Yesus sonyambut nuk Yerusalem sobagai Lacak
(Mat. 21:1-11; Luk. 19:28-40; Yoh. 12:12-19)
11
Kotihkak Yesus khavun murit-murit Ah was donik Yerusalem, idoh docok nuk kota Betfage khavun Betania jok arok nuk korong Zaitun. Yesus nguhtus duok behtik murit Ah, 2 Iyok nanjik doh: “Tulak nai noku kapung jok arok nuk husuk muk. Beteng kok nyolong noku anai, ihkok ahkan nohtok icok kungan keledai bio jok konahut, keledai erih jaham pujik tonupang ulun. Molahpas ah khavun ngoniu noku ohtoi. 3 Khavun ngindoi arok ulun jok marak ahkam muk ngombai ihkam molahpas khavun ngoniu keledai atuh, kam mutah ah: ‘Tuhan poduluk mbak ah. Iyok ahkan pohos nopulik ah noku ohtoi hinok.’ ”4 Idoh pun tulak noku anai, khavun nohtok icok kungan keledai bio konahut nuk dohopan lohpo nuk saran jalan, idoh turus molahpas ah. 5 Khavun ulun jok arok nuk anai bokesah marak doh: “Ngombai ihkam molahpas keledai atuh?”
6 Khavun koduok murit Yesus erih mutah ah kolo jok tonanjik Yesus ahkan dorok. Mahkak ulun erih mosuah idoh ngonin ah. 7 Khavun doh ngonin keledai erih noku Yesus, khavun ngolahpik lihkut keledai mbak jubah doh, khavun Yesus nuhkat noku isung keledai erih. 8 Khavun tumbuk ulun jok ngolahpik jubah doh nuk jalan jok ahkan sonyihing Yesus turus arok kak jok molot pahting kajuk tahkan umon doh khavun nihkas ah nuk tohun-tohun jalan. 9 Ulun-ulun jok nyalan nuk husuk khavun jok nyalan nuk lihkut, idoh havo-havoi marak ah: “Torpuji Hotalak! Konomerkat noh iyok jok lombut luvang ngaran Tuhan! a 10 Punak pios pomoretah jok ahkan lombut, kolo pomoretah beteng jaman Lacak Daud, tahtuk ajuh tok lomoi. Torpuji noh Hotalak jok Paling Isung!”
11 Dahpot nuk Yerusalem Yesus nyolong noku Lovun Hotalak. Nuk anai Iyok nohtok hokosilak Ah, totahpik kotului ondo was manyo noh ngolomik, mahkak Iyok tulak noku Betania hombo-homboh mbak koduok balas murit Ah.
Yesus nulut puꞌun harak jok yarok buai ah
(Mat. 21:18-19)
12 Ondo havun ah hinok Yesus khavun koduok balas murit Ah tulak tahkan Betania, Yesus ngomok arop ah bolouk. 13 Tahkan macuk Yesus nohtok puꞌun harak yamios karon daui ah. Jadik Iyok tulak noku puꞌun harak erih nohtok ah pai arok buai. Totahpik beteng Iyok docok nuk anai, Iyok yarok nohtok buai ah, tihkas arok daui ah kiyak, kotului beteng erih jaham musim buak harak. 14 Khavun Yesus nulut puꞌun harak erih hiyoi Ah: “Tahkan huntuh iyam arok icok behtik pun jok ahkan kuman buam muk!”
Murit-murit Ah nyonih inon jok pomarak Ah.
Yesus ngusir ulun-ulun jok borahkang nuk Lovun Hotalak
(Mat. 21:12-17; Luk. 19:45-48; Yoh. 2:13-22)
15 Yesus khavun murit-murit Ah pun docok nuk Yerusalem. Umbot Yesus dahpot noku Lovun Hotalak, Iyok pun ngusir dolang ulun jok borahkang nuk teras lovuk erih. Iyok molukang dolang mejak-mejak nuk nuhkar duit khavun dolang kurusik ulun jok dahkang ocinaꞌang merpati. 16 Khavun Iyok majak paring ulun ngonin barang bandak doh nyihing dohopan lovuk Hotalak erih. 17 Khavun Iyok ngajar marak idoh, hiyoi Ah: “Iyam leh arok tonulih nuk luvang Kitab Suci: ‘Lohpo Kuk ahkan pomarak lohpo doa ahkan dolang paring bangsak?’ Totahpik ihkam nguai ahkan unuk pocon dolang ulun ponahko!” b
18 Dolang kopalak pomipin agamak Yahudi khavun guruk-guruk agamak Yahudi nyonih inon jok pomarak Yesus erih. Khavun idoh nulo ngurah elah supayak touk munuk Yesus, idoh mihkoh mbak Iyok, kotului idoh nohtok ulun arok salut mbak ajar barak Ah.
