Petrus khavun Yohanes mombela arop dorok nuk husuk Mahkamah Agamak
4
Kotihkak Petrus khavun Yohanes honong bokesah umbak ulun arok, nyolengak lombut pomipin-pomipin agamak Yahudi khavun kopalak pongawal Lovun Hotalak khavun hicok umbak dolang ulun-ulun tahkan kolompok Saduki. 2 Ulun-ulun erih birat tului Petrus dorok Yohanes ngajar ulun arok khavun marak luvang Yesus arok bolum oluk poh ihtok uwas mahtoi. 3 Jadik dolang kopalak erih navan dorok khavun ngipos dorok luvang ponjara. Tului ondo uwas pindong dorok tonahan nyiring ondo icok ah. 4 Tahpik tumbuk ah holang ulun jok nyonih ajar Petrus khavun Yohanes erih jadik pocayak, sohinggak idoh makin arok kira-kira limok kujan behtik ulun bahkas iyam tormasuk ulun bavik khavun dolang anak kinyam.5 Ondo havun ah dolang pomipin ulun Yahudi khavun okok-okok nahtup dolang guruk agamak Yahudi ahkan hoposarak nuk Yerusalem 6 Umbak Pomipin Agamak Yahudi jok paling isung, Hanas dorok Kayafas, Yohanes dorok Aleksander, nahtup paring ulun-ulun jok koturun Pomipin Agamak Yahudi jok paling isung. 7 Khavun Petrus dorok Yohanes itot kuk pokarak erih, turus kongisok umbak kisok jok naing ihtuh: “Umbak inon atau hapan kuasa iyai borok nguan ulun kehtot erih konopios?” 8 Petrus beteng erih konguasak Roh Kudus iyok mutah ah: “Oo dolang okok-okok agamak Yahudi khavun dolang okon-okon nogara. 9 Ngindoi hondo tuh ihkai pomosarak tului ihkai nguan aꞌang jok pios ahkan ulun jok kehtot, khavun kongisok bohkolo ah iyok touk konopios. 10 Mahkak mosuah paring mik nahtup paring ulun Yahudi taꞌai tului ulun ihtuh konopios luvang ngaran khavun kuasa Yesus Kristus ulun Nasaret, jok uwas sonyalib mik lomoi totahpik Hotalak ngombolum Iyok tahkan pomalus Ah. Mahkak hapan kuasa Yesus noh ulun kehtot ihtuh touk tombok umbak kosehat ah nuk husuk paring mik. 11 Kolo auh jok uwas pomarak Hotalak,
‘Yesus sonyamak sobagai bahtuk ponahan jok iyam bogunak ahkan mik sobagai tuhkang bagunan,
totahpik Hotalak uwas nguan bahtuk erih jadik bahtuk jok paling poduluk.’ a
12 Jadik Yesus bongoi ah noh jok touk ngavat kolunon. Tahkan paring ulun nuk duniak tuh Yesus jok kongopilik Hotalak ahkan nyolamat kolunon. Iyam arok jok bohkon salak mbak Yesus.”
13 Kotihkak dolang Pomipin Pokarak Pongadilan Agamak nohtok hanyin Petrus dorok Yohanes idoh pusong tului idoh taꞌai ngindoi dorok yarok ponyokulah dorok. Khavun idoh sadar ngindoi Petrus dorok Yohanes murit Yesus. 14 Khavun ulun jok uwas konopios erih tombok donik Petrus khavun Yohanes, mahkak dolang kopalak erih iyam dahpat bokesah inon-inon ahkan doh touk navan Petrus dorok Yohanes. 15 Jadik idoh nyuhuk Petrus khavun Yohanes boluak tahkan ruangan posarak erih, khavun doh hopahkat havo-havoi, hiyom doh, 16 “Inon jok ahkan konguan tok ahkan dorok erih? Tului paring ulun nuk Yerusalem uwas taꞌan doh aꞌang jok punak motaher jok uwas konguan doh, khavun ihtok iyam dahpat ngilang ah. 17 Totahpik ahkan kesah ihtuh arak sapai soup kota'an ulun arok, ihtok poduluk ngancam doh khavun nahtup majak dorok bokesah ahkan iyai pun jok hapan ngaran Yesus.”
18 Mahkak idoh nyuhuk Petrus khavun Yohanes nyolong hinok. Umbot erih idoh majak dorok ngajar khavun ngesah mongenai Yesus ahkan iyai pun.
