Tindung mongenai anak domba jok niho
(Mat. 18:12-14)
15
Icok ondo dolang pomungut pajak khavun ulun-ulun bodosa lombut noku Yesus ahkan nyonih auh Ah.2 Mahkak ngomumut noh ulun-ulun Parisi khavun dolang guruk agamak, hiyon doh marak ah: “Ceh, Iyok norimak ulun-ulun bodosa khavun kuman hombo-homboh umbak idoh.” 3 Kotului erih Yesus marak tindung ihtuh ahkan doh,
4 “Ngindoi nuk holang ihkam arok jok tepun solahtus kungan domba, turus ngindoi nuk holang domba-domba erih arok icok kungan jok niho, mihtik iyok ahkan nohtah siyoi puluk siyoi erih nuk lahpang uruk, khavui ngurah jok niho erih nyiring sombang. 5 Khavun ngindoi iyok uwas nyombang domba erih, iyok ahkan nihkas ah nuk isung bahai ah tahtup kandah ah khavui ngoniu ah bulik. 6 Khavun kotihkak iyok uwas dahpot nuk lovui ah, iyok naꞌah dolang jolahai ah khavun ulun jok hokosilak lovui umbak iyok, iyok marak ah: ‘Yuk paring tok havoi ngandah, kotului domba kuk jok niho erih uwas sombang kuk noh.’ 7 Nyonih ah noh! Koderih kak nuk surga nai arok kosenang jok holovik hajok kotului icok behtik ulun bodosa botobat tahkan siyoi puluk siyoi behtik jok uwas pios khavun iyam poduluk botobat.”
Duit jok niho
8 “Koderih kak sopama arok icok behtik bavik tepun sopuluh kobikap duit perak, khavun niho icok kobikap, tetu iyok ahkan ngomolum sumbuk turus mohpas lovui ah, nahtup ngurah ah soup nyiring sombang duit erih.
9 Khavun ngindoi iyok uwas nyombang duit perak erih, iyok naꞌah dolang jolahai ah khavun ulun jok hokosilak lovuk umbak iyok, iyok marak ah, ‘Yuk paring tok havoi ngandah, kotului duit perak kuk jok niho erih uwas sombang kuk noh.’
10 Nyonih ah noh! Koderih kak molekat Hotalak ngandah ngindoi arok icok behtik ulun bodosa jok botobat.”
Anak jok niho
11 Yesus bokesah hinok: “Arok icok behtik jok tepun duok anak bahkas. 12 Hiyon anak ah jok toranan ahkan amai ah, ‘Mai, nongak kuk nai tongai koponahto mik jok uwas jadik bagin ekuk.’ Khavun amai ah pun magik-milah ah dolang koponahto erih, nuk holang dorok paring ah. 13 Arok pirak ondo ulik erih, anak ah jok toranan erih dahkang dolang koponahto ah jok uwas umbot jadik bagin aiu, khavui tulak noku nogara jok macuk. Nuk anai iyok ngohpah dolang uang duit ah, nguan komolum ah jok boraus-boresau. 14 Beteng uwas ohpah dolang duit ah, torjadik noh louk jok punak nyangit nuk luvang nogara erih, iyok pun uwas malak khavui bolouk. 15 Khavun iyok pun tulak korejak noku icok behtik tuan unuk nogara erih. Tuan erih nyuhuk iyok tulak noku umoi ah ahkan ngindoi dolang urak ah. 16 Khavun iyok yamios loui ah sohinggak iyok kanik kuman dolang ukun urak erih. Oluk poh iyok nyangit loui ah, iyam arok icok behtik pun jok nongak ahkai ah ukui. 17 Khavun iyok pun sadar umbak koadaꞌan ah, iyok nuhtui nuk luvang ahtoi ah, ‘Oo nai, ulun-ulun jok korejak umbak amai kuk holovik holeak ukun ponguman doh, khavun ahkuk nuk ohtoi manyo mahtoi haot. 18 Ahkuk ahkan tulak noku amai kuk, khavun marak ahkai ah: Mai, ahkuk uwas salak mbak ihkam khavun bodosa mbak Hotalak. 19 Ahkuk iyam pahtut nai kongohavot anak mik mai. Nihak nyuhuk ahkuk jadik jihpon mik.’ 20 Khavun iyok pun turus tulak bulik noku amai ah. Beteng ah honong macuk, iyok tonohtok amai ah. Amai ah pun lombut asiu ah, khavui nokoruk noku anak ah, khavui ngohavon yok turus ngarok ah. 21 Hiyon anak erih ahkan amai ah, ‘Amai, ahkuk uwas salak mbak ihkam khavun bodosa mbak Hotalak, ahkuk iyam pahtut nai pomarak anak mik.’ 22 Totahpik amai ah marak ahkan dolang jihpoi ah, ‘Ngimos ah ngoniu kohtoi hatik jok paling tamam, khavun mokajan iyok umbak ah. Khavun mosoloh ah kak icok tisim ahkai, khavun mahtuk ah noh sopahtuk noku paꞌai ah. 23 Khavun ngoniu ah noh anak sahpik jok bulat, turus nyombolih ah ahkan tok kumai khavun tok bogavik. 24 Kotului anak kuk ihtuh nanyam ah uwas mahtoi noh, totahpik kolo ah iyok hulik bolum hinok. Davak kuk iyok niho, totahpik iyok hulik bulik noku ahkuk.’ Khavun idoh bogavik.
25 Hun erih anak ah jok okok arok nuk umok. Beteng ponyalai ah bulik uwas donik noh mbak lovuk, iyok nyonih auh ulun jok hotevah khavun bohok doh nginyah. 26 Khavun iyok naꞌah icok behtik jihpoi ah, khavui turus ngisok ah, ‘Ngombai arok gavik nuk lovuk tuh?’ 27 Khavun jihpon ah erih mutah ah, ‘Arik muk uwas hulik. Khavun amai muk uwas nyuhuk nyomolih icok kungan sahpik jok bulat, kotului arik muk uwas bulik umbak pios.’
28 Khavun birat noh anak ah jok okok erih, iyok elew nyolong noku luvang lovuk. Khavun amai ah boluak turus nyuhuk iyok nyolong. 29 Totahpik iyok mutah amai ah hiyoi ah: ‘Uwas botou-toun ahkuk korejak mahto-mahtoi ahkan mik. Khavun iyam alik ahkuk ngolavan poletah mik. Tahpik kotahin ihtuh iyam halik icok kungan kombing jok itot mik ahkak kuk, ahkan hatik kuk bogavik umbak dolang jolahak kuk! 30 Totahpik punai ah kak lombut anak mik jok ngomoros dolang koponahto mik, iyok ngohpah ah unuk ngomayar polacur. Totahpik beteng iyok hulik, ihkam nyombolih anak sahpik erih ahkai ah.’ 31 Hiyon amai ah ahkai ah: ‘Anak kuk, ihkok hicok humbak nulo umbak ahkuk. Khavun paring ah jok ekuk tepui ah erih halik ain emuk kak. 32 Sobenar ah ihtok rih harus ngandah, kotului arik muk ihtuh nanyam ah uwas mahtoi, totahpik kolo ah iyok hulik bolum hinok. Davak kuk iyok niho, totahpik iyok hulik bulik noku ihtok.’ ”