Arak nguan ulun nyolong noku luvang dosa
(Mat. 18:6-7, 21-22; Mrk. 9:42)
17
Yesus marak ahkan murit-murit Ah: “Dolang aꞌang jok nguan ulun nyolong noku luvang dosa, mihtik ahkan arok. Totahpik colahkak noh ulun jok nguai ah. 2 Pios morong ngindoi ngahut bahtuk hajok nuk ujat ah, khavun iyok tonahpuk noku luvang laut, daripadak iyok nguan icok behtik tahkan ulun-ulun ngohasuk Kuk jok jaham dalo pocayak, napak dosa. 3 Kotului erih touk-touk noh!Ngindoi arok jolaham muk jok havoi kopocayak ah napak kosalak umbak ihkok, marak ah ahkai kosalak ah. Ngindoi iyok monasar, ngapun ah noh kosalak ah. 4 Ngindoi iyok salak umbak ihkok pihtuk kali icok ondo. Khavun nyinong iyok lombut noku ihkok khavui marak ah, ‘Ahkuk nyavot maap’, jadik ihkok harus ngapun kosalah ah.”
Mongenai kopocayak
5 Khavun dolang rasul marak ah ahkan Tuhan Yesus: “Tuhan, monahang ah noh kopocayak kai.” 6 Tuhan mutah doh: “Ngindoi ihkam tepun kopocayak kohajon bijik savik, ihkam touk marak ah ahkan bahtang harak ihtuh, ‘Bocohpit noh ihkok khavum totonjom noku laut nai.’ Mihtik noh bahtang harak erih pahtuh umbak poletah muk.”
Aꞌang jok iyam taꞌai iyam jihpon nguai ah
7 “Inon kolo ah icok behtik tahkan ihkam tepun icok jihpon jok nyakul nuk umon mik, atau jok jagak dolang domba mik, khavun kotihkak jihpon ah erih bulik. Arok leh ihkam marak ah ahkan jihpon erih, ‘Has ngimos ah nai kuman?’ 8 Tetu iyam! Mohtos tokalik, ihkam ahkan marak ahkai ah, ‘Hatiu ah noh hatik jok borasih khavum nyodiak ah noh ahkak kuk ukun ponguman, nyiring ahkuk umbot kuman ihkok ngurus ahkuk umbot erih, baruk ihkok touk noh kuman.’ 9 Arok leh ihkam botorimakasih umbak jihpon mik erih, kotului iyok uwas umbot nguan paring aꞌang jok sonyuhuk mik iyok ngorejak ah? Tetu iyam! 10 Koderih kak ihkam. Ngindoi ihkam umbot nguan paring jok ponoletah ah ahkan mik, marak ah noh, ‘Ihkai tuh jihpon. Ihkai nguan inon jok harus ihkai nguai ah kiak.’ ”
Yesus nyahkang sopuluh behtik ulun bobelang
11 Kotihkak luvang ponyalai Yesus noku Yerusalem, Iyok nyihing holang Samaria khavun Galilea. 12 Beteng Yesus nyolong nuk icok kapung, arok sopuluh behtik ulun jok buah ponyahkit belang jok lombut noku Iyok. Totahpik idoh tombok macuk tahkan Yesus. 13 Khavun ngoriak: “Yesus, Guruk, masik ah noh ihkai!”
14 Beteng Yesus nohtok doh, Iyok marak Ah: “Tulak noh khavun mokarah arop muk noku okon agamak Yahudi tului ihkok uwas pios.”
Lambak idoh nyalan, pios noh ponyahkit doh. 15 Kotihkak icok behtik ulun tahkan idoh taꞌai ngindoi iyok uwas pios, iyok hulik tahtup kandah ah momuji Hotalak. 16 Khavun nuk husuk Yesus, ulun erih nyembah khavui marak ah torimakasih umbak Iyok. Ulun erih ulun Samaria. 17 Khavun Yesus marak ah: “Iyam leh arok sopuluh behtik ulun jok uwas pios? Nuk amoh jok siyoi ah hinok? 18 Ngombai tihkas ulun jok iyam ulun Yahudi ihtuh kiak jok hulik marak torimakasih umbak Hotalak?” 19 Khavun Yesus marak ahkan ulun erih: “Tombok nai khavum muk tulak nai. Kotului ihkok pocayak umbak Ahkuk, ihkok pios.”
