Ananias khavun oruh ah Sapira
5
Arok icok behtik bahkas ngarai ah Ananias. Iyok khavun oruh ah Sapira dahkang icok bidang tanak doh. 2 Duit lehkan tanak erih tonahan dorok oruh ah tongai, tisai ah baruk dorok nongak rasul-rasul. 3 Mahkak Petrus marak: “Ananias, ngombai ahtoi muk konguasak Iblis sohinggak ihkok nihpuk, kok ngombalik Roh Hotalak khavun nahan tongai duit lehkan tanak erih. 4 Sojaham tanak erih dahkang iyam leh ihkok tepui ah, khavun umbot tanak erih dahkang iyam leh ihkok kak jok tepun duit ah? Ngombai kok ngevak aꞌang jok jaek luvang ahtoi muk? Ihkok iyam ngombalik kolunon tahpik ihkok ngombalik Hotalak!” 5 Kotihkak yok nyonih auh Petrus erih bolukang noh Ananias tahkan ponombok ah turus yok mahtoi. Paring ulun jok nyonih kojadiu erih mihkoh. 6 Mahkak arok pirak behtik ulun jok honong bio lombut mukus otun Ananias, ngoniu ah khavun tulak nanom ah.7 Sokitar toluk jam ulik erih oruh Ananias nyolong iyok iyam yok taꞌai inon jok uwas torjadik mbak bosai ah. 8 Hiyon Petrus ahkan Sapira oruh Ananias erih: “Cobak kok marak kuk, inon leh karon tuh lehkan tanak jok dahkang borok?” Hiyoi bavik erih mutah ah: “Iyok tu'uk.”
9 Hiyon Petrus: “Ngombai borok hopahkat nikos Roh Tuhan? Nohtok ah, doh dolang atuh punan doh bulik nanom bosai muk, idoh tombok nuk tukang atop atuh kanik nanom kok nok.” 10 Khavun bolukang noh bavik erih nuk husuk Petrus khavun iyok pun palus. Beteng dolang anak kinyam bio erih nyolong noku luvang lohpo, idoh nohtok bavik erih uwas palus noh, khavun doh ngonin yok boluak turus nanom yok donik tanom bosai ah. 11 Dolang jemaat khavun ulun arok jok nyonih kojadiu erih idoh mihkoh.
Tandak-tandak jok motaher tahkan Hotalak
12 Umbot erih tumbuk aꞌang jok motaher jok konguan dolang rasul-rasul tahkan holang ulun arok. Paring ulun jok pocayak idoh nulo hokupur nuk teras Serambi Salomoa jok arok nuk Lovun Hotalak, khavun doh havoi sombayang nuk anai. 13 Khavun ulun bohkon iyam bohanyik hokupur hicok humbak mbak idoh. Ahkan totahpik doh jok pocayak erih konolehkak paring ulun. 14 Khavun makin ondo makin tumbuk ulun jok pocayak mbak Tuhan, dolang bahkas bavik. 15 Kotului aꞌang jok motaher jok konguan Petrus erih, ulun-ulun jok arok nuk anai nandu ulun-ulun poros noku saran jalan, supayak ngindoi Petrus nyihing anai atai behtin Petrus touk buah ulun jok poros erih supayak doh pios tahkan oros doh. 16 Khavun ulun tahkan kota jok hokoronik mbak Yerusalem halik lombut noku anai, idoh ngonin ulun jok poros khavun ulun jok sonyorupang roh jaek. Supayak doh paring ah pios tahkan oros doh.
Rasul-rasul pononyorak khavun pomolahpas
17 Khavun Pomipin Agamak Yahudi jok paling isung bortindak hicok umbak dolang jolahai ah tahkan kolompok Saduki, tului ahtoi doh ngombelik umbak inon jok uwas konguan dolang rasul. 18 Dolang rasul-rasul tonavan khavun doh pomonjara. 19 Totahpik ngolomik doh pomonjara, molekat Hotalak lombut nguhkoi dolang atop ponjara erih, khavun ngonin dolang rasul-rasul erih boluak. Molekat erih marak ahkan doh: 20 “Tulak nai, tombok ngajar ulun nuk Lovun Hotalak marak ahkan doh paring ah mongenai komolum jok bohuak. 21 Mahkak doh pun ngohasuk inon jok pomarak molekat erih, khavun ngohko-ngohkos doh tulak noku Lovun Hotalak, khavun doh turus ngajar ulun jok lombut nuk anai.”
