Barnabas dorok Saulus konopilik khavun konguhtus
13
Nuk Antiokia arok pirak betik jemaat khavun dolang nabik nahtup guru-guruk agamak jok ngajar ulun supayak pocayak umbak Yesus ngaran doh erih Barnabas, Saulus, Simeon jok pomarak ulun jok mitom, Lukius tahkan Kirene, Menahem. Menahem jok konohajok homboh umbak lacak Herodes. 2 Beteng icok ondo idoh ibadah noku Tuhan khavun doh puasa, hiyon Roh Kudus ahkan doh: “Ngopilik ah noh Barnabas dorok Saulus ahkan nguan korejak jok uwas sonyodiak Kuk ahkan dorok.”3 Mahkak doh puasa khavun bodoa, khavun umbot nihkas longon doh noku isung kuhung Saulus khavun Barnabas, khavun dorok konguhtus.
Barnabas khavun Saulus nuk pulou Siprus
4 Dorok sonyuhuk Roh Kudus tulak, Barnabas dorok Saulus tulak noku Seleukia, khavun tahkan anai dorok nuhkat alut noku pulou Siprus. 5 Beteng dorok dahpot nuk Salamis dorok ngesah Auh Hotalak nuk luvang lohpo-lohpo ulun-ulun Yahudi sombayang. Khavun Yohanes dahang dorok nuk luvang ponyalan dorok.
6 Idoh noliung pulou Siprus nyiring kuk kota Papos. Nuk anai idoh tobarung umbak icok behtik ulun Yahudi ngarai ah Baryesus. Iyok tuhkang sihir khavun iyok noh kak nabik palsu. 7 Baryesus arok noh jolahan Sergius Paulus, Sergius Paulus arok noh gubernur nuk pulou Siprus erih iyok gubernur jok punak pitar, Sargius Paulus naꞌah Barnabas dorok Saulus iyok kanik nyonih auh Hotalak tahkan dorok. 8 Tahpik ngaran tuhkang sihir erih asli Elimas iyam Baryesus. Ngaran Elimas erih onin tahkan auh Yunani. Tahpik Elimas tuhkang sihir erih ngotiak nguan supayak gubernur erih iyam kanik nyonih auh dorok khavun iyam kanik pocayak mbak Tuhan. 9 Totahpik Saulus, halik pomarak Paulus kak, iyok tuvik konguan kuasa Roh Kudus, khavun iyok ngonorong tuhkang sihir erih, 10 khavui marak ah: “Oo ihkok anak Iblis, ihkok ulun jok punak ponihpuk khavun ulun jok punak jaek ahtoi muk, ihkok ngolavan paring aꞌang jok hinut, ngombai ihkok iyam tondo-tondok ngalut evak Hotalak kanik nyolamat kolunon? 11 Huntuh nohtok ah, Tuhan ahkan ngohukum kok, ihkok ahkan bobulen, pirak ondo tuh ihkok iyam ahkan dahpat nohtok mahtan ondo.”
Khavun beteng erih kak iyok iyam taꞌai nohtok kavui ah ngurah ulun jok kanik nguhkui yok. 12 M'bot nohtok inon jok uwas torjadik erih gubernur erih pun pocayak, iyok salut nyonih ajar barak Hotalak.
Paulus khavun Barnabas tulak noku Antiokia nuk provinsi Pisidia
13 Paulus khavun dolang jolahai pun tulak tahkan kota Papos turus tulak noku Perga nuk Pamfilia. Totahpik Yohanes nohtah doh khavun bulik noku Yerusalem. 14 Tahkan Perga idoh nurus ponyalan doh, khavun docok nuk Antiokia nuk Pisidia. Beteng ondo Sabat doh arok nuk lohpo sombayang ulun Yahudi. 15 Beteng uwas umbot konombasak hukum Taurat khavun kitab nabik-nabik, pomipin-pomipin lovun sombayang nyuhuk bokisok mbak dorok: “Oo jolahak ngindoi ihkam arok aꞌang jok ahkan pomarak mik mongenai komolum jok pios nuk husuk Hotalak marak ah ahkan kai!” 16 Mahkak kuat noh Paulus. Iyok ngirak mbak longoi ah, Khavui marak ah ahkan doh tonih, khavun iyok bokesah,
“Oo ihkam ulun-ulun Israel khavun ihkam ulun-ulun jok pocayak mbak Tuhan, nyonih ah! 17 Hotalak ulun Israel uwas ngopilik tahtuk ajuh tok khavun nguan umat erih monjadik umat jok arok, beteng doh mocon nuk Mesir idoh nupang mocon nuk anai. Umbak kuasa Ah jok nyahtak Hotalak ngonin doh boluak tahkan tanak erih. a 18 Ohpat puluk toun kotahiu ah Iyok nahan kobirat Ah nohtok tobiat doh nuk lahpang baras. b 19 Khavun Hotalak munuk ngohpah pihtuk bangsak nuk tanak Kanaꞌan khavun nongak negri erih ahkan ulun Israel ahkan nuk doh mocon. c 20 Tahkan topahtuk doh lombut mocon nuk tanak Mesir nyiring doh lombut noku tanak Kanaan sokitar ohpat lahtus liman puluk toun kotahiu ah.
