Yesus bokesah mbak icok behtik bavik Samaria
4
Beteng Yesus taꞌai ngindoi ulun-ulun Parisi was nyonih Iyok ngombaptis tumbuk ulun khavun idoh jadik murit-Ah, holovik arok hinok tahkan murit Yohanes. 2 Totahpik sobenar ah Yesus iyam ngombaptis, jok ngombaptis iyok noh murit-murit-Ah. 3 Kotihkak Yesus taꞌai ngindoi ulun Parisi nyonih aꞌang erih, Iyok khavun dolang murit-Ah pun tulak tahkan daerah Yudea khavun bulik noku Galilea. 4 Nuk luvang ponyalai-Ah Yesus pun alah nyihing daerah Samaria. 5 Mahkak docok noh Yesus khavun dolang murit-Ah noku icok kota nuk Samaria ngaran kota erih Sikhar, iyam macuk tahkan tanak jok ongak Yakub ahkan anak ah Yusup lomoi. a 6 Nuk anai arok sumur Yakub. Yesus bo'ok kotului nyalan macuk, tului erih Iyok tuot nuk saran sumur. Beteng erih tohun hondo sokitar jam duok balas. 7 Mahkak lombut noh icok behtik bavik Samaria ngonin totai alap ah iyok kanik ngalap danum. Hiyon Yesus ahkai ah: “Touk leh Ahkuk nyavot danum korih?” 8 Beteng erih dolang murit-Ah was tulak noku kota molik ukun ponguman.9 Khavun bavik Samaria erih mutah ah: “Ahkuk pusong Ihkok nyavot danum korih mbak ahkuk! Kotului Ihkok ulun Yahudi khavun ahkuk tuh ulun Samaria.” (Kotului ulun Yahudi iyam kanik hojolahan mbak ulun Samaria.) b
10 Yesus mutah ah: “Ihkok iyam taꞌai inon jok ahkan tonongak Hotalak ahkam muk. Khavun ngindoi ihkok taꞌai iyai jok nyavot danum korih mbak ihkok, mahkak ihkok jok ahkan holuk nyavot danum korih erih mbak Ahkuk. Khavun Ahkuk ahkan nongak danum jok nguan kok bolum.”
11 Hiyon bavik erih: “Tuan iyam arok tahkip, khavun sumur ihtuh timbon. Tahkan amoh Ihkok ngonduon danum komolum? 12 Yakub tahtuk ajuh kai nongak kai sumur ihtuh. Iyok bongoi ngonin danum korih ah tahkan ohtoi. Koderih kak mbak dolang anak ah khavun dolang ocinlouk jok konomolum ah. Inon leh Tuan ngomok Tuan holovik hajok mbak tahtuk ajuh kai Yakub?”
13 Hiyon Yesus: “Ulun jok ngorih danum tahkan sumur ihtuh ahkan haus hinok. 14 Totahpik ulun jok ngorih danum jok ahkan tonongak Kuk, iyok iyam ahkan haus hinok nyiring yarok tihkas nyamah ah. Kotului danum jok ahkan tonongak Kuk ahkan jadik mahtan danum nuk luvang arop ah jok ahkan nulo nyalut khavun ahkan nongak komolum jok yarok tihkas nyamah ah.”
15 Hiyon bavik Samaria erih: “Tuan, nongak ahkuk danum erih, supayak ahkuk iyam haus hinok khavun iyam nai poduluk malap danum tahkan ohtoi.”
16 Hiyon Yesus: “Tulak nai, naꞌah bosai muk, khavun borok hulik noku ohtoi.”
17 Hiyon bavik erih: “Ahkuk iyam tepun bosai.”
Hiyon Yesus mutah yok: “Inon jok pomarak muk erih hinut, ihkok yam arok bosai muk. 18 Kotului ihkok was ngavuk limok kali, khavun bahkas jok bolum hicok mbak ihkok huntuh iyam bosai muk. Punak tuꞌuk noh hiyom muk erih.”
