Petrus khavun Kornelius
10
Nuk Kaisarea arok icok behtik ulun ngarai Kornelius, iyok kopalak “Pasukan Italia”. 2 Iyok ulun jok nyembah Hotalak, iyok khavun koluarga ah, idoh paring ah pahtuh mbak poletah Hotalak khavun iyok tumbuk nongak narui ahkan dolang ulun-ulun Yahudi, khavun nyinong ondo iyok monyembah Hotalak. 3 Icok ondo Kornelius nohtok aꞌang jok motaher, luvang ponohtok ah nohtok arok icok behtik molekat Hotalak mokarah arop ah. Kojadiu erih sokitar jam toluk sohit, molekat erih nyolong noku luvang lohpo ah khavun marak yok: “Kornelius!”4 Kornelius pun nohtok molekat erih tahtup kihkoh ah khavui yok marak ah: “Ngombai?”
Hiyon molekat erih ahkai ah: “Hotalak uwas nyonih doa muk, khavun Iyok nohouk paring kopios muk ahkan paring ulun. 5 Khavun huntuh, nyuhuk ah noh pirak behtik tulak noku Yope turus ngihit icok behtik ngarai ah Simon, Simon jok tonaꞌah doh Petrus. 6 Iyok mocon unuk ulun jok korejak ah nguan uhpak ocin louk, ngarai ah Simon kak lohpo ah nuk saran laut.” 7 Umbot molekat erih tulak Kornelius na'ah duok behtik kuli ah khavun icok behtik porajurit jok pocayak mbak Tuhan nuk holang porajurit-porajurit jok bohkon jok mocon hicok humbak mbak iyok. 8 Khavun umbot yok ngesah paring aꞌang jok torjadik erih, iyok nyuhuk idoh noku Yope.
9 Ondo jok kobohkon ah hinok kotihkak doh toluk nuk luvang ponyalan doh kotihkak doh uwas donik kota Yope, sokitar jam duok balas, pas tohun hondo, Petrus pun nuhkat noku isung sahpo jok lahtak khavui bodoa. 10 Iyok ngomok arop ah bolouk jolik kuman, totahpik beteng dolang ukun ponguman honong sonyodiak, nyolengak iyok nohtok aꞌang jok motaher. 11 Khavun kihtai ah langit tokuhkoi khavun arok kihtai ah kain mosuluh tahkan langit puhting ah ohpat kongihih khavun kain erih bototohkak noku tanak. 12 Nuk luvang kain erih arok malik macam ocin louk jok paai ah ohpat, khavun ocin louk jok nyolik nuk tanak khavun dolang ocin aꞌang. 13 Khavun konihai auh jok marak ah: “Kuat nai, oo Petrus, Nyombolih ah muluh ngonah ah khavun kumai ah!”
14 Totahpik Petrus mutah ah: “Iyam Tuhan, kotului Ahkuk iyam pujik kuman aꞌang jok bajan agamak kuk kumai.” 15 Totahpik konihai hinok auh jok marak ah: “Inon jok cuhun Hotalak ihkok kumai ah, iyam taꞌai kok marak ah haram.” 16 Aꞌang jok tonohtok khavun yok sonyonih ah erih marah nyiring toluk kali, umbot toluk kali ah tokahtang noku langit noh inon jok tonohtok ah erih.
17 Petrus bokisok nuk luvang ahtoi ah, inon rehti ah jok umbot yok nohtok ah erih, khavun beteng yok maham paring aꞌang jok torjadik erih, ulun-ulun jok sonyuhuk Kornelius erih lombut tombok nuk tohopan lohpo Simon tului idoh uwas taꞌan doh noh lohpo ah erih 18 Idoh naꞌah icok behtik ulun khavun ngisok yok, inon leh Simon jok pomarak Petrus mocon nuk lohpo ihtuh.
19 Khavun beteng Petrus maham inon manak jok uwas umbot yok nohtok ah erih, kongihai ah hinok Roh Hotalak nuhtui ahkai ah: “Arok doh toluk behtik ngurah ihkok. 20 Kuat nai, mosuluh nai kopindak khavun tulak nai homboh-homboh umbak idoh, arak mihkoh kotului Ahkuk nyuhuk idoh noku ohtoi.” 21 Khavun Petrus mosuluh noku pindak khavun bokesah mbak doh toluk erih: “Ahkuk noh ulun jok kongurah mik rih. Inon kopoduluk kam toluk ngurah ahkuk?”
22 Khavun doh mutah ah: “Kornelius, kopalak parajurit jok punak konolehkak ulun Yahudi khavun iyok pios ahtoi ah, khavun iyok pahtuh mbak Hotalak, icok behtik molekat Hotalak marak ahkai ah, supayak iyok nyuhuk kok noku lohpo ah, khavun nyonih ah inon jok ahkan pomarak muk.” 23 Khavun Petrus nyuhuk idoh kapat nuk ah kapat erih.
Khavun ondo koicok ah hinok iyok monyun khavun tulak noku lohpo Kornelius, khavun arok pirak behtik ulun jok pocayak tahkan Yope dahang doh nyalan noku anai. 24 Khavun ondo havun ah hinok idoh dahpot nuk Kaisarea, Kornelius ngindoi mbak polombut doh, iyok pun naꞌah dolang jolahai harik khavun dolang jolahai hokupur nuk lohpo ah. 25 Beteng Petrus nyolong, Kornelius lombut turus tosuhkuk nyembah yok. 26 Totahpik Petrus ngahtang yok, hiyoi ah: “Kuat nai, ahkuk halik kolunon havoi mbak ihkok kak.” 27 Khavun dorok bokesah turus nyolong noku luvang lohpo, Petrus nohtok tumbuk ulun nuk anai. 28 Iyok marak doh: “Ihkam taꞌai, aꞌang jok punak konomajak ulun Yahudi nguai ah, idoh majak hojolahan umbak ulun jok iyam ulun Yahudi iyam taꞌai nyolong noku luvang lovun ulun jok iyam Yahudi, totahpik Hotalak majak ahkuk ngohavot ah ngindoi arok ulun jok iyam ahkan tonorimak Hotalak. 29 Kotului erih noh beteng kam ngurah kuk khavun nyuhuk kuk masap ohtoi ahkuk kanik tulak noku ohtoi, huntuh ahkuk kanik taꞌai ngombai kam nyuhuk kuk noku ohtoi.”
