Yesus mokuman limok kujan behtik ulun
(Mat. 14:13-21; Mrk. 6:30-44; Luk. 9:10-17)
6
Pirak ondo ulik erih Yesus tulak noku pohoi danau Galilea, danau erih kongohavot kak ngarai ah danau Tiberias. 2 Tumbuk kolompok ulun ngohasuk Iyok kotului idoh was nohtok aꞌang jok motaher konguai-Ah ahkan ulun-ulun jok poros. 3 Khavun Yesus nuhkat noku korong, khavun tuot nuk anai mbak dolang murit-Ah. 4 Beteng erih was manyo noh Ondo Paskah ulun Yahudi. 5 Beteng Yesus nohtok hokosilak-Ah, Iyok nohtok tumbuk ulun lombut noku Iyok. Mahkak hiyoi ahkan Pilipus: “Nuk amoh ihtok touk molik ukun ponguman, ahkan paring ulun tuh touk kuman?” 6 Yesus was taꞌai inon jok ahkan konguai-Ah, totahpik Iyok bokesah koderih tului Iyok kanik nohtok inon leh Pilipus pocayak mbak Iyok.7 Hiyon Pilipus mutah-Ah: “Duit karon duok lahtus dinar pun, uhpah ulun korejak onom bulan, iyam ahkan cuhkup molik ukun ponguman ahkan paring ulun tuh, holuk poh paring ulun jok nuk ohtoi hobagik nyohio-nyohiot kiyak.”
8 Icok behtik tahkan dolang murit-Ah, yok erih Andreas jok harik mbak Simon Petrus, hiyoi Andreas ahkan Yesus: 9 “Nuk ohtoi arok anak kinyam bahkas iyok tepun limok roti khavun duok ocin. Totahpik erih iyam cuhkup ahkan paring ulun jok arok nuk ohtoi.”
10 Nuk anai tumbuk uruk, hiyon Yesus ahkan dolang murit-Ah: “Nyuhuk dolang ulun erih tuot.” Jadik paring ulun erih tuot nuk isung uruk. Karon ulun nuk anai sokitar limok kujan behtik, jok kongohitung ulun bahkas kiyak. 11 Yesus pun ngonin roti, khavun bosukur noku Hotalak. Umbot erih Iyok nyuhuk dolang murit-Ah magik roti ahkan ulun arok, koderih kak Iyok nguan ocin erih. Idoh pun kuman nyiring bosuh. 12 Umbot paring doh kuman nyiring bosuh, hiyon Yesus ahkan dolang murit-Ah: “Ngupur ah tisan ukun ponguman erih, arak sapai arok jok hajang.” 13 Khavun doh ngupur duok balas bahkun tuvik tisan limok roti jok umbot doh kumai ah.
14 Kotihkak ulun arok nohtok aꞌang jok motaher konguan Yesus, hiyon doh marak ah: “Tuꞌuk noh, Iyok tuh nabik jok ahkan lombut noku duniak!” 15 Yesus taꞌai idoh lombut kanik mahpak Yok jadik lacak doh. Kotului erih Iyok tulak bongoi noku korong.
Yesus nyalan nuk isung danum
(Mat. 14:22-33; Mrk. 6:45-52)
16 Kotihkak ondo was manyo noh pindong, dolang murit Yesus mosuluh noku danau. Khavun idoh jahkat nuk alut, 17 turus mihtah noku Kapernaum. Ondo was pindong tahpik Yesus jaham kak lombut noku idoh. 18 Beteng erih danau holujak kotului bahiu bolovut. 19 Idoh was ngavus sokitar limok nyiring onom kilomehter noh kacun doh tahkan kovang, idoh nohtok Yesus nyalan nuk isung danum Iyok ngoronik doh. Idoh botokihkoh nohtok ah. 20 Totahpik hiyon Yesus ahkan doh: “Arak mihkoh, ihtuh Ahkuk!” 21 Khavun tahtup kandah idoh norimak Yesus nyolong noku luvang alut, khavun hun erih kak alut erih dahpot nuk doh jok ahkan tulik.
Ulun arok erih ngurah Yesus
22 Hondo havun ah ulun arok jok tonohtah Yesus khavun murit ah nuk pohoi danau, sojaham ah idoh was nohtok ngindoi arok icok alut kiyak nuk anai. Beteng erih kak punan doh taꞌai ngindoi dolang murit Yesus was tulak noh tahkan anai hatin alut erih, totahpik Yesus iyam umbak doh mihtah hatin alut erih. 23 Khavun arok pirak alut tahkan kota Tiberias lombut, dolang alut erih tulik nuk donik ulun arok jok ponokuman Yesus mbak roti ulik Iyok mongucap sukur noku Hotalak. 24 Kotului ulun arok erih taꞌai ngindoi Yesus khavun dolang murit-Ah yarok nuk anai, idoh nuhkat dolang alut erih khavun umbak tulak noku Kapernaum ngurah Yesus.
