Petrus pomonjara khavun Yakobus mahtoi pomunuk
12
Beteng hun erih lacak Herodes iyok monyorak arok pirak behtik ulun-ulun jok pocayak mbak Tuhan. 2 Iyok nyuhuk munuk Yakobus hatin iso, Yakobus erih jolahan Yohanes harik. 3 Beteng Herodes nohtok, inon jok konguai ah erih nguan ulun Yahudi ngandah, Iyok nguan kojaek ah hinok, yok nyuhuk ulun navan Petrus. Beteng erih Ondo Raya Kue Iyam Konolakik. 4 Umbot doh navan Petrus, Herodes nyuhuk ngurung yok nuk luvang ponjara khavun nyuhuk doh ohpat kolompok jagak yok, icok kolompok ah kononjagak ohpat behtik porajurit. Supayak ngindoi uwas umbot porayaan Ondo Kue Iyam Konolakik, iyok touk ngohukum Petrus nuk husuk ulun arok. a 5 Mahkak Petrus tonahan doh nuk luvang ponjara. Totahpik dolang ulun-ulun pocayak bodoa tuꞌuk-tuꞌuk noku Hotalak ahkan Petrus.Molekat molahpas Petrus tahkan ponjara
6 Beteng ngolomik sojaham Herodes kanik ngohukum Petrus nuk husuk ulun arok, Petrus tiruh nuk holang duok behtik porajurit, iyok konahut mbak ratai longoi kombuloi khavun koto'ui, khavun arok kak porajurit-porajurit jok jagak nuk atop ponjara erih. 7 Nyolengak lombut molekat Tuhan donik Petrus ngolondang borolosah nuk anai. Molekat erih nehpak bahai Petrus khavun mokonyun yok, hiyoi ah: “Monyun nai!” Mahkak ratai jok arok nuk longon Petrus erih pun solengak botokuhkoi bongoi ah. 8 Khavun hiyon molekat erih ahkai ah: “Ngahut ah nai kahang muk khavun hatiu ah nai sopahtuk muk!” Petrus pun ngohasuk inon jok pomarak molekat erih ahkai ah. Khavun hiyon molekat erih ahkai ah: “Hatiu ah nai jubah muk, ngohasuk ahkuk!” 9 Khavun Petrus ngohasuk molekat erih boluak, totahpik Petrus iyam yok sadar ngindoi jok konguan molekat erih ahkai tuꞌuk-tuꞌuk torjadik, Petrus monavak erih nuhpiu ah. 10 Umbot dorok nokalo ponjagak jok topahtuk ah, khavun dorok noku ponjagak jok koduok, khavun dorok pun docok nuk atop umat jok jalan noku kota. Atop umat erih tokuhkoi bongoi ah. Beteng dorok uwas nokalo atop umat erih, dorok nyalan noku topahkan jalan erih, khavun molekat erih nyolengak yam marah nohtah Petrus.
11 Beteng Petrus sadar ngindoi iyok uwas boluak tahkan ponjara erih, hiyoi ah marak ah: “Huntuh ta'ak kuk noh ngindoi Hotalak nyuhuk molekat Ah nyolamat ahkuk tahkan Herodes, khavui nyolamat ahkuk tahkan kojolik ulun Yahudi ahkan monyorak kuk.”
12 Khavun umbot Petrus mihkir inon jok torjadik erih, khavui tulak noh iyok noku lohpo Maria inai Yohanes jok tonaꞌah doh Markus, nuk anai tumbuk ulun kupur bodoa. 13 Khavun beteng ah naꞌah doh, lombut noh icok behtik ulun bavik iyok korejak nuk lohpo Maria, ngarai ah Rode, iyok kanik nohtok ah iyai jok naꞌah erih. 14 Iyok taꞌai ngindoi erih bahing Petrus, totahpik kotului kandah ah iyok iyam nguap atop ahkan Petrus totahpik iyok hulik nyolong hinok marak ahkan ulun jok arok nuk lohpo erih ngindoi Petrus arok nuk luar. 15 Hiyon doh ahkan bavik erih: “Ihkok bobujon.” Totahpik iyok marak ah: “Tuꞌuk noh inon jok pomarak kuk.” Hiyon doh ahkai ah: “Erih roh ah!”
16 Totahpik Petrus naꞌah doh bunang khavun kotihkak doh nguap atop doh nohtok Petrus, Idoh pusong. 17 Totahpik Petrus nongak kode ahkan doh hatin longoi ah supayak doh tonih. Khavui ngesah ah bokolo Tuhan ngonin yok boluak tahkan anai, hiyoi ah: “Marak ah noh paring ah ihtuh ahkan Yakobus khavun jolahan-jolahan tok jok bohkon.” Khavun iyok boluak khavun tulak noku bohkon.
18 Ondo ulik Petrus boluak tahkan ponjara erih kalut noh dolang porajurit-porajurit erih. Idoh hokisok mbak jok bohkon inon kolo ah Petrus boluak tahkan anai. 19 Herodes nyuhuk porajurit-porajurit jok bohkon ngurah Petrus, totahpik yarok doh nyombang yok. Khavun Herodes nyuhuk morisak porajurit-porajurit jok jagak ponjara khavun munuk doh.
Khavun Herodes tulak tahkan Yudea noku Kaisarea turus mocon nuk anai.
Herodes palus
20 Lacak Herodes tuꞌuk-tuꞌuk birat ahkan ulun Tirus khavun ulun Sidon. Idoh hopahkat bohavung umbak Herodes, khavun idoh borhasil mahkat icok behtik ngarai ah Blastus dohop doh, iyok ulun jok punak poduluk nuk istana Herodes, khavun idoh tulak noku istana nyavot damai mbak lacak kotului ukun ponguman doh omin tahkan korajaan Herodes kiak.
21 Khavun icok ondo jok uwas tonetu, lacak Herodes hatin kolambik korajaan khavun tuot unuk ponuoꞌot ah nuk korajaan erih khavui pidato ahkan doh. 22 Khavun dolang kolunon ah goriak ngandah hiyon doh: “Tuh auh dewa iyam auh kolunon!” 23 Khavun beteng erih kak Herodes tonopeleng molekat Tuhan kotului iyok iyam momuji Hotalak, Herodes ukun opan kahvui turus mahtoi.
24 Mahkak Auh Hotalak kongihan paring ulun arok.
25 Umbot Barnabas khavun Saulus nyolesai polayanan doh nuk Yerusalem, idoh bulik noku Antiokia turus ngonin Yohanes jok pomarak Markus.