Bavik-bavik jok ngurus Yesus
8
Iyam tahik ulik erih, khavun Yesus tulak noku kota-kota khavun noku kapung-kapung, nyalan marak tarung jok pios tului Hotalak momorintah jadik Lacak. Arok duok balas behtik murit Ah jok nulo umbak Iyok. 2 Koderih kak arok pirak behtik bavik-bavik, jok umbot Pomolahpas Yesus tahkan otuk khavun oros doh. Holang idoh erih arok icok behtik ngarai ah Maria jok tonaꞌah doh Magdalena jok uwas pomolahpas tahkan pihtuk roh jok jaek. a 3 Arok kak Yohana oruh Khuza, Khuza erih iyok noh pogawai istana Herodes. Arok kak Susana khavun tumbuk bavik jok bohkon, jok hatin ukus arop doh. Idoh ngavat Yesus khavun murit-murit Ah.Tindung mongenai ulun pongumok
(Mat. 13:1-23; Mrk. 4:1-20)
4 Ulun-ulun turus lombut noku Yesus tahkan havoi ayiu kota ah. Khavun hun erih tumbuk ulun hokorumbuk, khavun Yesus ngesah icok tindung ahkan doh kolihtuh: 5 “Arok icok behtik ulun pongumok tulak ngombulan bonyik ah. Kotihkak iyok monyik ah arok kak tongai ah bonyik jok botoravuh nuk saran jalan. Arok kak jok tonicak ulun, khavun ukun ocin naꞌang. 6 Arok kak jok toravuh nuk holang bahtuk-bahtuk, uhui ah nyuluh, suluh ah molanyuk kotului tanak ah koring. 7 Arok kak bonyik jok toravuh nuk lupuk duhik. Duhik erih ngohapit suluh ah nyiring mahtoi kotului doh nyuluh homboh umbak duhik erih. 8 Totahpik arok kak bonyik jok toravuh noku tanak jok bojonguh, khavui nyuluh turus muak icok lahtus kali lihpet.”
Umbot ngesah tindung erih khavun Yesus marak ah: “Nyonih ah noh pios-pios!”
9 Khavun ulik erih murit-murit Yesus turus ngisok Iyok, inon rehti ah tindung erih. 10 Khavun Yesus mutah doh: “Ahkan ulun-ulun bohkon Ahkuk ngajar hatin tindung erih, ahkan inon jok tonulih nabik jaman lomoi rih torjadik: Idoh nohtok ah totahpik idoh iyam Ngorehti inon jok tonuneng, idoh nyonih totahpik idoh iyam Ngorehti inon jok sonyonih doh erih. Totahpik ahkan ihkam, Hotalak uwas nongak ponaꞌam ahkam mik taꞌai rahasia inon kolo ah Hotalak momorintah jadik Lacak.b 11 Ihtuh noh rehti ah tindung tuh: Bonyik erih iyok noh Auh Hotalak. 12 Bonyik jok botohkah nuk saran jalan iyok noh kolo ulun-ulun jok nyonih Auh Hotalak erih, totahpik okon paring otuk lombut khavui ngomiu ah tahkan ahtoi doh, ahkan idoh iyam pocayak khavun iyam sonyolamat. 13 Bonyik jok botohkah unuk holang bahtuk erih, iyok noh kolo ulun jok nyonih Auh Hotalak erih, norimak ah mbak ngandah ahtoi doh, totahpik iyam nyuluh nuk luvang ahtoi doh. Idoh pocayak nyohuluk kiak, totahpik kotihkak lombut aꞌang jok ahkan nikos idoh, idoh pun nohtah kopocayak doh umbak Hotalak. 14 Bonyik jok nohkah nuk lupuk duhik kolo ulun jok nyonih Auh Hotalak, totahpik atak liduk umbak komolum doh, idoh kanik komolum doh tahto, ngandah nuk luvang duniak tuh, sohinggak iyam muak buak jok pios. 15 Bonyik jok botohkah unuk tanak jok pios erih iyok noh kolo ulun jok nyonih Auh Hotalak, khavun doh ngivak ah nuk luvang ahtoi doh nyiring iyok muak buak jok pios.”