Umbot erih Hotalak nongak pomipin-pomipin ahkan bangsak Israel, nyiring jaman nabik Samuel jadik pomipin. d 21 Khavun doh nyavot icok behtik lacak ahkan doh, khavun Hotalak nongak doh icok behtik lacak ngarai ah Saul anak Kish, tahkan suku Benyamin, ohpat puluk toun kotahiu ah iyok jadik lacak doh. e 22 Umbot erih Hotalak nondok yok jadik lacak. Khavun Hotalak ngatik yok mbak Daud jadik lacak ulun Israel. Hotalak marak ah mongenai Daud, ‘Daud anak Isai nguan ahtoi Kuk ngandah khavun nguan inon jok pomoretah Kuk.’ f 23 Khavun tahkan koturun ah noh, sosuai mbak inon jok kononyanjik Ah, Hotalak uwas ngopolum icok behtik Ponyolamat ahkan ulun Israel, yok erih Yesus. 24 Sojaham Iyok lombut Yohanes marak ahkan paring ulun Israel supayak idoh botobat khavun nongak arop doh konombaptis. g 25 Khavun beteng Yohanes uwas kanik umbot ngorejak paring korejak ah erih, iyok marak ah, ‘Davak mik ahkuk tuh iyai? Ahkuk iyam Lacak Ponyolamat jok kongindoi mik, Iyok ahkan lombut ngindoi umbot ahkuk. Nguhkoi sopahtuk tahkan paꞌai ah kiyak ahkuk iyam pahtut.’ h
26 Oo dolang bari-basak kuk koturun Abraham khavun dolang bangsa-bangsak jok bohkon jok pahtuh mbak Hotalak, tarung kosolamatan erih uwas pomarak ahkan tok. 27 Kotului ulun-ulun jok mocon nuk Yerusalem khavun pomipin-pomipin doh, idoh iyam pocayak Yesus. Khavun doh ngohukum Yok nyiring mahtoi, idoh mongenab inon jok kongesah nabik-nabik erih nyinong ondo Sabat. 28 Idoh yarok nyombang icok alasan pun supayak idoh touk munuk Yesus, tahpik idoh nyavot mbak Pilatus supayak Yesus pomunuk. i 29 Khavun ulik ulun Yerusalem umbak dolang pomipin doh, solesai nguan paring aꞌang jok umbot tonulih nuk luvang kitab mongenai Yesus, Murit-murit Yesus nohkak iyok tahkan isung salib ah khavun turus nanom Iyok. j 30 Totahpik Hotalak ngomolum Iyok tahkan holang ulun mahtoi. 31 Khavun holang pirak ondo Iyok mokarah arop Ah ahkan murit-murit jok ngohasuk Iyok tahkan Galilea noku Yerusalem. Idoh dolang erih noh jok jadik saksi ahkan ihtok jaman tuh. k 32 Khavun ihkai huntuh nongak Tarung Kosolamatan ahkam muk, yok erih kotului janjik jok tonongak Hotalak ahkan tahtuk ajuh tok, 33 aꞌang erih uwas kongenap Hotalak ahkan tok Iyok uwas ngomolum Yesus tahkan pomalus Ah. Kotului nuk luvang Mazmur jok koduok arok tonulih,
‘Ihkok noh anak Kuk,
ondo ihtuh Ahkuk uwas jadik Amai Muk.’ l
34 Hotalak uwas ngomolum Iyok tahkan pomalus Ah khavun Iyok iyam ahkan mahtoi hinok. Paring aꞌang erih uwas kononyahtak Hotalak hiyoi Ah,
‘Ahkuk ahkan ngenap ahkam muk janjik-janjik kudus jok dahpat kam pocayak ah,
jok uwas tonongak Kuk ahkan Daud.’ m
35 Kotului erih Iyok marak Ah luvang Mazmur jok bohkon,
‘Ihkok iyam ahkan nohtok Hamba Muk jok pahtuh erih dalak nuk luvang tanom Ah hinok.’ n
36 Kotului Daud ngohasuk kokanin Hotalak kotahin iyok bolum. Beteng Daud palus iyok tonanom hicok umbak dolang tahtuk ajuh ah, khavun otun Daud maram dalak nuk anai. 37 Totahpik Yesus, jok hulik bolum konguan Hotalak, Iyok iyam hacur nuk luvang tanom. 38 Jadik poduluk kam taꞌai, dolang bari-basak, kotului ulun pocayak mbak Yesus mahkak dolang dosa ulun erih ahkan konapun. 39 Havun nuk luvang Iyok paring ulun jok pocayak idoh pomolahpas tahkan dosa-dosa doh, dosa erih yataꞌai kongahpus hatin Hukum Taurat jok tonulih Musa. 40 Kotului erih, bojagak jagak noh, supayak iyam torjadik ahkam muk inon jok uwas pomarak luvang kitab nabik-nabik,
41 ‘Nohouk ah, ihkam jok baꞌas ngohinak,
ihkam ahkan pusong khavun ihkam ahkan mahtoi!