30 Hiyon Kornelius mutah yok: “Ohpat ondo jok uwas umbot sokitar jam toluk sohit, beteng kuk bodoa nuk lohpo tuh. Solengak arok ulun tombok nuk husuk kuk hatiu ah tarang ngolondang. 31 Iyok marak kuk, ‘Kornelius, doa muk uwas kongonih Hotalak khavun konohop muk ahkan ulun malax tonohouk Ah. 32 Nyuhuk ah noh ulun noku Yope ngonin Simon jok pomarak doh Petrus erih. Iyok honong mocon nuk lohpo Simon, jok korejak ah nguhpak uhpak ocin louk, lohpo ah nuk saran laut.’ 33 Kotului erih ahkuk nyuhuk idoh ngurah ihkok, khavun umbak kosenang ahtoi muk ihkok lombut. Huntuh ihkai arok nuk ohtoi nuk husuk Hotalak ihkai kanik nyonih inon jok pomarak Hotalak ahkam muk, jok ahkan kongohavot muk ahkan kai”
Petrus ngesah mongenai Hotalak iyam milik-milik mongasihi ulun
34 Khavun Petrus bokesah, hiyoi ah: “Ahkuk uwas ngorehti huntuh, kotului Hotalak iyam Iyok mili-milik pios umbak ulun. a 35 Paring kolunon tahkan negri amoh pun jok nyembah khavun pahtuh umbak Iyok, Iyok mongasihi idoh. 36 Erih noh auh jok sonyuhuk Ah ahkuk marak ahkan ulun Israel, yok erih tarung pios tului ihtok touk damai umbak Hotalak nyihing Yesus. Yesus iyok noh Tuhan Lacak Ponyolamat jok borkuasak ahkan paring ulun 37 Khavun ihkam uwas taꞌai mongenai inon jok umbot konguan Yesus ulun Nazaret erih nuk Yudea. Iyok nopahtuk polayanan ah nuk daerah Galilea umbot Yohanes pembaptis ngajar paring ulun Yahudi ngindoi idoh harus botobat khavun konombaptis. Jadik ihkam uwas taꞌai mongenai Yesus, jok uwas ongak Hotalak kuasa ahkai Ah nyihing Roh Kudus khavun mbak kuasa Ah. Yesus tulak noku amo-amoh khavun nguan aꞌang jok pios turus molahpas paring ulun jok konuasak Iblis, kotului Hotalak arok humbak mbak Iyok. 38 Ihkam taꞌai kak Hotalak uwas ngopilik Yesus ulun Nazaret erih khavun Hotalak nongak Iyok Roh Ah ahkai Ah sohinggak Iyok bokuasak, Iyok tulak noku amo-amoh khavun nguan aꞌang jok pios nuk paring unuk turus ngopios ulun-ulun jok konguasak iblis lacak roh jaek, tului Hotalak humbak umbak Iyok. 39 Khavun ihkai tuh noh jok nohtok inon jok uwas Iyok nguai ah nuk daerah Yudea khavun Yerusalem, khavun doh mahkuk Iyok nuk salib turus munuk Iyok khavun. 40 Yesus uwas hulik bolum konguan Hotalak ondo jok kotoluk ah, khavun Hotalak motohtok Yok ahkan ulun arok, 41 iyam ahkan paring ulun jok nuk duniak tuh, tahpik ahkan ihkai jok uwas kongopilik Hotalak sobagai saksi-saksi Ah khavun ihkai uwas kuman khavun ngorih hicok umbak Iyok ulik Iyok bolum tahkan holang ulun mahtoi. 42 Khavun Iyok uwas nongak ahkan kai kuasa marak ahkan ulun arok, Yesus konopilik Hotalak ahkan Hakim ahkan ulun jok bolum khavun ulun jok mahtoi. 43 Paring nabik uwas ngesah tarung mongenai Iyok, tului nyihing ngaran Yesus, sotiap ulun jok pocayak umbak Yesus dosa ah ahkan kongapun.”
Ulun jok iyam ulun Yahudi ongak Hotalak Roh Ah ahkan doh
44 Beteng Petrus bokesah koderih, mosuluh noh Roh Hotalak noku paring ulun jok nyonih Tarung Pios erih. 45 Khavun ulun Yahudi jok pocayak mbak Yesus khavun jok ngohasuk Petrus tahkan Yope, paring ulun pusong nohtok Hotalak nongak Roh Ah ahkan ulun-ulun jok iyam ulun Yahudi. 46 Kotului ulun arok erih nyonih idoh bokesah hatin auh jok malik macam, idoh momuji Hotalak hatin auh doh erih. 47 Khavun Petrus marak doh: “Cobak kok nohtok ah idoh paring ah atuh umbot noh tonongak Hotalak Roh Ah havoi mbak ihtok. Jadik touk leh ulun bajak doh konombaptis mbak danum?” 48 Mahkak Petrus nyuhuk doh konombaptis luvang ngaran Yesus Lacak Ponyolamat. Umbot erih idoh nyavot Petrus mocon mbak idoh arok pirak ondo kotahiu ah.