Tindung mongenai sumbuk
16 Khavun Yesus ngohavot ah hatin tindung jok bohkon: “Iyam arok ulun jok nutang sumbuk khavui nuhtup ah umbak katang, iyam arok kak ulun jok nihkas sumbuk bolum erih nuk pindak tegan. Totahpik sumbuk erih tonihkas ah unuk totai nihkas sumbuk, ahkan ulun jok lombut noku luvang lohpo nohtok kotarang ah. 17 Paring ah ajar barak Kuk jok huꞌun ihtuh rehti ah sonyuhuk, nain ahkan kihtan rehti ah, khavun inon jok kongorahasiak, ahkan kotaꞌan khavun ahkan pomarak ahkan ulun arok.c
18 Kotului erih nyonih ah pios-pios inon jok kongohavot Kuk ihtuh. Tului ulun jok norimak auh Kuk, Hotalak ahkan nguan iyok ngorehti nyangit hinok. Totahpik ulun jok iyam norimak auh Kuk, oluk poh iyok pihkir tului iyok ngorehti nyohiyot Hotalak ahkan nguan iyok iyam ngorehti inon-inon.”d
Yesus khavun jolahai harik
(Mat. 12:46-50; Mrk. 3:31-35)
19 Icok ondo inai Yesus khavun jolahai harik tulak noku Iyok, totahpik idoh iyam taꞌan doh bohumbak umbak Yesus kotului tumbuk ulun nuk hokosilak Iyok. 20 Arok ulun marak ahkan Yesus: “Guruk arok inai Muk khavun jolaham harik nuk konahak, idoh kanik bohumbak umbak Ihkok.”
21 Totahpik Yesus marak ahkan idoh: “Ulun jok kanik nyonih Auh Hotalak khavun kanik nguai inon jok hiyon Hotalak, erih noh inai Kuk khavun jolahak Kuk harik.”
Yesus nondok bahiu bolovut
(Mat. 8:23-27; Mrk. 4:35-41)
22 Icok ondo Yesus marak ahkan murit-murit Ah: “Has tok mihtah noku pohoi lavang.” Idoh pun nuhkat alut turus tulak. 23 Beteng doh nuk luvang ponyalan doh, Yesus totiruh. Solengak lombut bahiu bolovut khavun lujak hajok, khavun danum nyolong noku luvang alut doh, sohinggak doh pun nuk luvang bohayak. 24 Murit-murit Yesus turus ngonyun Iyok, idoh marak ah: “Guruk, Guruk, ihtok ahkan mahtoi!”
Yesus pun monyun khavui nyuhuk bahiu khavun lujak erih tondok. Tonih nai bahiu erih khavun lujak erih pun turus loꞌoi. 25 Yesus marak ah ahkan idoh: “Ngombai ihkam iyam pocayak umbak Ahkuk?”
Idoh pun pusong khavun mihkoh, turus bokiso-kisok nuk luvang ahtoi doh: “Iyai ulun ihtuh? Kotihkak Iyok moletah, bahiu bolovut khavun lujak hajok erih pun mindak umbak auh Ah.”
Yesus ngusir otuk jok nyorupang icok behtik ulun nuk Gerasa
(Mat. 8:28-34; Mrk. 5:1-20)
26 Yesus umbak murit-murit Ah turus mihtah noku Gerasa pohoi lavang Galilea. 27 Beteng Yesus mosuluh tahkan alut, arok icok behtik ulun bahkas tahkan kapung lombut noku Iyok. Ulun erih sonyolong otuk-otuk khavun uwas tahik noh beleu hatin hatik khavun beleu mocon nuk lohpo. Iyok kanik mocon nuk tanom kiak. 28 Kotihkak yok nohtok Yesus, iyok nyangit ngoriak khavui nyuhkuk nuk husuk Yesus, iyok marak ah: “Yesus, Anak Hotalak jok Paling Isung! Ahkan konguam muk inon ahkak kuk? Ahkuk nyavot mꞌbak Ihkok arak monyorak ahkuk!” 29 Ulun erih nuhtui neing erih, tului iyok taꞌai Yesus uwas moletah otuk erih boluak tahkan iyok. Ulun erih dalo kobojoiu ah sonyorupang otuk erih sohinggak olupoh longoi ah khavun paꞌai ah kongahut umbak ratai khavun iyok pomojagak ketat, iyok honong duoi ah mahtot ratai erih khavui ah omin otuk erih noku lahpang baras.
30 Yesus ngisok ulun erih: “Iyai ngaram muk?”
Khavun ulun erih mutah Ah: “Ngarak kuk Legion.”
Tului tumbuk nyangit otuk jok uwas nyolong noku luvang ulun erih. 31 Khavun otuk-otuk erih nyavot umbak Yesus, ahkan iyok iyam ngusir doh noku luvang noraka.e
32 Donik erih tumbuk ah urak jok honong ngurah ukui ah nuk kuhung korovih. Otuk-otuk erih ngotiak nyavot umbak Yesus ahkai Ah mosuah idoh nyolong noku luvang urak-urak erih. Khavun Yesus mosuah idoh.
33 Khavun otuk-otuk erih boluak tahkan bahkas erih turus nyolong noku luvang urak-urak erih. Khavun urak-urak erih nokoruk khavun nomarang tahkan saran korovih erih noku luvang lavang, beteng erih kak urak-urak erih turus lohtong.
