Yesus muhkok roh jaek tahkan ulun Gerasa
(Mat. 8:28-34; Luk. 8:26-39)
5
Umbot erih Yesus khavun murit-murit Ah mihtah idoh pun docok nuk pohoi Danau Galilea, nuk daerah Gerasa. 2 Beteng Yesus punai mosuluh tahkan alut, lombut noh noku Iyok icok behtik ulun jok sonyorupang roh jaek, iyok lombut tahkan tanom. 3 Ulun jok sonyorupang erih mocon nuk tanom, iyok muhat yarok icok behtik pun jok duon doh ngahut yok, oluk poh kahut mbak ratai. 4 Was bojoin ulun ngahut longoi ah khavun paai ah mbak ratai, totahpik iyok duoi ah mahtot rantai jok nuk ngahut longoi ah khavun molot umat jok nuk nahan paai ah. Iyok punak muhat yarok icok behtik pun jok duon doh namit yok. 5 Hondo ngolomik iyok mocon nuk tanom khavun nuk korong-korong, iyok ngoriak tahtup ngolang arop ah mbak bahtuk.6 Beteng yok nohtok Yesus tahkan macuk, iyok nokoruk lombut noku Yesus khavun nyuhkuk nuk husuk Ah. 7 Khavun mbak auh jok mohing ulun erih ngoriak hiyoi ah: “Inon urus Muk mbak ahkuk, O Yesus, Anak Hotalak jok Paling Isung? Ahkuk nyavot mbak ihkok supayak kok janjik mbak ngaran Hotalak tului ihkok iyam ahkan monyorak ahkuk!” 8 Iyok bokesah koderih kotului Yesus was umbot marak ahkai ah: “O roh jaek! Boluak tahkan ulun ihtuh!”
9 Khavui Yesus ngisok ulun erih: “Iyai ngaram muk?”
Iyok mutah ah: “Ngarak kuk Legiona, kotului yamios karon kai.” 10 Roh-roh jaek erih nulo nyavot supayak Yesus arak ngusir doh tahkan daerah erih.
11 Beteng erih nuk saran korovih arok dolang urak hokorumbuk ngurah ukui ah. 12 Khavun roh-roh jaek erih nyavot mbak Yesus hiyon doh: “Mosuah ah noh ihkai nyolong noku luvang urak-urak erih!” 13 Khavun Yesus mosuah roh-roh jaek boluak tahkan ulun erih turus nyolong noku luvang urak-urak erih. Karon urak erih duok kujan, idoh nomarang tahkan saran korovih khavun mahtoi bolonyot nuk danau.
14 Mahkak nokoruk noh ponjaga-ponjagak urak-urak erih khavun ngesah mongenai aꞌang jok was torjadik noku kota khavun kapung-kapung jok hokosilak erih. Ulun-ulun pun boluak nyalan nohtok inon jok was torjadik nuk anai. 15 Idoh lombut noku Yesus, khavun doh nohtok ulun jok sonyorupang erih nenih iyok tuot, iyok was hatin hatik khavun was pios noh bujon ah, mahkak paring ulun jok nohtok ah mihkoh. 16 Ulun-ulun jok was nohtok paring aꞌang jok was torjadik erih, idoh ngesah ahkan ulun bohkon mongenai ulun jok sonyorupang roh jaek khavun mongenai dolang urak erih. 17 Khavun doh tuꞌuk-tuꞌuk nyavot mbak Yesus supayak Iyok pohos tulak tahkan nuk daerah erih.
18 Beteng Yesus jahkat noku luvang alut, ulun jok was pios noh tahkan bujon ah erih iyok nyavot supayak iyok touk ngohasuk Yesus.
19 Yesus majak yok, totahpik yok marak ahkan ulun erih hiyoi ah: “Bulik nai noku lohpo muk, noku kapung muk khavun ngesah ah ahkan dolang barih basak muk mongenai paring aꞌang jok uwas konguan Hotalak ahkan muk khavun mongenai kopios Ah ahkam muk!”
20 Ulun erih pun tulak khavun ngesah ah nuk daerah Dekapolis paring aꞌang jok konguan Yesus ahkai ah. Khavun paring doh jok nyonih ah jadik pusong.