Tului Ahkuk honong nguan aꞌang jok motaher beteng kam honong bolum.
Kotihkak ulun ngesah ah ahkan mik,
ihkam iyam ahkan pocayak.’ ” o
42 Kotihkak Paulus khavun Barnabas boluak, dorok sonyuhuk bokesah hinok mongenai auh jok kongesah dorok hondo sabat jok topahtuk ah khavun ngesah ah hinok beteng hondo sabat jok bohkon. 43 Beteng umbot doh sombayang, tumbuk ulun Yahudi khavun dolang ulun bangsak jok bohkon jok nyolong bangsak Yahudi jok pocayak mbak Tuhan, idoh ngohasuk Paulus khavun Barnabas. Dorok turus ngajar marak doh, supayak idoh bolum nuk luvang asin Hotalak ahkan doh.
44 Beteng ondo sabat jok bohkon ah hinok, dolang ulun icok kota erih tulak noku lohpo sombayang ulun Yahudi, ahkan nyonih Auh Hotalak. 45 Totahpik, kotihkak ulun-ulun Yahudi erih nohtok ulun arok, idoh ngombelik nohtok ah khavun doh bokesah aꞌang jok iyam pios mongenai Paulus, idoh ngolavan inon jok pomarak Paulus. 46 Totahpik mbak hanyiu ah Paulus khavun Barnabas marak ah: “Ihkam jok paling holuk harus nyonih Auh Hotalak, totahpik ihkam iyam kanik nyonih ah, ihtuh noh tandak ahkan mik, ihkam iyam pahtut norimak komolum jok yarok tihkas nyamah ah erih. Kotului erih kai ngajar bangsa-bangsak jok bohkon. 47 Kotului ihtuh noh jok sonyuhuk Hotalak ihkai marak ah, Tuhan marak Ah,
‘Ahkuk uwas ngopilik ihkok ahkan jadik tarang ahkan ulun-ulun jok iyam ulun Yahudi,
supayak ihkok ngesah kosolamatan nuk luvang Yesus ahkan paring ulun nuk duniak tuh.’ ” p
48 Beteng ulun bohkon jok iyam ulun Yahudi nyonih auh dorok erih, idoh punak ngandah nyonih ah, khavun doh momuji-memuji Hotalak erih. Khavun ulun jok uwas tonetu Hotalak ngonduon komolum jok yarok tihkas nyamah ah, idoh pocayak mbak Hotalak.
49 Khavun auh Hotalak erih pun pomarak noku paring wilayah. 50 Totahpik dolang pomipin Yahudi borhasil ngohasut dolang ulun jok poduluk bohkon ah nuk kota erih, khavun dolang bavik jok punak poduluk nuk kota erih, idoh punak tuhit monyembah Hotalak. Totahpik idoh paring kanik buah kohasud pomipin-pomipin erih khavun idoh monyorak Paulus khavun Barnabas khavun dorok turus kongusir tahkan kota erih. 51 Ahkan totahpik Barnabas dorok Paulus nopuhit korovuk tahkan tonahpak paꞌan dorok, ahkan tandak ahkan ulun kota erih, Hotalak ahkan ngohukum idoh. Khavun dorok tulak noku kota Ikonium. q 52 Khavun murit-murit Yesus jok arok nuk Antiokia idoh punak ngandah, kotului Roh Kudus nuk luvang idoh.