Tindung pongurus duit jok picik
16
Icok ondo Yesus ngohavot ahkan murit-murit Ah: “Arok icok behtik ulun jok tahto, iyok tepun icok behtik ulun jok patah ngurus duit ah khavun paring dolang ponahto ah. Ulun tahto erih ngonduon kaduk tului ulun jok patah ngurus duit ah erih iyok ngoraus ngoresau ponahto ah. 2 Khavui ah naꞌah ulun jok ngurus duit ah khavun ponahto ah erih, iyok marak ah, ‘Ahkuk nyonih ah ihkok tuh rih ngoraus duit kuk. Hun ihtuh, nongak ahkak kuk dolang lahporan korejak muk, tului ihkok tonondok kuk noh ngurus dolang koponahto kuk.’ 3 Mahkak ulun jok ngurus duit ah erih bopihkir, ‘Inon jok poduluk konguak kuk huntuh? Tuan kanik nondok ahkuk tahkan korejak kuk. Nyakul ahkuk iyam duok kuk, jadik ulun ponyavot ahkuk miak. 4 Ahkuk arok evak. Ngindoi ahkuk uwas tonondok, ahkuk harus tumbuk jolahak kuk jok kanik unuk kuk mocon nuk lohpo doh!’ 5 Jadik iyok jok korejak pongurus duit erih-rih naꞌah paring ulun jok bohutang umbak tuan ah. Iyok marak ahkan ulun jok topahtuk ah, ‘Pirak uhtang muk umbak tuan kuk?’ 6 Ulun erih mutah ah, ‘Solahtus botoran binyak buak jaitun.’ Khavui ah marak ah ahkan ulun erih, ‘Ihtuh surat uhtang muk. Tuot noh khavun pohos nguan surat uhtang muk jok bohuak, nulih ah noh liman puluk botoran kiak.’ 7 Khavui marak ah ahkan ulun jok bohutang koduok ah, ‘Gas pirak uhtang muk?’ Ulun erih mutah ah, ‘Cok kujan goni gandum.’ Khavui ah marak ah ahkan ulun erih, ‘Ihtuh surat uhtang muk. Tuot noh khavun pohos nguan surat uhtang muk jok bohuak, nulih ah jaluk lahtus goni.’8 Mahkak tuan erih ngehtek kopicik ulun jok ngurus duit jok iyam jujur erih. Tului ulun jok iyam pocayak mbak Hotalak holovik picik ngahtur urusan ah daripadak ulun jok uwas pocayak mbak Hotalak.”
9 Khavun Yesus bokesah hinok, hiyoi Ah: “Nyonih ah! Hapai ah noh ponahto duniak ihtuh ngindoi unuk ngonduon jolahak, tului ponahto duniak ihtuh iyam bolehkak nai. Khavun ihkam ahkan tonorimak unuk pocon jok yarok tihkas nyamah ah.
Tuhit umbak korejak jok kenek
10 Ulun jok touk pomocayak umbak aꞌang jok kenek, touk kak pomocayak umbak aꞌang jok hajok. Totahpik ulun jok iyam taꞌai ah pomocayak umbak aꞌang jok koik, iyam taꞌai ah pomocayak luvang aꞌang jok hajok kak. 11 Jadik ngindoi ponahto jok nuk duniak tuh kiyak ihkam iyam dahpat pomocayak, mahik nok nuk surga nai, Hotalak iyam ahkan pocayak umbak ihkok ngurus koponahto Ah nuk surga nai. 12 Khavun ngindoi ihkok iyam tuhit ngurus barang ulun bohkon, iyai jok ahkan nongak ihkok barang jok ahkan ihkok tepui?
13 Iyam arok jihpon jok touk korejak ahkan duok tuan. Tului iyok ahkan holovik pahtuh khavun mongasihi jok icok daripadak jok bohkon. Koderih kak umbak ihkam. Ihkam iyam taꞌan mik sotia mbak Hotalak, ngindoi atak mihkir koponahto duniak.”
14 Ulun-ulun Parisi nyonih paring ah jok kongohavot Yesus. Khavun idoh ngotaok Iyok, tului idoh tamak mbak duit. 15 Totahpik Yesus marak Ah ahkan doh: “Ihkam tuh jok ngotiak pios nuk mahtan ulun arok, totahpik Hotalak taꞌai suang ahtoi mik. Tului inon jok hinut nuk mahtan kolunon, konganggap salak nuk mahtan Hotalak.
