Paulus khavun Barnabas nuk Ikonium provinsi Likaonia
14
Nuk Ikonium koduok rasul Paulus khavun rasul Barnabas nyolong noku lohpo unuk ulun Yahudi sombayang, khavun dorok ngajar ulun-ulun nuk anai, sohinggak tumbuk ulun Yahudi khavun jok iyam ulun Yahudi idoh pun jadik pocayak mbak Hotalak. 2 Totahpik ulun-ulun Yahudi jok iyam kanik nyonih ajar barak dorok, khavun ulun-ulun Yahudi motapak ulun-ulun jok iyam ulun Yahudi erih supayak doh iyam pocayak khavun becik mbak dorok. 3 Paulus khavun Barnabas mocon tahik nuk anai, dorok ngajar ulun nuk anai tahtup hanyin dorok, kotului dorok pocayak mbak Tuhan. Tuhan ngonyahtak kosaksian dorok tu'uk khavun Tuhan nongak dorok kuasa ahkan dorok nguan aꞌang jok motaher tahkan Hotalak. 4 Totahpik ulun nuk kota erih arok duok kolompok, Arok jok mombela ulun Yahudi arok kak jok mombela Paulus dorok.5 Mahkak ulun-ulun jok iyam pocayak mbak Hotalak, ulun-ulun Yahudi khavun pomipin-pomipin doh nguan kojaek ahtoi doh, idoh kanik monyorak Paulus dorok Barnabas khavun muhkah dorok mbak bahtuk. 6 Beteng dorok taꞌai inon jok kongevak ulun arok erih, tulak noh dorok noku kota jok bohkon jok arok nuk provinsi Likaonia noku kota Listra khavun Derbe khavun nuk daerah sokitar erih. 7 Nuk anai idoh ngesah Tarung Pios mongenai Yesus.
8 Nuk Listra arok ulun jok kehtot iyam taꞌai nyalan, tahkan yok punai kongarok, khavun iyok jaham pujik nyalan. 9 Ulun kehtot erih iyok tuot nyonih ah beteng Paulus bokesah. Khavun Paulus ngonorong yok, Paulus nohtok ulun kehtot erih arok iman ah khavun ulun erih touk konopios. 10 Khavun hiyon Paulus bokesah tahtup korahang ah: “Tombok noh morong!” Khavun ulun erih pun turus kuat tahkan ponuoꞌot ah, khavun nyalan kujuoi kuboꞌoi. 11 Kotihkak ulun arok nohtok aꞌang jok motaher jok konguan Paulus, idoh bokesah hatin auh Likaonia: “Dolang dewa uwas mosuluh noku tohun-tohun ihtok nyoriak kolunon.” 12 Barnabas pomarak doh Zeus khavun Paulus pomarak doh Hermes, kotului iyok jok bokesah. 13 Pomipin kolompok jok nyembah dewa Zeus, jok lohpo sombayang doh nuk husuk kota. Pomipin erih lombut ngonin dolang sahpik mohanoi khavun bunga-bunga noku atop nyolong kota. Iyok kanik ngohasuk ulun arok erih ahkan ngonin porsembahan ah ahkan rasul-rasul erih.
14 Nyonih evak Pomipin kolompok jok nyembah dewa Zeus erih, dorok nisah hatin dorok khavun nokoruk noku tohun-tohun ulun arok, khavun hiyon dorok bokesah tahtup komohing auh dorok, 15 “Oo ihkam paring ah, ngombai ihkam nguan korok kolihtuh? Ihkai korok tuh arok noh kolunon havoi mbak ihkam. Ihkai korok noku ohtoi kanik ngesah Tarung Pios mongenai Yesus ahkan mik paring ah, supayak ihkam nohtah paring kojaek mik nuk duniak tuh, khavun hulik noku Hotalak tok jok bolum jok napak lagit duniak khavun laut khavun paring suang ah. a 16 Beteng jaman holuk Hotalak mosuah dolang kolunon arok nguan inon jok kojolik doh, arop doh nguai ah. 17 Tahpik Iyok iyam nolingau mokarah mongenai arop Ah, yok erih nguan aꞌang jok pios. Iyok nongak ahkam muk ucan tahkan langit khavun hasil tanak beteng musim ah. Iyok nongak ukun ponguman ahkam muk khavun ngosenang ahtoi muk.” 18 Totahpik hatin auh erih rasul-rasul erih manyo yataꞌan doh majak dolang ulun arok erih nyembah idoh khavun idoh ngomin porsembahan binahtang khavun bunga ahkan rasul-rasul erih.
19 Totahpik lombut noh ulun-ulun Yahudi noku Listra idoh tahkan Antiokia khavun Ikonium khavun doh turus nyuhuk ulun arok erih iyam pocayak umbak koduok rasul erih. Khavun doh muhkah Paulus mbak bahtuk khavun nguhut yok boluak tahkan kota erih, kotului davak doh Paulus uwas mahtoi buah puhkah doh. 20 Ahkan totahpik beteng dolang murit-murit ah tombok noliung iyok, tombok noh iyok khavun nyolong hinok noku luvang kota erih, ondo havun ah iyok tulak umbak Barnabas tulak noku Derbe.
Paulus khavun Barnabas bulik noku Antiokia
21 Paulus khavun Barnabas ngesah Tarung Pios mongenai Yesus. Dorok ngajar paring ulun jok arok nuk Derbe, nuk anai dorok gonduon tumbuk ulun jok kanik pocayak mbak Tuhan. Khavun doh tulak noku Listra khavun noku Ikonium khavun Antiokia nuk Pisidia. 22 Nuk anai dorok ngajar marak dolang murit-murit jok bohkon khavun marak doh supayak idoh tu'uk pahtuh mbak Tuhan, khavun marak ah ngindoi ulun kanik Hotalak momorintah sobagai Lacak nuk luvang komolum ah iyok harus duoi ah jorak. 23 Khavun ahkan paring jemaat Paulus khavun Barnabas ngopilik jok ahkan jadik pomipin ahkan jemaat, khavun doh bodoa khavun puasa, idoh nyerah dolang pomipin-pomipin erih noku Yesus jok sonyembah doh.
24 Ulik erih dorok nyalan hinok nyihing provinsi Pisidia, khavun dahpot nuk provinsi Pamfilia 25 Nuk anai idoh ngesah auh Hotalak ahkan ulun jok arok nuk Perga, khavun doh tulak noku Atalia. 26 Tahkan Atalia tulak noh dorok noku Antiokia. Nuk Antiokia erih noh holuk idoh kongahtang khavun murit-murit Yesus bodoa ahkan doh, ahkan Hotalak moberkat khavun monjagak dolang korejak dorok. Huntuh dorok uwas ngumbot korejak dorok.