Yesus lombut noku gavik sahkik koruh nuk Kana
2
Beteng ondo kotoluk arok gavik sahkik koruh nuk kota Kana jok nuk provinsi Galilea, khavun inai Yesus pun arok nuk anai. 2 Yesus khavun dolang ulun jok ngohasuk Yok pun idoh sonyuhuk tulak noku gavik erih. 3 Beteng porohun gavik, idoh jok tepun gavik erih ohpah danum anggur doh. Khavun hiyon inai-Ah ahkan Yesus: “Danum anggur doh ohpah.” 4 Yesus mutah inai Ah hiyoi Ah: “Inai, ngombai ihkok marak aꞌang erih ahkak Kuk? Jaham ohkot ah Ahkuk mokarah iyai Ahkuk tuh.”5 Totahpik inai Yesus marak ahkan dolang polayan jok arok nuk anai: “Nguai ah kiyak inon jok pomarak-Ah ahkan mik.”
6 Nuk anan arok onom botoran bahtuk jok hajok, icok botoran erih touk sonyuang mbak danum karoi ah sokitar solahtus liter. Kopuun ah dolang botoran erih sonyuang danum ahkan unuk morasih arop doh kolo porahturan ulun Yahudi. 7 Yesus marak ahkan dolang polayan erih: “Nyuang dolang botoran atuh nyiring tuvik mbak danum.” Idoh pun nyuang ah nyiring tuvik. 8 Khavun hiyon Yesus ahkan doh: “Huntuh ngaut ah noh nyohiot danum tahkan botoran erih khavun nongak ah ahkan ulun jok ngurus gavik tuh.” Idoh pun nguai ah inon jok sonyuhuk Yesus. 9 Khavun ulun jok ngurus gavik erih ngomok nyohiot danum jok was malik jadik anggur konguan Yesus. Iyok iyam taꞌai tahkan amoh dolang polayan ngonduon danum anggur erih, dolang polayan jok ngaut danum erih kiyak jok taꞌai. Mahkak ulun jok ngurus gavik erih pun naꞌah pongantin bahkas erih. 10 Khavun hiyoi ah: “Jok kopuun ah ulun jok bogavik ahkan nongak ulun ngorih danum anggur jok punak pios paling holuk, umbot erih ngindoi ulun was puas ngorih ah, baruk iyok nongak danum anggur jok kurang pios. Totahpik nyiring huntuh ihkok nginak anggur jok punak pios.”
11 Erih noh topahtuk ah Yesus nguan aꞌang jok motaher. Aꞌang erih torjadik konguai Ah nuk kota Kana provinsi Galilea. Nyihing aꞌang jok motaher erih Iyok motohtok kuasak-Ah jok punak hajok, mahkak dolang ulun jok ngohasuk Iyok pun jadik pocayak mbak Iyok.
12 Umbot erih Yesus tulak noku Kapernaum hombo-homboh mbak inai Ah, dolang arik okak Ah khavun dolang ulun jok ngohasuk Iyok. Idoh mocon nuk anai pirak ondo kotahiu ah. a
Yesus ngusir ulun jok borahkang nuk lovun Hotalak
(Mat. 21:12-13; Mrk. 11:15-17; Luk. 19:45-46)
13 Kotihkak ondo Paskah ulun Yahudi was donik, Yesus tulak noku Yerusalem. b 14 Nuk dohopan Lovun Hotalak Yesus pun nohtok ulun-ulun dahkang dolang sahpik, domba khavun ocinaꞌang merpati nuk anai. Arok kak dolang ulun jok tuot nuk lihkut mejak nahtup nuhkar duit. 15 Kotului erih Yesus nguan icok cambuk tahkan talik, khavun Iyok ngusir paring doh mbak ocinlouk ah tahkan dohopan Lovun Hotalak. Dolang mejak doh jok nuhkar duit pun tonokalik-Ah sohinggak dolang duit doh pun hapah nuk tanak. 16 Khavun hiyoi-Ah ahkan doh jok dahkang ocinaꞌang merpati: “Ngoniu ah boluak uras dolang ocinaꞌang atuh khavun dolang kurung ah. Arak nai nguan Lovun Amai Kuk jadik unuk borahkang.” 17 Mahkak dolang murit-Ah nohouk auh jok tonulih luvang kitab Mazmur: “Ahkuk punak mongasihi Lovun Muk Hotalak, khavun kasih Kuk erih ngomohung kolo ahpui luvang ahtoi-Kuk.” c
18 Dolang pomipin Yahudi pun ngolavan Yesus hiyon doh: “Nikos Ihkok motohtok ah ahkan kai aꞌang jok motaher sobagai tandak ngindoi Ihkok arok hak majak kai borahkang nuk ohtoi!”
19 Hiyon Yesus mutah doh: “Monorop ah Lovun Hotalak ihtuh, khavun Ahkuk ahkan motombok jok bohuak toluk ondo kiyak kotahiu ah.” d
20 Khavun hiyon doh: “Ohpat puluk onom toun kotahiu ah ulun motombok Lovun Hotalak tuh. Khavun Ihkok touk motombok ah hinok luvang toluk ondo?”
21 Totahpik Lovun Hotalak jok hiyon Yesus yok noh behtiu-Ah bongoi. 22 Jadik kotihkak Yesus hulik bolum tahkan pomalus-Ah, dolang murit-Ah pun nohouk ah ngindoi Yesus pujik marak ah mongenai aꞌang erih. Mahkak pocayak noh idoh inon jok tonulih luvang Alkitab khavun pocayak kak mbak paring aꞌang jok pomarak Yesus.
Yesus taꞌai suang ahtoi paring ulun
23 Lambak Yesus mocon nuk Yerusalem kotahin ondo porayaan Paskah, tumbuk ulun pocayak mbak Iyok kotului aꞌang jok motaher konguai-Ah. 24 Totahpik Yesus iyam pocayak ngindoi idoh touk sotia mbak Iyok, kotului Yesus taꞌai suang ahtoi doh. 25 Iyok iyam poduluk pomarak iyai pun mongenai tobiat kolunon. Kotului Iyok was taꞌai suang ahtoi paring kolunon.