Saulus botobat
9
Totahpik Saulus nulo ngancam khavun munuk dolang murit-murit Tuhan. Kotului erih iyok lombut noharep Pomipin Agamak Yahudi jok paling isung, a 2 khavun nyavot surat kuasa ahkai ah ngoniu noku pomipin-pomipin lohpo sombayang ulun Yahudi nuk Damsyik, supayak ngindoi iyok nohtok ulun bahkas khavun ulun bavik jok pocayak mbak Tuhan, iyok navan idoh khavun ngonin doh noku Yerusalem ahkan pomosarak. 3 Nuk luvang ponyalai noku Damsyik, kotihkak iyok uwas donik kota erih, solengak aꞌang jok golondang tahkan langit nokuling yok. 4 Iyok botokaling noku tanak khavun sonyonih ah auꞌuh jok marak yok: “Saulus, Saulus, ngombai ihkok monyorak ahkuk?”5 Khavui mutah ah: “Iyai ihkok, Tuhan?” Hiyoi auh erih mutah yok: “Ahkuk noh Yesus jok pononyorak muk. 6 Totahpik monyun nai khavun tulak nai noku luvang kota atuh, nuk anai ahkan arok ulun marak ahkam muk inon jok harus kok nguai.”
7 Mahkak sokahtop noh ja'an doh dolang jolahai ah kotahin ponyalan doh, kotului idoh halik nyonih auh erih, totahpik idoh yarok nohtok iyai jok bokesah erih. 8 Saulus kuat kavui tombok, khavun ngomolat, totahpik iyok iyam taꞌai nohtok inon-inon. Dolang jolahai nguhkui iyok nyolong noku kota Damsyik. 9 Toluk ondo kotahiu ah iyok iyam dahpat nohtok, khavun toluk ondo kotahiu ah iyok iyam kuman khavun iyam ngorih.
10 Unuk Damsyik arok icok behtik ulun jok pocayak mbak Yesus ngarai ah Ananias. Iyok nohtok aꞌang jok motaher, Tuhan Yesus bokesah ahkai ah: “Ananias!”
Khavui mutah Ah: “Ihtuh ahkuk, Tuhan!”
11 Hiyon Tuhan Yesus ahkai ah: “Tulak nai noku jalan, ngaran jalan erih Jalan Morong, khavun ngurah ah noku lohpo Yudas icok behtik ulun tahkan Tarsus jok ngarai ah Saulus. Iyok huntuh bodoa, 12 khavun tahkan ponohtok ah iyok nohtok, ulun jok ngarai ah Ananias nyolong noku luvang lohpo khavun ngahtang longoi noku isung kuhung ah, ahkan iyok touk nohtok hinok.” 13 Khavun Ananias mutah Ah: “Tuhan, ulun arok marak ah mongenai iyok, uwas tumbuk kojaek jok uwas umbot iyok nguai ah ahkan ulun-ulun jok pocayak mbak Ihkok nuk Yerusalem. 14 Khavun iyok lombut noku ohtoi ngonin surat tahkan kopala-kopalak pomipin agamak Yahudi ahkan navan ulun-ulun jok pocayak mbak Ihkok.”
15 Totahpik hiyon Tuhan ahkan Ananias: “Tulak nai kotului iyok erih noh jok ahkan hatik kuk ngesah mongenai ngarak Kuk ahkan dolang bangsa-bangsak jok bohkon khavun dolang lacak-lacak khavun dolang ulun-ulun Israel. 16 Ahkuk bongokuk noh jok ahkan mokarah ahkai ah, boh karoi kojorak jok harus iyok ngomok ah ngindoi iyok ngohasuk Ahkuk.”
17 Khavun tulak nai Ananias noku anai noku lohpo erih. Iyok nihkas longoi ah noku isung kuhung Saulus, hiyoi ah: “Saulus, jolahak kuk, Tuhan Yesus, jok uwas mokarah arop Ah ahkamuk nuk jalan hun ihkok nyihing anai, Tuhan nyuhuk ahkuk lombut noku ihkok, supayak ihkok touk nohtok khavun tuvik mbak kuasa Roh Kudus.” 18 Khavun ulik Ananias bokesah arok kolo ondap ocin jok botahak tahkan mahtai ah, khavun Saulus pun touk nohtok, iyok kuat khavun turus konombaptis. 19 Khavun umbot iyok kuman, jadik topulik noh dolang uhat tulang ah.
Saulus ngesah Yesus nuk kota Damsyik
Saulus mocon pirak ondo mbak murit-murit Yesus nuk Damsyik. 20 Kotihkak erih kak iyok ngesah mongenai Yesus nuk lohpo-lohpo ibadah, khavun iyok marak Yesus erih Anak Hotalak. 21 Paring ulun jok nyonih auh ah pusong khavun doh bokisok: “Iyam leh iyok tuh ulun tahkan Yerusalem jok kanik munuk ngohpah ulun jok pocayak mbak Tuhan? Iyam leh iyok tuh lombut noku ohtoi ahkan navan doh khavun yerah doh noku kopala-kopalak pomipin agamak Yahudi?”