19 Hiyon bavik erih: “Huntuh ahkuk taꞌai ngindoi Tuan arok noh nabik. 20 Tahtuk ajuh kai ulun Samaria nyembah Hotalak nuk korong tuh, totahpik hiyon mik bangsak Yahudi nuk Yerusalem kiyak unuk ulun nyembah Hotalak.”
21 Hiyon Yesus ahkai ah: “Pocayak noh mbak Ahkuk, icok ondo ihkam touk nyembah Hotalak nuk amoh kiyak, iyam nai nuk korong ihtuh khavun iyam kak nuk Yerusalem. 22 Ihkam ulun Samaria nyembah Hotalak jok iyam kam nyokonok ah. Totahpik ihkai ulun Yahudi nyembah Hotalak jok was sonyokonok kai. Kotului kosolamatan tonongak ahkan kolunon nyihing ulun Yahudi. 23 Totahpik icok ondo ahkan lombut khavun huntuh was torjadik noh, ulun jok tuꞌuk-tuꞌuk nyembah Hotalak, iyok nyembah tahtup pomipin Roh Kudus khavun nyembah Hotalak mbak hinut kolo jok kokanin Hotalak. 24 Kotului Hotalak arok noh Roh, khavun mbak kuasak Roh Hotalak kiyak ulun touk nyembah Iyok mbak hinut.”
25 Bavik erih marak noku Yesus: “Ahkuk taꞌai Lacak Ponyolamat jok pomarak ulun Kristus Iyok ahkan lombut. Ngindoi Iyok lombut, Iyok ahkan marak paring aꞌang ahkan kai.”
26 Hiyon Yesus: “Ahkuk noh Lacak Ponyolamat erih, Ahkuk jok huntuh honong bokesah mbak ihkok.”
27 Beteng erih kak murit-murit-Ah bulik. Idoh pusong Yesus bokesah mbak icok behtik bavik. Totahpik yarok icok behtik pun nuk holang murit-Ah jok bokisok mbak bavik erih mongenai inon jok kongisok ah mbak Yesus, ngindoi iyam bokisok mbak Yesus ngombai Iyok bokesah mbak bavik erih.
28 Mahkak bavik erih nohtah totai alap ah khavun tulak tahkan anai nokoruk noku kota khavun marak ahkan ulun-ulun jok arok nuk anai, 29 hiyoi ah: “Has tok nohtok ah arok icok behtik ulun, Iyok ngesah paring aꞌang jok pujik kuk nguai ah. Iyam leh Iyok erih Lacak Ponyolamat?” 30 Mahkak paring ulun tulak tahkan kota erih khavun lombut noku Yesus.
31 Sojaham doh lombut murit-murit-Ah nulo ngihit Yok kuman. Hiyon doh: “Guruk has tok kuman!”
32 Totahpik Yesus mutah doh: “Ahkuk arok ukun ponguman jok was umbot noh Kuk kumai, khavun ihkam iyam taꞌai ukun erih.”
33 Mahkak dolang murit-Ah bokisok icok mbak jok bohkon: “Inon leh arok ulun ngonin ukun ahkai-Ah?”
34 Khavun hiyon Yesus ahkan doh: “Ukun ponguman Kuk nguan kokanin Iyok jok nguhtus Ahkuk, yok erih ngumbot korejak jok was ongak-Ah ahkak Kuk. 35 Kotihkak ihkam ngumok, hiyon mik: ‘Ohpat bulan hinok musim ngohtom.’ Totahpik Ahkuk marak ahkan mik: Nohtok ah noh dolang umok jok was bohendak, was touk konohtom! 36 Ulun jok ngohtom was norimak uhpah ah khavun iyok ngupur inon jok was duoi ah, yok erih paring ulun pocayak jok norimak komolum jok yarok tihkas nyamah ah. Mahkak ulun jok ngomulan khavun ulun jok ngohtom touk ngandah havo-havoi. 37 Jadik kesah tindung tuh tuꞌuk kak: Jok icok ngomulan jok bohkon ngohtom. 38 Ahkuk nyuhuk kam tulak ngohtom nuk umok jok iyam kam napak ah, ulun bohkon was korejak nuk anai, totahpik ihkam ngohtom hasil korejak doh.”
