Stepanus mombela arop ah
7
Pomipin Agamak Yahudi jok paling isung bokisok mbak Stepanus: “Tu'uk leh inon jok pomarak doh erih?” 2 Stepanus mutah ah: “Oo dolang paring bari-basak kuk! Nyonih auh kuk! Hotalak jok punak hajok kuasa Ah, mokarah arop Ah ahkan Abraham, tahtuk ajuh tok, beteng Abraham mocon nuk Mesopotamia khavun beteng ah jaham pindah noku Haran.” a 3 Beteng hun erih Hotalak bokesah mbak Abraham Nohtah ah noh inai amai muk khavun lihit liting muk khavun negri nuk muk mocon. Khavun tulak noh noku negri jok ahkan pomokarah Kuk ahkam muk. 4 Khavun Abraham pun tulak nohtah negri Kasdim khavun tulak noku kota Haran. Khavun beteng umbot amai ah palus, Hotalak nyuhuk yok pindah tahkan negri Haran noku negri unuk tok mocon huntuh. 5 Beteng erih Hotalak iyam nongak yok nyohiyot pun nogara erih jok ahkan aiu tepui, totahpik Hotalak bojanjik ahkan nongak Abraham khavun koturun ah ahkan edoh tanak erih, podahal beteng erih Abraham jaham tepun anak. b 6 Totahpik ihtuh noh jok kongohavot Hotalak ahkai ah Koturun muk ahkan mocon sobagai ulun porantau nuk negara ulun. Ulun-ulun negri erih ahkan monjajah idoh khavun ahkan monyorak doh ohpat lahtus toun kotahiu ah. c 7 Hotalak marak ah hinok ahkan Abraham hiyoi Ah: “Totahpik bangsak jok nguan doh koderih ahkan kongohukum Kuk, khavun umbot erih koturun muk ahkan nohtah negri erih khavun nyembah Kuk nuk ohtoi.” 8 Khavun Hotalak nguan janjik ahkan Abraham paring anak bahkas harus pomalax, khavun Abraham tepun anak ngarai ah Ishak beteng umur ah jaluk ondo iyok pomalak. Ishak tepun anak jok ngarai Yakub, Yakub halik pomalak, kolo erih kak ahkan koduok balas anak Yakub. Jadik koduok balas suku jok arok nuk Israel. d9 Khavun anak-anak Yakub jok bohkon dahkang Yusup noku Mesir kotului idoh ngombelik mbak iyok. Totahpik Hotalak hicok humbak mbak Yusup, e 10 khavun molahpas yok tahkan dolang kojorak ah. Hotalak nongak iyok kopitar khavun kohorahtik beteng iyok noharep Firaun lacak Mesir, mahkak Firaun ngahtang yok kan gubernur nuk negara Mesir khavun ponguasak nuk istana Firaun. 11 Beteng erih nuk negri Mesir khavun Kanaan torjadik noh louk jok punak nyangit ahkan doh, sohinggak idoh nyangit jorak. Khavun dolang tahtuk ajuh tok erih yarok ngonduon dolang ukun ponguman. 12 Totahpik kotihkak Yakub nyonih nuk Mesir arok dolang ukun ponguman iyok nyuhuk anak-anak ah, yok erih tahtuk ajuh tok. Anak-anak ah jok harik mbak Yusup. Erih noh topahtuk doh noku anai. 13 Khavun kotihkak idoh tulak jok koduok kali ah noku anai, Yusup marak ahkan dolang okak ah ngindoi iyok arok noh Yusup. Beteng erih noh Firaun taꞌai dolang koluarga Yusup. 14 Khavun Yusup marak ahkan dolang okak ah: “Marak ah ahkan amai tok, ahkan iyok khavun paring bari-basak tok pindah noku Mesir.” Karon doh jok pindah noku anai pihtun puluk limok behtik. 15 Yakub khavun dolang koluarga ah pun tulak noku Mesir. Nuk anai Yakub khavun dolang tahtuk ajuh tok palus. 16 Otun doh onin bulik noku Sikem khavun tonanom nuk tanom jok uwas pomolik Abraham, tanom erih pomolik tahkan koturun Hemor nuk Sikem.
