Ondo Paskah uwas donik
(Mat. 26:1-5; Mrk. 14:1-2; Yoh. 11:45-53)
22
Beteng ondo hajok roti iyam kongolakik, jok pomarak doh Paskah uwas donik. a 2 Dolang kopalak okon agamak Yahudi khavun guru-guruk agamak Yahudi ngurah jalan ahkan doh touk munuk Yesus toni-tonih, tului idoh mihkoh umbak ulun arok kolas ngolavan idoh.Yudas ngohianat Yesus
(Mat. 26:14-16; Mrk. 14:10-11)
3 Yudas Iskariot iyok noh icok behtik tahkan holang duok balas murit Yesus, iyok konguasak Iblis okon paring otuk 4 Khavun tulak noh Yudas Iskariot noku okon-okon agamak khavun kopala-kopalak pongawal Lovuk Hotalak ahkan ngesah mongenai bohkolo ah Yudas nyerah Yesus ahkan doh. 5 Idoh ngandah nyangit nyonih ah, khavun doh sopahkat ahkan nongak duit ahkai ah. 6 Yudas punak sotuju umbak ah, khavun ngurah kotihkak ah jok pios ahkan nyerah Yesus noku idoh ngohimat iyam kongotaꞌan ulun arok.
Nyodiak ukun ahkan ngoramik ondo Paskah
(Mat. 26:17-25; Mrk. 14:12-21; Yoh. 13:21-30)
7 Mahkak docoh noh ondo roti iyam kongolakik, yok erih ondo ulun harus nyomolih domba Paskah. 8 Khavun Yesus nyuhuk Petrus khavun Yohanes, hiyoi Ah: “Tulak nai nyodiak ah noh ukun ponguman ahkan tok touk kuman unuk ngoramik Paskah tuh.”
9 Khavun dorok ngisok ah: “Nuk amoh konganin Guruk ihkai nyodiak ah?”
10 Yesus mutah ah: “Ngindoi borok nyolong kota Yerusalem, kam borok ahkan tobarung umbak ulun bahkas jok ngomin botoran suang danum. Ngohasuk ah noh iyok noku luvang lohpo jok ahkan sonyolong ah erih. 11 Khavun marak ahkan ulun jok tepun lohpo erih, Guruk ngisok ihkok: ‘Amoh takun unuk ihkai umbak guruk ahkan kuman beteng porayaan Paskah tuh?’ 12 Umbot erih ulun erih ahkan ninjuk ahkam muk icok takun hajok nuk isung lohteng nai, anai sodiak mejak, khavun lahpik, nuk anai noh ihkam nyodiak ah ukun ponguman ahkan tok.”
13 Khavun tulak nai Petrus dorok Yohanes noku kota Yerusalem, dorok tobarung umbak ulun jok hiyon Yesus erih, inon jok hiyon Yesus erih tumbas uras noh. Khavun dorok nyodiak ukun ponguman ondo Paskah.
Ukun ponguman beteng Paskah
(Mat. 26:26-30; Mrk. 14:22-26; 1Kor. 11:23-25)
14 Cohit erih uwas manyo noh ohkot ah Paskah, Yesus tuot kuman hicok umbak dolang murit Ah. 15 Hiyoi Ah ahkan doh: “Ahkuk jolik ahkan tok kuman hombo-homboh beteng hondo Paskah ihtuh sojaham Ahkuk pomonyorak. 16 Tului erih Ahkuk ngohavot ah ahkan mik jok kotuꞌui ah: Ahkuk iyam ahkan kuman kolo ihtuh hinok sojaham rehti porayaan Paskah ihtuh nyahtak nuk luvang Korajaan Hotalak.”
