9
Hiyoi Yesus ahkan doh: “Nyonih ah noh pios-pios! Ahkuk marak ahkam muk, ahkan arok nuk holang ihkam jok iyam ahkan mahtoi sojaham iyok nohtok Hotalak momorintah jadik Lacak jok bokuasak.”Yesus bokesah mbak Musa khavun Elia
(Mat. 17:1-13; Luk. 9:28-36)
2 Onom ondo hulik erih Yesus mangit Petrus, Yakobus, khavun Yohanes tulak noku icok puruk jok isung. Nuk anan iyam arok iya-iyai, cumak bongon doh kiyak. Nuk anan idoh nohtok Yesus malik, a 3 kolambik Ah pun ngolondang ngolosah. Nuk luvang duniak tuh iyam arok ulun jok touk nguan hatik kopuhtik erih. 4 Solengak toluk behtik murit Ah erih nohtok Nabik Elia khavun Nabik Musa beteng doh honong bokesah mbak Yesus. 5 Hiyon Petrus marak Yesus: “Guruk, tamam tuꞌuk ihtok unuk ohtoi! Ihkai ahkan nguan toluk balai icok ahkan Emuk, icok ahkan Musa, khavun icok ah hinok ahkan Elia.” 6 Petrus bokesah kolo erih kotului iyok iyam taꞌai inon jok harus pomarak ah ahkan Yesus, kotului Petrus khavun koduok jolahai ah mihkoh.
7 Totahpik beteng erih kak, tohkak havun nuk isung doh khavun nuhtup doh. Tahkan luvang havun erih kongihan auh hiyoi ah: “Ihtuh noh Anak Kuk jok kongasih Kuk. Nyonih ah noh Iyok.” b 8 Solengak kotoluk murit Ah erih nohtok hokosilak doh, idoh yarok nohtok iyai-iyai tahpik nohtok bongon Yesus kiyak. 9 Nuk luvang ponyalan doh mosuluh tahkan puruk erih, Yesus majak doh: “Arak marak ahkan iya-iyai pun jok was umbot kam nohtok ah nuk isung puruk tuh nenih, ngindoi ah holuk nyiring Anak Kolunon hulik bolum tahkan holang ulun mahtoi.”
10 Idoh pun pahtuh mbak inon jok was pomarak Yesus ahkan doh. Totahpik doh toluk bokiso-kisok icok mbak jok bohkon inon rehti ah jok hiyon Yesus “Hulik bolum tahkan holang ulun mahtoi”. 11 Khavun doh bokisok mbak Yesus: “Ngombai guruk-guruk agamak marak ah ngindoi Nabik Elia harus holuk lombut sojaham Lacak Ponyolamat?” c
12 Yesus mutah ah: “Punak tuꞌuk Elia harus holuk lombut supayak nyodiak paring aꞌang sojaham Anak Kolunon lombut. Tahpik ngombai arok tonulih nuk luvang Kitab Suci ngindoi Anak Kolunon jok lombut tahkan Hotalak, Iyok harus tumbuk jorak khavun konohina ulun? 13 Totahpik Ahkuk marak ah ahkam muk: Punak tuꞌuk ngindoi Elia was lombut holuk mbak Ahkuk, totahpik ulun nguan iyok ngohasuk kokanin ahtoi doh. Kotului ihtuh was tonulih mongenai nabik Elia nuk luvang Auh Hotalak.”
Yesus nyahkang anak kinyam jok sonyorupang roh jaek
(Mat. 17:14-21; Luk. 9:37-43a)
14 Kotihkak Yesus, Petrus, Yakobus khavun Yohanes bulik noku murit-murit Ah jok bohkon, idoh nohtok ulun arok kupur nuk anai. Khavun arok kak dolang guruk agamak Yahudi honong hobatah mbak murit-murit Ah. 15 Beteng ulun arok nohtok Yesus idoh pusong khavun turus nokoruk noharang polombut Ah. 16 Khavun Yesus bokisok mbak murit-murit Ah: “Inon mosalah muk mbak idoh?”
