Yesus bokesah mbak Nikodemus
3
Arok icok behtik pomipin agamak Yahudi ngarai ah Nikodemus iyok tahkan kolompok ulun Parisi. 2 Beteng ngolomik iyok lombut noku Yesus. Iyok bokesah mbak Yesus hiyoi ah: “Guruk, ihkai taꞌai ngindoi Guruk konguhtus Hotalak supayak ngajar ihkai. Kotului iyam arok icok behtik pun jok touk nguan aꞌang jok motaher kolo jok konguam-Muk, ngindoi Hotalak iyam hicok mbak iyok khavun dohop yok nguai ah.”3 Yesus mutah ah: “Pocayak noh, ngindoi icok behtik iyam konganak hinok, mahkak iyok iyam ahkan ngomok Hotalak momoretah jadik Lacak nuk luvang komolum ah”
4 Hiyon Nikodemus ahkan Yesus: “Bohkolo ulun touk hulik konganak ngindoi iyok was okok? Inon leh iyok nyolong hinok noku butui inai ah khavun hulik konganak hinok?”
5 Yesus mutah ah: “Inon jok pomarak Kuk ahkam muk tuh tuꞌuk yarok ulun jok ahkan ngomok Hotalak momoretah jadik Lacak luvang komolum ah, ngindoi iyok iyam konganak hinok nyihing danum khavun Roh Hotalak. 6 Ihtok konganak noku duniak ihtuh nyihing ulun okok tok. Tahpik roh tok konganak nyihing Roh Hotalak. 7 Arak pusong ngindoi Ahkuk marak ah: Ihkam paring ah alah hulik konganak hinok. 8 Korejak Roh Kudus nuk luvang ahtoi kolunon kolo bahiu jok bopuhtar noku amoh kiyak iyok kanik, ihtok touk nyonih auh bahiu erih kiyak, tahpik iyam taan tok tahkan amoh bahiu erih lombut khavun ponulak ah. Koderih noh korejak Roh Kudus Iyok nguan kolunon konganak hinok.”
9 Hiyon Nikodemus ngisok Yesus: “Bohkolo ulun touk konganak tahkan Roh?”
10 Yesus mutah ah: “Ihkok arok noh guruk jok peting nuk Israel, bohkolo ihkok touk yam ngorehti mongenai aꞌang erih? 11 Ahkuk marak ahkam muk, pocayak noh ihkai bokesah mongenai inon jok taan kai, khavun ihkai nongak kosaksian mongenai inon jok was tonohtok kai, totahpik ihkam iyam kanik norimak inon jok pomarak kai erih. 12 Ihkam iyam pocayak ngindoi Ahkuk ngesah ahkan mik mongenai aꞌang jok torjadik nuk duniak tuh. Bohkolo kak ihkam touk pocayak, ngindoi Ahkuk ngesah ahkam mik mongenai paring aꞌang jok tahkan surga? 13 Yarok icok behtik pun pujik nuhkat noku surga, salak mbak Iyok jok mosuluh noku duniak, yok erih Anak Kolunon.
14 Khavun havoi mbak nabik Musa motuhkat topahtung lohik jok tonapak tahkan tembaga unuk icok bahtang kajuk nuk lahpang baras, koderih kak Ahkuk, Anak Kolunon, ahkan ponotuhkat kak kolo erih. a 15 Supayak paring ulun jok pocayak mbak Ahkuk touk duon komolum jok yarok tihkas nyamah ah.”
16 Kotului yamios hajoi kasih Hotalak ahkan duniak ihtuh, sohinggak Iyok nongak Anak-Ah jok tukan, supayak paring ulun jok pocayak mbak Iyok iyam konolohpung, totahpik ngonduon komolum jok yarok tihkas nyamah ah. 17 Kotului Hotalak nguhtus Anak-Ah iyam ahkan ngohukum kolunon jok arok nuk luvang duniak, totahpik supayak kolunon sonyolamat nyihing Iyok. 18 Ulun jok pocayak mbak Iyok iyam ahkan kongohukum. Totahpik ulun jok iyam pocayak idoh was kongohukum Hotalak, kotului idoh iyam pocayak mbak Anak Hotalak jok tukan. 19 Kotului erih noh Hotalak ngohukum ulun-ulun nuk duniak: Tarang jok tahkan surga was lombut noku duniak, totahpik kolunon punak suhkak bolum nuk duniak jok pindong, dari padak bolum luvang tarang, kotului tobiat doh jaek. 20 Kotului iyai nguan aꞌang jok jaek, iyok becik mbak tarang khavun iyok iyam kanik lombut noku tarang erih. Kotului tarang erih ahkan motohtok tobiat doh jok jaek. 21 Totahpik iyai pun nguan aꞌang jok hinut, iyok ahkan lombut noku tarang erih. Supayak nyahtak inon jok konguai ah sosuai mbak kokanin Hotalak.