Beteng Hotalak lombut ahkan momorintah
(Mat. 24:23-28, 36-41)
20 Arok pirak behtik ulun Parisi bokisok umbak Yesus: mirak Hotalak lombut momorintah jadik Lacak. Yesus mutah ah: “Korajaan Hotalak iyam tonohpatuk hatin tandak-tandak jok touk tonohtok ulun. 21 Jadik ulun pun iyam taꞌai marak ah, ‘Has nohtok, ihtuh iyok!’ ngindoi iyam, ‘Nuk anai iyok!’ Kotului Hotalak uwas lombut momorintah nuk tohun-tohun ihkam.”
22 Ulik Yesus marak ah ahkan murit-murit Ah: “Ahkan lombut kotihkak ah ihkam bolinguk nohtok Ahkuk, Anak Kolunon. Totahpik ihkam iyam ahkan nohtok Ahkuk. 23 Nain ulun ahkan marak ahkam muk, ‘Nohtok, nuk anan!’ ngindoi iyam, ‘Nohtok ah, nuk ohtoi!’ Totahpik arak noh ihkam boluak ngurah Ahkuk. 24 Havoi umbak kilap ngololinyap tahkan langit, tahkan silak noku silak, koderih kak Ahkuk, Anak Kolunon ahkan hulik lombut. 25 Totahpik topahtuk ah Ahkuk harus tumbuk jorak khavun iyam tonorimak ulun-ulun jaman ihtuh. 26 Beteng ondo Ahkuk, Anak Kolunon, hulik lombut koadaꞌan ah havoi mbak kolo jaman Nuh. 27 Ulun kuman, ngorih khavun sokavuk sokohumak. Koderih nulo-nulo nyiring Nuh nyolong noku luvang kahpal ah khavun danum nyurung hajok lombut khavun munuk idoh paring ah. 28 Kolo beteng jaman Lot kak. Ulun kuman, ngorih, borahkang molik, nonjom ngombulan, khavun nombok lohpo. 29 Totahpik beteng Lot boluak tahkan Sodom, beteng ondo erih kak ucan ahpui nahtup bahoi ah nohkah tahkan langit khavui ngolohpung idoh paring ah. 30 Koderih noh koadaꞌan havun beteng ondo Ahkuk, Anak Kolunon mokarah arop Kuk.
31 Kotihkak ondo erih ulun jok honong arok nuk isung sahpo lovui ah arak noh mosuluh ahkan ngomin barang bandak ah jok nuk luvang lovui. Koderih kak ulun jok honong nuk umok arak noh hulik noku lovui ah. 32 Nohouk ah noh, inon jok uwas umbot torjadik umbak oruh Lot! 33 Kotului ulun jok kanik motahan komolum ah khavun kopoduluk ah nuk duniak tuh, ahkan niho komolum nuk surga. Totahpik ulun jok nohtah komolum ah khavun kopoduluk ah iyok ahkan sonyolamat. 34 Pocayak noh! Beteng ngolomik erih, duok behtik ulun honong tiruh nuk icok tegan. Icok behtik ah ahkan kongomin, khavun icok behtik hinok ahkan tonohtah. 35 Duok bavik jok honong mucak paroi, icok behtik ahkan kongomin, khavun icok behtik hinok tonohtah. 36 Duok behtik ulun honong korejak nuk umok, jok icok behtik ahkan kongomin, khavun icok behtik hinok tonohtah.”
37 Khavun murit-murit Yesus erih bokisok: “Tuhan, nuk amoh erih ahkan torjadik?”
Yesus mutah ah: “Nuk amoh arok otun ulun, nuk anai arok ocin naꞌang okak jok kuman karam ah.”a