Pononyorak jemaat jok arok nuk Yerusalem
8
Saulus halik sotuju kotului Stepanus mahtoi pomunuk. Beteng hun erih torjadik noh jemaat jok arok nuk Yerusalem pononyorak idoh paring ah jorak nuk anai. Kotului erih idoh paring ah nasah noku daerah Yudea khavun Samaria, totahpik dolang rasul-rasul iyam tulak, idoh tehtap noku Yerusalem. 2 Ulun-ulun jok pios khavun pocayak mbak Tuhan, idoh nanom otun Stepanus, khavun doh nangih ah.3 Totahpik Saulus punak gotiak munuk ngohpah ulun-ulun pocayak erih, iyok nyolong lohpo-lohpo khavun ngonin dolang khavan ulun bahkas khavun ulun bavik boluak tahkan lohpo doh khavun ngipos doh noku luvang ponjara. a
Pilipus nuk Samaria
4 Kotului idoh jok pononyorak erih ngoliling kapung erih nyalan noku kapung bohkon turus doh ngesah Tarung Pios mongenai Yesus. 5 Khavun Pilipus tulak noku icok kota nuk daerah Samaria khavun ngesah mongenai Lacak Ponyolamat jok kononjanjik Hotalak. 6 Beteng ulun arok erih ngonih kesah Pilipus, khavun nohtok tandak-tandak jok konguai ah, idoh paring ah umbak ahtoi jok tuꞌuk norimak inon jok kongesah ah erih. 7 Khavun yamios karon ulun jok sonyorupang roh jaek, dolang roh jaek jok nyorupang doh erih pun boluak khavun ngoriak mbak auh jok punak mohing. Khavun tumbuk ah kak ulun jok iyam taꞌai nyalan khavun ulun kehtot paꞌai jok konopios ah. 8 Khavun punak ngandah nyangit noh dolang paring ulun jok arok nuk kota erih.
9 Icok behtik ulun jok ngarai Simon iyok uwas tahik noh nulo nguan gajiw nuk kota erih nguan dolang ulun Samaria pusong nohtok ah, khavun iyok nguan arop ah kolo ulun jok punak poduluk. 10 Paring ulun jok poduluk khavun ulun jok iyam poduluk ngohasuk iyok khavun hiyon doh: “Ulun ihtuh hatin kuasa Hotalak jok punak nyahtak.” 11 Khavun turus idoh ngohasuk iyok, kotului uwas tahik noh iyok nguan doh pusong mbak gajiw ah. 12 Totahpik huntuh doh uwas pocayak mbak Pilipus, Pilipus jok uwas ngesah ahkan doh mongenai Hotalak momorintah sobagai Lacak, khavun mongenai ngaran Yesus Lacak Ponyolamat jok kononyanjik Hotalak. Umbot erih idoh nongak arop doh konombaptis dolang kavan bavik khavun dolang kavan bahkas. 13 Simon halik jadik pocayak. Khavun umbot Simon konombaptis iyok hojolahan khavun hicok humbak mbak Pilipus. Khavun iyok pusong beteng iyok nohtok dolang mujizat jok torjadik erih.
14 Kotihkak dolang rasul-rasul jok nuk Yerusalem nyonih kesah ulun Samaria uwas norimak Auh Hotalak, idoh nyuhuk Petrus khavun Yohanes noku anai. 15 Beteng dorok dahpot nuk anai dorok bodoa, supayak ulun jok arok unuk Samaria ngonduon Roh Kudus. 16 Kotului Roh Kudus jaham arok nuk idoh, kotului idoh kongombaptis umbak ngaran Tuhan Yesus kiyak. 17 Khavun dorok ngahtang longon dorok noku isung kuhung doh, khavun doh norimak Roh Kudus.
18 Beteng Simon nohtok, Roh Kudus jok tonongak rasul-rasul erih beteng dorok ngahtang longon dorok noku isung kuhung doh, Simon kanik nongak dorok duit, 19 khavui iyok marak ah: “Nongak ah kak ahkakuk Roh Kudus erih, supayak ngindoi ahkuk ngahtang longok kuk noku isung ulun, iyok touk norimak Roh Kudus.”
20 Khavun hiyon Petrus ahkai ah: “Nihak ngindoi duit muk erih lohpung havoi mbak betim muk tuh kak, kotului ihkok moravak, ihkok touk molik tongak Hotalak umbak duit muk? 21 Yarok bagin emuk khavun hak muk nuk luvang polayanan tuh, kotului ahtoi muk iyam pios nuk mahtan Hotalak. 22 Jadik botobat noh ihkok tahkan kojaek ahtoi muk atuh, bodoa noh noku Hotalak supayak iyok ngapun kojaek ahtoi muk! 23 Kotului ahkuk uwas nohtok ahtoi muk havoi mbak porui ocin louk jok punak poit, khavun ihkok nyolong noku luvang jok punak jaek.”
