Paulus nuk Epesus
19
Kotihkak Apolos honong nuk Korintus, Paulus tulak nyalan nyihing kapung-kapung daerah erih iyok docok nuk Epesus nuk anai iyok bohavung pirak behtik ulun jok pocayak mbak Yesus. 2 Paulus ngisok doh hiyoi ah: “Umbot noh reh kam norimak Roh Kudus, beteng kam pocayak mbak Yesus?”Totahpik doh mutah yok hiyon doh: “Jaham, ihkai pun jaham alik nyonih, ngindoi arok Roh Kudus.” 3 Khavun hiyon Paulus ahkan doh: “Ngindoi koderih hatin baptisan jok kongajar iyai ihkam konombaptis?” Idoh mutah ah: “Hatin baptisan Yohanes.” 4 Hiyon Paulus ahkan doh hinok: “Baptisan Yohanes arok noh baptisan ulun jok uwas botobat, totahpik Yohanes pujik marak ahkan ulun arok, kotului idoh harus pocayak mbak ulun jok ahkan lombut ulik iyok, yok erih Yesus.” a
5 Kotihkak doh nyonih auh Paulus, idoh nongak arop doh konombaptis nuk luvang ngaran Tuhan Yesus. 6 Khavun beteng Paulus nihkas longoi nuk isung kuhung doh, mosuluh noh Roh Kudus noku isung idoh khavun doh pun bokesah hatin dolang auh jok iyam ulun ngorehti ah, khavun doh ngesah auh tahkan Hotalak. 7 Karon doh sokitar duok balas behtik.
8 Uwas toluk bulan noh kotahiu ah Paulus mocon nuk Epesus iyok ngajar doh paring ah nuk lohpo nuk doh sombayang. Umbak hanyiu ah iyok ngotiak ngoyakin doh mongenai Korajaan Hotalak. 9 Arok pirak behtik ulun nuk holang idoh mahang jaan doh iyam kanik pocayak mbak Yesus. Mahkak nuk husuk ulun arok doh ngohinak jalan kosolamatan nuk luvang Yesus. Kotului erih Paulus pun nohtah idoh khavun tulak havo-havoi umbak ulun-ulun jok pocayak mbak Yesus. Sotiap ondo Paulus ngajar ulun jok pocayak erih nuk lovuk sokulah ngarai ah Tiranus. 10 Aꞌang erih konguan Paulus duok touk kotahiu ah, sohinggak paring ulun Asia nyonih Auh Hotalak, ulun Yunani khavun ulun Yahudi halik nyonih ah.
11 Nyihing Paulus Hotalak nguan aꞌang jok motaher jok yam masuk ahkar. 12 Ngindoi ulun ngonin kain jok pujik Paulus hapai kain erih tonihkas doh noku ulun jok poros mahkak ulun erih solengak pios, khavun dolang oros doh niho khavun roh-roh jaek jok nyolong noku ulun-ulun erih pun boluak.
Anak-anak Skewa
13 Arok pirak behtik dukun idoh ulun Yahudi, idoh nyalan ngoliling nuk daerah Epesus, dolang dukun erih nikos hatin ngaran Tuhan Yesus muhkok roh jaek jok nyorupang ulun-ulun erih idoh marak ahkan dolang roh jaek erih: “Hatin ngaran Tuhan Yesus jok kongesah Paulus erih ihkai ngusir ihkam!” 14 Arok pihtuk behtik anak bahkas idoh anak kopalak pomipin agamak Yahudi ngarai Skewa, idoh ngusir roh jaek erih hatin ngaran Tuhan Yesus.
15 Hiyon roh jaek erih ahkan doh: “Yesus ta'ak kuk, Paulus halik sokonak kuk, tahpik ihkok, iyai kok tuh?”
16 Khavun ulun jok sonyorupang roh jaek erih nocahap navan doh, idoh pun buho tahkan lohpo erih nahtup toburang dolang behtin doh havan, khavun hatin doh tonisah ulun jok sonorupang erih. 17 Paring ulun jok mocon nuk Epesus nyonih kojadian erih, idoh ulun Yahudi khavun ulun Yunani, idoh jadik mihkoh. Mahkak idoh momuji ngaran Tuhan Yesus. 18 Tumbuk nuk holang idoh uwas jadik pocayak, idoh lombut khavun ngahkuk nuk husuk ulun arok, kotului idoh pujik hatin gajik. 19 Tumbuk kak nuk holang doh jok pujik hatin gajik, idoh ngupur dolang buhkuk gajik doh erih khavun doh mahpui ah, nuk husuk ulun arok. Lehkan dolang buhkuk gajik doh erih sokitar liman puluk kujan duit perak.b 20 Umbot paring ah erih torjadik mahkak Auh Hotalak kongihan nuk amo-amoh khavun makin tumbuk ulun jok pocayak mbak Iyok.
Demetrius nguan kokalut nuk Epesus
21 Umbot kojadiu erih, Paulus tulak noku Yesusalem nyihing Makedonia khavun Akhaya. Hiyoi ah: “Umbot tahkan anai ahkuk harus tulak noku Roma.” 22 Khavun iyok nyuhuk duok behtik jolahai ah Timotius dorok Erastus holuk tulak noku Makedonia, iyok bongoi mocon arok pirak ondo kotahiu ah nuk provinsi Asia.
