Kisok mongenai kuasa Yesus
(Mat. 21:23-27; Mrk. 11:27-33)
20
Beteng icok ondo Yesus ngajar khavun nongak Tarung Pios tahkan Hotalak, ahkan ulun-ulun jok arok nuk luvang Lovuk Hotalak. Khavun lombut noh okon-okon agamak, guru-guruk agamak, khavun dolang okok ulun Yahudi noku anai. 2 Khavun doh ngisok Yesus: “Marak ah noh ahkan ihkai umbak kuasa iyai poh Ihkok nguan paring ah ihtuh, khavun iyai jok nongak kuasa erih ahkam Muk?”3 Khavun Yesus mutah ah ahkan doh: “Ahkuk kanik ngisok ihkam. Cobak ihkam mutah ah jok kongisok Kuk ihtuh: 4 Iyai jok nongak kuasa ahkan Yohanes ahkai ah touk mombaptis? Hotalak atau kolunon?”
5 Kotihkak erih kak idoh hopahkat: “Ngindoi ihtok marak ah: ‘Umbak kuasa Hotalak.’ Iyok ahkan mutah Ah: ‘Ngindoi koderih, ngombai ihkam iyam pocayak umbak Yohanes?’ 6 Totahpik ngindoi ihtok marak ah: ‘Mbak kuasa kolunon’, paring ulun ahkan muhkah ihtok umbak bahtuk, kotului idoh pocayak Yohanes iyok noh nabik.” 7 Jadik idoh mutah ah: “Ihkai iyam taꞌai iyai jok nongak kuasa ahkan Yohanes ahkai mombaptis.”
8 Mahkak Yesus marak ahkan idoh: “Ngindoi koderih Ahkuk pun iyam ahkan marak ahkam muk hatin kuasa iyai Ahkuk nguan paring ah ihtuh.”
Tindung mongenai ulun Yahudi jok nulo ngombelek ulun jok konguhtus Hotalak
(Mat. 21:33-46; Mrk. 12:1-12)
9 Yesus ngesah tindung ihtuh ahkan ulun arok, hiyoi Ah: “Arok icok behtik jok tepun tanak, iyok nyuhuk jihpoi ah ngombulan puꞌun anggur nuk tanak ah erih. Khavun kabun erih pomosevak ah ahkan pirak behtik ulun jok ngorejak kabun anggur. Khavui tulak noku nogara bohkon khavun mocon tahik nuk anai. a 10 Kotihkak uwas kanik ngombuak anggur, ulun jok tepun kabun erih nyuhuk icok behtik jihpoi ah tulak nahkih hasil anggur jok bagin ayiu noku idoh jok ngorejak anggur erih. Totahpik docok noh jihpoi ah erih nuk anai, nuk ulun jok ngorejak anggur erih idoh napar nodup iyok, khavun doh nyuhuk iyok bulik yarok ngomin inon-inon. 11 Mahkak ulun jok tepun kabun anggur erih nyuhuk jihpoi ah jok koduok ah nok, totahpik jihpoi ah erih pun tonapar khavun pomokiak ulun-ulun jok nyevak kabun anggur erih, khavun nyuhuk iyok bulik yarok ngomin inon-inon. 12 Khavun ulun jok tepun kabun erih nyuhuk jihpoi ah jok kotoluk. Totahpik jihpoi ah erih pun pomoros doh kak khavun kongindo doh iyok boluak tahkan kabun erih. 13 Mahkak hiyon ulun jok tepun kabun erih: ‘Inon jok harus konguak kuk, ahkuk ahkan nyuhuk anak kuk jok kongasih kuk. Tetu idoh ahkan ngolehkak iyok!’ 14 Totahpik kotihkak ulun jok nyevak kabun anggur erih nuneng anak ulun jok tepun kabun erih lombut, idoh bokesah icok mbak jok bohkon: ‘Nuneng ah noh! Jok lombut erih anak ulun jok tepun kabun anggur tuh, iyok rih ahkan tepun kabun ihtuh ngindoi amai ah uwas mahtoi. Has tok munuk yok, ahkan kabun tuh rih bulik ihtok.’ 15 Khavun doh nguhut molihit iyok boluak tahkan kabun anggur erih khavun doh munuk iyok.”
