Paulus nuk Korintus
18
Umbot erih Paulus tulak tahkan Atena noku Korintus. 2 Nuk Korintus Paulus bohavung umbak icok behtik ulun Yahudi ngarai ah Akwila, ulun erih borasal tahkan daerah Pontus. Iyok punai lombut tahkan Italia dorok oruh ah Priskila, kotului Kaisar Klaudius uwas nyuhuk supayak paring ulun Yahudi nohtah Roma. Paulus noku lohpo Akwila, 3 khavun iyok mocon hicok mbak Akwila dorok oruh ah. Kotului iyok hicok korejak mbak dorok, kotului korejak doh havo-havoi napak tenda ahkan dahkang doh. 4 Khavun nyinong ondo sabat Paulus tulak noku lohpo sombayang ulun Yahudi iyok ngotiak nguan ulun Yahudi khavun ulun Yunani jok arok nuk anai supayak idoh pocayak mbak Yesus, Yesus erih iyok noh Lacak Ponyolamat.5 Beteng Silas dorok Timotius lombut tahkan Makedonia, Paulus ngajar doh bojondo-jondo ngesah mongenai Yesus, Paulus ngajar doh tuꞌuk-tuꞌuk ngindoi Yesus iyok noh Lacak Ponyolamat jok kongindoi doh. 6 Totahpik beteng Paring ulun jok hobatah khavun ngohinak iyok, iyok nopuhit korovuk tahkan hatiu ah sobagai tandak iyok iyam nai podulik mbak idoh, hiyoi ah: “Ngindoi ihkam nokacuk arop mik tahkan husuk Hotalak, erih iyam salak kuk, nopahtuk tahkan huntuh ahkuk ahkan nohtah ihkam khavun ngesah mongenai Tarung Pios ihtuh ahkan ulun jok iyam ulun Yahudi kiyak.” 7 Mahkak boluak noh iyok tahkan lohpo sombayang ulun Yahudi erih, khavun iyok lombut noku lohpo icok behtik bahkas ngarai ah Titius Yustus, Titius sombayang noku Hotalak, lohpo ah hokoronik mbak lohpo sombayang ulun Yahudi erih. 8 Totahpik Krispus, kopalak lohpo sombayang ulun Yahudi erih iyok jadik pocayak mbak Tuhan Yesus, iyok khavun paring ulun jok arok nuk luvang lohpo ah, khavun tumbuk ulun Korintus jok nyonih ajar barak Paulus, jadik pocayak khavun nongak arop doh konombaptis.
9 Beteng ngolomik Tuhan mokarah arop Ah ahkan Paulus kolo nuhpiu nih, hiyon Ah: “Arak mihkoh mbak ulun-ulun erih! Totahpik kok tehtap ngajar marak doh mongenai Tarung Pios khavun arak tondok nguan inon jok konguamuk huntuh. 10 Kotului Ahkuk jagak kok khavun yarok icok betik pun jok ahkan moros khavun monyorak kok, kotului tumbuk ulun jok pocayak mbak Ahkuk nuk kota ihtuh.” 11 Mahkak mocon noh Paulus nuk Korintus icok toun onom bulan kotahiu ah khavun iyok ngajar marak mongenai Auh Hotalak ahkan doh.
12 Ahkan totahpik beteng Galio jadik gubernur nuk provinsi Akhaya, mahkak ulun-ulun Yahudi idoh havo-havoi ngolavan Paulus, Khavun ngonin yok noku pongadilan. 13 Hiyon doh: “Iyok ihtuh ngajar ulun sombayang noku Hotalak totahpik ajar barak ah erih hokolavan mbak pongajaran nuk luvang Hukum Taurat!”
