Yesus ngajar mongenai avuk humak jok hokomuho
(Mat. 19:1-12; Luk. 16:18)
10
Tahkan anai Yesus tulak noku daerah Yudea khavun daerah pohoi Sungoi Yordan. Beteng Yok docok nuk anai tumbuk ulun hokorumbuk lombut noku Iyok. Khavun kolo kopuꞌun ah Iyok ngajar marak doh.2 Mahkak lombut ulun-ulun Parisi, idoh nikos Yesus umbak kisok: “Inon leh bosai ah touk hindo mbak oruh ah?”
3 Hiyon Yesus mutah doh: “Inon hiyok poletah nabik Musa ahkan mik?”
4 Mahkak ulun-ulun Parisi erih mutah ah: “Musa marak ah touk hindo totahpik harus napak surat hindo holuk.” a
5 Khavun hiyon Yesus mutah doh: “Musa nulih poletah erih ahkan mik kotului ihkam iyam kanik pomarak khavun ahtoi mik jaek. 6 Kotului beteng duniak punai tonaoi, Hotalak napak bahkas khavun bavik, b 7 kotului erih bahkas ahkan nohtah amai khavun inai ah khavun ahkan hicok mbak oruh ah, c 8 sohinggak dorok jadik icok. Kotului erih noh dorok iyam nai duok totahpik icok. 9 Kotului erih, inon jok uwas konohicok Hotalak, iyam taꞌai hindo.”
10 Kotihkak Yesus khavun murit-murit Ah was nuk lohpo, murit-murit bokisok umbak Iyok mongenai kesah ah mbak ulun-ulun Parisi erih. 11 Khavun hiyoi Ah ahkan doh: “Iyai jok hindo mbak oruh ah khavun hosokavuk hinok mbak bavik bohkon, iyok bodosa mbak oruh ah jok okok (kotului iyok tiruh mbak bavik bohkon.) d 12 Khavun ngindoi oruh ah hindo mbak bosai ah khavun sohakavuk hinok mbak bahkas bohkon, iyok bodosa mbak bosai ah jok okok kotului iyok tiruh mbak bahkas bohkon.”
Yesus ngomerkat anak-anak kinyam
(Mat. 19:13-15; Luk. 18:15-17)
13 Arok ulun ngonin anak kinyam noku Yesus, supayak Iyok ngomberkat idoh. Totahpik murit-murit Ah ngomirat ulun-ulun erih. 14 Kotihkak Yesus nohtok tobiat murit-murit Ah, Iyok birat ahkan doh hiyoi Ah: “Pohiyoi noh anak kinyam atuh lombut noku Ahkuk! Arak majak doh, kotului ulun jok kolo anak kinyam atuh jok nyolong Korajaan Hotalak. 15 Nohouk ah! Iyai jok iyam noharang korajaan Hotalak numun anak kinyam tuh, iyok iyam ahkan nyolong noku anai.” e 16 Khavun Iyok ngohavon dolang anak kinyam erih, Iyok nihkas longoi Ah noku isung idoh turus ngomerkat ah.
Ulun tahto susah nyolong Korajaan Hotalak
(Mat. 19:16-26; Luk. 18:18-27)
17 Beteng Yesus nurus ponyalan Ah, lombut noh ulun nokoruk noku Iyok khavun ulun erih tosuhkuk nuk husuk Ah khavun turus bokisok: “Guruk jok pios, inon jok harus kuk nguai supayak ngonduon bolum jok yarok tihkas nyamah ah?”
