Porsembahan icok behtik baluk malak
21
Beteng Yesus nuk Lovun Hotalak, Iyok noliti ulun-ulun tahto jok ngitot duit surung doh noku luvang totai ah. 2 Iyok pun nohtok icok behtik baluk malax, ngipos duok kobikap duit jok paling koik nilai ah, noku totai Porsembahan. 3 Khavun Yesus marak ah: “Nyonih ah noh, baluk malax ihik mosolong yamios karoi tahkan paring ulun jok bohkon. 4 Kotului paring ulun bohkon erih nongak porsembah doh tongai ah kiyak tahkan koponahto doh, totahpik baluk jok yamios komalak ah ihtuh nongak paring inon jok arok umbak iyok. Nyiring yarok icok inon pun jok arok nuk iyok, nuk ah molik ukun pongumai ah.”Yesus bokesah mongenai Lovuk Hotalak ahkan kongahkas khavun hacur
(Mat. 24:1-2; Mrk. 13:1-2)
5 Hun erih arok pirak behtik bokesah mongenai bohkolo tundah ah Lovuk Hotalak pomokajan hapan dolang bahtuk bangunan jok hajok khavun tamam, khavun umbak dolang barang surung jok umbot tonongak ahkan Hotalak. Mahkak Yesus marak ahkan doh: 6 “Ahkan lombut Kotihkak ah nain nuk amoh paring jok tonohtok mik ihtuh ahkan kongahkas nyiring iyam arok icok bahtuk pun jok honong bosusun nuk isung bahtuk jok bohkon.”
Ulun-ulun jok ngohasuk Yesus ahkan bojoin jorak
(Mat. 24:3-14; Mrk. 13:3-13)
7 Khavun murit-murit Yesus bokisok umbak Iyok: “Guruk, mirak aꞌang jok pomarak muk erih ahkan torjadik, khavun inon tandak ah ngindoi aꞌang erih torjadik?”
8 Khavun Yesus mutah ah: “Touk-touk noh, arak sapai ihkam pocayak khavun totihpuk! Tului tumbuk ulun ahkan lombut khavun marak ah: ‘Ahkuk noh Kristus, khavun kiamat ahkan pohos torjadik!’ Arak noh sapai ihkam ngohasuk idoh.” 9 Khavun arak noh ihkam mihkoh ngindoi ihkam nyonih tarung mongenai hobunuk khavun kokalut. Kotului paring ah erih ahkan torjadik, totahpik erih iyam borarti Ondo Kiamat uwas donik.
10 Khavun Yesus nurus auh Ah hinok: “Ahkan torjadik hobunuk nuk holang suku khavun bangsa-bangsak jok bohkon. 11 Khavun nuk amo-amoh ahkan torjadik tanak tokuruk, louk jok notihkas khavun dolang oros jok jaek, khavun ahkan torjadik tandak-tandak tahkan langit jok nguan ulun mihkoh. 12 Totahpik sojaham aꞌang erih torjadik, ihkam ahkan tonavan khavun pomonyorak. Ihkam ahkan ponosarak nuk lovuk unuk ulun Yahudi sombayang khavun ponjara, khavun ihkam ahkan noharep lacak khavun dolang ponguasak kotului ihkam ngohasuk Ahkuk. 13 Uhun erih noh arok hocok muk marak tarung pios tahkan Hotalak. 14 Kotului erih noh sojaham ihkok ponosarak nuk luvang pokarak, arak noh ihkok liduk umbak inon jok harus pomarak muk nuk kok ngobela arop muk. a 15 Kotului Ahkuk ahkan nongak ihkok ponoum muk nuk kok bokesah jok horahtik, sohinggak iyam icok behtik pun musuh muk jok ngolavan inon jok pomarak muk. 16 Khavun ihkam ahkan sonyerah ulun okok muk, khavun dolang jolaham harik, bari-basak muk, dolang jolaham noku ulun jok jaek khavun pirak behtik nuk holang ihkam ahkan pomunuk. 17 Ihkam ahkan konomecik ulun kotului ihkam ngohasuk Ahkuk. 18 Totahpik icok koliting balo muk pun iyam ahkan niho konguan doh! 19 Ngindoi ihkam sabar noharep mosalah, ihkam ahkan ngonduon komolum jok yarok tihkas nyamah ah.”