Yesus iyok noh roti jok nongak bolum
25 Beteng doh was mihtah noku Kapernaum idoh pun tobarung mbak Yesus nuk anai, idoh pun bokisok mbak Iyok: “Guruk, mirak Guruk dahpot nuk ohtoi?”
26 Yesus mutah ah: “Punak tuꞌuk inon jok pomarak Kuk, ihkam ngurah Ahkuk iyam kotului ihkam nohtok dolang aꞌang jok motaher jok konguak Kuk, totahpik kotului ihkam was kuman nyiring bosuh. 27 Arak noh korejak supayak duon ukun ponguman jok touk ohpah khavun touk maram. Korejak noh supayak ngonduon ukun ponguman jok iyam taꞌai maram khavun jok nguan tok bolum nyiring yarok tihkas nyamah ah. Ahkuk Anak Kolunon ahkan nongak ukun ponguman ahkan mik, kotului Hotalak Amai was nongak hak ahkak-Kuk.”
28 Khavun idoh bokisok mbak Yesus hiyon doh: “Inon jok alah kai nguai ah supayak korejak sosuai kokanin Hotalak?” 29 Yesus mutah ah: “Pocayak noh mbak Iyok jok konguhtus Hotalak, erih noh korejak jok konganin Hotalak kam nguai.”
30 Hiyon doh ahkan Yesus: “Ngindoi koderih, aꞌang jok motaher jok bohkolo jok ahkan konguam Muk supayak ihkai nohtok ah khavun ihkai pocayak mbak Ihkok? Khavun inon hinok jok ahkan kongorejak Muk? 31 Tahtuk ajuh tok kuman roti manna nuk lahpang baras, kolo jok tonulih luvang Kitab Suci: Iyok nongak doh kuman roti jok tahkan surga.” a
32 Khavun hiyon Yesus ahkan doh: “Jok kotuui ah iyam Musa jok nongak roti tahkan surga ahkam muk, totahpik Amai Kuk jok ahkan nongak ahkam muk roti jok hinut tahkan surga. 33 Kotului roti jok ongak Hotalak arok noh roti jok mosuluh tahkan surga khavun nongak komolum ahkan kolunon jok arok nuk duniak.”
34 Khavun hiyon doh ahkan Yesus: “Tuan nongak ah nulo roti erih ahkan kai.”
35 Hiyon Yesus ahkan doh: “Ahkuk noh roti jok nongak komolum, ulun-ulun jok lombut noku Ahkuk iyam ahkan pujik bolouk hinok. Khavun ulun jok pocayak mbak Ahkuk iyam ahkan pujik haus hinok.
36 Totahpik kolo jok was pomarak Kuk ahkan mik, holuk poh ihkam was nohtok Ahkuk, ihkam iyam ahkan pocayak. 37 Paring ulun jok sonyerah Amai ahkak Kuk ahkan lombut noku Ahkuk. Ahkuk iyam ahkan ngomelek iyai pun jok lombut noku Ahkuk. 38 Kotului Ahkuk mosuluh tahkan surga iyam nguan inon jok kokanik Kuk, totahpik nguan inon jok konganin Amai tului Iyok jok nguhtus Ahkuk. 39 Khavun ihtuh noh konganin Amai nguhtus Ahkuk: Supayak paring ulun jok was sonyerah ahkak Kuk, iyam icok behtik pun jok niho, khavun supayak Ahkuk nguan doh hulik bolum beteng Ondo Kiamat. 40 Tului ihtuh noh konganin Amai Kuk: Supayak paring ulun jok nohtok Ahkuk Anak-Ah khavun pocayak mbak Ahkuk ngonduon komolum jok yarok tihkas nyamah ah, khavun Ahkuk ahkan nguan idoh hulik bolum beteng Ondo Kiamat.”
41 Mahkak dolang ulun Yahudi ngomumut ahkan Yesus, kotului Iyok marak ah: “Ahkuk noh roti jok was mosuluh tahkan surga.” 42 Idoh marak ah: “Iyam leh ihtuh Yesus, anak Yusup? Ihtok taꞌai iyai amai inai Ah! Bohkolo Iyok touk marak ah Iyok was mosuluh tahkan surga?”
43 Khavun hiyon Yesus ahkan doh: “Arak ngomumut. 44 Amai noh jok nguhtus Ahkuk, yarok icok behtik pun touk lombut noku Ahkuk ngindoi Amai iyam ngomin yok noku Ahkuk. Khavun iyai jok lombut noku Ahkuk ahkan hulik bolum konguak Kuk beteng Ondo Kiamat. 45 Nuk luvang buhkuk dolang Nabik tonulih kolihtuh: ‘Paring ulun ahkan kongajar Hotalak.’ Jadik paring ulun jok was nyonih khavun norimak ajar barak tahkan Amai, idoh ahkan lombut noku Ahkuk. b 46 Iyam tului idoh was nohtok Amai, ico-icok ah ulun jok pujik nohtok Amai yok erih Ahkuk jok lombut tahkan Amai.
