Yesus nyahkang ulun poros nuk kolam Betesda
5
Umbot erih arok porayaan agamak ulun Yahudi, mahkak Yesus tulak noku Yerusalem. 2 Nuk Yerusalem arok gerbang jok tonongak ngarai ah Atop Gerbang Domba. Nuk donik atop erih arok icok kolam, nuk luvang auh Ibrani ngarai kolam erih Betesda, khavun kolam erih arok limok teras aha. 3 Nuk teras erih tumbuk ulun poros jok kaling: arok ulun bobulen, arok jok picang, khavun arok ulun kehtot. Idoh paring ah erih ngindoi danum kolam erih holujak. 4 Kotului arok unuk ah molekat Tuhan mosuluh noku kolam erih khavun notujak danum jok arok nuk anai. Khavun ulun poros jok topahtuk nyolong noku luvang kolam erih noh jok ahkan pios, inon pun ponyahkit ah. 5 Nuk anai arok icok behtik bahkas jok tolun puluk jaluk toun kotahiu ah iyok nulo poros. 6 Yesus nohtok iyok kaling nuk anai, khavun Yesus taꞌai ngindoi bahkas erih was tahik noh poros, mahkak Yesus bokisok mbak iyok hiyoi ah: “Kanik leh kok pios?”7 Bahkas jok poros erih mutah ah: “Tuan, iyam arok ulun nuk ohtoi jok ahkan ngipos ahkuk noku luvang kolam beteng danum ah holujak. Khavun beteng kuk tulak noku kolam atuh, ulun bohkon was holuk nyolong noku anai.”
8 Mahkak hiyon Yesus ahkai ah: “Kuat nai, ngahtang kacang nuk muk kaling atuh khavun nyalan nai.” 9 Beteng erih kak ulun erih pios. Iyok ngahtang kacang ah khavun nyalan.
Totahpik beteng erih Ondo Sabat. 10 Kotului erih dolang pomipin Yahudi marak ulun jok punai pios tahkan oros ah erih: “Hondo tuh Ondo Sabat. Monurut porahturan agamak etok ihkok iyam taꞌai ngahtang kacang nuk kok tiruh atuh.”
11 Totahpik iyok mutah doh: “Ulun jok ngopios kuk nenih jok nyuhuk ahkuk ngahtang kacang khavun nyalan.”
12 Hiyon doh ngisok yok: “Iyai jok nyuhuk ihkok ngahtang kacang unuk poniruh muk khavun nyuhuk kok nyalan?” b 13 Totahpik ulun jok punai pios erih yataꞌai iyai ulun jok was ngopios yok, kotului Yesus was yamarah tahkan tohun ulun arok erih.
14 Umbot erih Yesus pun bohavung mbak ulun erih nuk Lovun Hotalak, khavun marak ahkai ah: “Huntuh ihkok was pios. Nohouk ah, arak nguan dosa hinok, supayak ihkok iyam ngonduon aꞌang jok holovik jaek.”
15 Mahkak tulak noh ulun erih khavun marak ahkan dolang pomipin Yahudi, jok pujik bokisok mbak iyok, ngindoi Yesus noh jok nyahkang iyok. 16 Kotului erih noh dolang pomipin Yahudi ngurah elah ahkan monyorak Yesus, kotului Iyok ngopios ulun beteng ondo Sabat.
17 Totahpik hiyon Yesus ahkan doh: “Amai Kuk nulo korejak nyiring huntuh, khavun Ahkuk pun korejak kak.” 18 Auh erih nguan dolang ulun Yahudi mahi-mahik ngotiak kanik munuk Iyok. Idoh koderih, kotului Iyok iyam pahtuh mbak porahturan agamak mongenai ondo Sabat, khavun kotului Iyok marak Hotalak erih Amai-Ah, monurut doh Iyok ngohavoi arop-Ah mbak Hotalak.
Yesus tepun kuasak Hotalak
19 Yesus mutah dolang pomipin Yahudi erih hiyoi-Ah: “Pocayak noh, Ahkuk arok noh Anak Hotalak, iyam taak Kuk nguan ino-inon ngindoi Ahkuk iyam nohtok Amai-Kuk nguai ah. Kotului inon jok konguan Amai, erih kak jok konguan Anak. 20 Kotului Amai mongasihi ahkuk Anak-Ah, khavun Iyok motohtok ahkak-Kuk paring aꞌang jok konguai-Ah. Holovik hinok Amai halik ahkan motohtok ahkak-Kuk dolang korejak jok punak peting, sohinggak ihkam ahkan pusong. 21 Kotului havoi kolo Amai ngopolum dolang ulun tahkan pomalus ah, khavun nongak doh komolum jok yarok tihkas nyamah ah. Koderih kak Ahkuk Anak-Ah ahkan nongak komolum jok yarok tihkas nyamah ah ahkan ulun jok kokanik-Kuk. 22 Amai iyam ngohakim iyai pun. Paring kuasak jok ahkan ngohakim kolunon was ongak Amai ahkak-Kuk, Anak-Ah. 23 Amai nguan paring erih supayak paring ulun ngolehkak Ahkuk kolo idoh ngolehkak Amai. Ulun jok iyam ngolehkak Anak, iyok iyam kak ngolehkak Amai jok nguhtus Anak-Ah.”
