Yesus konomelek nuk kapung Ah Nazaret
(Mat. 13:53-58; Luk. 4:16-30)
6
Umbot erih Yesus nohtah kota Kapernaum khavun hulik noku Nazaret kapung unuk Iyok konohanyok. Dolang murit Ah pun ngohasuk Iyok. 2 Beteng ondo Sabat Yesus ngajar nuk lovun ibadat ulun Yahudi khavun tumbuk ulun, idoh salut beteng nyonih Iyok bokesah. Khavun hiyon doh: “Tahkan amoh Iyok bolajar paring ah erih? Nuk amoh Iyok ngonduoi kohorahtik erih? Khavun aꞌang jok motaher erih bohkolo iyok touk nguai ah? 3 Iyam leh Iyok tuh tuhkang kajuk, anak Maria, jolahan Yakobus harik, Yoses, Yudas khavun Simon? Iyam leh jolahai harik jok bavik arok mbak ihtok?” Khavun idoh ngomelek Yesus, mahkak idoh iyam kanik pocayak mbak Iyok.4 Mahkak hiyon Yesus marak doh: “Icok behtik nabik konolehkak nuk amo-amoh totahpik iyok iyam konolehkak nuk kapung ah, khavun nuk holang dolang arik okak khavun bari-basak basak ah.” a
5 Nuk anai Yesus ngopios arok pirak behtik ulun poros kiyak kotihkak Iyok nihkas longoi nuk isung idoh, Iyok iyam tumbuk nguan aꞌang jok motaher. 6a Iyok pusong kotului doh iyam pocayak mbak Iyok.
Yesus nguhtus koduok balas murit
(Mat. 10:5-15; Luk. 9:1-6)
6b Umbot erih Yesus nyalan tahkan kapung noku kapung jok bohkon turus Yok ngajar marak nongenai auh Hotalak. 7 Iyok naꞌah koduok balas murit Ah turus nguhtus duo-duok behtik icok kolompok. Iyok nongak doh kuasak supayak muhkok roh-roh jaek. 8 Khavun nanjik doh supayak arak ngonin inon-inon nuk luvang ponyalan doh, kocuali sokuhut, arak ngonin ukun ponguman, landong, khavun duit, b 9 touk hatin sopahtuk, totahpik arak bohatik kolambik hatin jok nuk behtim doh kiyak. 10 Khavun hiyon Yesus hinok marak doh: “Ngindoi nuk icok kapung ihkam tonorimak nuk icok lovuk, mocon nuk anai nyiring kam tulak tahkan kapung erih. 11 Totahpik ngindoi arok kapung jok iyam kanik norimak ihkam mocon nuk anai, khavun ngindoi idoh iyam kanik nyonih ajar barak muk, boluak noh tahkan anai nopuhit ah poruhuk tahkan paam muk sobagai tandak ahkan doh ngindoi idoh salak.” c
12 Khavun murit-murit Yesus pun tulak ngajar marak ulun arok ngindoi doh harus botobat. 13 Dolang murit Yesus erih pun tumbuk muhkok dolang roh jaek, khavun ngasak ulun jok poros mbak binyak zaitund khavun idoh pun pios. e
Yohanes Pombaptis pomunuk
(Mat. 14:1-12; Luk. 9:7-9)
14 Lacak Herodes nyonih kesah mongenai Yesus, kotului ngarai ah was taan paring ulun khavun ulun marak ah, hiyon doh: “Ulun ihtuh arok noh Yohanes Pombaptis jok was hulik bolum tahkan pomalus ah, kotului erih noh Iyok tepun kuasak nguan aꞌang jok motaher.” f
15 Totahpik ulun bohkon marak ah: “Iyok Elia.”
Arok kak jok marak ah: “Iyok nabik, havoi mbak nabi-nabik jaman holuk.”
16 Beteng Herodes nyonih paring ah erih, iyok marak ah: “Pasti yok erih Yohanes Pembaptis jok pujik kuk nyuhuk mutung ujat ah. Huntuh iyok hulik bolum hinok!”
17 Kotului holuk Herodes jok nyuhuk ulun navan Yohanes khavun ngipos yok noku luvang ponjara. Kotului Herodes ngavuk mbak Herodias. Pilipus dorok Herodes harik, Herodias arok noh oruh Pilipus. g 18 Kotului tobiat ah erih noh Yohanes Pombaptis nulo ngajar marak Herodes, hiyoi ah: “Iyam taꞌai ihkok hosokavuk umbak oruh jolaham harik!”