47 Punak tuꞌuk auh Kuk tuh: Ulun jok pocayak mbak Ahkuk tepun komolum jok yarok tihkas nyamah ah. 48 Ahkuk noh roti jok nongak komolum. 49 Tahtuk ajuh muk kuman manna nuk lahpang baras khavun idoh mahtoi kak. 50 Totahpik iyam koderih mbak roti jok tahkan surga, ulun jok kuman roti erih iyam ahkan mahtoi. 51 Ahkuk noh roti jok tahkan surga roti jok nongak komolum. Ulun jok kuman roti erih ahkan bolum nyiring yarok tihkas nyamah ah. Roti jok ahkan tonongak Kuk ahkan kolunon jok bolum nuk duniak arok noh usik Kuk.”
52 Nyonih erih, ulun-ulun Yahudi hobatah icok mbak jok bohkon. Hiyon doh: “Bohkolo Ulun tuh touk nongak usiu-Ah supayak tok kumai?”
53 Khavun hiyon Yesus ahkan doh: “Pocayak noh mbak Ahkuk, ngindoi ihkam iyam kuman usin Anak Kolunon khavun ngorih dahak-Ah, ihkam iyam ahkan ngonduon bolum jok yarok tihkas nyamah ah. 54 Ulun jok kuman usik Kuk khavun ngorih dahak Kuk tepun komolum jok yarok tihkas nyamah ah khavun Ahkuk ahkan ngopolum yok beteng Ondo Kiamat. 55 Kotului usik Kuk arok noh ukun ponguman jok hinut, khavun dahak kuk arok noh danum korih jok hinut. 56 Ulun jok kuman usik Kuk khavun ngorih dahak Kuk, tehtap hicok mbak Ahkuk, iyok mocon nuk luvang Ahkuk khavun Ahkuk mocon nuk luvang iyok. 57 Amai jok bolum erih, nguhtus Ahkuk khavun Ahkuk pun bolum tahkan Amai. Koderih kak ulun jok kuman usik Kuk iyok ahkan bolum tahkan Ahkuk. 58 Ihtuh noh roti jok mosuluh tahkan surga, iyam kolo roti jok ukun tahtuk ajuh muk. Holuk poh idoh was umbot kuman roti erih, idoh mahtoi kak. Totahpik ulun jok kuman roti ihtuh ahkan bolum nyiring yarok tihkas nyamah ah.”
59 Paring ah erih pomarak Yesus kotihkak Iyok ngajar nuk lohpo sombayang ulun Yahudi nuk Kapernaum.
Dolang murit nohtah Yesus
60 Umbot doh nyonih auh Yesus erih, tumbuk nuk holang murit-Ah bokesah hiyon doh: “Ajar barak tuh iyam tok ngorehti ah, dalo kobahat ah! Iyai jok duoi norimak ah?”
61 Yesus taꞌai ngindoi dolang murit-Ah ngomumut mongenai ajar barak erih. Mahkak hiyoi-Ah: “Inon leh ajar barak Kuk tuh nguan kam poros ahtoi? 62 Bohkolo nain ngindoi ihkam nohtok Ahkuk, Anak Kolunon hulik bulik hinok nuk surga, unuk asal-Kuk? 63 Jok nguan kolunon bolum iyok noh Roh Hotalak. Komuhat kolunon yam arok gunai ah. Ajar barak jok pomarak Kuk ahkam muk arok noh tuhtui auh Roh Hotalak khavun auh jok nongak komolum ahkam muk. 64 Totahpik arok kak nuk holang ihkam jok iyam pocayak.” Kotului tahkan topahtuk ah Yesus was taꞌai ah iyai jok iyam pocayak, khavun iyai jok ahkan ngohianat Iyok. 65 Khavun hiyon Yesus nok: “Kotului erih noh Ahkuk marak ahkan mik: Yarok icok behtik pun jok touk lombut noku Ahkuk, ngindoi Hotalak Amai iyam ngomin yok lombut noku Ahkuk.”
66 Beteng erih noh tumbuk dolang murit-Ah jok nohtah Iyok, khavun iyam kanik ngohasuk Iyok nai.
Petrus tuꞌuk-tuꞌuk pocayak mbak Yesus
67 Khavun hiyon Yesus ahkan koduok balas murit Ah: “Inon leh ihkam halik kanik nohtah Ahkuk kak?”
68 Hiyon Simon Petrus ahkai-Ah: “Tuhan, yam taan kai tulak noku iyai? Auh Muk nongak komolum jok yarok tihkas nyamah ah. c 69 Ihkai was tuꞌuk pocayak ngindoi Ihkok noh jok kudus jok konguhtus Hotalak.”
70 Yesus mutah ah: “Iyam leh Ahkuk jok ngopilik ihkam duok balas tuh? Totahpik arok icok nuk holang ihkam arok noh jihpon Lacak paring otuk!” 71 Jok pomarak Yesus erih iyok noh Yudas anak Simon Iskariot. Kotului Yudas noh jok ahkan ngohianat Yesus oluk poh iyok arok noh icok behtik tahkan holang koduok balas murit-Ah.