Tindung mongenai ulun pongumok
(Mat. 13:1-9; Luk. 8:4-8)
4
Icok ondo Yesus ngajar nuk saran Danau Galilea. Mahkak lombut noh ulun arok ngorumbuk Yok. Iyok pun tulak khavun nuhkat noku alut jok tulik nuk anai, Iyok tuot nuk isung alut erih khavun ulun arok tombok nuk kovang danau. a 2 Khavun Iyok ngajar paring aꞌang hatin tindung, hiyoi Ah:3 “Nyonih ah! Arok icok behtik ulun pongumok tulak ngombulan bonyik nuk umoi ah. 4 Beteng iyok ngombulanb bonyik ah arok kak tongai bonyik erih jok toravuh nuk saran jalan, khavun ocinaꞌang lombut kumai nyiring ohpah. 5 Arok kak tongai jok toravuh nuk tanak jok hobahtuk, bonyik erih pun nyuluh. Kotului tanak ah nyohiot, 6 beteng mahtan ondo marah, daui ah pun molanyuk turus koring kotului uhat ah nyohiot. 7 Khavun tongai ah nok toravuh nuk lupuk dorop duhik, khavun dorop duhik erih nyuluh homboh mbak bonyik erih, suluh bonyik erih pun konohapit dolang dorop sohinggak yarok taꞌai muak. 8 Khavun arok kak tongai jok toravuh nuk tanak jok bojonguh bonyik erih pun nyuluh nyiring hajok khavun muak, hasil ah arok jok tolun puluk bijik, arok jok onom puluk bijik, khavun arok jok solahtus bijik.”
9 Hiyoi Yesus nok: “Nyonih ah pio-pios auh ihtuh!”
Ngombai Yesus ngajar ulun arok hatin tindung
(Mat. 13:10-17; Luk. 8:9-10)
10 Kotihkak Yesus bongoi ah ulun-ulun jok ngohasuk Iyok khavun koduok balas murit-murit Ah bokisok mbak Iyok inon rehti tahkan tindung erih. 11 Iyok mutah ah: “Hotalak uwas nguan ihkok ngorehti inon jok holuk iyam ulun taꞌai ngindoi Iyok ahkan momorintah jadik Lacak. Totahpik ahkan ulun jok iyam pocayak mbak Ahkuk, paring ah kongesah luvang tindung. 12 Ahkuk hatin tindung supayak nyolung noh inon jok pomarak Hotalak nyihing dolang nabik, yok erih:
‘Idoh ahkan tuꞌuk-tuꞌuk nohtok ah,
totahpik idoh iyam ngorehti.
Khavun doh ahkan tuꞌuk-tuꞌuk nyonih ah,
tahpik iyam taan doh inon,
aꞌang erih torjadik supayak
idoh iyam hulik noku Hotalak
khavun idoh ngonduon pongampunan.’ ” c
Yesus ngesah rehti tindung mongenai icok behtik ulun jok pongumok
(Mat. 13:18-23; Luk. 8:11-15)
13 Khavun hiyon Yesus nok ahkan doh: “Ngindoi ihkok iyam ngorehti tindung ihtuh mahkak ihkok iyam ahkan ngorehti tindung jok bohkon. 14 Ulun jok ngombulan bonyik iyok noh ulun jok ngesah mongenai Auh Hotalak. 15 Bonyik jok toravuh nuk saran jalan kolo ulun jok nyonih Auh Hotalak, mbot erih lombut Lacak roh jaek ngomin Auh Hotalak jok sonyonih doh erih, sohinggak idoh iyam ngonduon inon-inon. 16 Koderih kak bonyik jok toravuh nuk tanak jok hobahtuk, kolo ulun jok nyonih Auh Hotalak turus norimak ah umbak kosenang ahtoi. 17 Totahpik auh Hotalak erih iyam arok ahkah ah luvang ahtoi doh, idoh pocayak totahpik ngonyoluh kak, beteng arok kojorak khavun arok aꞌang jok punak bahat luvang komolum doh mahkak idoh nohtah kopocayak doh mbak Hotalak. 18 Khavun bonyik jok toravuh nuk lupuk dorop, arok noh idoh jok nyonih auh erih, 19 totahpik idoh liduk mbak komolum doh khavun idoh kanik bolum tahto nuk luvang duniak ihtuh khavun kanik dolang aꞌang jok bohkon. Sohinggak kokanin doh erih nguan auh Hotalak kohapit khavun iyam muak nuk ahtoi doh. 20 Khavun bonyik jok toravuh nuk tanak jok bojonguh, iyok noh ulun jok nyonih Auh Hotalak erih khavui turus nguai ah inon jok sonyonih ah erih, iyok pun muak buai ah yamios karoi, arok jok tolun puluk, arok jok onom puluk, khavun arok jok lihpet solahtus.”