Yerusalem ahkan kongohacur
(Mat. 24:15-21; Mrk. 13:14-19)
20 “Beteng ihkam nohtok Yerusalem kongohukung paring tentara, ihkam poduluk taꞌai tului uwas donik noh kotihkak ah kota erih kongohacur. 21 Beteng hun erih kak ulun-ulun jok arok nuk Yudea harus buho noku puruk. Khavun ihkam jok arok nuk kota Yerusalem harus ngimos boluak tahkan kota ihtuh, khavun ulun jok arok nuk luar kota arak noh nyolong hinok noku kota. 22 Kotului beteng erih noh kotihkak ah Hotalak ahkan ngohukum kojaek nogara ihtuh. b 23 Colahkak noh paring bavik jok honong botohik khavun jok honong noposuk anak ah beteng erih! Idoh ahkan jorak kotului bohalik buho. Kosusah jok punak nyangit ahkan nguan dolang paring ulun nogara ihtuh, kotului Tuhan mokarah kobirat Ah ahkan nogara ihtuh. 24 Arok kak jok ahkan pomunuk hatin iso, arok kak jok ahkan onin sobagai tonahan doh noku bangsa-bangsak ulun bohkon. Khavun ulun-ulun jok iyam mongenal Hotalak ahkan nguasak Yerusalem nyiring ohpah kotihkak ah jok ongak Tuhan ahkan idoh.”
Polombut Anak Kolunon khavun tindung puꞌun harak
(Mat. 24:29-35; Mrk. 13:24-31)
25 Khavun Yesus bokesah marak Ah hinok: “Ahkan arok tandak-tandak jok kihtan tahkan mahtan ondo, bulan khavun potion, khavun nuk duniak tuh dolang bangsak ahkan mihkoh khavun pusong noharep ohtuh lujak hajok. c 26 Ulun ahkan kohoran kotului mihkoh, paring aꞌang jok torjadik nuk duniak ihtuh kotului otuk-otuk nguan kokacau nuk langit nai. 27 Beteng erih kak Ahkuk, Anak Kolunon ahkan marah nuk luvang havun puhtik, kuasa Kuk kihtan khavun dolang komuliaan Kuk marah. d 28 Khavun beteng aꞌang erih torjadik, ngohanyik ah noh arop muk khavun pocayak noh, kotului Hotalak ahkan nyolamat ihkam.”
29 Khavun Yesus ngesah tindung tuh ahkan doh: “Nohtok ah noh puꞌun harak khavun puꞌun kajuk jok bohkon. 30 Beteng ihkam nohtok puꞌun kajuk erih uwas arok dolak ah, ihkam taꞌai kotului buak ahkan muak. 31 Koderih kak ngindoi ihkok nohtok tandak-tandak erih torjadik, poduluk kok taꞌai kotului Hotalak uwas manyo noh momorintah jadik Lacak.”
32 Khavun Yesus marak ahkan doh: “Nyonih ah noh pios-pios! Inon jok pomarak kuk erih tuꞌuk ahkan torjadik sojaham ulun-ulun jok bolum huntuh mahtoi uras. 33 Aꞌang erih tuꞌuk ahkan torjadik uras. Langit khavun duniak ahkan niho, totahpik inon jok kongajar kuk iyam ahkan niho khavun ohpah.”
Bojaga-jagak noh
34 “Bojaga-jagak noh tobiat mik ahkan ihkam iyam kuman ngorih arak boram holovik holeak nyiring ihkam buso, khavun iyam nulo mihkoh umbak komolum mik. Ngindoi ihkam nguan aꞌang jok koderih mahkak ihkam iyam ahkan norimak ondo polombut Ahkuk, Anak Kolunon, jok lombut nyolengak. 35 Kotului hondo erih ahkan lombut ahkan paring ulun nuk duniak ihtuh, iyam hokotaꞌan havoi mbak bojang jok nyolengak nyokihtong paꞌan ocin louk. 36 Jadik tehtap noh ihkam bojaga-jagak! Khavun bodoa nulo supayak ihkam duon botahan khavun lahpas tahkan aꞌang jok ahkan torjadik erih, supayak ihkam touk noharang polombut Kuk, Anak Kolunon, umbak kandah mik khavun iyam mia-miak.”