24 Hiyon Yesus: “Punak tuꞌuk auh Kuk tuh: Ulun jok nyonih auh Kuk khavun pocayak mbak Iyok jok nguhtus Ahkuk, iyok tepun bolum jok yarok tihkas nyamah ah. Iyok iyam ahkan konohukum, tului iyok was ponolahpas tahkan kuasak jok nguan ulun mahtoi khavun ngonduon bolum jok yarok tihkas nyamah ah. 25 Punak tuꞌuk auh Kuk tuh: Ahkan lombut ondo ah khavun huntuh was torjadik, ulun-ulun jok bolum idoh kolo ulun mahtoi tului iyam pocayak mbak Hotalak, idoh ahkan nyonih auh Anak Hotalak khavun idoh ahkan bolum. 26 Havoi kolo Amai tepun kuasak ahkan nongak komolum, Iyok nongak kuasak erih kak ahkan Anak supayak touk kak nongak komolum. 27 Amai Kuk halik was nongak kuasak ahkak Kuk supayak ngohakim kolunon, kotului Ahkuk Anak Kolunon. 28 Arak ihkam pusong nyonih aꞌang ihtuh, kotului ondo ah ahkan lombut paring ulun jok was tonanom ahkan nyonih auh-Ah. 29 Khavun idoh jok tobiat ah pios ahkan boluak tahkan tanom doh khavun idoh ahkan ngonduon komolum jok yarok tihkas nyamah ah. Totahpik ulun jok jaek tobiat ah idoh ahkan hulik bolum khavun ahkan konohukum.” c
Idoh bokesah mongenai Yesus
30 Hiyon Yesus: “Iyam taak Kuk nguai kokanik Kuk bongok. Ahkuk ngohakim sosuai mbak inon jok kongajar Hotalak ahkak Kuk. Khavun Ahkuk ngohukum mbak adil, kotului Ahkuk ngohakim iyam tului kokanin Kuk totahpik kokanin Iyok jok nguhtus Ahkuk.
31 Ngindoi Ahkuk nongak kosaksian mongenai arop Kuk, mahkak ihkam iyam ahkan pocayak ngindoi inon jok pomarak Kuk erih hinut. 32 Totahpik arok kosaksian jok bohkon tahkan Amai mongenai Ahkuk, khavun Ahkuk taꞌai inon jok pomarak-Ah erih mongenai Ahkuk hinut. 33 Ihkam was nguhtus ulun noku Yohanes pombaptis, khavun iyok was marak aꞌang jok hinut mongenai Ahkuk. d 34 Jok kotuui ah Ahkuk iyam poduluk ulun ngesah mongenai arop Kuk, totahpik Ahkuk marak ahkan mik ngindoi kosaksian Yohanes pombaptis erih hinut supayak kam pocayak khavun sonyolamat. 35 Yohanes erih kolo sumbuk jok ngonyelak, iyok nongak tarang, totahpik ihkam nyohuluk kiyak kanik ngomok tarang ah erih. 36 Totahpik jok holovik peting tahkan kosaksian Yohanes arok noh paring aꞌang jok konguak Kuk khavun jok tonongak Amai ahkak Kuk. Erih noh jok motohtok ah ngindoi Amai was nguhtus Ahkuk noku duniak ihtuh. 37 Khavun Amai jok nguhtus Ahkuk Iyok noh jok motohtok ah iyai Ahkuk jok kotuui ah. Totahpik ihkam iyam pujik nyonih auh-Ah khavun iyam pujik nohtok tapak Ah. e 38 Tuhtui auh-Hotalak iyam tokinak nuk luvang ahtoi mik, kotului ihkam iyam kanik pocayak mbak Ahkuk jok konguhtus-Ah. 39 Ihkam hodilik mongenai suang Kitab Suci, kotului davak mik nuk luvang ah ihkam ahkan ngonduon bolum nyiring yarok tihkas nyamah ah. Khavun nuk luvang Kitab Suci tonulih mongenai iyai sobenar ah Ahkuk tuh. 40 Totahpik ihkam iyam kanik lombut noku Ahkuk supayak ngonduon komolum jok yarok tihkas nyamah ah.
41 Ahkuk iyam ngurah supayak kongehtek kolunon. 42 Ahkuk nyokonok ihkam. Ahkuk taꞌai ihkam iyam mongasihi Hotalak nuk luvang ahtoi mik. 43 Ahkuk lombut mbak kuasak Amai Kuk, totahpik ihkam iyam norimak Ahkuk. Totahpik ngindoi ulun bohkon lombut mbak kuasak ah bongoi, ihkam kanik norimak ulun erih. 44 Ihkam ngandah ngindoi hokehtek havoi arop mik, tahpik ihkam iyam ngotiak ngurah kehtek tahkan Hotalak jok ico-icok ah. Jadik, bohkolo ihkam touk pocayak? 45 Arak ihkam davak ngindoi Ahkuk ahkan nondah ihkam salak nuk husuk Amai-Kuk. Totahpik jok ahkan marak dolang kosalak mik arok noh Musa, iyok noh jok konoharap mik. 46 Kotului ngindoi ihkam pocayak mbak Musa, ihkam ahkan pocayak kak mbak Ahkuk, tului iyok was nulih mongenai Ahkuk. 47 Totahpik ngindoi ihkam iyam pocayak mbak inon jok tonulih Musa, bohkolo ihkam touk pocayak inon jok pomarak-Kuk?”