22 Totahpik somakin tahik Saulus somakin nyangit mompongaruh ulun arok khavun nguan pusong ulun-ulun Yahudi jok mocon nuk Damsyik. Iyok ngesah dolang tandak ngindoi Yesus yok noh Lacak Ponyolamat.
23 Pirak ondo hulik erih dolang pomipin-pomipin ulun Yahudi idoh hopahkat kanik munuk Saulus. b 24 Totahpik Saulus taꞌai tahkan ulun bohkon ngindoi idoh gevak kanik munuk iyok. Hondo ngolomik ulun Yahudi bojagak jagak unuk gerbang kota ngipak munuk iyok. 25 Ngolomik jok kobohkon ah hinok dolang murit-murit Saulus, nguluh yok hapan koranjang tahkan isung pahkot kota.
26 Beteng Saulus dahpot Yerusalem iyok ngotiak ngohicok arop ah mbak dolang murit-murit Yesus, totahpik idoh mihkoh mbak iyok, kotului doh iyam pocayak ngindoi iyok uwas botobat khavun tuꞌuk-tuꞌuk pocayak mbak Yesus. 27 Totahpik Barnabas pocayak iyok khavui ah ngoniu noku rasul-rasul khavun ngesah ahkan doh, mongenai Saulus nohtok Tuhan nuk tohun jalan khavun Tuhan bokesah umbak iyok. Khavui ngesah hanyin Saulus ngajar paring ulun nuk Damsyik mongenai Tuhan Yesus. 28 Khavun Saulus halik hicok humbak mbak idoh nuk Yerusalem, khavun umbak ahtoi jok bohanyik iyok ngajar ulun ngesah mongenai Tuhan. 29 Iyok pun hobatah mbak ulun Yahudi jok hatin auh Yunani, totahpik idoh ngotiak kanik munuk yok. 30 Beteng dolang jolahai jok pocayak mbak Yesus taꞌai mongenai mosalah erih iyok kanik pomunuk doh, iyok onin doh noku Kaisarea khavun tahkan Kaisarea doh nyuhuk yok noku Tarsus.
31 Khavun kotahin erih dolang ulun jok pocayak mbak Tuhan jok arok nuk Yudea, Galilea khavun Samaria idoh bolum linuh, khavun doh monyembah Hotalak khavun nyinong ondo idoh makin arok kotului kuasa Roh Kudus.
Petrus ngopios Eneas khavun ngopolum Dorkas
32 Beteng hun erih Petrus nyalan kohtoi kanai noku jemaꞌat-jemaꞌat. Nuk tohun ponyalan ah iyok tulak kak noku ulun jok pocayak Tuhan nuk Lida. 33 Nuk anai iyok tobarung umbak icok behtik ngarai ah Eneas, Eneas uwas jaluk toun noh yarok taꞌai kuat tuot iyok kaling bunang kotului iyok kehtot. 34 Hiyon Petrus ahkai ah: “Eneas, Yesus Lacak Ponyolamat ngopios ihkok. Kuat nai khavun nihpok morasih ah nuk muk tiruh atuh!” Beteng erih kak iyok kuat. 35 Paring ulun Lida khavun ulun Saron jok nohtok Eneas, idoh halik pocayak mbak Tuhan.
36 Khavun nuk Yope arok icok behtik bavik murit Tuhan ngarai ah Tabita, ngarai ah erih rehti ah nuk luvang bahasa Yunani, Dorkas. Bavik erih yamios kopios ah iyok bojoin ngavat ulun malax. 37 Tahpik beteng erih iyok poros, turus palus, khavun doh noponus otui ah turus doh mokaling ah unuk takun lohteng. 38 Kapung Lida hokoronik mbak kapung Yope, Beteng murit-murit Yesus nyonih, Petrus arok nuk Lida, idoh nyuhuk duok behtik noku Petrus khavun marak ah: “Huntuh rih ihkok sonyuhuk doh kuk Yope.” 39 Mahkak Petrus ngoripos puat ah khavun tulak hombo-homboh mbak idoh, beteng ah jocok anai, iyok cuhun doh nuhkat noku lohteng unuk otun bavik erih, paring dolang bavik baluk lombut noku iyok turus nangih khavun doh mokarah ah dolang hatik jok tonapak bavik erih beteng yok honong bolum. 40 Totahpik Petrus nyuhuk doh boluak, khavun iyok nyuhkuk khavui bodoa, khavun iyok muhtar behtiu ah nohtok otun Tabita khavun marak ah: “Tabita kuat nai!” Khavun Tabita ngomolat mahtai ah kotihkak iyok nohtok Petrus, iyok kuat khavun tuot. 41 Petrus ngavat yok tombok nahtup namit longoi ah khavun bavik erih turus tombok, khavun iyok naꞌah ulun-ulun jok pocayak mbak Tuhan khavun dolang baluk-baluk erih, khavun motohtok ah ahkan doh, ngindoi bavik erih hulik bolum. 42 Kesah erih kongihan nuk paring daerah Yope khavun tumbuk ulun pocayak mbak Tuhan. 43 Khavun ulik erih Petrus mocon arok pirak ondo nuk Yope, nuk lohpo icok behtik jok ngarai ah Simon, iyok tuhkang ngorejak uhpak ocin louk.