Kosaksian Yohanes pombaptis mongenai Yesus
22 Umbot erih Yesus khavun dolang murit-Ah tulak noku daerah Yudea. Arok pirak ondo Iyok mocon nuk anai mbak idoh khavun Iyok mombaptis tumbuk ulun. 23 Yohanes pombaptis halik mombaptis dolang ulun nuk kota Ainon donik mbak kota Salim. Nuk anai tumbuk danum, ulun-ulun lombut noku anai ahkan konombaptis ah. b 24 Beteng hun erih Yohanes pombaptis jaham kongurung noku luvang ponjara.
25 Arok pirak behtik murit Yohanes pombaptis idoh hobatah mbak icok behtik ulun Yahudi mongenai porahturan morasih arop doh jok sosuai mbak adat turan ulun Yahudi. 26 Murit-murit ah lombut noku Yohanes pombaptis khavun ngisok yok hiyon doh: “Guruk, Ulun jok pujik pomarak muk ahkan kai, jok hicok mbak ihkok nuk pohoi sungoi Yordan. Iyok huntuh ngombaptis kak, khavun tumbuk ulun lombut noku Iyok!”
27 Yohanes pombaptis mutah ah: “Kolunon iyam taꞌai nguan inon pun ngindoi Hotalak iyam nongak iyok nguai ah. 28 Ihkam was nyonih ahkuk marak ah, ‘Ahkuk iyam Lacak Ponyolamat. Ahkuk konguhtus holuk narung mongenai polombut-Ah’. c 29 Yesus erih kolo pongantin bahkas, ulun-ulun jok lombut noku Iyok kolo pongantin bavik khavun ahkuk kolo jolahan pongantin bahkas. Pongantin bahkas erih noh jok punak peting, ahkuk sobagai jolahan pongantin bahkas tombok nuk silak Iyok, nyonih auh kiyak ahkuk halik ngandah kak. Koderih kak, pongomok kuk punak ngandah tului paring aꞌang jok ongak Hotalak ahkan Yesus. 30 Iyok alah mahi-mahik peting, khavun ahkuk iyam nai peting.”
Yesus lombut tahkan surga
31 Yesus erih lombut tahkan surga, jadik Iyok holovik bokuasak tahkan paring ulun jok arok nuk duniak ihtuh. Kolunon erih asal ah tahkan duniak, khavun kolunon cumak bokesah mongenai duniak. Yesus lombut tahkan surga, kotului erih noh Iyok holovik tahkan paring ah. 32 Iyok bokesah mongenai inon jok tonohtok khavun jok sonyonih-Ah nuk surga, totahpik yarok icok behtik kolunon pun jok pocayak mbak paring aꞌang jok pomarak-Ah. 33 Ulun jok pocayak mbak inon jok pomarak-Ah, iyok pun pocayak ngindoi auh Hotalak erih hinut. 34 Ulun jok konguhtus Hotalak, Iyok marak auh Hotalak kotului Roh Hotalak was ongak ahkai-Ah yamios kohajoi. 35 Amai mongasihi Anak-Ah, khavun Iyok was nongak paring kuasak ahkan Anak-Ah. d 36 Ulun jok pocayak mbak Anak Hotalak iyok ahkan ngonduon bolum jok yarok tihkas nyamah ah. Totahpik ulun jok iyam pahtuh mbak Anak Hotalak iyok iyam ahkan ngonduon bolum jok yarok tihkas nyamah ah. Iyok ahkan konohukum Hotalak nyiring yarok tihkas nyamah ah.