19 Totahpik Petrus khavun Yohanes mutah doh: “Ihkam bongon mik noh mihkir ah amoh jok pios, Pahtuh umbak Hotalak ngindoi iyam pahtuh umbak ihkam! 20 Tului iyam arok anggar ah ihkai iyam ngesah aꞌang jok uwas kihtan kai khavun jok uwas umbot ihkai nyonih ah.” 21 Idoh atak ngancam Petrus khavun Yohanes, khavun doh molahpas dorok, ulik doh iyam ngonduon kosalak ahkan ngohukum dorok tului ulun arok momuji Hotalak tahkan inon jok uwas torjadik. 22 Tului ulun jok konopios umbak aꞌang jok motaher erih umur ah uwas holovik mbak ohpat puluk toun.
Doa jemaat
23 Tona'ak pomolahpas tulak noh Petrus khavun Yohanes noku jolahan dorok, khavun dorok ngesah paring aꞌang jok kongesah dolang kopalak pomipin agamak Yahudi khavun dolang okok-okok Yahudi beteng dorok pomosarak. 24 Kotihkak dolang jolahan dorok nyonih auh erih, bodoa noh idoh kuk Hotalak, hiyon doh: “Oo Tuhan ihkok noh jok napak langit khavun duniak, laut nahtup suang ah. b 25 Tului Roh Kudus Muk, Ihkok uwas bokesah nyihing jihpom Muk, Daud iyok tahtuk ajuh kai,
‘Mahpah noh dolang bangsak jok iyam bangsak Yahudi birat ahkan ngolavan Hotalak;
khavun mahpah noh ulun-ulun jok iyam pocayak Hotalak ngevak ahkan ngolavan Iyok. c
26 Lacak-lacak doh
khavun dolang ponguasak duniak ngohicok dolang tentara doh ahkan
hobunuk ngolavan Hotalak khavun Lacak Ponyolamat jok kongojanjik Ah.’
27 Tului nuk kota tuh rih uwas kupur noh Herodes, khavun Pontius Pilatus, nahtup dolang bangsa-bangsak jok iyam pocayak Hotalak, hicok umbak ulun Yahudi ahkan ngolavan Yesus Jihpom Muk jok kudus, jok kongahtang Muk ahkan Lacak Ponyolamat, d 28 ahkan nguan paring aꞌang jok uwas tonetu Muk tahkan holuk nyihing kuasa Muk khavun evak Muk. 29 Khavun huntuh, Oo Tuhan, nohtok ah noh boh kolo ah idoh ngancam ihkai, khavun Ihkok nongak ahkan kai noh jihpom Muk tuh, kobohanyik ahkan narung tarung kosolamatan. 30 Nonyuluk longom Muk kan nyahkang ulun, khavun ngarok ah noh tandak-tandak khavun aꞌang jok motaher hatin ngaran Yesus anak muk jok Kudus erih.”
31 Khavun kotihkak doh honong bodoa, tokuruk noh tohorong unuk doh kupur erih khavun paring doh konguasak Roh Kudus, khavun doh ngesah auh Hotalak umbak bohanyik.
Ulun pocayak havoi hokonohop
32 Paring ulun jok pocayak erih havoi hicok ahtoi pihkir hicok pahkat. Iyam arok icok behtik pun ulun jok pocayak erih ngohavot inon jok aiu tepui ah erih ain aiu bongoi ah, tahpik paring jok ain aiu tepui ah erih idoh havo-havoi tepui ah noh. e 33 Khavun umbak kuasa jok hajok dolang rasul nongak tarung mongenai Tuhan Yesus hulik bolum, khavun paring doh bolum luvang kopios Hotalak jok holovik holeak. 34 Iyam arok icok behtik pun jok malak nuk holang idoh, tului paring ulun jok tepun tanak khavun lohpo pomorahkang doh, lehkai ah onin doh 35 khavun idoh nihkas ah nuk husuk paꞌan rasul-rasul. Khavun rasul-rasul magi-magik ah ahkan paring doh, sosuai umbak jok kopoduluk doh. 36 Koderih kak jok konguan Yusup, ulun tahkan pulou Siprus tahkan koturun Lewi. Rasul-rasul napak ngarai ah jok bohuak, yok erih Barnabas. Arti ngarai ah “Ulun jok nongak somangat kan ulun bohkon.” 37 Barnabas dahkang umoi ah, khavui ah ngomin duit ah yok nyerah ah noku rasul-rasul.