17 Khavui Ah ngomin cawan suang danum anggur, Iyok mongucap sukur noku Hotalak. Umbot erih Iyok marak Ah ahkan idoh: “Tuh noharang ah, magik ah ahkan paring mik. 18 Ahkuk marak ahkan mik: ‘Ulik ihtuh Ahkuk iyam ahkan ngorih danum anggur ihtuh hinok, sojaham Hotalak napak Korajaan Ah nyahtak nuk duniak ihtuh.’ ”
19 Khavun Yesus ngunjut roti, mongucap sukur noku Hotalak, khavui Ah nyipak ah turus magik ah ahkan murit-murit Ah. Hiyoi Ah ahkan doh: “Ihtuh noh behtik Kuk jok sonyerah ahkan muk unuk novus dosa muk. Nguai ah noh kolo ihtuh ahkan mik nohouk Ahkuk.” 20 Koderih kak ulik doh kuman. Yesus nongak idoh sakir suang danum anggur khavun Iyok marak Ah: “Danum anggur ihtuh noh janjik jok bohuak holang Hotalak umbak kolunon, tului dahak Kuk tonusuh ahkan mik. b
21 Totahpik, nyonih ah noh! Ulun jok ahkan nyerah Ahkuk noku ulun jok jaek, arok nuk ohtoi. c 22 Tului Ahkuk, Anak Kolunon ahkan mahtoi tumbas numun jok tonetu Hotalak, totahpik colahkak noh ulun jok nyerah Ahkuk noku ulun jok jaek umbak Ahkuk!”
23 Turus noh murit-murit Ah bokiso-kisok icok umbak jok bohkon: “Iyai ulun ah jok ahkan nyerah Guruk noku ulun jok jaek?”
Iyai jok konganggap punak poduluk nuk holang idoh
24 Torjadik noh hokomirat nuk holang murit Yesus mongenai iyai jok paling poduluk nuk holang idoh. d 25 Tului erih Yesus marak ahkan murit-murit Ah: “Nuk duniak tuh sotiap lacak khavun ponguasak jok iyam pocayak umbak Hotalak idoh momorintah nahtup kojaek doh ahkan ulun jok pindak umbak doh. Oluk poh koderih ulun erih harus nulo marak ah lacak erih ulun jok pios ahtoi ah. e 26 Tahpik ihkam iyam taꞌai ah kolo lacak khavun ponguasak erih. Numbak ah iyai ulun jok kongolehkak harus jadik ulun jok biasa kiak khavun iyai jok kanik jadik okon harus jadik polayan.” f 27 Yesus ngisok murit Ah: “Iyai jok paling hajok: Jok tuot kuman, atau jok molayan? Tetu ulun jok tuot erih. Totahpik Ahkuk arok nuk tohun-tohun ihkam ahkan molayan. g
28 Ihkam noh ulun jok tehtap hicok humbak umbak Ahkuk nuk luvang paring kojorak jok kongomok Kuk. 29 Tului erih, Ahkuk ahkan nongak ihkam kuasa ahkan hantin mik momorintah, havoi umbak Hotalak Amai Kuk nongak kuasa ahkak Kuk. 30 Ihkam ahkan ngandah kotului kuman khavun bolum hicok humbak-mbak Ahkuk nuk luvang Korajaan Kuk. Khavun ihkam ahkan hombo-homboh mbak Ahkuk ahkan momorintah duok balas suku Israel.” h
31 Khavun hiyon Yesus: “Simon, Simon nyonih ah noh! Iblis okon paring otuk uwas ngonduon ijin tahkan Hotalak, ahkan nikos ihkam kolo milang apos paroi umbak ojah ah. 32 Tahpik Ahkuk uwas bodoa ahkam muk, ahkan kopocayak muk umbak Hotalak iyam balang, khavun ngindoi ihkok uwas hulik pocayak tulin noh umbak Hotalak ihkok nyamah ngajar bari-basak basak muk nuk luvang Tuhan ahkan kopocayak doh tuꞌuk-tuꞌuk noku Hotalak.”