17 Hiyon icok behtik ulun tahkan holang ulun arok erih: “Guruk, anak kuk ihtuh onik kuk noku Ihkok, kotului iyok sonyorupang roh jaek sohinggak iyam taꞌai bokesah. 18 Ngindoi roh jaek erih nyorupang iyok, roh erih nonjuhung yok noku tanak, iyok nyolengak ngoriak khavun behtiu ah nyolengak kohecang konyereng nyiring baui ah ngolopuhtak. Ahkuk nyavot mbak murit-murit Muk, supayak idoh muhkok roh jaek erih, totahpik yataan doh.”
19 Mahkak Yesus marak ahkan doh: “Ahkai, ihkam tuꞌuk-tuꞌuk ulun jok iyam pocayak mbak Ahkuk! Boh kotahiw ah hinok Ahkuk harus mocon hicok humbak umbak ihkam khavun sabar noharep ihkam supayak ihkam pocayak? Ngomin anak kinyam erih kohtoi!” 20 Khavun doh ngonin anak kinyam erih noku Iyok.
Beteng roh jaek erih nohtok Yesus, roh erih monyorak anak kinyam erih iyok nguruk behtiu ah khavun anak kinyam erih soketap turus bolukang khavun bolinang bolaning nuk isung tanak baui ah pun ngolopuhtak. 21 Khavun Yesus bokisok mbak amai anak kinyam erih hiyoi Ah: “Boh kotahiw ah noh iyok sonyorupang?”
Amai anak kinyam erih mutah ah hiyoi: “Tahkan yok honong kenek. 22 Khavun roh jaek erih bojoin ngihit yok nyolong noku luvang ahpui ngindoi iyam noku luvang danum supayak munuk yok. Ngindoi Ihkok touk ngopios oros ah, ngavat ah noh anak kuk khavun masik ah noh ihkai.”
23 Hiyon Yesus mutah yok: “Ngombai ihkok bokisok: ‘Ngindoi Ihkok touk?’ Kuk marak ahkam muk tului bagin Hotalak iyam arok jok motaher ahkan ulun jok pocayak.”
24 Turus noh amai anak kinyam erih bokesah mbak auh jok mohing hiyoi ah: “Ahkuk was pocayak. Ngavat ah noh ahkuk supayak ahkuk tuꞌuk-tuꞌuk pocayak mbak Ihkok!”
25 Kotihkak Yesus nohtok ulun makin arok hokupur nuk anai, Iyok bokesah mbak auh jok mohing ahkan roh jaek erih hiyoi Ah: “O ihkok roh jok nguan ulun bisuk khavun borengen, Ahkuk moletah kok boluak tahkan anak kinyam ihtuh khavun arak nyolong noku iyok hinok!”
26 Khavun roh jaek erih ngoriak khavun nyangit nguruk behtin anak kinyam erih umbot erih yok boluak. Beteng erih kak anak kinyam erih kolo jok was palus, sohinggak tumbuk ulun marak ah: “Iyok was palus.” 27 Totahpik Yesus namit longoi ah khavun nokonyun yok, iyok pun turus kuat.
28 Kotihkak Yesus khavun murit-murit Ah kiak was nuk lohpo, idoh bokisok mak Iyok hiyon doh: “Ngombai ihkai iyam taꞌan kai muhkok roh jaek erih?”
29 Hiyoi Ah mutah doh: “Muhkok roh jaek kolo ihtuh iyam taꞌai, ngindoi iyam hatin doa kiyak.”
Yesus ngesah mongenai pahtoi Ah
(Mat. 17:22-23; Luk. 9:43b-45)
30 Yesus khavun murit-murit Ah tulak tahkan anai nyihing Galilea, Yesus iyam kanik ulun taꞌai nuk amoh iyok mocon, 31 kotului Iyok honong ngajar dolang murit-murit Ah. Hiyoi ahkan doh: “Anak Kolunon ahkan sonyerah noku anak danum kolunon, khavun idoh ahkan munuk Iyok, khavun toluk ondo ulik Iyok pomunuk Iyok ahkan hulik bolum hinok.”
32 Idoh iyam ngorehti umbak kesah ah erih, totahpik idoh mihkoh bokisok mbak iyok.
Iyai jok paling hajok nuk holang dolang murit
(Mat. 18:1-5; Luk. 9:46-48)
33 Khavun docok noh Yesus khavun murit-murit Ah nuk Kapernaum. Kotihkak Yesus uwas dahpot nuk lohpo, Iyok bokisok mbak murit-murit Ah hiyoi: “Inon jok kesah mik nuk tohun jalan nih?”
