Tindung baluk khavun hakim
18
Yesus marak icok tindung unuk Iyok ngajar murit-murit Ah, ahkan idoh turu-turus bodoa khavun iyam puhtus asa. 2 Hiyoi ah ahkan doh: “Unuk icok kota arok icok behtik hakim iyok iyam mihkoh umbak Hotalak. Khavun iyok pun iyam ngohormat ulun-ulun jok bohkon. 3 Nuk kota erih arok kak icok behtik baluk. Iyok nulo lombut noku hakim erih khavui marak ah, ‘Ngavat ahkuk ngonduon hak kuk tahkan ulun jok kanik ngorugik ahkuk.’ 4 Uwas tahik noh hakim erih ngombelek dohop baluk erih, totahpik laiu ah hakim erih bokesah luvang ahtoi ah, ‘Oluk poh ahkuk iyam mihkoh umbak Hotalak, khavun ahkuk pun iyam podulik mbak ulun bohkon, 5 totahpik kotului baluk erih nulo ngalut ahkuk, ahkuk ahkan ngonohop iyok khavun ngopuhtus pokarak ah, ahkan iyok iyam nulo lombut noku ahkuk khavun iyam ngaok ahkuk.’ ”6 Khavun Tuhan Yesus marak Ah hinok: “Ngonih ah noh inon jok pomarak hakim jok iyam jujur erih! 7 Ngindoi hakim erih touk ngavat pokarak baluk erih, holovik hinok Hotalak ahkan ngavat ulun-ulun jok uwas umbot kongopilik Ah, jok uwas bodoa nyavot umbak Iyok hondo ngolomik, Iyok iyam ahkan botele-tele ngavat idoh! 8 Pocayak noh: Hotalak ahkan pohos ngavat idoh. Totahpik kotihkak Ahkuk, Anak Kolunon hulik lombut, jaham mihtik ahkan arok ulun jok pocayak umbak Ahkuk nuk duniak ihtuh!”
Tindung ulun Parisi khavun ponahkih pajak
9 Khavun arok pirak behtik ulun jok nuk anan ngomok arop doh punak tuꞌuk nuk husuk Hotalak, khavun nganggap ulun jok bohkon pindak umbak idoh. Kotului erih noh Yesus ngesah tindung ihtuh ahkan doh. 10 Hiyoi Ah: “Arok duok behtik jok tulak noku Lovuk Hotalak ahkan bodoa. Icok ah ulun Parisi khavun jok bohkon ah hinok ulun ponahkih pajak. 11 Ulun Parisi erih tombok bongoi khavui bodoa, hiyoi ah, ‘Hotalak, ahkuk botorimakasih umbak Ihkok, kotului ahkuk iyam kolo ulun bohkon, jok bokahuk, ponihpuk, khavun iyam pujik dusak. Ahkuk bosukur kotului ahkuk iyam kolo ponahkih pajak erih. 12 Ahkuk bopuasak duok kali icok minggu. Khavun ahkuk nongak perpuluhan tahkan paring hasil korejak kuk.’ 13 Totahpik ponahkih pajak erih tombok ngacuk arop ah tahkan ulun jok bohkon. Iyok pun iyam bohanyik nokarak noku langit, iyok nihkas longoi ah nuk husuk ah nahtup iyok bodoa, hiyoi ah, ‘Hotalak masik ah noh ahkuk, ulun jok bodosa.’ ”
14 “Pocayak noh!” Hiyon Yesus. “Beteng dorok bulik noku lohpo doh, ponahkih pajak erih noh jok tonorimak Hotalak, totahpik ulun Parisi erih iyam tonorimak Hotalak. Kotului paring ulun jok ngisung arop ah iyok ahkan kongopindak Hotalak. Khavun ulun jok ngopindak arop ah ahkan kongisung Ah.” a
Yesus ngomberkat anak kinyam
(Mat. 19:13-15; Mrk. 10:13-16)
15 Arok pirak behtik ulun ngomin anak ah noku Yesus, ahkan dolang anak kinyam erih tonamit Yesus khavui ngomberkat ah. Kotihkak murit-murit Yesus nohtok paring ah erih idoh ngomirat ulun-ulun erih. 16 Totahpik Yesus naꞌah dolang anak kinyam erih, khavui marak dolang murit-murit Ah, hiyoi Ah: “Mosuah ah noh anak kinyam lombut noku Ahkuk! Arak majak idoh, kotului ulun jok kolo dolang anak kinyam ihtuh noh jok tepun Korajaan Hotalak. 17 Nyonih ah noh pios-pios! Ulun jok iyam norimak Hotalak kolo icok behtik anak kinyam ihtuh, iyok iyam ahkan nyolong Korajaan Hotalak.”
Punak bohalik ulun tahto nyolong noku luvang Korajaan Hotalak
(Mat. 19:16-26; Mrk. 10:17-27)
18 Icok behtik okon Yahudi bokisok mbak Yesus: “Guruk jok pios, inon jok harus kuk nguai ahkak kuk touk norimak komolum jok pios jok yarok tihkas nyamah ah?”
