Yesus nyahkang ulun beteng ondo Sabat
(Mat. 12:9-14; Luk. 6:6-11)
3
Icok ondo Yesus nyolong hinok noku lovun ibadat. Nuk anai arok ulun jok bokomahtoi longoi ah silak. 2 Nuk anai arok ulun Parisi idoh noliti Yesus inon leh Iyok ngopios ulun beteng ondo Sabat, sohinggak idoh touk ngaduk Iyok noku pomipin-pomipin doh. 3 Khavun Yesus marak ahkan ulun jok bokomahtoi longoi ah erih: “Kohtoi tombok tohun tuh.” 4 Mbot erih Yesus bokisok mbak ulun arok: “Monurut Hukum Taurat inon jok touk tok nguai beteng ondo Sabat, nguan aꞌang jok pios atau nguan aꞌang jok jaek, nyolamat hasong ulun atau munuk ah?”Totahpik idoh jok arok nuk anai tonih kiyak. 5 Nahtup kobirat Ah Yesus nohtok doh jok arok nuk hokosilak Ah, totahpik ahtoi Ah halik masik kotului idoh jok arok nuk anai mahaꞌang jaan doh. Khavun hiyoi Ah ahkan ulun jok komahtoi longoi ah erih: “Nonjuluk longom muk.” Ulun erih pun nonjuluk longoi ah khavun iyok turus pios. 6 Mahkak dolang ulun Parisi erih nohtah lohpo ibadat erih, khavun doh hopahkat mbak ulun-ulun tahkan kolompok Herodes ahkan munuk Yesus.
Yesus nyahkang ulun arok
7 Yesus mbak dolang murit-murit Ah idoh tulak noku Danau Galilea. Tumbuk ulun ngohasuk doh, ulun-ulun erih idoh tahkan provinsi Galilea khavun Yudea, 8 khavun arok kak jok lombut tahkan Yerusalem, idoh tahkan daerah Idumea, khavun tahkan pohoi Sungoi Yordan, tahkan sokitar daerah Tirus khavun Sidon. Paring doh lombut kotului idoh nyonih paring aꞌang jok konguan Yesus. 9 Beteng Yesus nohtok ulun arok hokupur, Iyok marak ahkan dolang murit-murit Ah: “Ngimos nyodiak alut, supayak Ahkuk nuhkat noku luvang ah, kotului ngindoi iyam Ahkuk ahkan hokosikik.” a 10 Beteng ondo erih yamios karon ulun poros jok konopios Yesus. Sohinggak tumbuk ulun-ulun jok honong poros idoh hotucuk supayak touk ngoronik khavun nukik Yesus. 11 Khavun nuk anai arok ulun-ulun jok sonyorupang roh jaek. Beteng roh-roh jaek erih nohtok Yesus, idoh jok sonyorupang erih turus tuot mbak kalop doh nuk husuk Ah, khavun hiyon doh ngoriak: “Ihkok Anak Hotalak!”
12 Yesus tuꞌuk-tuꞌuk majak dolang roh jaek erih supayak idoh arak marak mongenai arop Ah Anak Hotalak.
Yesus milik duok balas behtik murit Ah
(Mat. 10:1-4; Luk. 6:12-16)
13 Umbot erih Yesus tulak nuhkat noku korong. Iyok naꞌah dolang ulun jok konopilik Ah, khavun idoh pun lombut noku Iyok. 14 Iyok milik duok balas behtik tahkan holang doh supayak hicok umbak mbak Iyok khavun konguhtus Ah ngesah Tarung Pios tahkan Hotalak. 15 Iyok pun nongak kuasak supayak idoh touk ngusir dolang roh-roh jaek.
16 Ihtuh noh ngaran koduok balas behtik jok konopilik Yesus, yok erih: Simon jok ongak Yesus ngarai bohuak yok erih Petrus, 17 Yakobus khavun Yohanes dorok anak Zabedeus, Yesus nongak ngaran dorok jok bohuak yok erih Boanerges, rehti ah anak tokorang, 18 khavun murit-murit jok bohkon ah Andreas, Pilipus, Bartolomeus, Matius, Tomas, Yakobus anak Alpeus, Tadeus, Simon jok pomarak ulun Zelotb, 19 khavun Yudas Iskariot noh jok ahkan dahkang Yesus noku pomipin agamak Yahudi.
Yesus khavun Beelzebul
(Mat. 12:22-32; Luk. 11:14-23; 12:10)
20 Khavun Yesus nuhkat noku icok lohpo. Mahkak lombut noh ulun arok hokupur nuk anai, sohinggak Iyok khavun dolang murit-murit Ah pun iyam hocok doh kuman. 21 Beteng dolang barih basak Ah nyonih mongenai kesah tahkan paring ulun kotului Iyok was bobujon, mahkak idoh lombut kanik ngonin Iyok.
22 Khavun dolang guruk agamak jok lombut tahkan Yerusalem idoh bokesah, hiyon doh: “Iyok sonyorupang Belsebulc lacak paring otuk, khavun mbak kuasak Beelzebul erih kak Iyok muhkok dolang otuk.” d
23 Mahkak Yesus naꞌah dolang ulun arok erih, khavun ngesah ahkan doh hatin tindung: “Bohkolo Beelzebul lacak paring otuk touk ngusir otuk? 24 Ngindoi icok korajaan jok toravuh toraik ponduduk ah khavun hokolavan havoi arop doh, mahkak korajaan erih iyam ahkan botahan. 25 Khavun ngindoi avuk humak uwas iyam nai hicok ahtoi mahkak avuk humak erih ahkan hindo. 26 Koderih kak nuk luvang korajaan Iblis, idoh lohpung ngindoi idoh havoi hokolavan.
27 Ngindoi ulun kanik nahko barang nuk lohpo ulun jok muhat, ulun jok nahko erih harus ngahut ulun jok muhat erih holuk. Mbot erih baruk yok touk nahko dolang barang bandak ah.
28 Ahkuk marak ahkam muk: Nyonih ah! Dolang dosa khavun kesah jok ngohinak ulun bohkon ahkan kongapun. 29 Totahpik ngindoi ulun ngohinak Roh Kudus, iyok iyam ahkan kongapun! Kotului dosa erih yarok tihkas nyamah ah.” e 30 Yesus bokesah koderih kotului guruk-guruk agamak marak Yok sonyorupang roh jaek.
Yesus khavun dolang arik okak ah
(Mat. 12:46-50; Luk. 8:19-21)
31 Beteng erih kak lombut noh inai khavun dolang arik okak Yesus. Beteng doh tombok nuk konahak, idoh nyuhuk ulun naꞌah Yok. 32 Tumbuk ulun tuot ngoliling Iyok, idoh marak ahkai Ah hiyon doh: “Guruk, Inai khavun dolang arik okak Muk arok nuk konahak, idoh kanik bohavung mbak Ihkok.”