Khavun Yesus bokisok: “Monurut emik inon jok ahkan konguan ulun jok tepun kabun anggur erih ahkan doh? 16 Pasti iyok ahkan lombut khavun munuk dolang ulun jok ngorejak kabun anggur erih, khavui nongak kabun erih ahkan ulun jok bohkon.”
Nyonih aꞌang erih bokesah noh ulun-ulun umbak Yesus, hiyon doh: “Arak sapai aꞌang erih torjadik!”
17 Yesus nuneng idoh khavui marak ah: “Ngindoi koderih, inon rehti ah ayat Kitab ihtuh:
‘Bahtuk jok elen tuhkang bangunan hatiu. Uwas konguan Hotalak jadik bahtuk jok punak poduluk.’ ” b
18 Khavun hiyoi Ah: “Iyai kiak jok botahak noku isung bahtuk erih, iyok ahkan boromuk, khavun iyai kiak jok tonopahas bahtuk erih, iyok ahkan borohpuh.”
Soal ngomayar pajak
(Mat. 22:15-22; Mrk. 12:13-17)
19 Guru-guruk agamak khavun kopalak okon-okon agamak taꞌai ngindoi tindung erih pomarak Yesus ahkan doh. Tului idoh kanik navan Iyok beteng erih kak, totahpik idoh mihkoh umbak ulun arok. 20 Jadik idoh ngurah kotihkak ah jok pios. Idoh ngomayar ulun-ulun jok ahkan nobiat kolo ulun jok tuꞌui, khavun nyuhuk ulun-ulun erih ngojebak Yesus umbak dolang kisok doh, supayak idoh touk ngaduk Yesus noku ponguasak nogara erih. 21 Mahkak ulun-ulun jok uwas kongomayar erih bokesah umbak Yesus hiyon doh: “Guruk, ihkai taꞌai inon jok kongajar khavun jok pomarak Muk erih tuꞌuk, ihkai pun taꞌan kai Ihkok ngajar poletah Hotalak ahkan kolunon mbak turus terang, kotului Guruk iyam mili-milik ulun. 22 Jadik kisok kai: Monurut hukum agamak etok, touk iyam ihtok ngomayar pajak ahkan Kaisar lacak Roma atau iyam?”
23 Totahpik Yesus taꞌai ngindoi idoh tuh arok evak jok jaek umbak Iyok. Khavui Iyok bokesah umbak idoh: 24 “Cobak nongak Kuk icok kobikap duit perak. Tuh gambar khavun ngaran iyai nuk ohtoi?”
Hiyon doh mutah ah: “Gambar khavun ngaran Kaisar, lacak Roma!”
25 Hiyon Yesus ahkan doh: “Ngindoi koderih, nongak ah noh ahkan Kaisar, inon jok tepun Kaisar khavun ahkan Hotalak, inon jok tepun Hotalak.”
26 Khavun idoh iyam dahpat navan Iyok umbak aꞌang jok kongohavot Ah nuk husuk ulun arok. Idoh pusong umbak inon jok putah Ah erih khavun idoh tonih.