19 Erih noh buhkui ah Herodias becik mbak Yohanes khavun kanik munuk yok, totahpik iyok iyam taꞌai nguai ah, kotului pomajak Herodes. 20 Herodes mihkoh mbak Yohanes kotului Yohanes ulun jok konguhtus Hotalak khavun iyok pahtuh mbak poletah Hotalak. Jadik Herodes jagak Yohanes. Beteng Herodes nyonih ajar barak Yohanes iyok deroh pongomok ah, totahpik iyok ngandah nyonih ajar barak erih.
21 Totahpik beteng Herodes ngoramik ondo ulang tahun ah, Herodias arok jalan supayak iyok touk munuk Yohanes. Beteng erih Herodes ngoramik ondo ulang toun mbak dolang ponjabat khavun mbak dolang kopalak porajurit khavun ulun-ulun jok bokuasak nuk Galilea. 22 Beteng erih anak Herodias jok bavik nari, tarian ah erih nguan ahtoi Herodes ngandah, khavun paring ulun jok lombut noku acara erih. Lacak Herodes marak ahkan bavik beleh erih: “Nyavot ah kiyak ahkak kuk inon kojolik muk, mahkak ahkuk ahkan nongak kok!” 23 Khavun Herodes hotulut ahkan nongak yok inon jok sonyavot ah: “Inon kiyak jok sonyavot muk ahkan tonongak kuk ahkam muk holuk poh ihkok nyavot sotengah tahkan korajaan tuh!”
24 Anak kinyam bavik erih tulak khavun ngisok inai ah: “Inon jok harus sonyavot kuk?”
Inai ah mutah yok: “Nyavot kuhung Yohanes Pombaptis!” 25 Mahkak ngimo-ngimos ah yok tulak noku lacak Herodes khavun marak ah inon jok ahkan sonyavot ah, hiyoi ah: “Ahkuk kanik, supayak huntuh ihkok nongak ahkak kuk kuhung Yohanes Pombaptis, nihkas ah nuk luvang talam!”
26 Khavun piluk noh ahtoi lacak Herodes nyonih ah, totahpik kotului tulut ah khavun kotului dolang tamu-tamu ah iyok harus nongak inon jok sonyavot anak kinyam erih. 27 Herodes turus moletah porajurit ah nyuhuk doh ngonin kuhung Yohanes, porajurit ah erih pun turus tulak khavun mutung kuhung Yohanes Pombaptis nuk luvang ponjara. 28 Porajurit ah erih turus ngonin kuhung Yohanes nuk luvang talam khavun nongak ah ahkan anak kinyam beleh erih khavun anak kinyam erih nongak ahkan inai ah. 29 Kotihkak murit-murit Yohanes nyonih kesah erih idoh lombut khavun ngoniu otui ah, khavun turus nanom ah.
Yesus mokuman limok kujan behtik ulun
(Mat. 14:13-21; Luk. 9:10-17; Yoh. 6:1-14)
30 Khavun ulik erih koduok balas rasul jok konguhtus Yesus erih idoh bulik hokupur mbak Yesus khavun ngesah ahkai Ah paring jok kongorejak khavun jok kongajar doh. 31 Yesus marak ahkan doh: “Hai tok noku jok bungun jok iyam arok ulun, supayak ihtok bongon tok kiyak, nondok olai!” Kotului yamios karoi ulun jok lombut khavun tulak, sohinggak kuman pun idoh yam hocok. 32 Mahkak tulak noh idoh noku jok bungun hatin alut.
33 Totahpik beteng doh nulak alut tumbuk ulun jok nohtok khavun taꞌan doh noku amoh Yesus khavun murit-murit ah ahkan tulak. Ulun arok erih tulak nyalan nyihing tanak diang, idoh tahkan havoi aiw kota, doh holuk dahpot mbak Yesus khavun dolang murit Ah. 34 Beteng Yesus tohkak tahkan alut iyok nohtok yamios karon ulun, mahkak masik noh Iyok mbak idoh. Kotului idoh kolo domba jok yarok kongurus, khavun Iyok ngajar marak doh mongenai paring aꞌang. h 35 Beteng ondo was manyo pindong, murit-murit Yesus lombut marak Yok hiyon doh: “Nuk ohtoi bungun khavun ondo manyo noh pindong. 36 Nyuhuk ah noh doh tulak, supayak doh touk molik dolang ukun ponguman nuk kapung-kapung nuk jok donik mbak ohtoi.”