19 Puꞌun cohit was hiro-hirok noh, Yesus khavun dolang murit Ah boluak hinok tahkan kota Yerusalem.
Yesus ngajar mongenai doa
(Mat. 21:20-22)
20 Ngohko-ngohkos beteng Yesus khavun dolang murit Ah nyihing, idoh nohtok puꞌun harak jok tonulut Yesus erih was mahtoi nyiring noku uhat ah. 21 Mahkak Petrus nohouk ah inon jok uwas pomarak Yesus ahkan puꞌun harak erih. Khavun iyok marak ahkan Yesus hiyoi: “Guruk, atuh noh puꞌun harak jok tonulut Muk, was mahtoi puꞌui ah.”
22 Yesus mutah doh: “Pocayak noh mbak Hotalak! 23 Ihkam touk marak ah mbak puruk tuh: ‘Tulak nai, nyolong noku luvang danum!’ Ngindoi ihkok iyam deroh khavun pocayak mbak inon jok pomarak muk erih ahkan nyolung, mahkak Hotalak ahkan nguai ah ahkan mik. c 24 Kotului erih nohouk ah noh: Ngindoi ihkam bodoa khavun arok aꞌang jok sonyavot muk, pocayak noh ngindoi Hotalak was nongak ah, mahkak inon jok sonyavot muk ahkan tonorimak muk. 25 Ngindoi ihkam bodoa, ihkam harus ngapun ah holuk ulun jok arok kosalak ah mbak ihkam. Mahkak Amai muk jok nuk surga ahkan ngapun dolang paring dosa muk. d 26 [Totahpik ngindoi ihkam iyam ngapun ulun jok salak mbak ihkam, mahkak Amai muk jok nuk surga iyam ahkan ngapun dolang kosalak muk.]”
Yesus hobatah mbak ulun Yahudi
(Mat. 21:23-27; Luk. 20:1-8)
27 Khavun Yesus mbak murit-murit Ah bulik nok noku Yerusalem. Beteng Yok docok anai Iyok nyalan nuk dohopan Lovun Hotalak, lombut noh dolang kopalak pomipin agamak Yahudi, guruk-guruk agamak Yahudi khavun okon-okon Yahudi idoh lombut noku Iyok. 28 Idoh bokisok mbak Iyok: “Hatin kuasak iyai Ihkok nguan aꞌang jok koderih nuk lovun Hotalak? Khavun iyai jok nyuhuk Kok nguai ah?”
29 Hiyon Yesus mutah doh: “Arok icok kisok Kuk mbak ihkam. Mutah ah khavun Ahkuk ahkan marak ahkan muk hatin kuasak iyai Kuk nguan aꞌang erih. 30 Yohanes ngombaptis mbak kuasak Hotalak atau mbak kuasak kolunon?”
31 Idoh bokesah icok mbak jok bohkon hiyon doh: “Ngindoi ihtok marak: ‘Tahkan Hotalak’, Iyok ahkan marak ah: ‘Ngindoi koderih ngombai ihkam iyam pocayak mbak Yohanes Pombaptis?’ 32 Totahpik yarok anggar ah ihtok mutah: ‘Kuasak Yohanes lombut tahkan kolunon.’ ” Kotului idoh mihkoh mbak ulun arok, paring ulun erih pocayak ngindoi Yohanes Pombaptis iyok noh nabik. 33 Jadik doh mutah Yesus: “Iyam kai taꞌai.”
Mahkak hiyon Yesus ahkan doh: “Ngindoi koderih, Ahkuk halik iyam kanik marak ahkam muk umbak kuasak iyai Kuk nguan paring aꞌang erih.”