17 Beteng erih uwas manyo noh ohkot ah Hotalak ahkan nepat janjiu ah ahkan Abraham, bangsak tok nuk Mesir botambah karoi ah. f 18 Khavun umbot erih arok lacak jok bohuak nuk Mesir, iyok iyam taꞌai mongenai Yusup. 19 Lacak jok bohuak erih yamios kolicik ah ngombalik koturun tok khavun monyorak dolang tahtuk ajuh tok, iyok nyuhuk ngindo dolang anak kinyam lengak koturun etok ahkan doh mahtoi. 20 Beteng hun erih Musa kongarok, khavun iyok bokenak nuk mahtan Hotalak, toluk bulan kotahiu ah iyok konorimbit nuk lohpo ulun okok ah. 21 Khavun Musa kogindo, totahpik puhtir Firaun nyombang yok khavun ngonin ahkan jadik anak ah. 22 Dolang kopitar bangsak Mesir kongajar ahkan Musa khavun iyok jadik ulun jok punak bokuasak luvang auh tuhtui nahtup korejak gavik.
23 Beteng Musa umur ohpat puluk toun, iyok jolik lombut noku bangsak ah ulun-ulun Israel jok arok nuk Mesir. 24 Iyok nohtok arok icok behtik ulun Israel jok pomonyorak ulun Mesir, kavui ah ngavat ulun Israel erih turus nahup ulun Mesir erih nyiring palus. 25 Musa ngoravak ngindoi bangsak ah ahkan ngorehti ngindoi Hotalak kanik hatin iyok ahkan nyolamat doh. Totahpik doh iyam ngorehti. 26 Hondo koicok ah hinok iyok tobarung mbak duok behtik ulun Israel hirat, khavun iyok nyuhuk dorok Hokopios, hiyoi ah: “Iyam leh borok tuh harik? Ngombai borok touk hirat?” 27 Totahpik ulun jok nguan mosalah mbak jolahai erih, beleu ah nyonih auh Musa, hiyoi ah: “Iyai jok ngahtang ihkok jadik pomipin khavun hakim nuk holang ihkai korok. 28 Inon leh ihkok kanik munuk ahkuk kak, kolo kok munuk ulun Mesir erih malom?” 29 Beteng Musa nyonih auh ulun erih iyok jadik mihkoh khavui ah buho tahkan Mesir, mocon nuk negri Midian. Nuk anai iyok ngavuk khavun duon duok behtik anak kinyam bahkas. g
30 Ohpat puluk toun ulik ah molekat lombut noku Musa beteng iyok nuk lahpang baras donik Puruk Sinai. Molekat erih marah nuk luvang jelax ahpui nih ngonyelak nuk lupuk dorop duhik. 31 Musa pusong inon jok uwas kihtai ah erih, khavun beteng iyok ngononik ah, sonyonih ah auh Tuhan tahkan anai, 32 hiyon auh erih: “Ahkuk noh Hotalak tahtuk ajuh muk, Hotalak Abraham, Ishak khavun Yakub.” Mahkak mihkoh noh Musa. Khavun iyok iyam bohanyik nohtok Ah. 33 Umbot erih Tuhan marak ah nok: “Molahpas ah kak sindal muk jok hapam muk atuh, tului tanak nuk muk tombok atuh tanak jok suci, 34 Ahkuk uwas nohtok ah kojorak bangsak Ahkuk nuk Mesir, khavun Ahkuk uwas nyonih paring koriak doh, kotului erih Ahkuk mosuluh ahkan molahpas idoh. Kotului erih ihkok ahkan konguhtus Kuk noku tanak Mesir.”
35 Jadik Musa ihtuh noh jok pujik doh nolak ah hiyon doh marak ah: “Iyai jok ngahtang ihkok jadik pomipin khavun hakim nuk holang ihkai?” Musa erih kak jok konguhtus Hotalak jadik pomipin khavun ponyolamat, molekat jok mokarah arop ah nuk lupuk duhik iyok noh jok marak ah. 36 Iyok noh jok ngomin doh boluak tahkan Mesir, hapan kuasa jok itot Hotalak, jok yamios nuk Mesir, nuk laut mangan khavun nuk lahpang baras ohpat puluk toun kotahiu ah. h
37 Musa tuh noh jok marak ahkan ulun Israel: “Icok behtik nabik jok kongopilik Hotalak tahkan holang ihkam, havoi mbak Hotalak ngopilik ahkuk.” i 38 Musa noh jok jadik holang Molekat jok bokesah umbak iyok nuk Puruk Sinai ahkan dolang tahtuk ajuh tok nuk lahpang baras. Iyok noh jok norimak auh jok bolum tahkan Hotalak ahkan kongesah ahkan tok paring ah. j
39 Oluk poh koderih tahtuk ajuh tok iyam kanik pahtuh umbak yok. Idoh nolak yok khavun kanik hulik kuk Mesir nok. 40 Hiyon doh ahkan Harun: “Napak ah noh ahkan kai dolang topahtung jok ahkan momipin kai. Kotului Musa jok ngomin kai boluak tahkan Mesir, huntuh ihkai iyam kai taꞌai inon jok torjadik mbak Musa.” k 41 Khavun beteng erih doh nguan topahtung anak sahpik, khavun doh nongak binahtang ahkan sahkin topahtung erih. idoh bogavik khavun doh nyembah topahtung jok tonapak doh erih. 42 Mahkak Hotalak iyam nai podulik mbak idoh, Iyok mosuah doh nyembah dolang potion jok arok nuk langit. Sosuai noh umbak inon jok tonulih nuk buhkuk dolang nabik:
“Oo ulun-ulun Israel! Iyam ahkan Ekuk,
ihkam nyomolih binahtang khavun nongak surung atuh, kotahin ohpat puluk toun kam nuk lahpang baras. l
43 Ihkam iyam pujik nongak surung ahkak Kuk. Totahpik ihkam ngomin tenda topahtung Molokm
khavun topahtung potion Refann,
ahkan sonyembah muk.
