Ngindoi iyam botobat tahkan dosa, ahkan lohpung
13
Kotihkak erih lombut noh pirak behtik ulun ngesah ahkan Yesus mongenai arok pirak behtik ulun Galilea jok pomunuk Pilatus. Idoh pomunuk kotihkak idoh nyodiak ocin louk ahkan sonyurung noku Hotalak. 2 Yesus mutah ah: “Tului ulun-ulun Galilea erih pomunuk kolo erih, davak mik tandak ah idoh nyangit bodosa tahkan paring ulun Galilea jok bohkon? 3 Iyam sama sinok! Totahpik nohouk ah: Ngindoi ihkam iyam botobat tahkan dosa-dosa mik, ihkam paring ah ahkan mahtoi kak, kolo idoh. 4 Inon kolo ah umbak jaluk balas behtik jok mahtoi nuk Siloam, beteng monara erih ngohop idoh? Davak mik erih mokarah idoh holovik bodosa tahkan paring ulun bohkon jok mocon nuk Yerusalem? 5 Iyam sama sinok! Sinok hinok Kuk ngohavot ah: Ngindoi ihkam iyam botobat tahkan dosa-dosa mik, ihkam paring ah ahkan mahtoi kolo idoh.”Tindung puꞌun harak jok iyam muak
6 Ulik erih Yesus ngesah tindung ihtuh: “Arok icok behtik tepun puꞌun harak nuk kabun anggur ah. Icok kotihkak tulak nai iyok ngurah buak harak erih, totahpik iyok yarok nyombang icok pun buai ah. 7 Jadik, iyok marak ah ahkan ulun jok ngorejak kabun ah erih: ‘Nohtok ah, uwas toluk toun ahkuk ngurah buak harak ihtuh, totahpik iyam arok kuk nyombang icok kobuhtup pun. Puꞌui ah atuh novong ah kiak! Tului iyam arok gunai ah nyuluh nuk tanak ihtuh!’ 8 Totahpik ulun jok korejak kabun erih mutah ah: ‘Mosuah ah noh iyok bolum icok toun tuh hinok, tuan. Ahkuk ahkan nyakul tanak nuk hokosilak ah khavun nongak pupuk ah. 9 Touk kak iyok muak toun pongok tuh. Totahpik ngindoi iyam, touk noh tuan nyuhuk novong ah.’ ”
Yesus nyahkang icok behtik bavik mokehtut beteng Ondo Sabat
10 Icok ondo beteng ondo Sabat, Yesus ngajar nuk icok lovuk unuk ulun Yahudi sombayang. 11 Nuk anan arok icok behtik bavik jok uwas jaluk balas toun poros, tului arok otuk nuk luvang behtiu ah. Bavik erih mokehtut iyam duoi ah sama sinok tombok ngorong behtiu ah. 12 Beteng Yesus nohtok ah, bokesah noh Iyok ahkan bavik erih: “Inai, ihkok uwas pios tahkan oros muk!” 13 Khavun Yesus nihkas longoi Ah kuk isung bavik erih, khavun beteng erih kak iyok tombok morong behtiu ah khavui ah momuji Hotalak.
14 Kopalak lovuk unuk ulun Yahudi sombayang erih birat, tului Yesus nyahkang ulun beteng ondo Sabat. Tului erih iyok marak ah ahkan ulun arok: “Arok onom ondo hapan korejak, lombut noh beteng onom ondo erih ngindo kanik sonyahkang, arak beteng ondo Sabat!”a
15 Tuhan mutah Ah: “Oo ihkam jok pura-purak pios! Beteng ondo Sabat paring ulun molivus sahpik atau keledai ah tahkan kurung ah khavun ngoniu ah boluak ahkan nongak ah ngorih. 16 Khavun nuk ohtoi huntuh arok icok behtik bavik koturun Abraham, jok uwas jaluk balas toun kotahiu iyok kongahut Iblis umbak ponyahkit ah. Iyam leh iyok touk kak pomolahpas tahkan kahut ah erih beteng ondo Sabat?” 17 Beteng Yesus mutah ah kolo erih, paring ulun jok ngolavan Iyok jadik miak, totahpik ulun arok ngandah nyangit nohtok paring ah jok motaher konguan Yesus.
Tindung kolahpai savik
(Mat. 13:31-32; Mrk. 4:30-32)
18 Yesus ngisok: “Kolo inon ngindoi Hotalak momorintah jadik Lacak? Khavun umbak inon Ahkuk touk nindung Ah? 19 Hotalak momorintah jadik Lacak havoi umbak tindung ihtuh: Icok kolahpai savik jok omin ulun, khavui ah nonjom ah unuk kabun ah. Kolahpai erih nyuluh khavui ah nyoriak puꞌun kajuk hajok, khavun dolang ocin naꞌang napak kosalah ah nuk dolang daꞌan kajuk erih.”