37 Totahpik hiyon Yesus mutah doh: “Ihkok harus nongak doh kuman!”
Hiyon doh mutah Yesus hinok: “Inon leh ihkai harus molik roti lehkan duok lahtus dinari ahkan doh touk kuman?” 38 Totahpik hiyon Yesus marak dolang murit-murit Ah: “Pirak kobikap roti jok arok nuk ihkam? Nikos morisak ah!” Umbot doh morisak ah hiyon doh: “Limok roti khavun duok ocin.”
39 Khavun Yesus nyuhuk paring ulun erih, supayak doh tuot hicok nuk luvang kolompok, nuk isung uruk. 40 Mahkak tuot noh idoh yamios karoi kolompok ah icok kolompok arok jok solahtus behtik, arok kak jok liman puluk behtik. 41 Umbot Yok ngonin limok roti khavun duok ocin erih Iyok nokarak noku langit khavun bodoa bosukur, umbot erih Yok nyipak roti erih turus nongak murit-murit Ah supayak idoh magi-magik ah ahkan ulun arok erih koderih kak mbak ocin erih halik pomagik kak ahkan ulun jok arok nuk anai. 42 Khavun paring doh kuman nyiring bosuh. 43 Umbot doh kuman Idoh ngupur roti erih tisai ah duok balas bahkun nyakum tisan ocin. 44 Jok mbak kuman roti erih sokitar limok kujan bahkas.
Yesus nyalan nuk isung danum
(Mat. 14:22-33; Yoh. 6:16-21)
45 Umbot erih Yesus nyuhuk murit-murit Ah nyolong noku alut khavun tulak holuk noku pohoi danau nuk Betsaida, ulun arok erih sonyuhuk Ah bulik. 46 Umbot Yok homomilang mbak ulun arok erih, Iyok tulak bodoa noku korong. 47 Kotihkak ondo was ngolomik alut jok hatin murit-murit ah erih was nuk tohun bolohuk, totahpik Yesus bongoi ah noh jok honong nuk korong. 48 Kotihkak Yok nohtok yamios kolo halin doh ngavus alut erih tului alut doh hokolavan mbak arah bahiu jok nyangit, mahkak sokitar jam toluk ngolomik Iyok nyalan nuk isung bilun danum kanik noku murit-murit Ah, totahpik Iyok kolo jok kanik nokalo idoh. 49 Kotihkak doh nohtok Iyok nyalan nuk isung danum, davak doh Iyok otuk, idoh mihkoh khavun ngoriak, 50 paring doh tokocit nohtok Ah.
Totahpik Iyok turus bokesah mbak idoh hiyoi Ah: “Arak mihkoh, ihtuh Ahkuk!” 51 Kotihkak Iyok jahkat noku luvang alut, bahiu pun tondok. Idoh pusong nohtok paring ah erih. 52 Idoh iyam soleng inon rehti ah kotihkak Yesus nguan limok roti erih jadik arok. Khavun idoh iyam ngorehti inon jok uwas torjadik.
Yesus nyahkang ulun-ulun poros nuk Genesaret
(Mat. 14:34-36)
53 Beteng doh docok pohoi danau, Yesus khavun dolang murit-murit Ah tulik nuk Genesaret khavun nyuhkui alut doh nuk anai. 54 Kotihkak Yesus khavun murit-murit ah tohkak tahkan luvang alut, ulun jok arok nuk anai turus sokonan doh ngindoi erih Yesus. 55 Mahkak dolang ulun jok arok nuk anai nokoruk noku paring daerah marak ahkan ulun-ulun bohkon ngindoi nuk anai arok Yesus. Khavun idoh ngonin dolang ulun jok poros nandu ah noku Yesus. Ngindoi idoh nyonih Yesus arok nuk anai mahkak idoh ngonin ulun-ulun jok poros noku anai. 56 Yesus nyalan hinok, noku kota noku kapung khavun noku desa-desa. Noku amoh pun Iyok tulak tumbuk ulun jok ngonin ulun poros idoh tonihkas nuk pasar khavun idoh nyavot mbak Yesus, supayak Yesus arak majak ulun jok poros erih nukik jubah Ah. Khavun dolang ulun jok nukik jubah Ah turus pios.