24 Khavun Simon mutah ah: “Ihkok harus bodoa noku Tuhan ahkakuk, supayak iyam torjadik havoi mbak inon jok pomarak muk ahkakuk.”
25 Umbot Petrus khavun Yohanes ngesah mongenai auh Hotalak ahkan ulun jok arok nuk anai, dorok pun bulik noku Yerusalem. Khavun nuk luvang ponyalan dorok erih pun dorok ngesah mongenai Tarung Pios Korajaan Hotalak, nuk paring kapung nuk daerah Samaria.
Pilipus khavun icok behtik Kopalak Bendahara ratu Etiopia
26 Khavun bokesah noh icok behtik molekat Hotalak ahkan Pilipus hiyoi ah: “Kuat nai khavun tulak nai noku silak solatan, ngohasuk jalan jok mosuluh Yerusalem noku Gaza.” Jalan erih jalan jok bungun. 27 Khavun Pilipus pun tulak noku anai arok icok behtik ulun bahkas kopalak pojabat pomorintah tahkan Etiopia, iyok kopalak bendahara Sri Kandake ratu nuk negri Etiopia, iyok luvang ponyalai bulik tahkan Yerusalem, iyok bulik monyembah Hotalak. 28 Beteng iyok honong nuk luvang ponyalai ah bulik iyok tuot nuk luvang koreta kuda nahtup yok ngomasak Kitab Nabik Yesaya. 29 Khavun hiyon Roh Kudus ahkan Pilipus: “Tulak nai ihkok noku anai ngoronik ah noh koreta ulun Etiopia erih!”
30 Pilipus turus tulak noku anai khavun nyonih kopalak bendahara Etiopia erih ngomasak Kitab Nabik Yesaya. Hiyon Pilipus ahkai ah: “Ngorehti leh tuan inon jok konomasak muk atuh?”
31 Khavui mutah ah: “Bokolo kuk touk ngorehti, ngindoi iyam arok ulun jok marak ahkuk?” Khavui ah nyavot Pilipus nuhkat noku koreta ah erih khavun Pilipus tuot nuk silak iyok. 32 Ayat jok konomasak ah erih bokesah mongenai,
“Iyok kolo icok kungan domba jok onin ahkan sonyombolih.
Domba erih iyam dahpat hokuvut khavun iyok tonih kiyak nuk husuk ulun jok nguting bului ah
kotului domba erih iyam nguhkoi baui ah. b
33 Iyok kongohina khavun konguan iyam adil. Hasong ah sonyohpit tahkan luvang duniak sohinggak icok behtik pun iyam arok jok dahpat ngesah mongenai asal usul Ah.”
34 Mahkak hiyon kopalak bendahara Etiopia erih ahkan Pilipus: “Ahkuk bokisok mbak ihkok, kotihkak nabik erih bokesah mongenai domba, inon leh iyok bokesah mongenai arop ah, atau bokesah mongenai ulun bohkon?” 35 Mahkak Pilipus nopahtuk kesah ah mongenai ayat erih khavun turus bokesah tarung pios mongenai Yesus ahkan ulun erih. 36 Idoh nurus ponyalan, khavun idoh docok unuk jok arok danum, khavun hiyon kopalak bendahara Etiopia erih: “Nohtok ah nuk anai arok danum. Inon kosalak ah ngindoi ahkuk konombaptis huntuh?”
37 Hiyon Pilipus ahkai ah: “Ngindoi Tuan pocayak tuꞌuk-tu'uk, touk.” Hiyon kopalak bendahara Etiopia erih: “Ahkuk pocayak ngindoi Yesus Kristus Anak Hotalak.”
38 Khavun kopalak bendahara Etiopia nyuhuk nondok kereta erih, khavun dorok mosuluh noku danum, khavun Pilipus ngombaptis iyok. 39 Khavun beteng kopalak bendahara erih boluak tahkan luvang danum, Pilipus nyolengak iyam marah, onin Roh Hotalak, Kopalak Bendahara erih pun yarok nai yok nohtok Pilipus. Iyok pun nurus ponyalai tahtup kandah ah. 40 Totahpik Pilipus solengak arok nuk Asdod. Iyok nyalan nyihing unuk anai, khavun nyalan unuk daerah erih turus iyok ngesah Tarung pios mongenai Yesus nuk paring kota, nyiring iyok dahpot nuk kota Kaisarea.