18 Yesus mutah Ah: “Mbai kok marak Kuk pios? Yarok ulun jok pios. Tihkas Hotalak kiyak jok pios. 19 Ihkok was taꞌai dolang poletah Hotalak: Arak munuk, arak tiruh mbak oruh ulun bohkon, arak nahko, unuk pongadilan arak bobalik ngesah aꞌang jok iyam tuꞌuk, arak nihpuk, ngolehkak ah noh amai khavun inai muk!” f
20 Khavun hiyon ulun erih marak Yesus: “Guruk, paring ah erih uwas konguak kuk tahkan kuk honong bio nyiring huntuh.”
21 Totahpik Yesus nohtok yok, Iyok pun masik mbak ulun erih, Hiyoi ahkan ulun erih: “Icok hinok jok jaham kok nguai: Tulak nai, dahkang ah inon jok arok mbak ihkok khavun nongak ah noh noku ulun-ulun malak, mahkak ihkok ahkan ngonduon ponahto nuk surga. Khavun umbot kok dahkang ah, lombut noh noku ohtoi khavun ngohasuk Ahkuk.” 22 Umbot nyonih auh Yesus erih iyok jaon, iyok turus tulak mbak ahtoi jok piluk, kotului iyok ulun jok tahto.
23 Khavun Yesus nohtok murit-murit Ah khavun marak doh hiyoi Ah: “Yamios kobohaliw ah ulun tahto nyolong noku luvang Korajaan Hotalak.”
24 Murit-murit-Ah pusong nyonih inon jok pomarak-Ah. Totahpik hiyon Yesus hinok ahkan doh: “Anak Kuk, punak bohalik nyolong noku luvang Korajaan Hotalak. 25 Honong murah icok kungan unta nyolong luvang doih dari padak ulun tahto nyolong noku Korajaan Hotalak.”
26 Nyonih kesah Yesus erih idoh makin pusong khavun bokisok icok mbak jok bohkon: “Ngindoi koderih, iyai jok touk sonyolamat?”
27 Lambak nyonih dolang murit ah bokesah Iyok pun nurus kesah Ah hiyoi: “Bagin kolunon aꞌang erih motaher totahpik bagin Hotalak yarok jok motaher.”
Uhpah ngohasuk Yesus
(Mat. 19:27-30; Luk. 18:28-30)
28 Hiyon Petrus ahkan Yesus: “Ihkai was nohtah paring aꞌang khavun ngohasuk Guruk!”
29 Hiyon Yesus mutah yok: “Nyonih ah noh! Ahkuk marak ahkam muk, paring ulun jok nohtah lohpo ah, nohtah jolahai harik, inai amai ah, anak ah, khavun nohtah umoi ah, kotului Ahkuk, khavun kotului ngesah Tarung Pios, 30 ulun erih huntuh pun iyok ahkan norimak uhpah solahtus kali lihpet: lohpo ah, jolahai harik ah, inai ah, anak ah, umoi ah. Totahpik ulun ahkan monyorak iyok kak, nuk komolum jok ahkan lombut iyok ahkan ngonduon bolum jok yarok tihkas nyamah ah. 31 Kotului erih noh, ulun jok tonohtok iyam poduluk huntuh iyok ahkan jadik ulun jok punak poduluk havun. Khavun ulun jok tonohtok punak poduluk huntuh ahkan jadik ulun jok iyam poduluk havun.” g
Yesus bokesah kotoluk kali mongenai pahtoi Ah
(Mat. 20:17-19; Luk. 18:31-34)
32 Yesus khavun dolang murit Ah khavun arok pirak behtik ulun tulak noku Yerusalem. Yesus nyalan nuk husuk doh. Murit-murit Ah pusong, khavun tumbuk ulun jok ngohasuk idoh tahkan lihkut murit-murit Ah pun mihkoh mbak inon jok ahkan torjadik nuk anai. Khavun Iyok naꞌah murit Ah hinok Iyok turus nopahtuk kesah Ah ahkan doh inon jok ahkan torjadik mongenai arop Ah. 33 Hiyoi Ah: “Huntuh ihtok tulak noku Yerusalem khavun Anak Kolunon ahkan sonyerah noku dolang Kopalak pomipin agamak Yahudi khavun guruk-guruk agamak Yahudi. Khavun idoh ahkan mokarah ah ngindoi Iyok salak Iyok ahkan konohukum mahtoi, idoh ahkan nyerah Yok noku ulun-ulun jok iyam ngenal Hotalak. 34 Khavun Iyok ahkan konolunyik, konolucak, pononyorak, khavun pomunuk, totahpik ondo jok kotoluk Iyok ahkan hulik bolum tahkan holang ulun mahtoi.”
