Hopahkat nuk Yerusalem
15
Arok pirak behtik ulun tahkan Yudea lombut noku Antiokia khavun ngajar ulun-ulun jok uwas pocayak nuk anai hiyon doh marak ah: “Ngindoi ihkam iyam pomalax monurut adat tahtuk ajuh kai jok kongajar Musa, ihkam iyam ahkan dahpat sonyolamat.” a 2 Totahpik Paulus khavun Barnabas nyangit ngolavan mbak ajar barak erih, khavun doh nehtap ah Paulus dorok Barnabas hombo-homboh mbak jemaat tulak ngisok dolang rasul-rasul khavun pomipin-pomipin jemaat nuk Yerusalem ahkan ngisok mongenai ajar barak erih.3 Idoh itot jemaat boluak tahkan kota khavun doh nyalan nyihing Penisia khavun Samaria, khavun nuk anai doh ngesah mongenai portobatan ulun-ulun jok iyam ulun Yahudi, nyonih kesah doh erih doh jok pocayak jok arok nuk anai pun ngandah nyonih ah. 4 Beteng doh docok nuk Yerusalem idoh tonoharang jemaat, rasul-rasul khavun pomipin-pomipin doh, khavun doh ngesah ah paring aꞌang jok konguan Hotalak nyihing idoh. 5 Khavun arok pirak behtik ulun tahkan kolompok Parisi, jok uwas jadik pocayak mbak Tuhan, idoh lombut khavun marak ah: “Dolang ulun jok iyam ulun Yahudi iyok harus pomalax khavun harus ngohasuk hukum Musa.”
6 Mahkak dolang rasul-rasul khavun pomipin-pomipin jemaat hokupur khavun doh hopahkat ngesah mongenai mosalah erih. 7 Arok pirak kotahiu ah doh hopahkat. Khavun Petrus tombok khavui marak ahkan doh: “Oo dolang bari-basak kuk ihkam uwas taꞌai, ngindoi Hotalak milik ahkuk tahkan holang ihkam, ahkan nyihing holang bauk kuk dolang ulun jok iyam ulun Yahudi nyonih Tarung Pios khavun doh jadik pocayak. b 8 Hotalak taꞌai inon jok arok nuk luvang ahtoi kolunon, khavun Iyok motohtok kokaniu Ah Iyok norimak ulun jok iyam ulun Yahudi erih, Iyok nongak Roh Ah ahkan doh, havoi mbak roh jok uwas ongak Hotalak ahkan tok, c 9 khavun Iyok iyam mili-milik ulun kotului erih ulun jok pocayak paring ah havoi nuk mahtan Hotalak. Hotalak morasih ahtoi doh kotului idoh pocayak mbak Iyok. 10 Jadik huntuh ngombai ihkam kanik nikos Hotalak, ihkam maksak dolang bari-basak tok jok iyam ulun Yahudi ngohasuk porahturan jok bahat erih, ihtok khavun dolang tahtuk ajuh tok kiyak iyam duon tok numun porahturan erih? 11 Soharus ah ihtok iyam nguan aꞌang jok koderih, ihtok harus pocayak, ngindoi kopion Tuhan Yesus nyahtak khavun hajok ahkan tok sohinggak ihtok ngonduon kosolamatan khavun idoh ngonduon kosolamatan erih havoi mbak ihtok kak.”
12 Mahkak tonih noh paring ulun jok arok nuk anai khavun doh nyoih inon jok hiyon Paulus khavun Barnabas dorok ngesah ah mongenai Hotalak hatin dorok nuk holang bangsa-bangsak jok bohkon jok iyam bangsak Yahudi, dorok tumbuk nguan mujizat khavun tandak jok tahkan Hotalak. 13 Umbot Paulus khavun Barnabas bokesah, hiyon Yakobus: “Oo dolang bari-basak! Nyonih ah noh ahkuk. 14 Petrus uwas ngohavot ah kan ihtok, tului tahkan topahtuk ah lomoi Hotalak uwas mokarah kopios Ah ahkan dolang bangsa-bangsak jok bohkon, yok erih mbak cara ngopilik ulun-ulun tahkan holang idoh ahkan jadik umat Ah. 15 Aꞌang erih torjadik sosuai mbak inon jok pomarak Hotalak khavun tonulih nabi-nabik,
Tuhan marak ah,
16 ‘Ahkuk ahkan lombut
napak ah hinok korajaan Daud jok uwas hacur,
korajaan erih kolo lohpo jok mohovak,
Ahkuk ahkan motombok lohpo jok bohuak hinok,
khavun ngorohon ah. d
17 Ahkan paring ulun bohkon ngurah Tuhan
khavun dolang bangsak jok iyam bangsak Yahudi, jok tonaꞌah Kuk khavun jok pomarak Kuk Ekuk tepui.’
Naing erih noh auh Tuhan jok nguan paring ah ihtuh.