Tindung lakik
(Mat. 13:33)
20 Sinok hinok Yesus bokisok: “Kolo inon ngindoi Hotalak momorintah jadik Lacak? Khavun umbak inon Ahkuk touk nindung Ah? 21 Koadaꞌan ah kolo lakik jok omin icok behtik ulun bavik khavui molouk ah umbak tehpung sokitar tolun puluk kilo, sohinggak tehpung erih ngambang uras.”
Tukang jok kenek
(Mat. 7:13-14, 21-23)
22 Beteng Yesus nurus ponyalai noku Yerusalem, Iyok nyihing kota-kota khavun kapung-kapung nahtup ngajar ulun nuk anai. 23 Khavun arok ulun bokisok umbak Iyok: “Tuhan, nyohiyot kak leh ulun jok ahkan sonyolamat?”
24 Yesus mutah ah: “Ngorihan ahkan nyolong nyihing tukang jok kenek. Tului erih Ahkuk marak ahkam muk: Tumbuk ah ulun ngorihan nyolong totahpik idoh iyam taꞌan doh.b 25 Beteng tuan lohpo erih monyun khavui ngatop atop ah, ihkam ahkan tombok nuk konahak khavun ngetok atop nahtup ngohavot: ‘Tuan, nguvat atop ahkan kai!’ Tuan erih ahkan mutah ah: ‘Ahkuk iyam taꞌak ihkam tahkan amoh, khavun ahkuk iyam alik ngahkuk ah ngindoi ihkam jolahak kuk!’ 26 Ihkam ahkan mutah ah: ‘Ihkai uwas umbot kuman ngorih homboh umbak tuan, khavun tuan uwas umbot kak ngajar nuk jalan-jalan kota ihkai!’c 27 Totahpik Tuan erih ahkan marak ah ahkan ihkam hinok: ‘Ahkuk iyam taꞌak ihkam tahkan amoh. Tulak tahkan ohtoi, ihkam jok nguan aꞌang jok jaek.’d 28 Beteng erih ihkam ahkan nohtok Abraham, Ishak, Yakub khavun paring nabik ngandah nuk luvang Korajaan Hotalak, totahpik ihkam ahkan tonocahkah noku unuk ulun nangih khavun ngomok kojorak jok yarok tundah ah!e 29 Khavun ulun-ulun ahkan lombut tahkan timur, tahkan barat, tahkan utara, khavun tahkan solatan ahkan bogavik khavun kuman hombo-homboh nuk luvang Korajaan Hotalak.f 30 Kotuꞌui erih noh ulun jok konganggap iyam poduluk huntuh ahkan jadik paling poduluk havun. Khavun ulun jok konganggap paling poduluk huntuh ahkan jadik iyam poduluk havun.”g
Yesus masik umbak ulun Yerusalem
(Mat. 23:37-39)
31 Beteng erih kak, arok pirak behtik ulun Parisi lombut noku Yesus khavun doh bokesah: “Arak mocon nuk ohtoi! Tulak nai noku jok bohkon, tului lacak Herodes kanik munuk Ihkok.”
32 Yesus mutah ah: “Tulak nai ngohavot ah ahkan ponihpuk erih: ‘Hondo ihtuh khavun hondo havun Ahkuk muhkok otuk khavun nyahkang ulun poros, totahpik beteng ondo kotoluk ah, Ahkuk ahkan ngumbot korejak Kuk.’ 33 Oluk poh koderih, Ahkuk harus nurus ponyalak Kuk hondo ihtuh, hondo havun khavun hulik havun, tului iyam pios nabik pomunuk nuk bohkon luar umbak Yerusalem.
34 Ulun Yerusalem, ulun Yerusalem! Nabi-nabik pomunuk mik! Uhtus Hotalak pomuhkah muk umbak bahtuk nyiring mahtoi! Punak dalo kobojoiu ah Ahkuk kanik ngohupon ihkam havoi umbak pohuk manuk ngolindung anak ah nuk pindak ilat ah, totahpik ihkam belem! 35 Kotetu ah Lovuk Hotalak ahkan bungun tului Tuhan Hotalak iyam umbak ihkam hinok. Kuk marak ahkan mik: ihkam iyam ahkan nohtok Ahkuk hinok nyiring hondo ihkam marak ah: Tonuah noh Iyok jok lombut umbak kuasa Tuhan Hotalak.” h i