Yesus nyahkang ulun poros
14
Beteng ondo Sabat Yesus tulak kuman nuk lovuk icok behtik ulun okon ulun Parisi. Nuk anan ulun-ulun nohtok Yesus mbak toliti nuk ngurah kosolai Ah. 2 Mahkak lombut noh noku Yesus icok behtik ulun jok loting masung paꞌai longoi ah. 3 Khavun Yesus ngisok mbak guru-guruk agamak khavun ulun-ulun Parisi jok arok unuk anan: “Monurut hukum agamak etok, touk iyam nyahkang ulun poros beteng ondo Sabat atau iyam?”4 Guru-guruk agamak khavun ulun-ulun Parisi erih tonih kiak. Khavun Yesus namit longon ulun poros erih khavun ngopios ah, khavui Ah nyuhuk ulun erih tulak. 5 Khavun Iyok nuhtui ahkan paring ulun jok arok nuk anai: “Ngindoi anak muk atau sahpik muk botahak noku luvang sumur beteng ondo Sabat, mihtik ihkok pun ahkan pohos ngahtang yok tahkan sumur erih.”
6 Totahpik iyam icok behtik pun jok touk mutah Yesus.
Pios ahtoi khavun andar nongak narui
7 Yesus nuneng tamu erih ngotiak tuot unuk ponuoꞌot ulun jok kongolehkak nuk lovuk ulun Parisi erih. Kotului erih Yesus ngajar doh paring ah, Iyok marak doh: 8 “Ngindoi ihkok kongundang noku gavik cahkik koruh, arak noh ihkok tuot unuk jok kongolehkak, kolas ulun jok tepun gavik erih uwas umbot ngundang ulun jok punak poduluk tahkan ihkok. 9 Ngindoi torjadik koderih, ulun jok tepun gavik erih ahkan lombut khavui marak ah ahkam: ‘Kahtun holuk kok, unuk ihtuh rih uwas sonyodiak ahkan tamu ihtuh.’ Nahtup iyak muk ihkok harus kahtun kulihkut nai. 10 Tului erih, ngindoi ihkam kongundang, ihkam harus tuot unuk lihkut kiak, nain ngindoi ulun jok tepun gavik erih nohtok ihkam iyok ahkan tulak ngononik ihkok khavui marak ahkam muk: ‘O jolahak, hatun kuk husuk nai kiak tuot nuk jok tamam nai.’ Mꞌbak koderih ihkam kongolehkak nuk husuk paring ulun jok bohkon. 11 Tului paring ulun jok ngisung arop ah iyok ahkan kongopindak, totahpik ulun jok ngopindak arop ah iyok ahkan kongisung.”
12 Khavun Yesus turus marak ahkan ulun Parisi jok ngundang Iyok kuman erih: “Ngindoi ihkok ngundang ulun arok kuman nuk lovum muk, arak noh naꞌah jolaham muk atau jolaham harik, anak jolaham harik, ngindoi iyam ulun kosilak lovum muk jok tahto, kotului nain idoh ahkan naꞌah ihkok kak, khavun mbak koderih ihkok ahkan norimak inon jok konguam muk. 13 Jadik, ngindoi ihkok bogavik, ngundang ah noh ulun malax, ulun kehtot, khavun ulun bobulen. 14 Ngindoi ihkok nguan aꞌang koderih, ihkok ahkan tonongak berkat, kotului ulun-ulun erih iyam ahkan duon doh malos kopios muk. Kopios muk ahkan pomalos Hotalak beteng ulun-ulun jok pios nuk husuk Hotalak hulik bolum tahkan holang ulun mahtoi.”
Tindung gavik hajok
(Mat. 22:1-10)
15 Kotihkak icok behtik ulun jok kuman hombo-homboh nuk anan nyonih auh Yesus erih, ulun erih marak ah: “Punak utung ulun jok ahkan kuman hombo-homboh mbak Hotalak nuk luvang Korajaan Ah!”