18 Iyok uwas marak paring dolang evak ah sojaham dolang jok pomarak khavun kongevak Ah erih torjadik.”
19 Hiyon Yakobus: “Kotului erih monurut kuk ihtok arak nguan kosusah ahkan ulun jok iyam ulun Yahudi tuh jok was nyerah arop doh noku Hotalak. 20 Totahpik ihtok harus nulih surat ahkan doh, supayak idoh iyam kuman dolang usiu jok uwas ongak ahkan otuk nyaling, khavun arak kuman jok holouk mbak dahak, khavun arak kuman binahtang jok mahtoi sonyeok khavun arak tiruh hicok humbak mbak bavik jok iyam oruh doh. e 21 Kotului tahkan jaman holuk Hukum Taurat jok tonulih Musa ahkan kongesah noku paring kota, khavun paring hukum erih konomasak nyinong ondo sabat nuk lohpo sombayang ulun Yahudi.”
Surat ahkan bangsak-bangsak jok bohkon jok uwas pocayak
22 Mahkak dolang rasul-rasul, pomipin-pomipin khavun dolang jemaat erih ngopuhtus ah arok pirak behtik nuk holang idoh jok ahkan tulak noku Antiokia ngohasuk Paulus khavun Barnabas. Khavun doh milik Silas khavun Yudas jok pomarak kak Barnabas. Dorok erih konolehkak paring ulun jok pocayak nuk Yerusalem. 23 Khavun ongak doh surat ahkan dorok, hiyon tulih nuk luvang surat erih,
“Salam ahkan dolang bari-basak jok pocayak mbak Tuhan Hotalak tok, ahkan mik jok iyam ulun Yahudi jok arok nuk Antiokia khavun jok arok nuk bohkon, jok arok nuk provinsi Siria khavun Kilikia. Surat ihtuh tahkan rasul-rasul khavun pomipin agamak ulun jok pocayak nuk Yerusalem ihkai dolang bari-basak mik. 24 Ihkai nyonih arok pirak behtik ulun tahkan ihkai jok uwas tulak noku ihkam nuk anan, idoh uwas ngajar kam paring ah, ihkam jadik deroh nyonih ajar barak dorok. Totahpik ihkai iyam nguhtus doh ngajar kam nuk anai. 25 Kotului erih paring kai umbot hopahkat khavun kai nguhtus pirak behtik ulun ahkan mik. Idoh ahkan tulak umbak Barnabas khavun Paulus jok kongasih kai. 26 Barnabas khavun Paulus iyam mihkoh mahtoi horonaan doh molayan Tuhan tok Yesus Lacak Ponyolamat. 27 Mahkak kai nguhtus Yudas khavun Silas, dorok ahkan marak tanjik ahkan mik kolo jok tonulih luvang surat ihtuh. 28 Nuk luvang kohorahtik jok ongak Roh Kudus ahkan ihkai, ihkai ngopuhtus ah ngindoi ihkai iyam taꞌai nongak beban ahkan mik. Ihkam poduluk pahtuh mbak porahturan-porahturan tuh: 29 Arak kumai ah ukun ponguman jok uwas ongak ahkan otuk nyaling, khavun arak kuman jok holouk mbak dahak, binahtang jok mahtoi sonyeok khavun arak niruh bavik jok iyam oruh mik, ngindoi ihkok iyam nguan paring aꞌang jok pomarak kuk tuh, ihkok ngorejak aꞌang jok pios. Ihtuh noh suang surat, torimakasih!”
30 Umbot erih, Yudas khavun Silas pun tulak noku Antiokia nuk anai idoh naꞌah paring dolang jemaat hokupur, khavun nongak surat erih ahkan doh. 31 Umbot dolang jemaat erih ngomasak surat erih idoh ngandah kotului suang surat erih ngosenang ahtoi doh. 32 Yudas khavun Silas dorok erih halik nabik kak, khavun dorok ngajar jemaat cuhkup tahik supayak idoh pocayak tuꞌuk-tuꞌuk mbak Hotalak. 33 Khavun dorok mocon tahik nuk anai khavun jemaat jok arok nuk Antiokia ngijin dorok bulik hinok noku jemaat jok arok nuk Yerusalem. [ 34 Totahpik Silas nyavot tohtah nuk Antiokia.]
Paulus khavun Barnabas hirat
35 Paulus khavun Barnabas mocon tahik nuk Antiokia, nuk anai dorok ngajar khavun ngesah mongenai Tarung Pios havo-havoi umbak ulun arok.
36 Totahpik iyam tahik ulik erih hiyon Paulus ahkan Barnabas: “Boh kolo ngindoi tok tulak nohtok dolang bari-basak tok jok nuk kota-kota jok bohkon, nuk amoh tok pujik ngesah tarung pios, supayak torok taꞌai bokolo koadaꞌan doh.” 37 Barnabas kanik ngonin Yohanes jok tonaꞌah doh Markus, 38 totahpik Paulus marak ahkan Barnabas: “Iyam pios ngonin ulun jok pujik nohtah tok nuk luvang ponyalan nuk Pamfilia khavun iyam kanik korejak havoi mbak tok.” f 39 Auh erih nguan doh salak paham sohinggak idoh hobomilang khavun Barnabas ngonin Markus tulak hicok mbak iyok, dorok tulak homboh kahpal noku pulou Siprus. 40 Totahpik Paulus mangit Silas tulak, khavun dorok tulak umbot jemaat nuk Antiokia bodoa ahkan dorok, supayak Tuhan ngojagak dorok. 41 Paulus khavun Silas pun tulak ngoliling Siria khavun Kilikia, nuk anai dorok ngajar marak doh supayak idoh pocayak tuꞌuk-tuꞌuk mbak Hotalak.