Tindung mongenai sumbuk jok tonuhtup mbak katang
21 Khavun hiyon Yesus ahkan doh: “Iyam arok ulun ngomolum sumbuk khavun nuhtup ah mbak katang atau nginak ah nuk pindak tegan, totahpik sumbuk erih ahkan konginak nuk totai ah. d 22 Kotului aꞌang jok sonyuhuk ahkan kotaꞌan, khavun jok kongorahasia ahkan pomarak ahkan ulun arok. e 23 Nyonih ah pio-pios auh ihtuh!”
24 Khavun hiyon Yesus nok: “Nyonih ah nohouk ah inon jok sonyonih muk! Somakin kam noliti ah, ihkam ahkan tumbuk ngonduon kohorahtik. Mahkak kohorahtik erih ahkan tonongak yamios karoi hinok noku ihkam. f 25 Kotului Tuhan ahkan monahang kohorahtik ahkan ulun jok kanik ngorehti mongenai ajar barak Ah, totahpik ahkan ulun jok iyam kanik ngorehti, Tuhan ahkan ngoniu kohorahtik jok arok mbak iyok.” g
Tindung mongenai bonyik jok nyuluh
26 Khavun hiyon Yesus: “Kolihtuh tindung mongenai Hotalak momorintah jadik Lacak, kolo ulun jok ngombulan bonyik nuk tanak, 27 Arok pirak ondo ulik iyok ngombulan bonyik erih kolo kopuꞌun ah ngolomik iyok tiruh khavun ngohkos iyok monyun, bonyik erih was nyuluh. Totahpik iyok iyam yok taꞌai bohkolo elah ah bonyik erih nyuluh jadik hajok. 28 Bonyik jok konomulan nuk tanak erih nyuluh bongoi khavun muak. Topahtuk ah bonyik erih nyuluh khavun makin hajok suluh ah, khavun arok dolak ah, dolak erih noh jok nyolung jadik buai ah. 29 Ngindoi buai ah was mosak, ulun jok ngombulai ah ahkan ngoniu, kotului was ohkot ah ahkan kongohtom.” h
Tindung mongenai kolahpai savik
(Mat. 13:31-32, 34; Luk. 13:18-19)
30 Hiyon Yesus hinok: “Bohkolo Ahkuk mokarah ah mongenai Hotalak momorintah jadik Lacak? Hatin tindung jok bohkolo ah hinok Ahkuk touk monjelas ah? 31 Ngindoi Hotalak momorintah jadik Lacak, kolo kolahpai savik jok konomulan nuk tanak, kolahpai savik jok paling koik nuk holang paring kolahpai jok arok nuk duniak tuh. 32 Totahpik ngindoi iyok konomulan, iyok nyuluh bojonguh nyangit mbak kanyap jok bohkon sohinggak nyuluh noh daꞌai ah khavun dolang ocinaꞌang touk ngosalah nuk anai.”
33 Tumbuk tindung jok kongesah Ah ahkan doh mongenai Auh Hotalak, Iyok ngesah ah supayak ulun-ulun erih touk ngorehti ah. 34 Iyok nulo ngajar nyihing tindung ahkan ulun arok. Totahpik ahkan dolang murit-murit Ah Iyok ngesah ah nyiring doh ngorehti tindung erih.
Yesus nondok bahiu bolovut
(Mat. 8:23-27; Luk. 8:22-25)
35 Beteng hondo was manyo noh pindong, Yesus marak dolang murit Ah: “Has tok mihtah noku pohoi Danau Galilea.”
36 Yesus khavun murit-murit Ah nyolong noku luvang alut, idoh nohtah ulun arok jok nuk kovang danau erih, khavun arok kak alut-alut jok bohkon ngohasuk idoh. 37 Nyolengak lombut bahiu bolovut khavun lujak hajok. Danum pun nyolong noku luvang alut doh, sohinggak alut erih kanik bokahom kotului manyo tuvik konguan danum. 38 Beteng erih Yesus tiruh nuk laik alut iyok tiruh arok karuk Ah. Mahkak murit-murit erih mokonyun Yok khavun hiyon doh ahkai Ah: “Guruk, Ihkok yam podulik ngindoi ihtok ahkan mahtoi?”
39 Iyok pun monyun, bokesah mbak auh jok mohing ahkan bahiu khavun danum erih hiyoi Ah: “Tondok! Teneng nai!” Beteng erih kak bahiu erih tondok khavun danum erih pun turus teneng. 40 Khavun Iyok bokesah mbak murit-murit-Ah, hiyoi Ah: “Ngombai ihkam mihkoh? Inon leh ihkam iyam pocayak mbak Ahkuk?”
41 Idoh jadik mihkoh khavun hokisok icok mbak jok bohkon: “Iyai sobenar ah Ulun ihtuh, sohinggak bahiu khavun lujak erih mindak mbak Iyok.”