Kisok ulun Saduki mongenai ulun jok hulik bolum tahkan holang ulun mahtoi
(Mat. 22:23-33; Mrk. 12:18-27)
27 Lombut noh noku Yesus pirak behtik tahkan kolompok ulun Saduki. (Idoh iyam pocayak ngindoi arok ulun mahtoi ahkan hulik bolum tahkan holang ulun mahtoi.) Khavun idoh bokisok umbak Yesus: c 28 “Guruk, Musa nulih hukum ihik ahkan ihtok: Ngindoi arok icok behtik bahkas mahtoi khavun iyok iyam tepun anak, mahkak dahang ah harik harus sokavuk umbak baluk ah ahkan nongak koturun ahkan ulun jok uwas mahtoi erih. d 29 Alik, arok pihtuk ulun harik. Jok okok ngavuk, khavui mahtoi sojaham tepun anak. 30 Khavun jok koduok ah ngavuk umbak baluk ah, totahpik iyok pun mahtoi jaham kak ngonduon anak. 31 Aꞌang jok havoi erih torjadik kak umbak dahang doh harik jok kotoluk ah nyiring jok kopihtuk ah. 32 Kopongok ah bavik erih pun mahtoi kak. 33 Bokolo noh huntuh umbak bavik erih, iyai nuk holang ulun-ulun erih jok ahkan jadik bosai ah beteng ondo ulun hulik bolum tahkan holang ulun mahtoi? Kotului pihtuk-pihtuk ah erih uwas sokavuk umbak iyok.”
34 Yesus mutah ah: “Ulun-ulun jok bolum huntuh rih sokavuk. 35 Totahpik nuk jaman jok ahkan lombut iyam nai koderih. Tului ulun-ulun jok pahtut ahkan ngonduon komolum jok yarok tihkas nyamah ah, nuk anai idoh iyam ahkan sokavuk anai. 36 Koadaꞌan doh havoi mbak molekat, jok iyam taꞌan doh mahtoi. Idoh noh anak-anak Hotalak, kotului idoh uwas hulik bolum tahkan holang ulun mahtoi. 37 Musa bongoi jok marak mbak jelas ngindoi ulun mahtoi ahkan hulik bolum. Luvang Kitab jok tonulih ah mongenai lupuk duhik jok ngonyelak erih iyok ngohavot Tuhan sobagai: ‘Hotalak Abraham, Hotalak Ishak khavun Hotalak Yakub.’ e 38 Hotalak erih iyam Hotalak ulun mahtoi! Iyok Hotalak ulun-ulun jok bolum! Kotului bagin Hotalak paring ulun bolum.”
39 Mahkak guruk agamak marak ah: “Guruk, putah Muk erih hinut nyangit.” 40 Beteng erih kak idoh iyam bohanyik nai bokisok inon pun umbak Yesus.
Lacak Ponyolamat
(Mat. 22:41-46; Mrk. 12:35-37)
41 Yesus bokisok umbak idoh: “Bokolo ihkam touk marak ah ngindoi Lacak Ponyolamat koturun Daud? 42 Podahal Daud bongoi marak ah nuk luvang Kitab Mazmur:
‘Hotalak bokesah umbak Tuhan Lacak Ponyolamat kuk:
Tuot noh unuk silak kotouk Kuk unuk ponuoꞌot jok ponolehkak, f
43 nyiring Ahkuk nguan musuh-musuh Muk iyam bohanyik khavun
mindak mbak Ihkok.’
44 Ngindoi lacak Daud marak Lacak Ponyolamat erih ‘Tuhan’, erih noh rehti ah tului Lacak Ponyolamat erih iyam tihkas koturun ah, totahpik holovik hajok tahkan arop ah.”
Arak noh urap-urap umbak guru-guruk agamak
(Mat. 23:5-7; Mrk. 12:38-40)
45 Beteng ulun arok nyonih Yesus, Iyok bokesah ahkan murit-murit Ah: 46 “Touk-touk noh mbak guru-guruk agamak. Idoh andar nyalan hatin hatik jok ombuk, khavun idoh andar kongolehkak nuk ulun jok borahkang. Tului idoh andar unuk jok ponolehkak nuk luvang lovuk-lovuk unuk ulun Yahudi sombayang khavun nuk ulun bogavik. g 47 Idoh nihpuk khavun ngomin lohpo ulun baluk. Khavun nuk nuhtup kojaek doh erih, idoh bodoa yamios kohombui! Hukuman Hotalak ahkan idoh erih havun ahkan bahat!”