Savot Yakobus khavun Yohanes
(Mat. 20:20-28)
35 Khavun Yakobus dorok Yohanes arok noh anak Zebedeus, dorok ngoronik Yesus khavun hiyon dorok: “Guruk, korok nyavot supayak Ihkok kanik nongak inon jok sonyavot korok!”
36 Iyok mutah dorok: “Inon jok sonyavot borok, supayak Kuk nongak ah?”
37 Khavun hiyok dorok: “Ngindoi Ihkok jadik Lacak mosuah ah noh korok tuot, icok behtik nuk silak kotoum Muk jok icok nuk silak uloi Muk.”
38 Totahpik hiyon Yesus ahkan dorok: “Ihkam iyam taan mik inon jok was sonyavot erih. Inon leh duon borok norimak khavun nakung kojorak kolo jok ahkan torjadik mbak Ahkuk?” h
39 Hiyon dorok mutah ah: “Korok touk.”
Khavun hiyon Yesus nok: “Punak tuꞌuk ihkam ahkan jorak khavun kongombaptis kolo Ahkuk kongombaptis. 40 Totahpik iyam Ahkuk jok netu ah iyai jok ahkan tuot nuk silak kotouk Kuk ngindoi iyam nuk silak uloi kuk, Hotalak noh jok ahkan ngopilik ah iyai jok tuot nuk anai.”
41 Beteng kosopuluh behtik murit Yesus jok bohkon nyonih savot Yakobus dorok Yohanes erih, idoh birat mbak dorok. 42 Khavun Yesus naꞌah paring murit Ah khavun marak doh hiyoi Ah: “Ihkam uwas taan mik ngindoi paring pomipin bangsak jok iyam ngenal Hotalak idoh ahkan monyorak ulun arok jok mocon nuk anai, ponguasak-ponguasak ahkan moretah mbak kogarang doh. i 43 Totahpik ihkam yata'ai koderih! Iyai jok kanik jadik ulun poduluk nuk holang ihkam, iyok harus jadik polayan kam. j 44 Khavun iyai jok kanik jadik ulun paling poduluk nuk holang ihkam, iyok harus jadik jihpon ahkan paring ulun. 45 Anak Kolunon lombut noku duniak iyam ahkan konolayan ulun, totahpik Iyok lombut ahkan ngolayan ulun bohkon khavun nongak hasong-Ah nuk novus dosa kolunon.”
Yesus nyahkang Bartimeus jok bobulen
(Mat. 20:29-34; Luk. 18:35-43)
46 Khavun docok noh Yesus khavun murit-murit-Ah nuk Yerikho. Umbot erih Iyok mbak dolang murit Ah hombo-homboh mbak ulun arok, idoh boluak tahkan Yerikho. Nuk anai arok ulun bobulen iyok tuot nuk saran jalan iyok baꞌas nyavot duit, ngarai ah Bartimeus, anak Timeus. 47 Kotihkak ulun jok bobulen erih nyonih ngindoi Yesus tahkan Nazaret nyalan nyihing anai, iyok ngoriak: “Yesus, Koturun Daud, masik ah noh ahkuk!”
48 Tumbuk jok birat ahkai khavun nyuhuk yok tonih. Totahpik somakin mohing iyok ngoriak: “Koturun Daud, masik ah noh ahkuk!”
49 Khavun Yesus tondok turus marak ah: “Naꞌah ulun bobulen erih!”
Idoh pun turus naꞌah ulun bobulen erih khavun marak ahkai ah: “Ngandah nai! Kuat nai, Yesus naꞌah kok.”
50 Khavun iyok nguhkoi jubah ah, turus ngimos tombok khavun lombut noku Yesus.
51 Yesus ngisok yok: “Inon jok kokanim muk supayak ahkuk nguai ahkam muk?”
Ulun bobulen erih mutah ah: “Guruk, ahkuk kanik touk nohtok.”
52 Khavun hiyon Yesus ahkai ah: “Tulak nai, iman muk uwas ngopios ihkok!”
Beteng erih kak iyok touk nohtok, khavun iyok nyalan ngohasuk Yesus.