16 Sojaham Yohanes Pombaptis nopahtuk molayan Hotalak, hukum Taurat jok tonulih Musa khavun ajar barak nabi-nabik honong tehtap hapan. Umbot erih tarung pios bohkolo ah Hotalak momorintah jadik Lacak tonarung bunang. Khavun ulun ngotiak arop doh ahkan nyolong nuk luvang Korajaan Hotalak. 17 Auh Hotalak jok tonulih nuk luvang hukum Taurat mihtik ahkan torjadik. Oluk poh langit khavun duniak niho, totahpik iyam arok icok tihkap pun tahkan Auh Hotalak erih ahkan niho.
18 Iyai jok hindo umbak oruh ah khavun sokavuk umbak bavik bohkon iyok dusak nuk mahtan Hotalak, pongavuk ah erih iyam sah. Khavun iyai kiak sokavuk umbak bavik jok kongindo bosai ah iyok dusak nuk mahtan Hotalak, khavun pongavuk ah erih iyam sah.”
Tindung ulun tahto khavun Lasarus ulun jok malak
19 Khavun Yesus ngajar tindung ihtuh: “Arok icok behtik ulun tahto. Pokajai ah pongok bolehkak, komolum ah mewah khavun iyok bogavik nyinong ondo. 20 Khavun arok icok behtik ulun malax ngarai ah Lasarus, behtiu ah soup buah bahak, iyok kaling donik atop ulun tahto erih. 21 Khavun iyok kanik kuman pahpat jok botohkah tahkan mejak ulun tahto erih. Mohtos asuk lombut ngonyelap bahak ah.
22 Kotihkak ulun malax erih mahtoi iyok turus tonanom khavun omin molekat noku unuk jok ponolehkak donik Abraham nuk surga. Ulik erih ulun tahto erih mahtoi kak khavun tonanom. 23 Nuk duniak ulun mahtoi, ulun jok tahto erih jorak nyangit. Khavun beteng iyok nokarak tahkan anai, iyok nohtok Abraham tahkan macuk khavun Lasarus arok nuk silak Abraham. 24 Khavui ah ngoriak, hiyoi ah, ‘Amai kuk Abraham, masik ah noh ahkuk. Nyuhuk Lasarus, motinyok iking ah noku danum umbot erih lombut nopotih ah noku jolak kuk. Ahkuk jorak nyangit luvang ahpui ihtuh!’
25 Totahpik Abraham marak ah, ‘Nohouk ah anak kuk, kotahin komolum muk ihkok ngonduon paring ah aꞌang jok tamam, totahpik Lasarus ngonduon aꞌang jok iyam pios. Huntuh iyok ngandah nuk ohtoi, khavun hun ihtuh ihkok jok jorak. 26 Umbot erih, nuk holang ihtok uwas umbot tonapak kosik jok isung iyam taꞌai sonyihing, ihkai tahkan ohtoi iyam taꞌai kanan khavun ihkam tahkan anan iyam taꞌai kohtoi!’ 27 Hiyon ulun tahto erih ahkan Abraham, ‘Ngindoi koderih ahkuk nyavot umbak ihkok ahkam nyuhuk Lasarus tulak noku lohpo amai kuk. 28 Arok limok behtik jolahak kuk harik unuk anai. Nyuhuk Lasarus marak idoh, ahkan doh iyam umbak ngomok kojorak kuk ihtuh.’
29 Abraham mutah ah, ‘Uwas arok unuk idoh hukum Taurat jok tonulih Musa khavun dolang nabik. Nihak doh ngomasak ah khavun pahtuh umbak erih kiak.’ 30 Totahpik ulun tahto erih mutah ah, ‘Iyam, Amai kuk Abraham, erih jaham cuhkup, totahpik ngindoi arok icok behtik jok lombut tahkan holang ulun mahtoi tuh noku idoh nai, idoh ahkan botobat.’ 31 Hiyon Abraham ahkai ah, ‘Ngindoi idoh iyam kanik ngomasak khavun nyonih hukum Taurat jok tonulih Musa khavun dolang nabik, idoh iyam ahkan kanik pomarak, oluk poh icok behtik ulun uwas mahtoi hulik bolum tahkan holang ulun mahtoi, marak idoh.’ ”