19 Hiyon Yesus ahkai ah: “Ngombai ihkok marak Ahkuk pios? Yarok jok pios salak umbak Hotalak kiak. 20 Ihkok uwas taꞌai poletah-poletah Hotalak, Arak dusak, arak munuk, arak nahko, arak nyavung nyanduk ulun, khavun ngohormat amai khavun inai muk.” b
21 Hiyon ulun erih mutah ah: “Paring porintah erih umbot ahkuk nguai tahkan kobiyo kuk nyiring huntuh.”
22 Nyonih auh ulun erih: Yesus marak Ah: “Honong arok icok jok poduluk kok nguai ah: Dahkang anoh paring aꞌang jok arok nuk ihkok: nongak ah duit erih ahkan ulun malax, khavun ihkok ahkan ngonduon ponahto nuk surga. Hulik erih lombut noh ngohasuk Ahkuk.” 23 Totahpik kotihkak ulun erih nyonih auh Yesus, iyok liduk, kotului iyok tahto nyangit.
24 Yesus taꞌai ulun erih liduk luvang ahtoi ah, kotului erih Iyok marak Ah: “Yamios kohaliu ah ahkan ulun jok tahto touk nyolong Korajaan Hotalak! 25 Bohalik nyangit icok kungan unta nyolong luvang tulung doih, punak mohalik hinok ulun tahto nyolong noku luvang Korajaan Hotalak.”
26 Hiyon ulun-ulun jok nyonih auh Yesus erih mutah Ah: “Ngindoi koderih, iyam arok ulun jok ahkan sonyolamat?”
27 Yesus mutah ah: “Inon jok iyam mukin ahkan kolunon, mukin bagin Hotalak!”
28 Khavun Petrus marak ah: “Nohtok ah noh! Ihkai uwas nohtah lovuk khavun avun human kai ahkan ngohasuk Ihkok.”
29 “Nyonih ah noh pios-pios!” hiyon Yesus. “Ulun jok uwas nohtah lohpo ah, oruh ah, jolahai harik, inai amai, khavun dolang anak ah kotului Korajaan Hotalak, 30 ulun erih ahkan norimak uhpah tahkan Hotalak holovik holeak karoi beteng huntuh kak, khavun beteng jaman jok ahkan lombut iyok ahkan tonongak komolum jok pios jok yarok tihkas nyamah ah.”
Yesus bokesah nyiring kotoluk kali ah mongenai pomalus Ah
(Mat. 20:17-19; Mrk. 10:32-34)
31 Yesus ngupur duok balas murit Ah, khavui marak ahkan doh: “Nyonih ah noh! Ihtok huntuh nujun Yerusalem. Khavun nuk anai, paring jok tonulih nabi-nabik mongenai Ahkuk, Anak Kolunon, ahkan torjadik. 32 Ahkuk ahkan sonyerah noku ulun-ulun jok iyam mongenal Hotalak, Ahkuk ahkan kongolunyik, kongohina, khavun kongolucak. 33 Idoh ahkan monyorak Ahkuk khavun munuk ahkuk, totahpik ondo jok kotoluk ah Ahkuk ahkan hulik bolum tahkan holang ulun mahtoi.”
34 Paring ah erih iyam doh ngorehti ah, kotului rehti auh ah erih, sonyuhuk Hotalak tahkan doh, ahkan doh iyam taꞌai inon jok pomarak Ah erih.
Yesus nyahkang ulun jok bobulen
(Mat. 20:29-34; Mrk. 10:46-52)
35 Beteng Yesus khavun dolang murit Ah uwas manyo docoh nuk Yeriko, arok icok behtik ulun bobulen jok honong tuot nyavot duit nuk saran jalan. 36 Kotihkak ulun bobulen erih nyonih ulun arok nyihing, iyok bokisok: “Arok inon poh?”
37 Hiyon idoh ahkai ah: “Yesus ulun Nazaret erih nyihing.”
38 Mahkak ulun bobulen erih ngoriak: “Yesus, koturun Daud! Masik ah noh ahkuk!”
39 Ulun-ulun jok nuk husuk ah ngomirat ulun bobulen erih. Khavun nyuhuk iyok tonih totahpik ulun jok bobulen erih, ngoriak yamios komohing ah: “Yesus, koturun Daud! Masik ah noh ahkuk!”
40 Yesus tondok khavun nyuhuk doh ngomin ulun jok bobulen erih noku Iyok. Beteng ulun bobulen erih dahpot nuk husuk Yesus, Iyok bokisok umbak ulun bobulen erih, 41 “Inon jok kokanim muk Ahkuk nguai ah ahkam muk?”
Hiyon ulun bobulen erih: “Tuhan, ahkuk kanik touk nohtok.”
42 Khavun Yesus mutah Ah: “Ngindoi koderih, nohtok nai! Kotului ihkok pocayak umbak Ahkuk, ihkok pios.”
43 Hun erih kak ulun bobulen erih touk nohtok, iyok turus ngohasuk Yesus khavun iyok marak ah torimakasih mbak Hotalak. Beteng ulun arok nohtok paring ah erih, idoh momuji-muji Hotalak.