16 Totahpik Yesus marak ahkan ulun erih: “Beteng icok ondo arok icok behtik napak gavik jok hajok khavui ngundang tumbuk ulun. 17 Kotihkak uwas ondo ah ahkan nopahtuk gaviu ah erih, ulun erih nyuhuk jihpoi ah tulak noku ulun jok uwas umbot kongundang khavui marak ah: ‘Lombut nai ihkam, tului paring ah uwas sonyodiak!’ 18 Totahpik idoh paring ah mico-micok ah nyavot apun. Jok topahtuk ah marak jihpon erih: ‘Ahkuk punak kuk kak molik tanak, ahkuk poduluk morisak ah nai. Ahkuk nyavot apun noh.’ 19 Khavun jok bohkon marak ah: ‘Ahkuk punak molik limok pasang sahpik, khavun maham nyarik ah nai. Nyavot apun noh ahkuk.’ 20 Jok bohkon hinok marak ah: ‘Ahkuk punak kak sokavuk, tului erih ahkuk iyam dahpat lombut.’
21 Jihpon erih bulik khavun marak auh doh erih ahkan tuan ah. Khavun tuan erih birat nyangit, khavui marak ahkan jihpoi ah: ‘Ngimos ah tulak noku jalan-jalan nuk kota, ngomiu ah noh kohtoi dolang ulun malax, ulun bobulen khavun ulun jok kehtot.’ 22 Khavun ulik erih jihpon erih bulik khavui marak ah: ‘Tuan, poletah muk umbot kuk nguai ah, totahpik oluk poh koderih lohpo tuh jaham tuvik.’ 23 Khavun tuan erih marak ah: ‘Tulak noh noku jalan hajok khavun noku luar kota, khavum maksak ulun-ulun nuk anai lombut ahkan nuvik lohpo kuk.’ 24 Nyonih ah noh! Paring ulun jok uwas ngomelek undangan kuk erih, iyam ahkan ngomok ukun ponguman gavik kuk ihtuh!”
Tehkat ulun-ulun jok kanik ngohasuk Yesus
(Mat. 10:37-38)
25 Icok ondo tumbuk ulun nyalan hombo-homboh umbak Yesus. Iyok moliyo noku lihkut khavun nuhtui ahkan doh: 26 “Ngindoi ulun lombut noku Ahkuk, totahpik iyok holovik mongasihi inai ah, amai ah, oruh ah, jolahai ah harik, khavun mongasihi arop ah, iyok yatai ah ngohasuk Ahkuk. 27 Ulun jok iyam kanik nakung salib ah, jorak nyiring mahtoi kotului Ahkuk, iyok iyam taꞌai ngohasuk Ahkuk. 28 Ngindoi icok behtik tahkan ihkam kanik motombok icok monara, tetu iyok ahkan tuot ngohitung ah holuk ukus ah ahkan iyok taꞌai ah inon leh duit ah cuhkup ahkan ngonyolung monara erih atau iyam. 29 Tului ngindoi iyok iyam duoi ngonyolung ah, podahal korakak ah umbot tonapak ah, mahkak paring ulun jok nohtok ah ahkan ngotaok ah. 30 Idoh ahkan marak ah: ‘Huh ulun tuh nombok totahpik iyam duoi ah ngonyolung ah!’
31 Ngindoi icok behtik lacak jok tepun sopuluh kujan tentara kanik hobunuk umbak lacak bohkon jok tepun duan puluk kujan tentara, tetu lacak erih ahkan tuot mihkir ah holuk, duon iyam ihkai ngolavan musuh erih. 32 Ngindoi iyok taꞌai iyok iyam duoi, kotihkak musuh honong macuk, iyok nguhtus ulun ahkan nyavot damai.”
33 Totihput ah Yesus marak Ah: “Koderih kak mbak ihkam. Iyam icok behtik pun tahkan ihkam touk ngohasuk Kuk, ngindoi iyok iyam nohtah paring jok uwas umbot iyok tepui ah.”
Tonyuk jok tavah
(Mat. 5:13; Mrk. 9:50)