Timotius ngohasuk Paulus khavun Silas
16
Paulus lombut kak noku Darbe khavun ulik erih iyok tulak kak noku Listra. Nuk anai arok icok behtik ulun jok pocayak mbak Yesus ngarai ah Timotius. Inai ah ulun Yahudi jok uwas jadik pocayak, amai ah ulun Yunani. 2 Timotius konehtek jemaat Listra khavun jemaat Ikonium iyok ulun jok punak pios. 3 Paulus nyuhuk supayak Timotius dahang yok nuk luvang ponyalai ah. Jadik Paulus nyuhuk Timotius pomalak, kotului unuk anai unuk kapung ulun Yahudi, khavun paring ulun taꞌai ngindoi amai ah ulun Yunani.Paulus mihtah noku Makedonia
4 Nuk paring kota nuk doh kapat, idoh marak ahkan ulun-ulun jok pocayak aꞌang jok uwas kongohpuhtus dolang rasul-rasul khavun pomipin-pomipin nuk Yerusalem. Idoh ngajar marak dolang jemaat erih supayak doh ngohasuk porahturan jok uwas tonapak. 5 Mahkak dolang jemaat jok pocayak erih idoh tuꞌuk-tuꞌuk pocayak khavun makin tahik makin arok ulun jok pocayak.
6 Idoh nyihing daerah Prigia khavun daerah Galatia, kotului Roh Kudus majak doh ngesah mongenai Tarung Pios nuk daerah Asia. 7 Khavun beteng doh dahpot Misia idoh nikos nyolong noku Bitinia, totahpik Roh Yesus majak doh noku anai. 8 Khavun doh nyihing Misia, idoh docok nuk Troas. 9 Beteng ondo uwas pindong Paulus ngonduon ponohtok. Arok icok behtik ulun Makedonia tombok nuk donik iyok khavun marak ahkai ah, hiyoi ah: “Mihtah nai noku ohtoi ngavat ah noh ihkai!” 10 Umbot Paulus ngonduon ponohtok, Ihkai turus ngurah ahkan tupang kai ahkan tulak noku Makedonia, kotului tahkan ponohtok erih ihkai bopihkir, kotului Hotalak uwas naꞌah kai ahkan ngesah Tarung Pios nuk anai.
11 Khavun ihkai tulak tahkan Troas turus Samotrake, hondo jok koicok ah hinok ihkai docok nuk Neapolis. 12 Tahkan anai ihkai noku Pilipi, kota jok topahtuk ah nuk daerah Makedoniaa, kota Pilipi konguasak korajaan Roma. Nuk kota erih kai mocon arok pirak ondo.
Paulus nuk Pilipi
13 Beteng ondo Sabat ihkai boluak tahkan gerbang kota khavun tulak mapan kovang cohuk ngohasuk sungoi kotului kopuꞌun ah nuk anai arok ulun Yahudi hokupur bodoa noku Hotalak. Khavun beteng kai nohtok unuk anai, ihkai tuot khavun bokesah mbak dolang bavik jok hokupur nuk anai. 14 Nuk holang dolang okok bavik erih arok icok behtik ngarai ah Lidia tahkan kota Tiatria iyok dahkang koromaꞌang ungu. Lidia ulun jok monyembah Hotalak. Kotihkak iyok nyonih Paulus bokesah, Hotalak nguan ahtoi bavik erih norimak khavun pocayak inon jok pomarak Paulus erih. 15 Beteng kai umbot mombaptis Lidia khavun dolang koluarga ah, iyok ngihit kai: “Ngindoi kam uwas pocayak ahkuk uwas botobat khavun pocayak mbak Yesus, Ihkam kapat nuk lohpo kuk sobagai tamu.” Iyok pun nyavot ah tuꞌuk-tuꞌuk mbak ihkai kosuah ah ihkai kanik mbak pangit Ah.
16 Ondo jok bohkon ah hinok beteng kai lombut hinok noku unuk bodoa erih, ihkai tobarung mbak icok behtik bavik jok touk nenung iyok konguasak roh jaek. Bavik erih jadik jihpon ulun-ulun jok uwas nyevak iyok, jadik idoh ngonduon tumbuk duit, kotului bavik erih touk nenung inon jok ahkan torjadik. 17 Bavik erih ngohasuk ihkai khavun Paulus khavun iyok ngoriak, koriak ah: “Ulun-ulun ihtuh iyok noh Hamba Hotalak jok Paling Isung tahkan paring dewa. Idoh lombut ahkan ngesah ah bokolo Hotalak nyolamat ihkam.” 18 Bavik erih ngohasuk Paulus khavun nulo ngoriak arok pirak ondo kotahiu ah. Paulus dasik kotului nulo kongalut bavik erih, iyok muhtar behtiu khavun marak ahkan roh jaek erih: “Umbak kuasa jok arok nuk luvang Yesus Lacak Ponyolamat ahkuk nyuhuk kok boluak tahkan bavik ihtuh!” Turus beteng erih kak roh jaek erih turus boluak.
