotiap ulun-ulun jok pocayak mbak Iyok. 33 Iyam pujik ahkuk jolik koponahto ulun bohkon jok ai tepui ah. 34 Ihkam halik taꞌai ngindoi ahkuk korejak supayak duon duit gunan duit jok duok kuk erih unuk molik dolang inon jok jadik kopoduluk kai khavun dolang jolahak kuk jok ngohasuk ahkuk umbak kumai ah kak. 35 Ahkuk uwas motohtok ah ahkan mik nyihing dolang tobiat kuk kotului mbak korejak puntang-panting numun ekuk erih ihtok harus ngavat ulun jok yarok duon doh korejak. Khavun ihkam harus nohouk ah inon jok pomarak Tuhan Yesus hiyoi ah: “Konomerkat noh ulun jok nongak dari padak ulun jok norimak.”
36 Umbot yok marak paring kesah ah erih Paulus tosuhkuk khavun bodoa havo-havoi mbak idoh. 37 Mahkak nangih noh doh paring ah khavun doh ngohavon yok turus marak solamat jalan ahkan Paulus. 38 Mahkak piluk noh ahtoi doh kotului iyok bokesah: “Ihkam iyam ahkan bohavung mbak ahkuk hinok.” Khavun idoh ngitot iyok noku kahpal.