Petrus ngopios ulun kehtot
3
Hondo erih Petrus khavun Yohanes tulak noku Lovun Hotalak sokitar jam toluk cohit beteng jam doh sombayang. 2 Nuk anan arok ulun bahkas jok kehtot tahkan kolengak ah, sohinggak iyok harus tonandu. Nyinong ondo iyok tonihkas jolahai ah donik tukang gerbang Lovun Hotalak ngaran unuk erih “Gerbang Tamam”, ahkai ah touk nyavot duit tahkan ulun jok boluak nyolong tahkan Lovun Hotalak. 3 Beteng ulun jok kehtot erih nohtok Petrus khavun Yohanes kanik nyolong, iyok nyavot duit umbak dorok. 4 Khavun dorok nohtok ulun kehtot erih, hiyon dorok: “Nohtok korok!” 5 Mahkak iyok nohtok dorok nahtup boharap ahkan norimak duit tahkan dorok. 6 Khavun Petrus marak yok: “Iyam arok jok arok humbak-mbak ahkuk mahik nok duit. Tahpik inon jok kuk tepui ahkan itot kuk ahkam muk. Umbak kuasa ngaran Yesus Lacak Ponyolamat ulun Nasaret, ihkok nyalan nai!” 7 Khavun Petrus namit hilak kotouk longon bahkas erih dohop iyok tombok. Kotihkak erih kak dolang paꞌai boko pios. 8 Khavun iyok tombok turus nomarang, iyok nyalan kohtoi kanai khavun iyok umbak dorok nyolong noku luvang Lovun Hotalak nahtup nopenjuk momuji Hotalak. 9 Paring ulun nohtok iyok nyalan nahtup momuji Hotalak. 10 Khavun doh nyokonok iyok, iyok noh ulun jok tuot ba'as nyavot nuk “Gerbang Tamam” Lovun Hotalak, sohinggak idoh pusong umbak inon jok terjadi umbak iyok.Kotbah Petrus nuk Lovun Hotalak
11 Ulun erih atak ngohasuk Petrus khavun Yohanes. Beteng doh toluk dahpot nuk “Sorambi Salomo” nuk tohopan Lovun Hotalak erih, paring ulun lombut ngorumbuk doh toluk tului idoh salut. 12 Beteng kotihkak Petrus nohtok doh, iyok marak ulun arok erih: “Oo ulun-ulun Israel, ngombai ihkok pusong mbak aꞌang ihtuh? Ngombai ihkok nohtok tului kopahtuh kai umbak Hotalak khavun kuasa jok hapan kai havoi mbak kuasa ekai nih, ihkai uwas nguan ulun ihtuh nyalan? 13 Iyam hapan kuasa ihkai tahpik kuasa Hotalak jok ngopios iyok. Hotalak jok sonyembah Abraham, Ishak khavun Yakub, Hotalak tahtuk ajuh tok uwas nguan aꞌang ihtuh ahkan ngisung Yesus Jihpon Hotalak. Yesus noh jok uwas sonyerah mik ahkan pomunuk. Ihkam ngomelek iyok nuk husuk Gubernur Pilatus, podahal Pilatus uwas muhtus ah ahkan molahpas Iyok. a 14 Ihkam iyam kanik ngahkuk Iyok jok Kudus khavun jok paling hinut, tahpik ihkam nyavot umbak Pilatus ahkan Barnabas jok pujik munuk erih pomolahpas ahkan mik. b 15 Jadik sobenar ah ihkam uwas munuk Yesus jok Tepun Bolum, totahpik Hotalak uwas nguan Iyok hulik bolum tahkan pahtoi Ah. Ihkai uwas konguhtus ahkan ngesah kojadiu erih. 16 Kuasa Yesus noh jok mokuat ulun kehtot jok kihtan mik ihtuh khavun ulun tuh sokonan mik. Aꞌang ihtuh tok torjadik tului ihkai pocayak umbak Yesus khavun kuasa Ah. Tuꞌuk numun jok uwas kihtan mik, ulun ihtuh uwas pios tului iyok kopocayak umbak Yesus.
17 Dolang bari-basak ahkuk, taꞌak tului ihkam khavun dolang pomipin-pomipin muk iyam ngorehti umbak inon jok uwas ihkam nguai ah beteng kam munuk Yesus. 18 Totahpik umbak jalan erih noh Hotalak nepat janjiu Ah jok kongohavot ah lomoi nyihing auh dolang nabik kotului Lacak Ponyolamat harus kongonjorak nyiring mahtoi. 19 Tului erih botobat noh khavun hulik noku Hotalak, ahkan dosa-dosa muk kongapun. 20 Khavun Hotalak ahkan nguan ihkok mahik aman umbak Iyok. Khavun tak sinok nok Hotalak ahkan nguhtus Yesus ahkan ihtok yok erih Iyok jok uwas kongopilik Hotalak jadik Lacak Ponyolamat. 21 Totahpik Yesus harus mocon nuk surga nyiring dahpot ohkot ah paring aꞌang ahkan konguai bohuak, havoi umbak inon jok kongohavot Hotalak nyihing dolang nabik jaman lomoi. 22 Nohouk ah inon jok kongohavot Musa, ‘Tuhan Hotalak muk ahkan nguhtus icok behtik nabik hinok ahkan ihkam iyok erih nabik havoi mbak ahkuk jok asal ah tahkan bangsak etok. Ihkam harus pahtuh umbak inon jok pomarak nabik erih. c 23 Khavun ulun jok iyam pahtuh umbak nabik erih ahkan kongohicok Hotalak, khavun Hotalak ahkan kongolohpung doh.’ 24 Tahkan Nabik Samuel, nyiring dolang nabik jok bohkon uwas marak tanjik Hotalak jaman ihtuh. 25 Ahkan ihkam Hotalak nongak janji-janjik jok uwas kongohavot ah ahkan dolang nabi-nabik. Ahkan ihkam kak janjik jok uwas Iyok ngohavot ah ahkan Abraham, yok erih, ‘Nyihing ulun-ulun tahkan koturun muk Ahkuk ahkan napak aꞌang jok pios ahkan paring bangsak.’ d 26 Jadik beteng Hotalak hulik ngomolum Yesus tahkan holang ulun mahtoi, Hotalak nguhtus Jihpoi Ah noku ihtok, supayak Iyok ngomerkat ihtok umbak cara nguan ihtok havo-havoi botobat tahkan paring kojaek ahtoi tok.”