Lambak erih Pomipin Agamak Yahudi jok paling siung humbak mbak dolang jolahai ah nyihing baun tukang jok bohkon, m'bot erih idoh ngupur dolang Mahkamah Agamak khavun paring okok-okok Yahudi ahkan mosarak doh. Khavun dolang pomipin erih nyuhuk ulun ngomin dolang rasul erih tahkan ponjara. 22 Totahpik kotihkak ulun-ulun jok sonyuhuk erih lombut noku ponjara erih, idoh iyam arok nohtok dolang rasul-rasul erih nuk anai. Khavun doh hulik, khavun marak ah ahkan dolang pomipin pongadilan. 23 Hiyon doh: “Ihkai nohtok atop ponjara erih tokucik sipot, khavun dolang ponjagak tombok nuk depan sotiap atop. Kotihkak kai nguvat ah khavun nyolong noku anai kai yarok nohtok icok behtik pun ulun jok arok nuk anai.” 24 Kotihkak kopalak pongawal Lovun Hotalak khavun paring ulun jok sopahkat navan doh erih nyonih lahporan erih, idoh mihkoh khavun bokisok luvang ahtoi doh inon jok uwas torjadik mbak rasul-rasul erih? 25 Totahpik lombut icok behtik ulun hiyoi marak ah: “Nohtok ah ulun jok uwas kongipos mik noku luvang ponjara, arok nuk luvang Lovun Hotalak khavun doh ngajar ulun arok.”
Rasul-rasul nuk husuk Kopalak Pongadilan Agamak
26 Khavun kopalak pongawal Lovun Hotalak umbak dolang porajurit ah ngomin rasul-rasul erih, totahpik doh ngoniu ah umbak pios, kotului doh mihkoh umbak ulun arok, kolas ulun arok erih muhkah doh umbak bahtuk.
27 Idoh ngomin koduok rasul erih noku Mahkamah Agamak. Khavun Pomipin Agamak Yahudi jok paling isung erih ngisok doh, hiyoi ah, 28 “Tahtup kobirat kai majak kam ngajar hatin ngaran Tuhan, totahpik, ihkam uwas nuvik Yerusalem mbak ajaran mik, cobak kam nohtok ah, ihkam ngajar paring ulun jok arok nuk Yerusalem, ihkam kanik nuduh ihkai ngindoi ihkai noh jok nguan ulun erih mahtoi.” b
29 Totahpik Petrus khavun dolang rasul-rasul jok bohkon mutah ah, hiyon doh: “Ihkai punak harus pahtuh umbak Hotalak arak pahtuh umbak kolunon. 30 Yesus jok sonyalib mik khavun pomunuk mik erih uwas hulik bolum konguan Hotalak jok sonyembah tahtuk ajuh tok lomoi rih. 31 Khavun Hotalak uwas nongak kuasa jok punak isung ahkai Ah, Iyok jadik Pomipin khavun jadik Ponyolamat, ahkan ulun Israel botobat tahkan dosa-dosa doh khavun idoh kongampun Hotalak. 32 Khavun ihkai noh saksi tahkan paring ah erih, ihkai khavun Roh Kudus, Roh jok ongak Hotalak ahkan paring ulun jok pohtuh mbak Iyok.”
33 Kotihkak anggota Pongadilan Agamak erih nyonih inon jok pomarak doh idoh birat, idoh hopahkat ahkan munuk rasul-rasul erih. 34 Totahpik nuk holang anggota pongadilan agamak erih arok icok behtik ulun Parisi ngarai ah Gamaliel. Iyok guruk agamak Yahudi jok punak konolehkak paring ulun. Iyok tombok khavun nyuhuk ulun ngomin rasul-rasul erih boluak luk. 35 Khavun hiyoi ah ahkan anggota Mahkamah Agamak jok bohkon: “Dolang bari-basak mihkir ah pio-pios inon jok ahkan konguan mik ahkan doh. 36 Kotului holuk arok ngarai ah Teudas, marak arop ah pomipin, khavun arok ohpat lahtus behtik jadik murit ah totahpik beteng ah pomunuk, paring murit-murit ah hobomilang khavun idoh iyam nai hicok. 37 Umbot kojadian erih arok sensus ponduduk, khavun lombut icok behtik ngarai ah Yudas iyok tahkan Galilea, Yudas erih mompongaruh ulun arok ahkan doh ngohasuk iyok. Totahpik iyok halik mahtoi, khavun dolang murit-murit ah jok bohkon hobomilang kak. 38 Jadik kotului erih ahkuk marak ahkan mik, arak ngolavan doh mosuah ah kiak. Ngindoi ajaran doh erih tahkan kolunon pasti ahkan lonyok. 39 Totahpik ngindoi ajaran erih tahkan Hotalak, ihkam yarok kan duon mik ngalah doh. Ngindoi koderih ihkam ngolavan Hotalak.”
Khavun paring doh norimak nosehat Gamaliel. 40 Idoh nyuhuk ngonin rasul-rasul erih nyolong noharep doh, khavun rasul-rasul erih pomorihpit doh, khavun idoh majak rasul-rasul ngesah Yesus nok. M'bot erih dolang rasul erih pomolahpas doh. 41 Rasul-rasul erih pun boluak tahkan unuk doh jok pokarak erih, nahtup kosenang doh kotului Hotalak nguan doh jadik ulun jok pahtut pomorihpit khavun pononyorak kotului pocayak mbak Yesus. 42 Khavun sotiap ondo idoh ngajar nuk lohpo Hotalak khavun nuk lohpo-lohpo ulun, idoh ngesah Tarung Pios mongenai Yesus Lacak ponyolamat jok kononjanjik Hotalak.