33 Petrus mutah Ah: “Tuhan ahkuk siap nyolong ponjara khavun siap mahtoi hicok umbak Ihkok!”
34 Tahpik Yesus mutah ah: “Ahkuk marak ahkam muk Petrus, hondo ihtuh manuk iyam ahkan nonduk sojaham ihkok ngilang Ahkuk toluk kali.”
35 Khavui Ah marak doh: “Beteng Ahkuk nguhtus ihkam yarok bohatik inon-inon, inon leh ihkam tahpas ukus mik?”
Idoh mutah Yesus: “Iyam!” i
36 Hiyon Yesus ahkan doh: “Totahpik huntuh, iyai tepun dopet khavun katong, harus ngoniu ah. Khavun iyai iyam tepun pedang harus dahkang jubah ah ahkai ah molik pedang.” 37 Nyonih ah noh pios-pios. Nuk luvang Kitab tonulih: “Iyok ahkan konguan kolo cok behtik ponjahat.” Jok tonulih luvang Kitab Suci erih, harus torjadik ahkak Kuk. Erih sosuai numun jok tonulih mongenai Ahkuk ahkan torjadik.
38 Hiyon doh: “Tuhan ihtuh duok pedang.”
Yesus mutah ah: “Yok cuhkup noh.” j
Yesus bodoa nuk taman Getsemani
(Mat. 26:36-46; Mrk. 14:32-42)
39 Numun jok kopuꞌun ah Yesus umbak dolang murit-murit Ah tulak tahkan Yerusalem noku puruk Jaitun. 40 Uwas dahpot noh doh nuk anai, Yesus marak ahkan murit Ah: “Bodoa noh ahkan ihkam iyam botahak kuluvang dosa kotihkak Iblis nikos ihkam.”
41 Khavun Yesus tulak bodoa sokitar tolun puluk mehter tahkan idoh, khavun Yesus ngalop khavun bodoa, hiyoi Ah: 42 “Tuhan Hotalak, Amai Kuk jok nuk surga, ngindoi Ihkok kanik, molahpas ah noh kojorak jok ahkan tonoharep Kuk ihtuh tahkan Ahkuk. Tahpik iyam kokanin Kuk totahpik kokanin Emuk noh jok torjadik.” 43 Khavun lombut icok behtik molekat tahkan surga noku Yesus ahkan ngomuhat ahtoi Ah. 44 Yesus tuꞌuk-tuꞌuk jaek pongomok Ah sohinggak Iyok somakin tuꞌuk-tuꞌuk bodoa. Khavun horas Ah motih noku bahtuk kolo dahak nih.
45 Umbot Yesus bodoa, Iyok hulik noku murit-murit Ah, Iyok nohtok doh totiruh, idoh punak liduk nahtup boꞌok nyangit. 46 Hiyon Yesus ahkan murit Ah: “Ngombai ihkam tiruh? Monyun nai khavun bodoa, ahkan mik iyam botahak kuluvang dosa beteng Iblis nikos ihkam.”
Yesus tonavan
(Mat. 26:47-56; Mrk. 14:43-50; Yoh. 18:3-11)
47 Beteng Yesus honong bokesah, lombut noh Yudas khavun rombongan ah noku Yesus. Yudas erih icok behtik tahkan murit Yesus. 48 Yudas turus ngohavon Yesus, tahpik Yesus marak ahkai ah: “Oo... Yudas, umbak kohavon ihtuh leh ihkok ahkan nyerah Ahkuk, Anak Kolunon noku ulun jaek.”
49 Kotihkak murit-murit Yesus nohtok Yesus ahkan tonavan, nuhtui noh idoh: “Tuhan inon leh ihkai touk nyarang doh umbak iso?”
50 Khavun icok behtik tahkan murit Yesus nyarang, turus molong tolingai kotoui ah icok jihpon kopalak okon agamak.
51 Yesus marak Ah: “Arak koderih.”
Khavun Yesus turus namit tolingai ah khavun ngopios ah.