Kotului erih, ahkuk ahkan ngindo kam nyiring noku negri Babel.”
44 Balai nuk Hotalak lombut noku kolunon unuk tahtuk ajuh tok nuk lahpang baras. Balai erih tonapak Musa cuhun Hotalak numun jok pomokarah Hotalak ahkan Musa. 45 Umbot erih Balai Hotalak erih omin tahtuk ajuh tok beteng doh mbak Yosua tulak nyombaan bangsak tok tuh tahkan kokuasaan bangsa-bangsak jok bohkon jok kongusir Hotalak. Balai erih arok nyiring jaman lacak Daud. 46 Komolum Daud ngosenang ahtoi Hotalak, iyok nyavot mbak Hotalak ahkai ah napak Lovun Hotalak, Hotalak jok sonyembah Yakub. o 47 Totahpik Salomo noh jok napak lohpo erih ahkan Hotalak. p
48 Totahpik Hotalak jok bokuasak iyam mocon nuk lohpo jok tonapak kolunon, kotului nuk buhkuk nabik tonulih:
49 Langit unuk Kuk tuot momorintah
khavun duniak arok noh Nuk paakuk nicak.
Lohpo jok boh kolo jok tonapak mik Ahkuk?
Unuk kuk nondok olai? q
50 Ahkuk noh jok napak paring ah.
Erih noh hiyon Hotalak.
51 Hiyon Stepanus marak ah: “Ihkam tuh ulun jok mahang jaan mik! Khavun iyam pahtuh umbak Hotalak khavun tolingan mik bototuhtup, kam yarok taꞌan mik nyonih Auh Hotalak, ihkam havoi mbak tahtuk ajuh muk jok ngolavan Roh Hotalak! r 52 Inon leh arok nabik jok iyam kongonjorak tahtuk ajuh mik? Idoh munuk dolang nabik jok konguhtus Hotalak jok lomoi uwas ngohavot mongenai Yesus ulun jok Hinut erih ahkan lombut. Khavun huntuh ihkam uwas ngohianat Iyok khavun uwas munuk Iyok. 53 Ihkam paring ah uwas norimak hukum Taurat jok uwas sonyampai dolang molaikat-molaikat erih ahkan totahpik ihkam iyam ngohasuk hiyon hukum erih!”
Stepanus pomuhkah hapan bahtuk
54 Beteng dolang anggota Mahkamah Agamak nyonih inon jok kongohavot Stepanus, idoh poros ahtoi khavun birat nyangit. 55 Totahpik Stepanus tuvik konguan Roh Kudus, iyok nohtok aꞌang jok tarang noku langit. Khavun iyok nohtok tarang kuasa Hotalak, Yesus tombok nuk silak kotoun Hotalak unuk jok bokuasak. 56 Khavun hiyoi Stepanus: “Ahkuk nohtok langit tokuhkoi khavun Anak Danum Kolunon tombok nuk silak kotouk Hotalak!”
57 Mahkak paring dolang Kopalak Pongadilan Agamak erih, idoh paring ah ngoriak khavun doh nuhtup tolingan doh, khavun doh turus nyarang kanik munuk yok. 58 Idoh nguhut yok boluak tahkan kota erih, khavun muhkah yok mbak bahtuk. Ulun-ulun jok nohtok kojadiu erih doh nihkas jubah doh nuk husuk icok behtik bahkas jok honong bio ngarai ah Saulus. 59 Beteng doh muhkah yok Stepanus bodoa, hiyoi ah: “Tuhan Yesus, norimak ah noh roh kuk.” 60 Beteng ah botosuhkuk yok bokesah mbak auh jok punak mohing: “Tuhan, ngapun dosa doh paring ah!” Khavun umbot yok bokesah koderih palus noh iyok.