34 Totahpik idoh tonih, kotului nuk tohun jalan idoh hobatah mongenai iyai jok paling poduluk nuk holang idoh. d 35 Yesus pun mangit koduok balas murit Ah tuot. Hiyon Ah ahkan doh: “Ngindoi ihkam kanik jadik ulun jok paling poduluk nuk husuk Hotalak, ihkam harus jadik ulun jok paling koik, khavun harus molayan ulun bohkon.” e 36 Khavun Yesus ngonin icok behtik anak iyam motombok ah nuk tohun-tohun idoh. Iyok ngohavon anak kinyam erih kahvui bokesah mbak murit-murit Ah hiyoi Ah: 37 “Ulun jok norimak anak kinyam kolo ihtuh kotului Ahkuk, iyok norimak Ahkuk kak. Khavun ulun jok norimak Ahkuk, iyok iyam norimak Ahkuk kiyak, totahpik norimak Hotalak jok was nguhtus Ahkuk.” f
Ulun jok iyam murit Yesus muhkok roh jaek
38 Hiyon Yohanes marak Yesus: “Guruk, Ihkai nohtok ulun bohkon jok iyam murit Muk, muhkok roh jaek luvang ngaram Muk, khavun ihkai majak ulun erih, kotului iyok iyam tahkan kolompok etok.”
39 Totahpik hiyon Yesus mutah auh Yohanes: “Arak kok majak yok! Kotului yarok icok behtik pun jok touk nguan aꞌang jok motaher hatin ngarak Kuk, totahpik iyok turus ngohinak Kuk. 40 Iyai jok iyam ngolavan ihtok iyok arok nuk hilak ihtok. g 41 Nohouk ah Ahkuk marak ahkam muk: Iyai jok nongak kok icok sakir danum korih kotului ihkam ngohasuk Lacak Ponyolamat, uhpah ah iyam ahkan niho.” h
Dolang aꞌang jok nguan ulun nyolong noku luvang bodosa
(Mat. 18:6-9; Luk. 17:1-2)
42 Hiyon Yesus: “Iyai jok nguan icok behtik tahkan holang anak kinyam ihtuh iyam pocayak hinok mbak Ahkuk, punak pios ulun erih kongahut bahtuk hajok nuk ujat ah khavun nahpuk yok noku laut. 43 Jadik ngindoi longom muk nguan ihkok bodosa, mutung ah kiyak! Kotului nihak kok bolum mbak Hotalak arok longom muk silak kiyak, dari padak arok longom muk duo-duok totahpik ihkok nyolong noku luvang noraka. Unuk anai ahpui iyam taꞌai konomalop. i 44 [Unuk anai dolang ulet jok kuman doh iyam taꞌai mahtoi, khavun ahpui ah iyam taꞌai balop.] 45 Khavun ngindoi paꞌamuk nguan ihkok bodosa, mutung ah kiyak! Kotului nihak kok bolum mbak paꞌamuk icok kiyak, dari padak arok duok paꞌamuk muk totahpik tonosahkah noku noraka. 46 [Unuk anai dolang ulet iyam taꞌai mahtoi, khavun ahpui ah iyam taꞌai balop.] 47 Ngindoi mahta muk nguan ihkok bodosa, ngoruet ah luang mahta muk erih! Nihak ihkok bolum hatin icok mahtak mbak Hotalak beteng Yok momorintah jadik Lacak, dari padak kok bolum hatin duok mahtak totahpik ihkok kongindo noku noraka. j 48 Unuk anai ahpui iyam ahkan balop dolang ulet iyam taꞌai mahtoi. k
49 Paring kolunon ahkan tonikos mbak kojorak jok kolo lasut ahpui.
50 Tonyuk punak pios, totahpik ngindoi tonyuk jadik tavah, bohkolo ihkam touk nguai ah jadik mohit hinok? Jadik ihkam harus kolo tonyuk jok mohit! Bolum noh hokopios icok mbak jok bohkon.” l