34 Jadik ulik ponjaga-ponjagak dolang urak erih nohtok ah inon jok uwas torjadik, idoh buho khavun ngesah erih nuk sokitar kota khavun nuk paring kapung jok donik erih. 35 Khavun ulun-ulun lombut ahkan nohtok inon jok torjadik. Idoh lombut noku Yesus, khavun nuk anan idoh tobarung umbak ulun jok uwas pomolahpas tahkan otuk-otuk erih tuot donik paꞌan Yesus. Iyok uwas hatin hatik khavun pihkir ah uwas pios. Khavun doh turus mihkoh. 36 Ulun arok jok uwas nohtok kojadiu erih, marak ahkan idoh inon kolo ah ulun jok sonyorupang otuk erih pomolahpas. 37 Khavun paring ulun daerah Gerasa erih nyavot umbak Yesus ahkan Iyok nohtah idoh, tului idoh punak mihkoh. Mahkak Yesus nuhkat noku alut kanik bulik. 38 Khavun ulun jok uwas tonohtah dolang otuk erih nyavot ahkan iyok touk umbak Yesus.
Totahpik Yesus nyuhuk iyok: 39 “Bulik nai noku lohpo muk khavun narung ah inon jok umbot konguan Hotalak ahkam muk.”
Mahkak ulun erih tulak narung ah noku paring kota erih, inon jok uwas umbot Yesus nguai Ah ahkai ah.
Yesus ngopios anak Yarius khavun icok behtik bavik jok buah ponyahkit ngindo
(Mat. 9:18-26; Mrk. 5:21-43)
40 Kotihkak Yesus bulik tahkan pohoi lavang Galilea Iyok tonoharang ulun ramai-ramik tahtup kosenang tului idoh honong ngindoi Iyok. 41 Umbot erih lombut noh icok behtik kopalak lovuk unuk ulun Yahudi sombayang nuk anan, ngarai ah Yairus. Iyok nyuhkuk nuk husuk Yesus nahtup nyavot ahkai Ah lombut noku lovui ah. 42 Tului anak bavik ah poros manyo mahtoi. Anak ah erih anak tukan. Khavun umur ah sokitar duok balas toun.
Lambak Yesus nyalan noku lohpo Yairus, ulun arok ngonyonyok Yesus tahkan amo-amoh. 43 Nuk holang ulun arok erih, arok icok behtik bavik uwas duok balas toun iyok poros ngindo dahak. Iyok uwas ohpah noh barang bandak hapai ah bocahkang, totahpik iyam pujik pios. 44 Bavik erih ngononik Yesus tahkan lihkut, khavui nukik tatan jubah Ah. Kotihkak erih kak ponyahkit ah pios. 45 Yesus ngisok: “Iyai jok nukik Ahkuk?”
Paring ulun ngilang ah. Khavun Petrus marak ah: “Guruk, yamios karon ulun nuk hokosilak Muk, idoh ngorumbuk Guruk!”
46 Yesus marak Ah: “Arok ulun jok nukik Ahkuk. Ahkuk taꞌak, tului arok kuasa jok boluak tahkan Ahkuk.” 47 Bavik erih sadar tului aꞌang jok konguai ah uwas kotaꞌan. Jadik iyok lombut nahtup tocot ah, khavui nyuhkuk nuk husuk Yesus. Mahkak iyok ngesah ah nuk husuk ulun arok, ngombai iyok nukik Yesus khavun inon kolo ah iyok beteng erih kak nyolengak pios. 48 Yesus marak ahkai ah: “Anak Kuk, tului ihkok pocayak umbak Ahkuk, ihkok pios. Tulak nai ihkok nahtup solamat.”
49 Beteng Yesus honong bokesah, arok icok behtik anak buah Yairus jok lombut tahkan lohpo ah, khavui ah marak ah ahkan Yairus: “Tuan, iyam usah kok ngomboꞌok Guruk, tului anak muk rih uwas iyam arok nai.”
50 Beteng Yesus ngonih auh erih, Yesus marak Ah: “Yarius, arak kok mihkoh, pocayak kiak kok. Anak muk ahkan pios.”
51 Homboh dahpot nuk lohpo, Yesus iyam nohoꞌoi ulun icok behtik pun nyolong, tihkas jok nohoꞌoi ah nyolong Petrus, Yohanes, Yakobus, khavun inai dorok amai anak kinyam erih kiak. 52 Paring ulun havoi nangih noloung tului anak erih, totahpik Yesus marak ahkan doh: “Arak nangih. Anak kinyam tuh iyam palus, iyok honong tiruh!”
53 Khavun doh havoi ngotaok Yesus, tului jok kotaꞌan dok anak kinyam bavik erih uwas palus noh. 54 Khavun Yesus namit longon anak kinyam erih turus Iyok marak Ah: “Monyun nai nak!” 55 Jadik hasong anak kinyam erih pun hulik hinok noku iyok, khavun kotihkak erih kak iyok turus monyun. Umbot erih Yesus turus nyuhuk doh mokuman anak kinyam erih. 56 Ulun okok anak kinyam erih pusong. Totahpik Yesus majak doh marak ah inon jok torjadik erih mꞌbak iyai pun.