39 Tumbuk ulun Samaria nuk kota erih jadik pocayak mbak Yesus. Kotului bavik erih marak ahkan doh: “Iyok ngesah ahkak kuk paring aꞌang jok pujik kuk nguai.” 40 Mahkak kotihkak dolang ulun Samaria erih bohavung mbak Yesus, idoh tuꞌuk-tuꞌuk nyavot mbak Yesus supayak Iyok mocon mbak idoh. Jadik Yesus mocon nuk anai duok ondo kotahiu ah.
41 Khavun yamios karoi ah hinok ulun pocayak mbak Yesus kotului paring aꞌang jok kongajar-Ah ahkan doh. 42 Idoh marak ahkan bavik erih, hiyon doh: “Holuk ihkai pocayak mbak Iyok, tului inon jok pomarak muk ahkan kai. Totahpik huntuh ihkai bongon kai noh jok was nyonih Iyok, khavun ihkai taꞌai ngindoi Iyok noh Ponyolamat duniak.”
Yesus nyahkang icok behtik anak kinyam
43 Was duok ondo noh Yesus mocon nuk kota Sikhar, khavun Iyok mbak dolang murit-Ah tulak noku kota Galilea. 44 Iyok bongoi jok pujik marak ahkan doh kolihtuh: “Icok behtik nabik iyam konolehkak unuk kapung pongolovuk ah.” c 45 Jadik beteng Iyok dahpot nuk kota Galilea, ulun-ulun jok arok nuk anai norimak Yok tahtup kandah doh, totahpik kotului idoh was nohtok paring aꞌang jok motaher konguan Yesus beteng ondo porayaan Paskah nuk Yerusalem. d
46 Khavun Yesus pun hulik noku Kana nuk daerah Galilea, nuk amoh Iyok pujik nguan danum jadik anggur. Arok icok behtik pogawai istana lacak jok mocon nuk Kapernaum donik mbak Kana, anak ah honong poros. e 47 Kotihkak pogawai erih nyonih ngindoi Yesus tulak tahkan Yudea khavun was dahpot noh nuk daerah Galilea, iyok tulak noku Yesus khavun nyavot Yesus lombut noku Kapernaum supayak nyahkang anak ah jok manyo mahtoi. 48 Yesus marak ahkan bahkas pogawai istana erih: “Ngindoi ihkam iyam nohtok tandak khavun dolang aꞌang jok motaher, ihkam iyam ahkan pocayak.”
49 Hiyon pogawai erih mutah ah: “Tuan, ngimos ah nai lombut sojaham anak kuk palus.”
50 Hiyon Yesus ahkai ah: “Bulik nai, anak muk was pios.”
Pogawai erih pun pocayak inon jok pomarak Yesus erih hinut, khavun iyok pun bulik. 51 Nuk tohun jalan beteng noku Kapernaum, dolang jihpon ah lombut noku iyok khavun marak ah: “Anak Tuan was pios noh.”
52 Khavun iyok bokisok mbak idoh sokitar jam pirak anak ah pios. Jihpon ah erih mutah ah: “Hondo malom sokitar jam icok tohun hondo pondam ah pios.” 53 Khavun pogawai erih nohouk ah tului tumbas beteng erih noh Yesus marak ahkai ah: “Anak muk was pios.” Mahkak iyok khavun dolang bari-basak ah pun pocayak mbak Yesus.
54 Erih noh koduok kali ah Yesus nguan aꞌang jok motaher beteng Yok bulik tahkan Yudea noku Galilea.