14 Beteng Paulus kanik nopahtuk kesah ah, totahpik hiyon Galio ahkan ulun-ulun Yahudi erih: “Oo ihkam ulun Yahudi! Ngindoi jok kongaduk mik tuh mongenai kosalak ah atau mongenai kojaek ah mbak ihkam, ahkuk ahkan ngadil yok. 15 Totahpik ihtuh mosalah porahturan agamak jok ihkam pocayak ah, kotului erih ihkam bongon mik noh jok ngurus mosalah tuh. Ahkuk elekuk marak ah amoh jok hinut amoh jok salak mongenai mosalah tuh” 16 Khavun Galio ngusir doh tahkan nuk luvang lovuk nuk pongadilan erih. 17 Mahkak idoh navan Sostenes iyok kopalak lovun ibadat, idoh nahup yok nuk luvang lovuk nuk pongadilan erih. Galio nohtok inon jok konguan doh mbak iyok totahpik yok tonih kiyak.
Paulus hulik noku Antiokia
18 Umbot erih Paulus mocon arok pirak ondo hinok nuk Korintus, khavui ah tulak tahkan provinsi Siria iyok promisik mbak dolang bari-basak ah jok pocayak mbak Hotalak jok arok nuk Korintus, beteng yok nuk Pelabuhan Kengkrea iyok nyavot ulun nguting balow ah kotului iyok pujik tuꞌuk-tuꞌuk bojanjik mbak Hotalak iyok nyuhuk Hotalak jadik saksi ah. Khavun doh pun tulak noku provinsi Siria. Priskila dorok bosai ah Akwila umbak nupang kahpal ngohasuk Paulus. 19 Kotihkak docok nuk Epesus, Paulus nohtah Priskila dorok bosai ah Akwila, khavun nyolong noku lohpo sombayang ulun Yahudi khavun botuhkar pihkir mbak ulun-ulun Yahudi nuk anai. 20 Idoh nyavot iyok mocon tahik nuk anai tahpik iyok beleu ah. 21 Totahpik beteng ah kanik tulak iyok marak doh hiyoi ah: “Ngindoi Hotalak nyuhuk ahkuk hulik, ahkuk ahkan lombut nok noku ohtoi.” Umbot yok bokesah koderih iyok pun tulak tahkan Epesus.
22 Beteng yok docok nuk Kaisarea, iyok nuhkat noku Yerusalem khavui nongak salam ahkan jemaat nuk anai, ulik erih yok tulak hinok noku Antiokia. 23 Khavun arok pirak ondo iyok mocon nuk anai, iyok tulak noku paring daerah nuk Galatia khavun Prigia iyok ngoyakin doh jok arok nuk anai khavun nguan doh mahi-mahik pocayak mbak Hotalak.
Apolos nuk Epesus
24 Beteng erih lombut noh noku Epesus icok behtik ulun Yahudi ngarai ah Apolos, iyok borasal tahkan Aleksandria. Iyok arok noh ulun jok touk ngajar khavun nguasak mongenai pongajaran nuk luvang Alkitab. 25 Iyok uwas norimak pongajaran mongenai Yesus. Umbak somangat iyok bokesah khavun umbak kotoliti ah iyok ngajar mongenai Yesus, totahpik nuk luvang baptisan, iyok cumak taꞌai inon jok kongajar Yohanes pombaptis beteng yok mombaptis ulun. 26 Iyok ngajar tahtup hanyiu ah nuk lovun ibadat. Totahpik kotihkak Priskila dorok bosai ah Akwila nyonih ah, mahkak dorok ngonin yok noku lohpo dorok khavun dorok monjelas ah punak toliti ahkai ah mongenai jalan kosolamatan. 27 Umbot erih Apolos kanik mihtah noku provinsi Akhaya, ulun-ulun jok pocayak mbak Hotalak jok arok nuk Epesus nongak surat ahkan dolang ulun-ulun jok pocayak jok arok nuk Akhaya, supayak idoh noharang Apolos umbak pios. Beteng yok docok nuk Akhaya, kotului kopion Hotalak ahkai ah, mahkak iyok jadik ulun jok bogunak ahkan ulun-ulun jok uwas pocayak jok arok nuk Akhaya. 28 Kotului iyok iyam boka-bokah mutah ulun-ulun Yahudi nuk husuk ulun arok khavun monjelas ah tahkan Alkitab ngindoi Yesus Iyok noh Lacak Ponyolamat.