Kopalak ponjara Pilipi
19 Dolang ulun-ulun jok uwas nyevak bavik ponenung erih, idoh sadar kotului idoh yataꞌan doh ngonduon duit hinok tahkan bavik erih. Kotului erih idoh nguhut Paulus khavun silas noku lahpang nuk tohun kota supayak noharep dolang pomipin-pomipin kota erih. 20 Idoh ngonin Paulus khavun Silas noharep pomipin-pomipin kota khavun marak ah: “Ulun-ulun ihtuh arok noh ulun Yahudi khavun idoh nguan mosalah ahkan dolang kolunon kota tok tuh, 21 idoh ihtuh ngajar aꞌang jok bohuak ahkan kai. Podahal ihtok kolunon Roma, kotului kolunon Roma yataꞌai ngohasuk ajaran jok bohuak!” 22 Ulun arok pun umbak norahuk Paulus khavun Silas. Khavun dolang pomipin kota erih nyuhuk ulun nisah hatin dorok khavun nyuhuk nahup dorok. 23 Umbot doh nyangit nahup Paulus khavun Silas, idoh mosolong dorok noku luvang ponjara. Pomipin-pomipin kota erih marak ahkan kopalak ponjara erih, hiyoi ah: “Ihkok harus jagak dorok tuh pios-pios arak sapai dorok lahpas.” 24 Nyonih auh pomipin-pomipin kota erih kopalak ponjara erih mosolong dorok noku takun ponjara jok punak macuk unuk ah, khavun nihkas paꞌan dorok noku pasung jok borohon.
25 Beteng tohun ngolomik Paulus khavun Silas honong bodoa noku Hotalak khavun momuji-muji Hotalak, ulun jok nuk takun ponjara jok bohkon nyonih Paulus khavun Silas nyanyi. 26 Solengak tanak tokuruk punak nyangit khavun johin ponjara erih kanik mohovak, khavun paring atop ponjara erih tokuap, khavun dolang rantai jok unuk ngahut doh rih tokuhkoi. 27 Beteng kopalak ponjara erih tokonyun khavun nohtok atop ponjara erih tokuap, iyok nguhut iso ah moluak usiw tahkan kupang ah, iyok kanik munuk arop ah kotului, iyok moravak ulun jok ponjara erih uwas boluak buho tahkan ponjara erih. 28 Totahpik Paulus ngoriak mbak auh jok mohing: “Arak munuk arop muk. Ihkai arok nuk ohtoi!”
29 Kopalak ponjara erih nyuhuk pongawal ah ngonin obor, khavun doh nokoruk noku Paulus khavun Silas. Iyok nocot noron kihkoh ah, kopalak ponjara erih nyuhkuk noku husuk dorok. 30 Khavun iyok ngonin doh boluak tahkan unuk ponjara erih khavun hiyoi ah: “Inon jok harus kuk nguai supayak kuk solamat?”
31 Paulus dorok Silas mutah ah: “Pocayak mbak Tuhan Yesus! Mahkak ihkok ahkan solamat, jadik paring dolang ulun jok mocon nuk lohpo muk, ahkan sonyolamat!” 32 Khavun Paulus dorok Silas pun ngesah tarung kosolamatan ahkan kopalak ponjara erih, khavun ahkan ulun jok arok nuk luvang lohpo ah. 33 Beteng erih kak kopalak ponjagak ponjara erih nyahkang dolang dingan dorok. Umbot erih Paulus khavun Silas pun mombaptis kopalak ponjara khavun dolang koluarga ah. 34 Khavun iyok ngonin Paulus dorok Silas noku lohpo ah khavun ngahtang kan dorok dolang ukun ponguman. Khavun kopalak ponjara erih ngandah, kotului iyok khavun dolang koluarga ah uwas pocayak mbak Hotalak.
35 Kotihkak uwas hondo, pomipin-pomipin kota nyuhuk dolang potugas keamanan kota tulak noku kopalak ponjara khavun marak ah: “Pomipin-pomipin kota nyuhuk ihkok molahpas Paulus khavun Silas tahkan ponjara.”
36 Kopalak ponjara marak auh erih ahkan Paulus, hiyoi ah: “Pomipin-pomipin kota nyuhuk molahpas borok, jadik boluak nai borok huntuh tulak nai mbak solamat!”
37 Paulus marak ahkan ulun-ulun erih: “Ihkai ulun tahkan nogarak Roma arok hak, totahpik ihkai tonorahuk unuk husuk ulun arok khavun yarok sidang ihkai turus konipos noku luvang ponjara. Khavun huntuh doh nyuhuk kai boluak khavun tulak tonih-tonih tahkan ponjara tuh? Ihkai elen kai! Nyuhuk dolang pomipin erih lombut noku ohtoi molahpas kai.”
38 Potugas-potugas keamanan erih marak ahkan pomipin-pomipin kota inon jok pomarak Paulus khavun Silas, kotihkak doh nyonih dorok ulun Roma mahkak mihkoh noh dolang pomipin erih. 39 Idoh lombut khavun nyavot apun turus ngonin koduok rasul erih boluak khavun nyavot supayak dorok tulak tahkan kota erih. 40 Khavun doh boluak tahkan ponjara erih khavun tulak noku lohpo Lidia, nuk anai dorok bokesah ahkan ulun-ulun jok uwas pocayak mbak Tuhan ngajar marak doh supayak doh makin pocayak. Khavun koduok rasul erih pun tulak tahkan kota erih.