Petrus ngolahpor ahkan jemaat jok arok nuk Yerusalem
11
Rasul-rasul khavun ulun-ulun jok pocayak mbak Tuhan jok arok nuk Yudea nyonih ngindoi bangsa-bangsak jok bohkon tahkan Yahudi pocayak Auh Hotalak kak. 2 Kotihkak Petrus docok nuk Yerusalem dolang ulun Yahudi jok pomalak khavun jok pocayak umbak Tuhan idoh hobatah mbak Petrus. 3 Hiyon doh: “Ngombai ihkok uwas nyolong noku lohpo ulun jok jaham pomalak? Khavun ihkok halik kuman homboh-homboh mbak idoh!” 4 Totahpik Petrus monjelas ahkan doh tahkan topahtuk ah, hiyoi ah,5 “Beteng kuk bodoa nuk Yope, ahkuk nohtok aꞌang jok motaher, ahkuk nohtok, aꞌang jok kolo kain puhtik, puhting ah ohpat kolo kongahut, khavui mosuluh tahkan lagit tumbas nuk husuk kuk. 6 Kihtak kuk nuk luvang kain erih arok binahtang jok molos, binahtang jok hopaak ohpat, khavun dolang ocin louk jok nyolik nuk tanak khavun dolang ocin naꞌang. 7 Khavun ahkuk nyonih auh jok marak ah, hiyoi Ah, ‘Kuat nai, oo Petrus, nyombolih muluh khavun kumai ah nai!’ 8 Totahpik ahkuk mutah ah, ‘Iyam Tuhan, kotului Ahkuk iyam pujik kuman aꞌang jok bajan agamak kuk kumai.’ 9 Totahpik jok koduok kali ah auh jok tahkan langit nai marak ahkakuk, ‘Inon jok cuhun Hotalak ihkok kumai ah, iyam taꞌai kok marak ah haram.’ 10 Auh erih kongihan nyiring toluk kali, khavun inon jok tonohtok kuk erih nyolengak iyam marah kolo konuhut noku langit. 11 Khavun beteng erih kak arok toluk behtik lombut ngurah ahkuk, idoh noku tohopan lohpo unuk kuk kapat, idoh tahkan Kaisarea sonyuhuk ngurah ahkuk. 12 Khavun hiyon Roh Hotalak ahkak kuk, ‘Tulak kiyak ngohasuk idoh arak mihkoh!’ Khavun arok doh onom behtik tahkan Yope dahang kuk noku anai, khavun kai nyolong noku lovun Kornelius. 13 Khavun ulun jok tepun lohpo erih ngesah ah arok molekat lombut noku idoh, hiyon molekat erih, ‘Nyuhuk ah ulun noku Yope ngonin Simon jok pomarak doh Petrus erih. 14 Iyok ahkan ngesah ahkan mik tarung mongenai kosolamatan, Iyok ulun jok ahkan lombut ngonin kosolamatan ahkamuk khavun ahkan paring ulun jok arok nuk luvang lohpo muk.’ 15 Khavun beteng ahkuk nopahtuk kesah kuk, Roh Hotalak pun mosuluh noku isung idoh, havoi mbak holuk beteng Hotalak nongak Roh ahkan tok. 16 Mahkak tohouk kuk noh auh Tuhan, ‘Yohanes ngombaptis mbak danum tahpik ihkam kongombaptis hatin Roh Kudus.’ a 17 Jadik ngindoi Hotalak nongak Roh Ah ahkan doh havoi mbak Iyok nongak ihtok, beteng hun erih kak idoh nopahtuk pocayak mbak Yesus Lacak Ponyolamat, bokolo ahkuk majak Hotalak!”
18 Beteng doh nyonih inon jok pomarak Petrus erih, doh paring ah nyavot apun mbak iyok, khavun doh momuji muji Hotalak, hiyon doh: “Jadik ahkan bangsak jok iyam ulun Yahudi Hotalak nongak idoh hocok ahkan doh botobat supayak idoh touk ngonduon komolum jok yarok tihkas nyamah ah hicok umbak Iyok!”
Barnabas khavun Saulus noku Antiokia
19 Umbot ulun-ulun munuk Stepanus, idoh pun monyorak ulun Kristen, sohingga ulun Kristen buho noku paring unuk. Idoh hobomilang nyiring noku daerah Penisia, Pulou siprus khavun kota Antiokia, idoh halik ngesah mongenai Yesus cumak ahkan ulun Yahudi kiyak. b 20 Ahkan totahpik arok pirak behtik ulun pocayak mbak Yesus idoh tahkan Siprus khavun ulun Kirene jok dahpot nuk Antiokia khavun bokesah mbak ulun-ulun jok iyam agamak Yahudi, khavun marak mongenai Tarung Kosolamatan erih, turus doh marak ah, Yesus erih Iyok noh Tuhan. 21 Khavun Hotalak nongak kuasa ahkan doh sohinggak beteng doh bokesah, tumbuk ulun pocayak mbak Tuhan Yesus khavun ngohasuk Iyok sobagai Pomipin nuk luvang komolum doh.
22 Khavun kongihan noh mongenai idoh paring ah noku ulun-ulun jok pocayak nuk Yerusalem. Khavun doh nyuhuk Barnabas noku Antiokia. 23 Beteng Barnabas lombut khavun nohtok paring ulun jok arok nuk Antiokia konomerkat Hotalak, ngandah noh iyok, iyok marak doh, supayak doh paring ah tuꞌuk-tuꞌuk pahtuh mbak Tuhan. 24 Barabas erih ulun jok pios, iyok konguasak Roh Hotalak khavun iyok ulun jok iyam mios kopocayak ah mbak Tuhan. Tumbuk ulun jok pocayak mbak Tuhan kotului polayanan ah.
25 Khavun Barnabas tulak hinok noku Tarsus, ngurah Saulus, khavun beteng yok tobarung mbak ah iyok mangit Saulus noku Antiokia. 26 Idoh mocon mbak jemaat jok arok nuk Antiokia icok toun kotahiu ah, dorok pun ngajar paring doh jok arok nuk anai. Nuk Antiokia topahtuk ah murit-murit Yesus pomarak Kristen.
27 Beteng hun erih lombut noh arok pirak behtik nabik tahkan Yerusalem noku Antiokia. 28 Arok icok behtik tahkan holang idoh ngarai ah Agabus. Iyok tombok nuk tohun-tohun idoh jok pertemuan jemaat erih khavun mbak kuasa tahkan Roh Kudus iyok marak ah, hiyoi ah: “Ahkan lombut louk jok punak nyangit nuk duniak tuh.” Aꞌang jok kongohavot ah erih pun torjadik kak beteng jaman pomorintahan lacak Klaudius. c 29 Nyonih auh ah erih idoh pun hopahkat ahkan ngupur dolang duit khavun paroi bojah doh, sosuai mbak tongak doh, khavun nongak ahkan doh jok nuk Yudea. 30 Khavun doh ngupur ah nongak dolang pomipin jemaat nuk Yudea. Barnabas dorok Saulus konguhtus ngitot ah ahkan doh.