52 Mahkak Yesus marak Ah ahkan dolang kopalak okon agamak khavun kopalak pongawal Lovuk Hotalak, homboh umbak okon jok navan Iyok, hiyoi Ah: “Davak muk ahkuk hik ponahko, mahkak ihkok lombut umbak aꞌang jok lekap umbak pedang khavun sokuhut kajuk? 53 Podahal nyinong ondo ahkuk arok nuk tohun-tohun ihkam nuk luvang Lovuk Hotalak, khavun ihkam iyam navan Ahkuk. Tahpik ihik noh ohkot ah ahkan mik jok jaek, khavun Iblis okon paring otuk bokuasak nuk luvang ihkam.” k
Petrus iyam ngahkuk Yesus
54 Uwas umbot noh Yesus tonavan khavun idoh ngomin Iyok tahkan anai, Iyok sonyerah noku lohpo kopalak okon agamak. Khavun Petrus ngohasuk tahkan kacui ah. 55 Nuk tohun tohopan lohpo ulun erih ulun ngomolum ahpui khavun tuot ngoniling ah. Petrus umbak kak tuot humbak umbak idoh. 56 Icok behtik jihpon jok bavik nohtok iyok tuot donik ahpui erih. Iyok nyangit noliti Petrus, khavui marak ah: “Ulun tuh hicok humbak umbak Yesus.”
57 Totahpik Petrus ngilang ah, hiyoi ah: “Iyam ahkuk, ahkuk iyam nyokonok Iyok!”
58 Iyam tahik ulik erih icok behtik nohtok iyok, khavui marak ah: “Ihkok icok behtik tahkan holang idoh!”
Totahpik Petrus mutah ah: “Iyam, iyam ahkuk!”
59 Khavun sokitar arok icok jam ulik erih jok bohkon hinok marak ah umbak auh tehtek: “Tuꞌuk noh, iyok ihtuh umbak Yesus, tului iyok ulun Galilea kak.”
60 Totahpik Petrus marak ah: “Iyam, ahkuk iyam taꞌak inon jok pomarak muk.”
Kotihkak erih kak manuk nonduk. 61 Yesus pun moliyo khavui Ah nohtok Petrus. Khavun Petrus nohouk ah Yesus alik nuhtui ahkai ah: “Sojaham manuk nonduk ondo ihtuh, ihkok uwas ngilang Ahkuk toluk kali.” 62 Khavui ah boluak, turus nangih umbak lingui ah.
Yesus nuk husuk kopalak Pongadilan Agamak
(Mat. 26:59-66; Mrk. 14:55-64; Yoh. 18:19-24)
63 Khavun ulun jok nahan Yesus nyangit ngolunyik Iyok khavun nyangit moros Iyok. 64 Idoh nuhtup tapak Ah khavun marak ah: “Ngindoi Ihkok nabik, marak ah iyai jok moros Ihkok?” 65 Khavun tumbuk ah auh jok jaek kongohavot doh ahkai Ah. 66 Khavun uwas ngohkos noh okok-okok Yahudi khavun kopalak okon-okon agamak, khavun dolang guruk agamak hokupur, khavun Yesus omin noku kopalak Pongadilan Agamak doh. 67 Hiyon doh ahkai Ah: “Ngindoi Ihkok Iyok noh Lacak Ponyolamat, marak ah noh ahkan kai.”
Yesus mutah ah: “Oluk poh ahkuk marak ah ahkam mik, ihkam pun iyam ahkan pocayak. 68 Khavun oluk poh ahkuk bokisok umbak ihkam, ihkam pun iyam ahkan mutah ah. 69 Tahkan huntuh Ahkuk, Anak Kolunon ahkan tuot nuk ponuoꞌot jok ponolehkak nuk silak kotoun Hotalak jok Mahakuasak.”
70 Hiyon doh paring ah: “Ngindoi koderih, Ihkok ihtuh Anak Hotalak?”