Pihtuk behtik ulun jok pocayak kongopilik ahkan molayan ulun malax
6
Beteng erih ulun jok pocayak mbak Yesus somakin arok. Beteng hun erih ulun-ulun Yahudi jok bokesah hapan auh Yunani, idoh jadik becik mbak ulun-ulun Yahudi jok asli. Idoh jok hatin auh Yunani erih marak ah: “Bavik jok baluk jok ulun ihkai, idoh iyam duon bantuan ahkan ukun doh bojondo-jondo.” 2 Kotului erih, koduok balas rasul erih ngupur ulun-ulun jok pocayak mbak Tuhan hiyon doh: “Iyam pios ngindoi ihkai tondok ngesah mongenai Auh Hotalak, kotului ihkai harus magik dolang ukun ponguman. 3 Kotului erih, ngurah ulun pihtuk behtik jok punak botarung pios khavun horahtik jok konguasak Roh Hotalak, khavun iyok harus touk ngahtur korejak jok ahkan tonongak kai tuh. 4 Supayak ihkai touk, tuꞌuk-tuꞌuk bodoa khavun ngesah Auh Hotalak ahkan ulun arok.”5 Paring ulun jok pocayak erih sotuju numun jok pomarak dolang rasul. Jadik doh milik Stepanus. Iyok noh ulun jok punak pocayak mbak Tuhan, khavun iyok konguasak Roh Hotalak, khavun doh milik Pilipus, Prokhorus, Nikanor, Timon, Parmenas, khavun Nikolaus tahkan Antiokia iyok iyam ulun Yahudi, totahpik uwas nyolong agamak Yahudi. 6 Paring ulun jok pocayak erih pun ngonin doh pihtuk behtik erih, noku rasul-rasul, khavun paring rasul erih bodoa ahkan doh turus nihkas longon doh nuk isung kuhung doh pihtuk erih kan momberkat idoh.
7 Mahkak auh Hotalak sonyonih nuk amo-amoh, khavun ulun jok pocayak nuk Yerusalem makin arok. Khavun tumbuk ah kak pomipin-pomipin agamak Yahudi jok pocayak mbak Yesus.
Ulun Yahudi ngolavan Stepanus
8 Stepanus norimak berkat khavun kuasa tahkan Hotalak sohinggak iyok touk nguan tumbuk dolang aꞌang jok motaher, nuk husuk ulun arok. 9 Totahpik arok pirak behtik jemaat ulun Libertini, idoh ulun Yahudi jok asal doh tahkan Kirene khavun Aleksandria, hicok umbak ulun Kilikia khavun Asia arok nuk anai idoh hirat hutah-hutah auh mbak Stepanus. 10 Totahpik Roh Hotalak nguan Stepanus jadik horahtik sohinggak ulun-ulun erih iyam dahpat mutah inon jok pomarak ah. 11 Khavun doh ngohasut pirak behtik, supayak doh bokesah kolihtuh: “Ihkai uwas nyonih iyok tuh mongohina Musa khavun Hotalak.” 12 Umbak cara erih idoh ngohasut ulun arok khavun okok-okok Yahudi khavun dolang guru-guruk agamak Yahudi, khavun doh paring ah navan Stepanus turus ngonin yok noku Mahkamah Agamak. 13 Khavun doh ngomin saksi-saksi erih ahkan doh bokesah jok iyam tu'uk mongenai Stepanus, hiyon doh: “Ulun ihtuh nulo ngohinak Lovun Hotalak jok suci erih khavun ngohinak Hukum Taurat jok tonulih Musa. 14 Ihkai uwas nyonih Stepanus marak ah, tului Yesus tahkan Nasaret erih ahkan monorop Lovun Hotalak ihtuh, m'bot erih ngaluh adat kobudayaan tok jok kongajar Musa ahkan tok!” 15 Paring ulun jok arok nuk luvang pokarak Mahkamah Agamak erih ngonorong Stepanus, khavun doh nohtok tapak Stepanus kolo tapak molekat.