23 Beteng hun erih torjadik noh kokalut jok punak nyangit mongenai ajar barak Paulus tului kosolamatan arok nuk luvang Yesus. 24 Kotului nuk anai arok icok behtik tuhkang perak ngarai ah Demetrius, iyok nguan lohpo-lohpo koik nuk nyembah Dewi Artemis. Usaha ah ngonduon duit punak arok ahkan dolang ulun jok nuhkang ah. 25 Kotului erih iyok ngupur dolang tuhkang ah khavun ulun tuhkang perak jok bohkon, khavun marak doh: “Dolang paring bari-basak! Ihkam taꞌan mik ngindoi ihtok ngonduon arok duit tahkan hasil korejak tok tuh. 26 Ihkam umbot nohtok khavun nyonih inon jok konguan Paulus erih. Iyok marak ah ngindoi dewa-dewa jok tonapak kolunon iyam dewa jok asli. Khavun iyok uwas nguan ulun arok pocayak mbak inon jok kongajar ah, iyam hanya nuk Epesus tuh, totahpik nuk paring daerah Asia. 27 Bohayak ah iyok nguan ngaran usaha tok tuh jaek khavun aꞌang jok konorejak tok tuh hacur nuk husuk ulun arok, umbot erih ulun iyam ahkan nganggap ah poduluk lohpo unuk nyembah Dewi Artemis jok bokuasak erih. Ulun-ulun halik iyam ahkan ngohormat Dewi Artemis, podahal kotahin ihtuh ulun-ulun jok arok nuk Asia khavun jok arok nuk bohkon nyembah yok.”
28 Beteng ulun-ulun erih nyonih yok bokesah koderih idoh turus birat, idoh ngorahang ngoriak hiyon doh: “Torpuji noh Artemis jok jadik dewi ulun Epesus jok punak bokuasak!” 29 Mahkak paring kota erih jadik kalut. Khavun duok behtik ulun jok baꞌas ngohasuk Paulus tahkan Makedonia yok erih Gayus khavun Aristarkhus dorok tonavan khavun konuhut ponolihit noku tohun ulun arok hokupur. 30 Paulus kanik ngohasuk noku anai tahpik ulun-ulun jok pocayak mbak Yesus nuk anai majak yok. 31 Arok pirak behtik pomipin jok isung nuk Asia doh hojolahan mbak Paulus, idoh nyuhuk ulun lombut noku Paulus marak tanjik doh supayak Paulus arak tulak noku ulun arok erih hokupur. 32 Beteng hun erih ulun-ulun jok hokupur erih idoh ngorahang ngoriak malik macam khavun jadik kalut noh nuk anai, kotului idoh tumbuk jok iyam taꞌai inon tujuan doh hokupur nuk anai. 33 Tahkan holang ulun arok erih, arok jok moravak Aleksander jok salak kotului ulun-ulun Yahudi notucuk yok noku husuk doh. Iyok ngahatang longoi ah khavun bokesah ahkan doh nyuhuk doh tonih, kotului iyok kanik bokesah monjelas ah ngindoi dorok jolahai iyam salak kolo jok tonuduh doh erih 34 Totahpik kotihkak doh taꞌai ngindoi Aleksander ulun Yahudi, idoh ngoriak sokitar duok jam kotahiu ah hiyon doh: “Torpuji noh Artemis, dewi ulun Epesus!”
35 Ahkan totahpik dolang seketaris kota erih nyuhuk doh tonih, khavui marak doh paring ah hiyoi ah: “Oo Paring ulun Epesus! Nuk amo-amoh ulun taꞌai ngindoi kota tuh jok jagak lohpo nuk nyembah Dewi Artemis khavun bahtuk suci jok botahak tahkan langit. 36 Yarok icok behtik pun jok dahpat mutah mongenai hal erih, kotului erih tonih khavun mihkir ah holuk sojaham kam nguai ah. 37 Kotului ihkam paring mik ngonin dorok tuh noku ohtoi. Ihkam ngonin dorok iyam kotului dorok nahko lohpo nuk nyembah dewa erih atau ngohinak dewi erih. 38 Jadik ngindoi Demetrius khavun dolang tuhkang ah erih birat mbak ulun bohkon, idoh touk ngolahpor ah noku pongadilan. Kotului pongadilan siap ngurus mosalah idoh mbak adil. 39 Totahpik ngindoi ihkam arok mosalah jok bohkon ah hinok, ihtok touk hoposarak nuk husuk ulun arok jok konahtur pomoretah. 40 Kotului inon jok konguan tok hondo tuh touk nguan tok bohayak. Ihtok touk pomarak tuhkang nguan kokalut ihtuh, kotului ihtok iyam taꞌan tok monjelas ah ngombai kokalut ihtuh arok.” 41 Umbot yok kesah naing erih, seketaris kota erih pun nyuhuk ulun arok erih bulik.