Yesus ngopolum anak Yairus khavun ngopios bavik jok buah ponyahkit cahai bohuang
(Mat. 9:18-26; Luk. 8:40-56)
21 Umbot Yesus mihtah hinok mbak alut, ulun arok lombut hokorumbuk nuk hokosilak Iyok. Beteng Iyok nuk saran kovang danau, 22 lombut noh icok behtik kopalak lohpo ibadat ulun Yahudi ngarai ah Yairus. Beteng yok nohtok Yesus, tosuhkuk noh iyok nuk paan Yesus. 23 Khavun iyok nyavot tuꞌuk-tuꞌuk mbak Yesus hiyoi ah: “Anak kuk jok bavik honong beleh iyok nyangit poros, manyo mahtoi. Lombut nai khavun nihkas ah noh longom Muk nuk isung ah supayak iyok pios iyam mahtoi.”
24 Khavun tulak noh Yesus mbak ulun erih. Ulun arok tumbuk tulak ngohasuk Yok idoh hokorumbuk nuk donik Iyok.
25 Nuk anai arok icok behtik bavik jok uwas duok balas toun iyok poros cahai bohuang. 26 Iyok uwas pirak kali bosahkang mbak tabib, sohinggak paring aꞌang jok arok nuk iyok ohpah, yarok ulun jok duon nyahkang iyok totahpik iyok mahi-mahik poros. 27 Iyok was nyonih kesah mongenai Yesus, mahkak nuk tohun ulun arok erih iyok ngoronik Yesus tahkan lihkut khavun nukik jubah Ah. 28 Kotului hiyoi ah: “Ahkuk nukik jubah Ah kiak, ahkuk ahkan pios.”
29 Beteng erih kak ponyahkit ngindo ah turus tondok, khavun bavik erih ngomok ponyahkit ah uwas pios. 30 Beteng hun erih kak Yesus taꞌai, ngindoi arok kuasak jok boluak tahkan arop Ah, Iyok ngulos behtiu turus bokisok: “Iyai jok nukik jubah Kuk?”
31 Khavun murit-murit Ah mutah Yok hiyon doh: “Ihkok iyam nohtok ulun arok hokosikik ngoronik Kok, ngombai Kok bokisok, iyai jok nukik Kok?”
32 Yesus turus nohtok ulun jok nuk hokosilak Ah, Iyok kanik taꞌai iyai jok was nukik jubah Ah. 33 Bavik erih, mihkoh khavun nocot kotihkak yok taꞌai inon jok torjadik mbak arop ah, iyok lombut nyuhkuk nuk husuk Yesus khavun marak paring aꞌang jok was kongomok ah. 34 Mahkak hiyoi ahkan bavik erih: “Anak Kuk, kotului ihkok pocayak mbak Ahkuk mahkak ihkok pios. Tulak nai mbak damai sojahtra kotului ihkok was pios tahkan ponyahkit muk!”
35 Beteng Yesus honong bokesah lombut noh arok pirak behtik ulun tahkan lohpo Yairus, hiyon doh ahkai: “Anak muk was mahtoi, iyam poduluk nai kok ngalut Guruk.”
36 Totahpik Yesus iyam podulik mbak auh doh khavun bokesah mbak kopalak lohpo ibadat erih hiyoi Ah: “Arak mihkoh Yairus, pocayak kiyak!” 37 Khavun Yesus majak paring ulun ngohasuk Yok tihkas jok touk Petrus, Yakobus dorok arik ah Yohanes. 38 Idoh dahpot nuk lovun Yairus, nuk anai Yesus nyonih ulun-ulun bohok kotului nyangit tangih doh. 39 Umbot Yok nyolong Iyok marak ulun-ulun erih: “Ngombai ihkam nangih? Anak kinyam ihtuh iyam mahtoi, iyok tiruh!”
40 Mahkak idoh ngotaok Yok. Yok pun nyuhuk paring ulun erih boluak. Khavun Yok mbak amai inai anak kinyam erih khavun kotoluk murit Ah idoh havo-havoi nyolong noku takun anak kinyam erih. 41 Khavun Yok namit longon anak kinyam erih, Iyok bokesah mbak auh Aram hiyoi Ah: “Talita kum,” rehti ah: “O anak Kuk, Ahkuk marak ahkam muk, monyun nai!”
42 Beteng erih kak anak kinyam erih monyun khavun turus nyalan. Umur anak kinyam erih duok balas toun. Ulun-ulun jok nohtok paring ah erih idoh pusong! 43 Totahpik Yesus majak doh arak sapai marak ah inon jok was tonohtok doh erih, arak ngesah ah ahkan iyai pun, khavun hiyoi Ah hinok: “Nongak ah noh anak kinyam atuh kuman.”